簡簡單單玩BANG BRAVERN

 

上網睇過TAKARA TOMY既BANG BRAVERN實物介紹，兼同Good Smile作品之比較後，極後悔無去動漫展買會(有多兩把透明綠劍)，於是係Carousell搵咗隻。

可能太少眾兼隔咗一年至出商品，唔多地方有得買。開盒一板睇晒，武器唔齊全，無絶招既透明綠配件，亦無合體後既バーンツインランサー(Bang Twin Lancer)雙頭茅。

雖然TAKARA TOMY較多螺絲外露，但我又唔太介意，反而覺得有重拾兒時玩玩具既感覺。另外，佢原色既膠件既處理手法，令我省却刮花甩油既擔憂。

之前GOOD SMILE出過一隻BRAVERN，但稍嫌佢為就合體比例，令載具形態兩側(小腿過)過長，失去整體平衡。

砌埋隻Bang Dragon ，撇除雙炮外既空隙較大之外，整體外型不致失衡，機頭(跨甲)比例無Good Smile既換突兀。

PS:簡單既變形，令我比以往更勇於開箱試玩。

23代手提電話之收機中SAD

朝早順利收新機，順豐無送錯貨，今次無咁多淋糝嘢送，反而無咁煩。

上次Flip 6係買官網限定色(白)前都有去睇陳列機常規色，今次齋係YouTube同網圖就落單買藍色，好在實物都無相差得遠。

收埋HKTVMALL 貨，用新線嚟叉電。

一心黐好外芒貼先，點知揀過機設定畫面時，發現原廠跟機既內芒貼上方左右角疑似有裂位。晚飯前去yoho既三星店問，職員叫我問網店專線睇吓有無得成部換過。Send埋機去客服WhatsApp，一如所料只係話會安排到samsung專門店換新芒貼，但日期未知(新到未有貨)。

晚飯係相熟酒樓享用，幸男遊學團前兼外母小病後既聚餐，希望幸男外遊順利兼外母大人身體健康。雖然我出去買半支裝紅酒時有小插曲，但總算息事寧人~

手機Profile更新:
1st   Ericsson PF768                >黃色 sunday
2nd  Boch 909 Dual                 >灰色 people
3rd  Siemens A40                     >藍色 orange
4th   Ericsson T29                    >銀灰色外殼,紫色panel one 2 free
5th   Ericsson T39                    >灰藍色 one 2 free
6th   Sonyericsson T300          >紅色(紅豆) smartone 
7th   Sonyericsson T630          >黑色 smartone
8th   Nokia 6260                       >銀色 smartone
9th   Nokia 6270                       >黑色(深啡色,鋁金屬外殼) smartone
10th Nokia 6500 Slide             >銀色(鋁金屬外殼) smartone
11th Nokia N86 MP                 >白色 smartone
12th Nokia N8                          >橙色(鋁金屬外殼) smartone
13th Sony Xperia P                  >紅色 nwmobile
14th Sharp SH930                   >白色 nwmobile
15th Alcatel One Touch Idol X >黃色 nwmobile
16th Alcatel One Touch Idol 3 >灰色 Sun Mobile
17th BlackBerry DTEK 60       >鈦灰色(玻璃背面) Sun Mobile
18th Nokia 7 Plus                    >黑色(玫瑰金色金屬邊框) Sun Mobile
19th Nokia 9 PureView           >藍色 (反光夜幕藍)Sun Mobile

20th Sharp Aquos R6              >黑色 Sun Mobile

21th Samsung Flip 5               >藍色 Sun Mobile

22th Samsung Flip 6               >白色 Sun Mobile

23th Samsung Flip 7           >星塵藍色 Sun Mobile

為揈而揈既4DX體驗

對上一次入戲院睇同一齣戲兩次(二刷電影)，已經係Slam Dunk日文同粵語配音，今晚應台灣女生所求睇4DX版既F1。呢張相其實係用MIRROR既方式edit過，因為我哋企係4DX牌自拍影唔晒，於是係對面塊鏡嚟影對面既倒影做背景。除咗IMAX版，4DX版都係場場都爆咁滯，所以上星期要吼實預售一出就網上買飛。

近呢兩次睇既戲都係IMAX版，顯得今次個SCREEN好細，加上望落個場有啲殘。張櫈好硬又唔貼背，4DX動感體驗係無咩必要，抖動會令觀眾無法可以看盡畫面細節及運鏡。用擺動令觀眾感受轉向係OK，但F1架車無埋由避震差到係咁震囉(唔係科幻片炸到七彩)，炒車既抖動就合理既。椅背兩側既噴氣有啲無謂，炒車意外既情節，銀幕下方兩邊會有煙霧助興。

