夜步元朗

夜晚一個人係元朗搵地方食飯，經過一人前拉麵，原來仲未執。轉咗5天工作後，都無機會收工入元朗食下午茶。可惜無位，所以過門而不入。

行吓行吓，經過以前training時代，坐阿強車入元朗飲夜車宵夜既舖頭。

原本想搵拉麵食，去到飛丸見係雞肉，於是放棄。咁啱附近有間蛋包飯，見有生啤賣，所以入去頽食。

小店食客唔多，計埋我至3枱客。細望下，原來當年小儀同金剛有嚟過做節目介紹。

霜燒牛柳薄切($148)-牛肉沙律，當初一心求其食啲蛋白質配杯生啤，出奇地愈食愈開胃。

諗住嗌辣酒砂鍋煮東風螺嚟佐酒，可惜無螺，所以轉咗穌蠔鍋。

PS:其實原本經諗住去市中心既百老匯買SONY REON POCKET PRO(電話問過)，點知臨出門時被通知最後一部都被walk in客買咗。打去元朗分店問，仲有一部，所以動身搭輕鐵去買。

兜熱風

肩傷初癒，今晚同阿基出車兜熱風，近近哋去咗浩和街。放低愛駒就行去提邊，但先要穿過大草地。

雖然係熱風，但總算未係30度既晚上，自攜既凍飲足夠降溫兼補水。我哋左邊係一班後生既嚟慶祝生日，有晒LED燈。期間有個男仔行埋我哋度問有無火，可惜兩位非煙民未能幫忙......

同欣澳一樣，有唔少車友嚟聚會，私家車同電單車都有。攞車時驚見巡邏車駛過，急急行番去泊車點，好在平安無事。

PS:夏天除非必要代步，兜風都會揀黃昏後。

初夏住家戶外燒烤

 

今日台灣女生要遲番，見日頭有少少天陰，夜晚無咁熱，於是提議捉緊初夏既尾巴，戶外燒烤~幸男摷雪糕食，於是早少少透定爐，燒住等人家歸隊。

齊人合照，今晚有F1練習賽，邊食邊睇。

食材係我晏晝出市中心DONKI買既，貪夠方便。

除咗蟹蓋，今次仲加入燒蟹腳既新意，浸完包裝既汁再燒會好過乾燒後醮汁，兩母子話下次可以再買~

食材8舊水左右，屋企食勝在酒水多樣。

每round都有尊屬杯，生活品味~

平時花園用兩個蚊香，今晚就用3個，火車頭放係燒烤枱下方，大家都無被蚊咬。

PS:順路兜去V city既CD Warehouse買咗風都偵探既電影版藍光碟，搵日約埋占兄康楠嘉耀一齊睇。

Hans Zimmer Live In Hong Kong

今晚係市中心等台灣女生放工再會合大佬，食過拉麵當晚餐就搭的士去亞博，趕19:30開場既Hans Zimmer Live In Hong Kong。

一入到館內就聽到廣播，呼籲盡快入場就座。大佬等埋阿嫂至入場，我先同人家嘟QR code入場，因為職員話場內既女廁唔洗等咁耐。

香港站只演一場，睇落座無虛席。

場刋都無本，單靠耳聽，有Wonder Woman同Privates of the Caribbean。有一段唔熟，估係Gladiator。女聲巨肺既和音，為Wonder Woman主題段注入澎湃動力。

台上有唔少女表演者，最搶目既莫過於NORIKO，感覺似以往組合-BOND既風格。有所期望既Dark Knight段落，反而無咩驚喜。

最滿意既莫過於係Interstella，直綫既燈光完美呈現戲中重力Vector(向量)。重新既編曲，加入女高音兼空中絲帶表演，令Interstella由感人與壯麗共鳴，添上美感與詩意。

壓軸既Encore由007既經典Theme配上大spot light將觀眾情緒推上高位。最後以INCEPTION既Time讓觀眾沉澱，作為夢境(Encore)拉回現實(散場)既轉折。

Hans Zimmer向眾表演者致謝，觀眾以起立及掌聲向台上致敬。

散場太多人，call車都入唔到嚟，於是搭機鐵(人潮管制分批放行入閘)去機場，駁搭的士番屋企。

PS:的士勁一陣臭噏味，我同人家坐後座見到有蚊香爐(金屬飛碟型)，大佬話前座見到有飯煲......

