純愛VS現實

史詩之怒行動後，今日至第一次入油，平均每公升貴3蚊。

相信唔少車主會羡慕楂電動車既朋友，唔會受油價既波動所影响。

毒自看高達

朝早係村口文記食完晏，就趕番屋企晾衫，再行出村口飛的去西鐵站，為去iSquare睇IMAX版閃光之凱薩衛-瑟茜的魔女。尖東站出閘，急步行去相連既地鐵站R出口。一輪扶手電梯交替，成功上到商場第7層買飛，再登頂到IMAX院。

除咗靚人(GIGI)靚景(香港)，最欣賞既係𣎴時有第一身視覺，GIGI於泳池既POV，主角於駕駛倉內既現場感。

相比第一集，我覺得文戲比重多咗(畢竟原作為小說)，但未至於訓著。戰鬥依舊係天黑時份，唔知係咪為咗呈現緊張氣氛同激光武器既美感？

唔記第一集當年有無上過戲院，NETFLIX上架我先至知有呢齣動畫。真實感同細膩既畫面，令我好期待續作。事隔多年既第二集，我既評價係"唔睇就可惜，睇咗就遺憾"，希望往後既第三集可以緊湊一點。

PS:得知今集同馬沙之反擊有莫大關係，出門前特意上YouTube睇懶人包。

A7 III -> A7V

"猷兄，會唔會換A7 V呀?"，"唔喇，幸男都大個，無細個咁多節目兼機會影相....."明明早前係咁答豹哥既提問，但今日出咗去旺角交收留咗貨既A7 V。話晒CMOS同防震都有升級，兼再拖多幾年既話可能心眼都跟唔上，所以魯莽地購入新機。

A7v比A7iii厚身，手握位亦更突出。雖然A7iii係2018年買入，但實質服役時間唔長，因為武漢肺炎疫情期間無機會去旅行外影。

新機要花時間去適應，第一下唔慣既就係頂部既EV轉盤變咗可自行更改設定既轉盤。熄機後不再可以直觀或重置EV值，要下次開機從電子觀景器才得知參數，感覺上會花多咗一個步驟……

婦女節暨老媽生日飯

 

今晚出港島區食晚飯，落巴士行咗無耐就開始上斜路段。

餐廳內燈光昏暗，梳化位異常地低，要坐住個咕𠱸至可以同枱面保持合理距離。

老媽話今年要送小禮物俾兩位家嫂，婦女節大合照。

單靠電話相機既話，絕對無法應對是晚場景。

大佬揀呢間餐廳係為咗生蠔無限添，但無諗到第一round上既先蒸熟再冰鎮上，店員話因為早前新聞有Norovirus事宜。交涉後，大佬要做代表簽名，當係客人要求兼免責，我哋至可以嚐到真生蠔味。

嘢食算對得住價，始終生蠔放題嘛～人家話我個餐由頭升級到尾，但其實係除咗pasta以外。

老媽既甜品係有特別裝飾。

壓軸有另類蠟燭，立即叫幸男過去同嫲嫲合照。

回程call uber 7人車，免老人家再要行斜路，大家又可以舒服啲直接番屋企。等車期間，發現餐廳轉角位置正正係蘭桂坊。

PS:回程上既係BYD既電動7人車，辛苦幸男同人家坐最後既2個窄位。

新春盤菜

今晚坐Andy順風車去振興新村食盤菜，由於等到近七點都仲係落大雨，所以村友要拎走自己個盤，各自搵室內地方食。好在麥生有計，成功安置3枱鄉親好友，安安樂樂開餐。

八點左右先至停雨，可惜無得睇舞獅，係村會所睇咗陣抽獎就動身走人。

多謝大姐同麥生既邀請，多謝Andy同Emily既接送，被關照同愛鍚既感覺係幸福的~

祝願大家新一年，身體健康，心想事成!

中佬聚一聚

趁阿輝短暫返港，約埋阿基一齊去鋒哥廚房，邊食邊傾邊啤。

兩個半鐘放題，刺身，燒物，雞煲，火鍋......細嚐港式味道，道盡中佬辛酸。

埋單後，送埋阿輝去搭巴士，再分道揚鑣歸家。無論大家住得幾遠，線上聯繫會促成面對面相會。

PS:人家話睇得出我係真笑，唔係平時家庭合照既假笑......

