屋企有個大雄(野比のび太)

台灣女生幫幸男間房大整頓，竟然係眼葯水存放位置既深處，搵到一份上年F.1既普通話功課。

呢一刻我諗起<<叮噹>>既情節，大雄媽媽搵到大雄零分既試卷。雖然唔係測驗考試，但睇得出幸男悉心既隱藏。

Initial D

扚起心肝由第一集頭文字D睇起，因為台灣女人生大傷風（臨訓前常咳），所以我會笠住個Px7S2，望住個平板，確保眼訓到唔會被咳醒。

當年我只係同德輝表叔豆姐哋係戲院睇真人版電影，原來電影版既人物橫跨3個季度，劇情都有所改動。

之前同幸男每星期追既MFゴ－スト，今年會有第二季，所以順便當溫下書，睇吓男主角片桐夏向既師傅（藤原拓海）當年有幾猛~

PS:當年Initial D紅極一時，無睇過動漫既我，都被其CD歌集所吸引，係信和地庫（電梯口,echo隔離既“特賣場”）買咗隻CD，仲記得<Remember Me>及<Make Up Your Mind>，<Night Fever>……

重遊龍鼓灘兜風

今晚約咗阿基一齊出車(我屋企村口牌坊集合)，話晒佢已摸熟新座駕FORZA330既脾性嘛~以前經常去既BBQ場流星花園不再後，已好耐無入龍鼓灘了。

海邊行人路多咗照明街燈，受惠於智能電話既夜攝能力提升，以前數碼儍瓜機影唔到既夜景，已變成能力範圍內。原來多咗個公廁同藍球場，係我同BURGMAN 150及SKYWAVE 250無既記憶。

回程前將兩車並排合照，基耶為FORZA換咗長風擋，當堂多咗一份巡航感既穩重。

PS:要留意吓電單車上渡輪既event

BANG BRAVERN

繼<<呪術廻戰>>後，<<勇氣爆發Bang Bravern>>已成為我每個星期五既期盼。懷疑已久既合體情節，卒之都出現。

原來之前BRAVERN係房砌既模型，真係用嚟合體用(自己裝備自己砌)。

合體後，好似係大大個徽章掛係心口。

飛機頭變褲頭，小腿篏入推進器，膊頭加厚甲，背部孭雙炮，感覺無純BRAVERN咁靚。

PS：合體無咩大突破性，睇嚟可以慳番唔洗買玩具……

黐餐變慶生

原本今晚番老家黐餐，點知原來今日係老媽農曆正日生日，好在有手信，瞬間變生日禮物。

之前都知老媽生日在即（西曆2月），但見大佬健未有通知約日子食飯，故不以為然。Whatsapp大佬，原來佢都唔知兼番咗大陸出差，唯有再約一日出去補食一餐。

二人東京遊DAY6

晏晝又去番尋日FOOD COURT果個位食，今日就只係見到個雪頂，我揀咗個富士山ローストビーフ丼(Roast Beef)嚟攞景。

食完晏出去戶外位用A7III影番張相先，要點先可以同尋日果張合番埋完整既富士山呢?

二人自拍，山頂白雪完全融入雲海之中，變相好似無忽富士山睇到。

繼續逛outlet，下午茶買coffee float。

之前旅行既outlet活動，都係一家三口都有收穫，尤其係買衫俾幸男（小朋友大得快）。

午飯前，我哋係CASIO睇中咗隻錶買俾幸男，話晒都中二，無謂仲帶住BABY G。上網search吓，原來深水埗都係賣差唔多價，唯有當佢係到時話無貨……

番酒店攞行李兼等巴士時，見到有呢張完美既富士山陳列照。

重回新宿，JR站外見到有Suica企鵝銅像，影低send俾幸男。

晚飯前既行程，就係去HANDS幫幸男買文具兼最後shopping，再搭鐵路去酒店放低行李。跟住google map行，我要分兩轉抽住個喼落樓梯，事後發現原來有另一邊路唔洗行樓梯(已中伏)。

晚餐係食出名既壽喜燒店享用，要搭鐵路去。有獨立包箱(唔係間板木)，好似<<半澤直樹>>傾商業秘密。

我幫人家揀咗支細既rose氣酒，我就例牌生ビ－ル。

人家book枱時已揀好套餐，樣樣都啱食。

臨尾我嗌杯燒酌-天使の誘惑，店員姨姨提我留意酒精濃度。“大丈夫，わたしはウィスキーラバです”， 瞬間以笑聲消除隔閡。

 見到呢個合格祈願，即時諗起幸男~

行行吓聽到有當地人街頭busking色士風，同其他當地人一樣駐足欣賞，之後竟然係吹<<Careless Whisper>>，好在無走度啫。雖然中間有甩咀，但都好滿意同欣賞。佢有個打賞箱，我上前投入紙幣。"あくしゅ?"，可能太直接，當事人窒一窒至回應到呢個外人既握手同笑容。

落鐵路行番酒店途中同A7同事視像，因為今晚佢哋搞聯歡撞正我去旅行，番到上房再視像傾多陣。

PS:聽朝就要晨早5點起身check out，趕搭鐵路去機場lu