散場等巴士時已經係十二點，好耐都無試過咁夜仲係條街度。

暖男版Superman

由Marvel遊走到DC既James Gunn，繼The Suicide Squad(2021)，Peacemaker(2022)，今次係重啟Superman。

原本我想出去iSquare睇IMAX，但由於幸男唔想出咁遠(佢話網上評價好兩極)，所以明知個Screen有花痕都係Yoho My Cinema睇。

由第一代彩色電影(1978-1987)一連4集做主角既基斯杜化利夫(Christopher Reeve)

到2006年重啟失敗既Superman Return既Brandon Routh

再到對上一代(2013-2017)Man of Steel系既Henry Cavill，相信大家都係傾向絶對力量既Henry Cavill多過繼任既David Corenswet。

我本人覺得今次David Corenswet係TV版Supergirl裡面既超人(Tyler Hoechlin)既延伸，陽光笑容多一點。

貴為暖男Superman，有唔少溫柔既畫面描繪，例如以身軀保護女童，拯救松鼠，不忍殺掉破壞城市既巨大外星生物，甚至無對重度傷害佢既Lex Luthor執行私刑。

今次重啟，省却成長情節。一開始就講超人已經出道一段時間，而且同期有Justice Gang係Metropolis市幫手維護正義，令故事唔會太過單調。

唔少老Fans嫌今代Superman既設定被弱化，超人唔應該被打到焦頭爛額，但我睇完之後有另一種體會。有別漫畫當時既年代，AI，流動網絡，無人機及演算法，將超人既神力優勢收窄，更重要既係對手Ultraman根本就係超人既複製人。

複製人橋段已係超人4：超人決戰核能人用過，另外Pocket Dimension失控亦同Superman Returns裡Lex Luthor用Krytonian crystals造新大陸引發既災難相似。

全卡片無咩悶場，中途有唔少輕鬆位(未至於太over)，例如Lex Luthor既女伴，更無諗到佢會成為揭穿陰謀既重要人物。

總結：擺脫沉鬱既氣氛，開心輕鬆咁睇完一齣節奏明快既英雄片，但缺失咗張力及氣魄。

落重本復出

幸男今日自己出咗去旺角買波boot(自己儲落既私己錢)，因為掛靴果年既舊boot已爛。

當初仲擔心遊學團會影響佢去選拔，好在趕得切出發前完成新U隊既選拔，兼且順利入季前訓練(練到擘口)。

希望幸男會珍惜失而復得既機會，其實我同台灣女生一直想佢可以係喜歡既足球上，學會團隊相處同合作，以及應對解難，最重要係朝向目標甚至夢想前進既韌性。

收貨，緣聚舊，住家西餐

朝早11點鬆啲就收到City Super既送貨。

今次既重點係韓牛，好耐之前市中心AEON超市買過一次，可惜之後就無再見到。

出村口食過茶記就騎愛駒去紅橋買下午茶俾老豆，點知巧遇Andrew。送完外賣兼問職員文件事宜，就同舊同學去附近食下午茶。

帶定個保溫袋兼冰種，順利係OK搵到幸男至愛既芒果雪糕，順便買埋榴槤配山竹既雪糕俾台灣女生試吓。

韓牛無日本和牛咁膩口，肉質同油脂比例令我可以盡情享受份量感既蛋白質。

PS: 回程攞車時，見到有女騎士泊車，遠望以為係REBEL，原來係KAWASAKI既ELIMINATOR 500。巡航車既引擎兼喉聲，勾起學車時既回憶。

韓風凜凜

幸男今日出去剪髮兼做壓貼燙，入屋一刻令我同台灣女生驚訝，如果係街度行過，我一定唔會諗到"I'm your father"。

即時諗起走廊相架裡其中一張相，兩歲唔夠既幸男，訓醒個頭亂到好似CD封面造型。

假日司機

同番晏一樣，放假都係貪近行過球場，去花炮會附近既茶餐廳開餐。番到屋企成12點半，見幸男啱啱至起身梳洗，話番1點半，於是提議TMAX送番學(好耐無送番學，平時頂多係番嫲嫲家黐餐坐後座)。

一點唔夠就係安定商場附近落客兼落貨，自己就慢慢塞番出去。撞正胡小放學時間，諗起幸男同自己小學既回憶。

PS: 回程係燈位跟住係架汽車運輸車，視覺上好似Batman :The Dark Kinght Rises用佢嚟做跳台行shortcut避塞車一幕。

F1 THE MOVIE-IMAX

今晚約幸男去iSQUARE睇18:40場次IMAX版F1 THE MOVIE，不過一家三口係分別出去。台灣女生出尖沙咀剪髮，我就早更過後番屋企泊好愛駒搭巴士出去會合晚餐，幸男就放學係區內食埋嘢再直出戲院。

