3rd final wireless earphone

開學兩個禮拜，幸男就跌咗邊耳機(我過俾佢既ZE3000)。原本叫佢上網睇吓邊款好，兼自己出錢買，但懶人遲遲未有行動。日日都係"單邊主義"，又怕佢會又唔見，所以決定將我用緊既ZE 3000SV過俾幸男，自己升級final tonalite。

其實年頭推出時已有興趣，但因定價($2680)及大細不便當電單車導航而却步。幸男跌耳機事件，將埋藏多時既糾結再度浮面。睇完多條YouTube做評估，用AA電貼住耳嚟試戴頭盔，又夠位喎!包送貨既HKTVmall又咁啱有平啲啲($2546)，反正price.com既$2380都係"查詢"狀態。

旗艦級別賣點係Digital Twin Audio Simulation 

，專用app以智能電話既前置鏡頭去掃瞄耳朵，頭形及上半身比例，去模擬最接近原音既調音。

對住螢幕記號嚟度面形，昂高dup低都還可以，但90度擰頭度耳影相堅難。失敗幾次後，要搵台灣女生幫手埋尾......

PS:網上評價tonalite可以呈現HiFi自然音色，媲美有線機，聽日搵啲無損格式歌嚟試真啲先~

預祝中秋

難得我星期六放假，台灣女生帶我去食海景午餐。搵極都唔見所謂既直上餐廳既地面𨋢位，結果經商場行問職員行較轉折既路。

前菜人家揀野菌忌廉湯(三道)，我就揀泰式醃三文魚他他(兩道)。

無諗到三文魚份量係填滿粟米片底，好在揀咗2道菜。點餐時問少爺啤喺咪生啤，侍應生只係答斟出嚟……支裝同生啤都係斟落杯㗎啦，結果係支裝囉。

和牛芝士漢堡，夠晒立體挺身，唔會好似老麥咁扁。無入鏡既自家製樽裝茄醬，以茄鮮為主，唔係死甜。

人家揀既海鮮叻沙都好足料，帶子大大粒~

餐飲叫咗Iced Cappuccino，無諗到凍飲既咖啡味都可以咁濃郁。甜品椰子奶凍，配上芒果，西米珍珠及柚子，變相crossover楊枝金露？

臨入𨋢落樓前，係玻璃窗邊以太空館文化中心為背景，嚟張維港自拍。落到地面，行到天星碼頭，又再近距同維港合照。經海運大厦行去海威商場既Dalloyau，拎取訂購既中秋禮食。

夜晚番老家做中秋，老媽依舊順便同我哋預祝生日。希望全家人身體健康，開心迎接下一個年度。

PS：中秋正日要番夜班，所以夾日子提前食。

區內腳車

放假日，村口食完晏就執回收嘢去綠在屯門，一星期就已經夠行一轉。用咗幾年既CONSOLE BAG已經爛爛地，但原廠YAMAHA已無再出。可惜GIVI果款間格唔太好，要換就要轉鋪天蓋地既大陸品牌。

台灣女生總係忙，結果晚餐由我發板，去鋒哥廚房買外賣雞煲兼少少火鍋配料。遲收工既人家叫我順便接埋佢放工，再去拎外賣自取。忽發奇想，以一張低抄視角相去話俾佢知，我已到佢樓下。

屯宿之男聚餐-廿八週年

如果唔係屯宿之男約係大角咀食晚飯，我都好耐無嚟大角咀。以前會騎BURGMAN 150去安定車行，自從換咗SKYWAVE 250 SS就無再兜嚟呢頭。華B係whatsapp group打"猶哥入嚟啦, 企門口做乜"，突然諗起阿強既相熟對白-"點呀波哥"。當時我以為我係最早，故係門口等埋多一個至入去。

適逢阿禮今日會落嚟，所以今晚張合照夠晒人氣。中佬們既近況，健康，計劃......見大家都安好，就已感恩。環境變咗好多，無分彼此既背靠背情義不變。

PS:不得不承認，近期身心疲憊既感覺揮之不去.....

