二人東京遊DAY5

朝早梳洗完，落餐廳樓層食早餐，唔洗趕頭趕命食乾糧。

台灣女生叫我上房攞喼，諗住閂門時，見有機械人碌入嚟“Yay!I'm going in! TAKE ME...”

架lift得我同佢，螢幕顯示佢要去25樓。正當諗緊要否幫佢㩒樓層制時，我見25樓個制已著(機械人與電梯連繫?)。“Pardon me, I'm going  out”，目送佢出lift，聽到佢發出好似星戰D2-R2既聲，感覺幾特別。

暫存行李，一喼一袋輕裝出發。貴為CITY HUNTER既愛好者，點都要影吓街牌。

今日既行程係搭巴士去御殿場，兩個鐘唔到既車程，最啱訓覺。

HOTEL CLAD，人家之前同中大姊姐嚟過，賣點係望到富士山，大堂有手機自拍三腳架供住客打咭(用完擺番係角落位就可以)。

Check in上房放低行裝，係酒店地下大堂平台行 一段路，就可以搭lift落outlet。

富士山，可惜多雲，遮咗個雪頂......

話咁快就去到outlet，地理優勢不容置疑。

先去搵地方食晏，上咗food court揀張望到富士山既枱，嚟食鐵板牛扒。

食埋個晏，厚雲都係遮住富士山最頂既位置，都要照影喇，唔係陣間遮到山腰，仲揼心口。

行咗兩個鐘就番酒店，放低戰利品，再落去浸預約好既私人溫泉風呂。

間房都幾大，個池係陽台位置。由於天色轉差兼厚雲，已睇唔見富士山。

雖然唔係自己房有得浸，但都總算唔洗去大浴場。

另一個樓層有小賣部，可以買嘢飲同嗌小食。

隔離就係漫畫區，住客可以攤係度睇漫畫都得。我見到幻法小魔星漫畫，仲搵到當年所見既“色色”畫面。

天陰到落埋雨，係酒店門口借把傘就再勇闖outlet。

最大既收穫莫過於人家既名袋及奶奶既絲巾。

酒店既伙食當然無溫泉旅館咁好，但都唔洗上定晒係枱等我哋到咁誇？

四色剌身，點都好過香港超市買一盒盒果啲。

開胃漬物，食晒唔係因為太好味，係怕唔夠飽。

主食係一人火鍋，坐多陣都見無人上甜品，唯有默然接受。

飲品都無嗌，留番啲錢上小賣部買特飲。

我就一早睇中款相熟啤酒SUNTORY＜香る＞エ－ル ，不過生啤就第一次試～

二人東京遊DAY4

溫泉旅館既朝食夠晒豐富，有洋蔥湯，生果，煎魚，之仲上埋夾雜白飯魚既沙律，燒鮑魚仔，奄列，餐包。

食飽就番入房，享受晨光下既私人溫泉風呂。遠望浪花，近聽流水聲，治癒也。

先係旅館check out同暫存行李，就動身去河津另一邊行吓，藍天下搵到棵櫻花樹。

經過市集，原來咁早都有手信檔開。

台灣女生話要試吓呢個士多啤利，再係另一檔買唔洗雪既wasabi膏。

朝食太飽肚，故今日不設午膳地點，見到有心儀小食就淺嚐。

呢棵櫻花樹吸引唔少遊人駐足影相，人家覺得佢好似心型，所以搵咗個有利位置嚟自拍。

唔.....勉強都可以話係心型，大細邊囉。

行行吓見到有蜜柑特飲甜品小店，大家都係飲生搾りみかんジュース，不過我果杯係燒酌割り。

隔離有蠔檔，蠔殼堆有生蠔bb公仔，幾搞鬼。

每人一隻蒸蠔，食完就要趕番去攞行李去火車。

驟眼望落去，真係分唔出2004定2024年，車站無螢幕，只有一幅幅彩色既廣告同告示牌。舊款列車上既LED顯示，頂多係平成時代既提示。時間彷彿停滯了，正正係鄉郊既共同點。

