維港遊

今晚我同台灣女生做咗跟團既大忌-遲到!E MAIL指示，係尖沙咀天星碼頭上「世星號」遊維港，點知搵極都唔見7號碼頭。走去問遊客中心，"7號係中環喎"。預遊一次維港，先搭一程船過對面海，成功壓線六點半多啲登上「世星號」......

當初人家話香檳任飲，原來只係生啤，白酒，紅酒，烈酒(vodka/gin/rum)，CHATEAU HIGHBALL(vodka梳打，gin梳打同whisky梳打)及果汁。Refreshment就係火腿片，肉腸片同芝士，其他冷盤西餅小食係得手指公頭咁大(侍應生一碟遞過嚟俾你隨手攞)。

最遲上船，船艙內既枱已無吉位，唯有係半戶外既大梳化位同老外搭枱。我同人家講，屋企由我揀既兩舊水紅酒都好飲過佢。

船頭甲版有DJ打碟，唔少人自拍打咭。

顯得船尾比較清幽，我哋將SOGO戰利品同背囊放係搭枱既大梳化角位。

拎番部A7III出嚟試影，好在係帶咗支F1.4 35mm，大光圈至可以抗衡低光。

自拍都要用埋閃燈(螢幕打光)，先至唔會黑口黑面。

平時係岸邊就影唔到呢類構圖，唔知平時遊客搭果啲維港遊既遊艇要幾錢呢?

原本有少少抱怨座位太緊絀，但遊船河望住夜景吹海風先係重點。

定焦鏡下，再用16:9嚟crop出新香港下既維港照。

唔經唔覺，咁就個半鐘埋岸喇~希望有機會可以一試汽車渡輪，同TMAX遊船河。

落咗船，係碼頭邊為「世星號」留倩影。

入夜後見到唔少Halloween既打扮，最意外係有隻小異形出現係地鐵站~

荃灣廣場-兩小時放題

今晚約咗外母出去荃灣廣場，食極上大瀛喜既放題。由於得兩個鐘時間，無咩時間影嘢食相。食完飯，見仲有一個鐘，逛埋LOG ON同H&M，結果都係人家係studio CLIP有收穫。

經天橋網絡行去搭巴士，見到有美式囚犯衫既電單車隊。

行咗大半係九巴APP睇班次先至發現，昔日既66M總站已經變咗第三個站。反而荃灣廣場附近既如心廣場，先至係真總站。我哋係轉車站轉車，外母就搭到番總站。

人家網上訂購既頸巾，幸男話似我果條粗用毛巾。諗落隻色又幾似，於是拎出嚟拼吓，忍笑合照。

PS:無屯門公路巴士轉車站，當時唔少人會係市區搭地鐵到荃灣再轉巴士去其他地區。荃灣巴士總站有好多熟食檔好熱鬧，俾轉車既打工仔或準備回家既巴士客醫肚，而家就只剩下吉舖或冷清。明白點解日本舊一代人喜歡昭和時代，因為努力係回報及幸福既保證。

住家大閘蟹

台灣女生中午約咗朋友出街聚餐，順便買餸番屋企煮。

今晚既重點係大閘蟹，幸男好滿意今晚既食材，人家話佢揀既係6両重。

呢隻係最多膏既效果，一包包附送既蟹醋味道都唔錯。

晚飯後拆埋隻新.幪面超人出嚟玩，無諗到件大褸內藏屬線，方便屈山飄逸既造型。

攞車變遊車河+足球觀賞+購物

今日帶埋後座頭盔，相機兼油缸袋，同台灣女生搭巴士出去太子接番TMAX。找埋條數就直接去大埔睇幸男踢波，金山郊野公園附近見到有馬騮橫過大埔公路，有驚無險到達。

原定13:30到埗，因出車前搵廁所兼臨尾行錯一個路口，所以遲咗15分鐘。好耐無用相機影運動，手忙腳亂之下，ISO無set到auto。幸男依舊唔多望向鏡頭，況且定點坐係場邊，影唔到太多滿意既相(入波都睇唔真)。

我同人家先坐TMAX番屋企擺低相機，再出發去東涌買衫。幸男啲衫開始唔啱著，所以主力睇運動品牌服飾。之後再去睇鞋，我係GEOX貪折上折買咗2對，人家就CLARKS買一對工作坊鞋。人家係FiRE BiRD訂咗枱食晚飯，一望裝潢咁似和民既?原來係同一集團，不過菜單就偏向居酒屋。臨回程前，人家係Chloe睇中咗個番學用既袋，快閃價4折，滿載而歸。我孭住背囊，人家要攬住個大紙袋嚟坐TMAX。

YAMAHA攞車時，店員話如維修後有咩問題，一個星期內會跟進。今日行既距離，已經超過平時一個星期既里數。8月check車換油時換皮帶同電池，貴在零件。今次車身不尋常振動兼雜聲，原來係水冷泵有滲漏。順便換埋極力子片(原本諗住12月換油至搞)，手工佔比高過上次維護。

PS:唔經唔覺，唔多出車，咁就7年，希望TMAX可以陪我行足12生肖。

大假的星期日

好耐無試過實時係電視睇節目，今次仲要係睇幪面超人ZEZTZ。

以前睇電視節目，一係跟住時間表即時睇，一係用VHS預校時間錄落錄影帶。

嘉耀係藍地等我一齊食茶記，就上我度動手裝機。新電腦細部好多，如果唔係舊機無力上Win 11，咁就可以慳番七千幾。反正都只係打blog同上網，有諗過平板配keyboard就算，但又用唔到2.5吋外置hard disk。買4k芒既notebook又貴，結果揀ASUS既Mini PC。

夜晚入咗元朗既再來一煲拎外賣雞煲，屯門店有不愉快經歷嘛。

回程時愛駒震動好大，好以前轆沙版附近有嘢卡位果重震動，仲要有雜聲。上到高速公路好似好啲，轉數同速度係有啲落差，唔通又係極力子片到期?但上次純動力上不配合轉數，無今次咁嚇人既震動。番到屋企，再次撻車，發現兩側比平時多熱風吹出，照理行完高速巡航，理應無燈位咁熱。攤咗陣車頭，再試兜去藍地惠康買嘢，又無再出現異樣，都係聽日打去約check車至安心......

老家做八月節

 

今日提早送出生日禮物俾幸男，照原定計劃用舊書枱嚟組裝。幸男當然開心，但未能做番出手制既時間......

其實份禮物係我尋日至係price.com搵到間舖頭買，轉數快過數，安在家中等即日收貨。揀呢款入門級別，除咗睇budget之外，更重要係幸男都只係AT車手。

夜晚番老家黐餐，每年屋企都係一餐過，中秋兼我農曆生日飯。Flip 7既自拍係無得輸，搵個紙巾盒楝高佢就搞掂。

幸男做代表吹蠟燭，今年就15歲喇。

每次經過村口油站都會勾起回憶，讀書，training，初出茅廬，學車買車，壞車推車……Burgman 150同Skywave 250都有嚟入過油，TMAX就一次都無。

另一份提早送出既禮物-B&W Pi8 McLaren版本。

台灣女生用咗幾年既Pi7一開降噪就沙沙聲，拼埋至發現今代既叉電盒細咗個碼。

PS:人大咗，每次番老家黐餐都係開心同珍惜～