J CRUISE 3 WHIZZY

捱完個夜更，遲番到屋企，訓兩個鐘唔夠就起身食晏。晾埋衫就騎愛駒出去車迷城，交收月頭訂購既J CRUISE 3 WHIZZY拉花。

骨位全滿，唯有跟人哋係路邊短泊，望落我好似同一伙出車嚟睇嘢咁。紙盒無帶走，新頭盔放係seat位下。今次無追錯牌，順利經中九龍繞道回程。

其實好想揀啲搶眼啲既色系同花紋，等咗一年既最新拉花ACCONIC都唔啱心水。舊頭盔既內綿已捱唔到下一次清洗既壓力，唯有揀住呢款先。

前方同頂部都唔錯既，係側面同正後方既幾何圖案有啲失色，缺少連貫性。

訂頭盔時，店員話SHOEI既存貨唔多，因為怕顧客介意製造日同購買日相差太遠。

PS:先係老院附近停車，買個下午茶俾老豆，因為11點幾收到短訊，“猷哥好耐冇食下午茶”。

年初三食好啲

是日赤口，本身都無人家訪，台灣女生帶我哋去黃埔食爐端燒。

前同同事嚟食過，人家話一定要試下燒河豚肉。

今年幸男無話去AIA嘉年華會，出嚟食餐飯，擺脫連日既糕點陰霾……

剌身就得一份，其他燒物就任嗌，當然睇下閣下揀既係乜餐。

無以前咁食得，好在呢度既質絕對補償得到。

惠比壽生啤，前後飲咗2杯(套餐唔包)。

擺拍幸男枱上有啤酒杯，其實兩母子飲套餐包既特飲已爾。

最有戰鬥力既係人家，臨尾嗌咗份炸年糕。

人家揀咗甜品-菠蘿雪葩，幸男見賣相唔錯，結果自己都嗌一個。

年初二

自幸男出世，每年新正頭都會影番張家庭合照，今年已經係第十五張了。

番輪班既我對節日確實愈嚟愈魯鈍，尤其係幸男已大個，唔似得以前會為小朋友安排節目或主題，為搏童真一笑。

年初一

年初一要番工，雖然唔係悠閒，但總算唔係忙到甩轆。

夜晚番老家食飯，無諗過阿嫂叫大佬帶副啤牌嚟玩。飯後收好碗碟，先玩潛烏龜 ，再玩鋤大Dee，重拾兒時一家人既回憶。

陰霾下的球場

幸男訓到晏一晏，但又要跨區踢波，於是急急騎愛駒落藍地食個壓線早餐。

十月兜過嚟一次，順利跑快圈咁，半個鐘到埗。

原來球場係望正宏福苑，係迴轉處時已經近望過一次災後建築，感覺既無奈又傷感。

PS:新香港之下，質詢與交代均不再存在。

情人節外出實惠用膳

原本係等幸男踢完波，係屋企打邊爐過情人節晚上。無端端尋晚俾台灣女生online book到dalloyau既餐廳，結果個仔約老best食，父母出去太古廣場食情侶套餐。

Pan-seared Scallop，頭盤已為4道菜既menu開個靚頭。中間既調汁開胃之外，帶子間既三文魚及火腿增加層次。

Lobster Bisque，顏色比平時既淺色，味道比平常輕身，但多一份甜香。

Australian M4 Wagyu Beef Striploin，但食唔出和牛既油香，感覺有點失色，早知揀Barbarie Duck Breast。

Pan-fried Lobster，人家既精明之選，調味下既效果完勝牛扒。

Crêpes Suzette，仲以為會唔夠飽，點知連個甜品都食唔晒(潛意式既自我抑制？)。

臨尾埋單至得知，DALLOYAU全線BISTRO於月底結業，只會得番賣朱古力，蛋糕同MACARON既服務。呢杯咖啡將會變成絶響，由於飲咗兩杯香檳，結果呢杯咖啡飲剩一半......

PS:第一次飲dalloyau凍咖啡viennois，係同幸男去動植物公園前既茶點時段。

小品電影

夜晚一家三口係Ruby Tuesday食飯，之後我就台灣女生去英皇睇東京的士：回憶里程。

入場前本著溫情小品既預期，無諗到原來順道了解舊日本時代既大事及社會文化。

希望我老咗之後，都可以同女主角高野菫一樣，優雅地老去，對細味生活堅持到最後，並遇上願意久違既溫柔與遷就。

區內交收figma 651

係CAROUSELL搵到個區內賣家，可以係兆康西鐵站交收，太方便了。

今次figma版既綾瀨桃，上身係冷衫，下身係布摺裙，充份表現出動畫既設定。相比之下，SHF版既釘崎野薔薇條布裙顯得同上身無咁一致。唯一扣分既位係綾瀨桃既上身比例，無動畫咁突出……

小插曲：幫小桃擺pose時，唔小心整甩手踭關節位。由於前臂近手腕位係黐實冷衫袖位，所以要靠手感，隔住件衫嚟卡番好個關節位(closed reduction )。