番到新宿，係商場行咗陣至番酒店，人家買咗個MACARON食。

夜晚我哋去咗蟹道樂食，畢竟結婚旅行既北海道蟹道樂食蟹刺身係情意結。

食餐係抵食，但最緊要係啲嘢啱食。

蟹刺身頭盤，真係無得輸~

燒鱈場蟹腳，諗起北海道既初嚐回憶。

人家鐘意食火鍋，正正呢個餐包咗個蟹肉shabushabu，連個鍋都係蟹形。

壓軸既碳水化合物，以壽司形式呈上。

埋單後落樓下，同個招牌合照。

由於個餐既份量適中，所以番到酒店可以享用商場買既冬甩作甜品。

人家繼續MACARON主題甜品~

二人東京遊DAY3

朝早係酒店食過早餐，好想訓多陣，好有衝動唔去新宿御苑。多得台灣女生既催趕，先至有動力出門。

<<言葉之庭>>既擁躉，卒之可以親自入閘口。

除咗朝聖，揀嚟呢度係順便賞櫻，人家拎出自攜既自拍神器。

色水同細緻度當然無我部A7iii咁好，就算唔係最新model都夠輾壓Xperia 1 V。

Flip 5既一千二百萬相機都真係唔太夠用，勝在自拍夠晒方便，希望Flip 6係會有大提升。

附近有本地人及外地遊客嚟打咭，我哋都要就下位兼等一陣。

人家不時用我部機嚟度位，睇吓邊個位置同角度有利。

又一張人家出手既作品。

平時少外影，所以我都係邊影邊睇效果，再補影，隨心既平庸之作。

直覺認為呢個景係<<言葉之庭>>出現過。

上網睇番，原來只係類近，唔係一模一樣。

日式庭園，點可以唔影吓石雕?

重要戲份地點，男女主角初遇兼每個雨天既相聚地。

"隱約雷鳴，陰霾天空，但盼風雨來，能留你在此。"

"隱約雷鳴，陰霾天空，即使天無雨，我亦留此地。"

一如動畫既寫照，苑外既高樓建築會係某啲角度出現。

如果我係住當地既話，唔知會唔會久唔久入場睇實體書呢?

行番去車站附近既商場LOCKER攞番行李，跟住就搭3個鐘頭鐵路，去今晚既落腳點-河津。

人家揀呢架火車，係為咗佢有餐車卡午餐輕食作賣點。

細個睇唔少西片，見火車有餐卡可以食飯，卒之可以體驗吓。

菜式簡單，除咗餐包之外，主食就係。平時只係食室溫既便當，而家有得熱葷，仲要可以望住個海添(人家上網刨攻略，校啱時間可以望海景)。

甜品我揀咗MANGO CHEESE CAKE，仲要有藍莓，正~

人家揀咗野莓撻，太過的骰。跟甜品上既細支裝Rotari Brut意大利sparking wine(187ml)味道一般，純儀式感。

嚟緊有機會既話，我都好想搭瑞風可以係火車上沖涼訓覺，體會流動酒店。

溫泉旅館位於海邊，我著緊既羽絨褸，仲係2018年聖誕著去去北海道旅行果件。

呢間溫泉旅館既賣點，係每間房都有半露天私人溫泉浸池。

坐係度望唔到海，但可以曬吓太陽望天放空，可惜我哋無咁既閒情。

陽台用相機天涯鏡捕足浪花激濺。

每間房都有唔同既名作識別，比數字多一點意思同溫度。

輕裝出門時已經四點多啲，太陽都準備落山。

二月係賞櫻季節，但今年既櫻花係早開，低頭望見既粉紅色，比抬頭望到既多。

相比遠攝，近攝會比較多粉紅色，但睇得出近半既花瓣已經掉落。

如果樹梢上既櫻花豐厚啲既話，牌上既文字會更有詩意。

沿河邊有唔少遊人駐足影相，見地圖話附近有個神社，可惜無開門。

遠景一望，其實仲有櫻花既樹只佔小數。

咁啱見到有隻雀係櫻花樹梢上。

開始天黑了，動身行番旅館。

行到海邊，人家又忍唔住話要影吓海浪。

晚餐揀咗係早食(18:00)，前菜已經有燒蝦食。

每次都會為溫泉旅館既菜單影相留念，因為每道菜都係精緻既作品。

隻燒蝦都唔細0架，面濶都無佢咁長。

日式料理，人家偏愛配清酒，都唔記得佢因邊次既經驗而起。

刺身夠晒鮮，有真山葵俾你即磨成泥蓉，仲要有香港少有既龍蝦刺身添。

人家即席示範，味道係完勝一般膏狀既WASABI。

SHABU SHABU金目鯛。

無和牛級數既国產手陶板燒，如果大塊啲就好了。

熟食金目鯛，大家都好飽，集中食魚背同魚尾。

和式美點雙輝-茶漬飯。

甜品作結尾，成個餐既份量未至於食到滯，但番到房係完全唔會諗食宵夜小食......

享受地埋VPN睇日本NETFLIX既VIVANT，等夠鐘落去預約既私人風呂。

環境唔錯，有日式庭園feel。

可以一齊浸大池，又可以分開一大一細，番上房又再浸過。