1st夾中公仔

人生第一次夾中公仔，竟然係用唔駛錢既代幣。見隻公仔唔係靚，所以放係枱面影張相就算。

當初見有一隻係喺近出口位，於是鎖定目標。三個代幣，第一個爭少少，第二個就成功跌落出口。

其實今日主線任務係去元朗大同，幫外母買月餅。晚飯一心去再來一煲堂食，點知無位（又話北上消費既？），結果去咗大滾友。二人餐抵食，揀咗半價散嗌一樣配料，無揀＄1啤酒放題。桶蠔賣相夠晒分，但食落只係台山蠔，同美國桶蠔無得比……

份量係ok既，只係我番完早更太攰，無乜胃口食嘢。綜觀座位舒適度，食品選項同質素，應該唔會再嚟幫襯。

PS:埋單後，店員俾咗3個代幣俾我哋去玩樓梯口既夾公仔機。

ACE COMBAT 8

YouTube見到有ACE COMBAT 8既宣傳片，空姐係客機走廊上，急趕地邊走邊問:"請問乘客中有無?"，"請問乘客中有無?"。直至不慎跌倒後，問出"有無英雄可以挺身而出?"。畫面一轉，全機既乘客都戴上頭盔，兼向空姐致禮。場面動人之餘，又非常搞笑，之後就接上遊戲既畫面片段。結尾仲以空姐捉住另一位同僚，扮戰鬥機空戰dog fight。

介紹片有唔少第一身視角交待文戲，一如過往系列既風格。

之前果隻ACE COMBAT 7我未打爆(一半)就停工，畢竟未能係工作透支，屋企雜務，以及補追Blog之間喘息......

Check車要在補胎後

今日10:30順利騎愛駒到太子check車換偈油，同職員陳述"鬆油溜車，錶版ECO燈熄滅時，龍骨下方會伴隨震動及聲响"。

交低車匙就行去始創逛吓，11:30就去番RBTea(仙踪林)食晏。

掃code落單，揀咗有限庫存既油封雞髀(鴨髀就食得多)黑松露意大利飯。味道唔差，只可惜厚肉位近骨有血水，唔可以食到盡。

台灣女生提議我去MOKO既Loft 望吓，原來得一個角位，商品唔算多。係商場蕩到兩點半，就落番去始創中心，依舊starbucks咖啡坐住等。

近五點至有得攞車，職員轉述師傅話無異樣。夜晚得我同幸男食，於是叫人家代order市中心PIZZA MARU外賣，我回程順路自取。

晚飯後兜去師傅樓下，當run吓車叉電。無上樓，只係Lobby交收兼傾咗陣，搵日食飯再詳談。

愛駒已服役8年，seat位已唔止一個爆皮位，所以今日訂定船期貨，下次check車換油一次過更換。風擋固定膠部件有現貨，除左原定換偈油同把手grip，風隔都要換。

PS:車行無解釋，唯有上網search，應該係離合器既分離導致震動同聲响，只要唔係太強烈就可以。

洩足一星期?

夜晚同幸男番老家黐餐，開布冚時覺得愛駒好似比平時矮咗啲?行車時難轉向，心知不妙，唯有揸慢啲。番到屋企用胎泵check，尾胎psi為"0"。舊電子氣泵打到13psi就死咗，好在嘉耀兜過嚟借泵俾我。打到35psi，用皂水試下㔆釘位，漏得幾快吓(10分鐘就跌到33psi).....

問埋康楠意見，都係唔好掹出嚟，打滿35psi就去區內既騎士堡補胎。師傅話要11點半左右，結果係12點3至到，好在嘉耀兜咗架車去等我，可以係車內涼住冷氣等。$80無坐地起價，無介紹人所講咁"有性格"。

PS:營業時間為20:00~08:00，起初以為日頭有正職，夜晚至收call至開舖。到過現場就知點解，間舖塞滿嘢，夜晚無人至可以係馬路邊作業。

陪三婆孫遊大阪Day5

酒店附近有間うめきた温泉 蓮，領隊當初早check in時就密謀想去浸溫泉。今朝早就係酒店lobby買飛，再經酒店專用通道，直接去Wellbeing Park。

感覺似以前番大陸既揼骨休閒中心，我哋揀基本course，十二個鐘內逗留。我同幸男沖過身，就去浸唔同溫度既池水，真溫泉水池只得一個。近風景動畫螢幕既池，係唔同特式既Jacuzzi。其中一個係電流，兩邊手臂會好似麻痺咁。

同幸男去埋75℃既桑拿房，坐咗5分鐘(夏蘭式禪至有外人入嚟)就出去浸凍水池。出嚟至醒起，眼鏡係咁熱既環境好似唔係咁好.....