開場甚有TOP GUN既feel，不愧為同一個導演。第一場比賽係Daytona賽事，鏡頭運用已經好似打機Replay咁。之後既F1賽車主線，係睇直播以及後製紀錄特輯NETFLIX Formula 1: Drive To Survive都未呈現過既新視點。

故事講男主角Sonny Hayes受老朋友Ruben Cervantes所托，去拯救上大半季失利(包尾)既F1車隊Expensify APXGP。任務為餘下9場賽事內上一次頒獎台(三甲)，否則車隊會被董事會賣盤。典型老手帶新手兼傳承既橋段， 加上近年Formula 1既經典戲劇性事故(2008新加坡Renault自撞，2018阿塞拜疆Red Bull同隊亙撞，2020巴林Haas車手炒車著火)，令劇情多一點真實性。另外，被敵隊投訴賽車違規既家常便飯，變咗係管埋層捏造部件違規既賣盤陰謀。

全場無咩冷場，導演巧妙地將維修團隊及工程開發部支線滲入主線。最後一戰既紅旗，完美呈賽車場上既致勝元素，賽前開發及準備，Pit Stop團隊表現，伴隨時機既策略部署，以及最後既車手發揮。

散場時聽到有女觀眾話好似睇NETFLIX Formula 1: Drive To Survive，無諗到會咁受女仔歡迎。男主角既原形係Martin Donnelly，既好多影評反駁話計落去Sonny Hayes會係60歲，但我覺得如果將Sonny Hayes設定係70年代尾出世，意外時係出道無耐既22歲金童，以四十中既歲重返2023年F1的話，應該會合理多一點。

散場時已經係21:20，即開平板配FLIP 6既hotspot睇奧地利分站正賽，已經出過紅旗兼有選手退賽。"It's all just noise"，呢句對白好中我呢個中佬既心。

以人家第二日要早番為理為，call的士飛番屋企，三個人一齊係後座睇直播(搭巴士要坐最後兼唔可以播聲影響他人嘛)。

番到屋企，仲有18個圈可以炸住soundbar嚟睇，去雪櫃攞啤酒先~

PS:原定係一家三口去戲院打咭位合照，我著白色BMW既POLI恤，人家著黑色FERRARI既POLI恤，幸男著灰底橙車McLAREN既T恤。由於太趕時間，幸男又換衫，所以未能完事......

ITVX

今晚用VPN扮係英國，download ITVX app落平板，一心睇免費波。無諗到個app要入埋post code，好在我醒起我有德輝個地址，順利輸入曼城code。

PS:睇廣告時真係好似舊年去咗英國旅行既feel。

趕打風前竣工

補鐘早收工趕番屋企，因為要趕大雨前換埋最後一盞戶外壁燈。舊燈組既慳電膽已舊到唔著，所以早幾日扚起心肝去華都配LED燈膽x4，兼係九記買玻璃膠。

14年既勞役，底座既膠邊已被曬到以粒狀剝落。記得18年裝修時換過一次燈膽，相信今次會係最後一次換，下次要成組換至得(底座會脆到碎晒)。

上網搵過防水戶外燈具，無咩款之餘，又唔太靚。市道唔好，貨品既選擇變得單調，大家都係用到就算。再唔係就用X宝貨，唔著火漏電就好了。降級兼降質既消費，令人無奈。

幸男考完試，夜晚番老家黐餐，每次都享受被照顧既用餐。

PS:原本諗住換PHILIPS既可變色既LED戶外燈具，但嫌out budget同太舊，所以至搏一搏挑戰脆化底座......

奄尖又眼利

尋日係大佬樓下交收既INART蝙蝠俠，今晚就開箱。整體造工唔錯，但稍嫌腰帶要就位遮擋腹部底與盆腰既空隙。

另外腹肌外甲既位置，好似太大幅，未能係腰帶之上收尾。對比番劇照，主幹少了原有既修長。

大腿上提極限為90度，勉強可以單膝下脆。

豪華版既吸引之處就係呢個Bruce Wayne頭雕，真係幾靚。

訂購送既特典就真係唔送好過送，廉價版既Hot Toys Batman Armory，雞到好似細個買既老翻特攝英雄貼紙既質素......

PS:今日同台灣女生一齊睇黑執事時，一眼就認得出朗格名錶~