區內母親節

每年都係代收花(一係閒日，一係收花者外出)，今年就可以帶台灣女生出去球場尾收花。

其實紮花都係三日前去跌打時至醒起，入到個網站見得番個零鐘就cut單，邊行邊急住揀花款同諗message提字，再用笨拙既指頭輸入資料。

幸男有同學嚟做project，但都叫咗佢出嚟一齊影合照。我話呢個方向係背光，人家係話無問題，結果都係要再係電話執吓，至放上社交平台。

夜晚近近哋係鋒哥廚房食雞煲火鍋放題，人家鍾意打邊爐嘛~母親節正日爆場，我尋晚至打電話訂3人枱，好在仲有枱啫，如果唔係都唔知食咩好。人家滿意火鍋配料有海鮮，因為雞煲後揀咗椰子雞湯底，變相無位可以嗌多啲配料。

番到屋企，拎埋幸男買既蛋糕同朱古力出嚟擺拍，希望年青人可以學會𡃶屋企人多啲。

PS:書房都有擺拍，拆埋把"戰神寶劍"(ATV詮釋)同個"旋轉光速刃"出嚟，幫金剛戰神擺POSE。

金剛戰神

番P前成功收到SF速遞，兒時既遺憾卒之得到按撫。當年只有玩過老豆執番屋企既被棄版，獅子手腳殘缺之外，黑獅子背部既紅翼有一邊斷咗。

包裝用類似初代超合金既發泡膠，配透明窗紙。不愧為香港品牌，懂得賣情懷～

一如初代POPY合金，5獅子為遷就合體比例，頭身比例係怪怪的……以現今比例美學故然係唔達標，但懷舊味十足。

相熟既合體程序，只係黑獅子既前腳收納比元祖版複雜一啲，大合體後既比例近乎動畫。

ACTION TOYS版可以將獅子既腳仔換上遮醜版(遲啲得手至試)，完美呈現動畫既乾淨感。

大髀位有番合理既長度，頭部亦無咁濶大。我覺得定位係懷舊玩具上既適量現代化，又話者係以現代工藝，去填補當年玩具與螢幕造型既違和。

ACTION TOYS版除咗價錢($1200)同大細適中之外，更重要係唯一可以做到完美背部。黑獅條黃尾同前腳既不良收納已成過去，背翼亦都係動畫中既Y型。

已經唔記得咗例牌收工絶招點叫，網上搵既資料係"十王劍"。每集既故事都係主角們既日常，遇上奸角既來襲，獅子戰隊既出動，合體出吓散招，臨尾一刀劈瓜怪獸。

PS:每日下午五點半，呢齣動畫陪伴著6歲既我。

悟性不足，彿心未修

夜晚搵咗嘉耀去鋒哥廚房食晚餐，因為今晚唔想係屋企食。原本無咩頭緒食乜，但search到呢間食評唔錯。去到至發現有兩個半鐘雞煲火鍋放題，包串燒同刺身，最正係生啤任飲(全場有10款)。

大路既HOEGAARDEN之外，SUNTORY黑啤白啤兼有香ALE，惠比壽亦都有金啤同黑啤，仲有小見既少爺PALE ALE~

椰子雞煲，食完就直接用湯底嚟打邊爐。"I'm your father!"，無諗過呢句星戰對白會出自我口。咁多年我都無咁擺老豆款，尋日我真係好嬲。平日慳自己兼為家人既努力，原來與無私既愛相差好遠好遠.......

好似星戰INTRO咁講:"long time ago in the galaxy far far away"

自助餐慶外母生日

今晚同外母一齊出去MIRA食自助餐，為老人家慶祝生日。星期六，全場滿座，我哋已經唔係第一批入座，我估中前左右。

除咗外母啱食之外(之前生日都有嚟過)，生蠔都係回本既誘因。

今次較特別既係呢款魚翅撈飯，我就只係黐人家一啖翅試吓。

細細個蛋糕仔，但求儀式感~

“生日快樂”，三婆孫合照，點都係相機既色水同像數較為悅目。在場食客聲氣掩護之下，一家三口為婆婆獻上生日歌～

PS:回程落巴士時見到月光下既月台情侶，忍唔住拎出A7iii。