極樂淨土篇

今晚睇埋星矢冥王-極樂淨土篇,感覺上有啲拖時間,可以減一兩話.領略第七感兼著住神聖衣黎對死神,睡神同冥王又洗唔洗打足六集呢?除咗眾人保護星華一段外,人物刻劃比之前差(e.g.潘多拉無啦啦又會幫一輝),星矢以外四位副手變咗茄厘啡.此作比冥王前後篇遜色.更無冥王十二宫既熱血.

睇番轉頭.最滿意都係冥王十二宫既制作班底,時間控制,人物刻劃,戲份分配,熱血指數,都做得好好.最理想係冥王前篇可以濃縮啲兼函蓋冥王後篇既頭少部份,極樂淨土篇可以融入冥王後篇,咁就會緊湊好多.

ps:睇完之後既感覺係情義結去睇點埋尾,多過享受個故仔,同感受一眾聖鬥士既熱血.另外動畫上聖衣既設定,好似比超合金figure既設定為差.....

唔覺係sleeping day

番完夜更,十二點出門去市中心美心皇宫同台灣女生兼外母大人飲茶,人家仲叫咗喜愛既胡椒豬肚湯.

係尖沙咀星光行既飛利浦訂完吸塵機軟喉,就搭巴士去旺角百老滙睇地球毁滅密碼.用咗積分換買一送一,加上vip八五折,結果由$65一張飛,變咗$27.5一張.故事有啲似世界末日-審判日,只不過係外星人代替咗天使既出現,洞悉天機密碼既主角最終只可以等死.......真係有啲失望,好在係平價飛.

搭巴士番入屯門,係大排檔叫咗雞煲,豉椒炒蜆,同埋呢個鹽焗蟹.雖然要件180,但計落都係俾人賺$30手工,食落真係好香同多肉同鮮味,話晒都係睇住佢係游水架嘛~

ps:一個人飲咗支大森堡,好滿足~

冷門電影+購物+火煱

今日同台灣女生出去百老滙電影中心睇一齣冷門電影"拼命戰羊",因為只係得呢間有得睇.細個好鍾意睇摔角,會係星期六同老豆.大佬一齊睇亞視既"週末摔角大狂熱".最記得浮誇既旁述"嘩,你睇吓佢既表情幾痛苦".細個無懷疑過摔角係咪真打,只係覺得好勁,打到七彩,所以今次睇呢齣戲都可能係因為情義結,並唔係因為齣戲攞奬. 

睇完戲行去佐敦既東京運動店睇跑步鞋,無之前著開既wave rider,但見呢對鞋(wave nexus 3)係super wide啱晒我.,個款又唔太差,於是買咗,可惜無折,,,,,,,買完鞋,行咗陣永安,因為要等到九點去稻香打特價火煱.唔洗等位,直接入座,都唔明點解屯門成日都要等餐死......估唔到碟安格斯牛肉咁大碟,好在人家幫手食~

省城手信

今日約咗小歌仔晏晝食下午茶兼提取之前托佢買既芝華仕18,食飽兼傾完就搭地鐵去旺角一個人行吓.

出到省刧梗係去睇吓有無得買鬆馳熊既精品黎氹吓台灣女生,結果買咗呢個人造皮鎖匙扣.雖然係中國制,但QC都唔錯,手工幾好,貴少少都覺得較合理.

夜晚同ANDREW係海霸打邊爐,番到屋企幫人家穿好呢個小手信,人家都話得意~

道指(肚子)止瀉

上星期六係金銘買咗個外賣牛什米食到腸胃炎,肚痛肚瀉咗六日,今日卒之都止瀉,可以試食正餐....

高峰期一個鐘入三次厠所,六日裡由沙嗲湯底至蕃薯糖水,真係苦不堪言....幸好只係SL咗一日,而A/N都能番工.

平時唔食粥既我,無奈食咗四日粥餐,真係破晒紀錄.

PS:多謝台灣女生呢幾日黎既照顧,好在佢咁啱呢個星期係番8-4啫

三色飯盒

雖然今日台灣女生番晏,但係人家預先準備既三色飯盒,令我番夜更前都可以有正餐食,填飽肚至開工.