其他貴啲選項就可以去做gym，美容，按摩，戶外infinity pool。基本入場2900円，黐吓WiFi上網同浸吓池都好抵玩。

11點半集合，出去嗌杯包既飲品，生啤有喎~見有輕食提供，為咗慳時間，於是係Wellbeing Park既餐廳食埋晏至(補錢)走人。

馬堀駅落鐵路，出站擔住遮行一段無瓦遮頭既路，10分鐘內行到小火車龜岡站。

站內有精品手信店，月台太熱，遊客都留係站內。

車站職員見時間差唔多，叫遊客排隊check飛，再放行去月台等車。好在排得前兼有天涯鏡，先至捕捉到埋站既時刻。

起初仲怕熱，去到山林間就感到涼意~

車卡頂兩側都係透明，方便遊人欣賞風光。

Flip7繼續擔當自拍主機。

目送列車離去，我哋就要行樓梯上去出站。

領隊先同外母慢慢行，我同幸男係車站外既小店幫襯甜店，話晒都近下午茶時間嘛~

原本諗住兩父子下午茶自拍，唔知㩒錯啲咩，搞到有負片既feel。

順利追上打咭位，三婆孫竹林合照。

平時番工係電腦芒都有見過嵐山竹林wallpaper，但今次係親經歷其景。

領隊同外母繼續前行，我就同幸男undercut偷差，去咗神社睇吓有咩啱心水既防御守，可惜無收穫。

今日既重頭戲係坐人力車觀光，幸男同外母坐一架車。我就不時回身，用天涯鏡試圖得出一張啱心水既相。車伕提我唔好擰轉身去影相，因為會影响佢操控，一定係頭D提及既重量轉移......

坐人力車可以行小一段專用路段，我哋可以廻避行人既喧鬧，獨享竹林恬靜。另一個好處，就係可以安心擺拍。可惜得一個陽光位，不過婆孫夠靚至緊要嘛~

經過火車路段，見到嵯峨野小火車駛過。

終點係上車位置，車伕為我哋係400年歷史既渡月橋影合照。

辛苦我哋既車伕大地さん，沿途為我哋介紹景物。"識少少"廣東話既大地，原來去過香港，好鍾意食蛋撻。我地用日文向大地さん講"お疲れ様です" (Otsukare sama desu)，大地さん則以"辛苦晒"回答我哋。

行手信店，中途去咗特色cafe(雲の茶)歇吓腳兼補水。慕絲蛋糕(芒果x3，香桃x1)，質感同味道都唔錯。外母飲熱茶，我哋就葡萄煎茶梳打，柚子雪糕梳打同極品白桃烏龍。

另一個角度下既渡月橋，三婆孫於夕陽下既合照。

過橋行15分鐘去車站，咁啱有班次，大家都要急步追上車。

番到梅田，係阪急作最後衝刺買手信。無諗到揀完食品，仲要揀心意句紙條。上酒店房放低手信，輕裝出門去預約既一星米芝蓮餐廳-天婦羅料理。為免外母行得辛苦，所以領隊用app預約的士，可惜司機停既位置係酒店對面。司機見咁耐都未到，所以用app既通話功能嚟搵我哋。領隊塞個電話俾我，中學時代既日語初班嚟同司機交代-唔好意思，等等，而家趕緊......去到餐廳時，已遲咗十分鐘左右，用電話翻譯定"遲到，唔好意思"向店員示意。

我留意到師傅不時於Bar枱後方，拎杯白酒小呷一口。"マスタ－ , 乾杯～"，師傅回個神來，以杯中物嚟回覆我呢位外人。侍應生中，有一位係略懂英語，故了解菜式多一點。

簡單日語，Flip 7翻譯下，讓我哋同師傅及店員增添亙動。我表示喜歡美食既卡通同日劇，原來師傅都有睇伙頭智多星，之後就開始試煮嘢食。當講到Grand Maison Tokyo同電影版Grand Maison Paris，師傅即興做出主角既3星手勢。

唔好以為會食唔飽，上吓一件，食吓一件，唔覺唔覺就食咗過10款。

呢間餐廳既signature食材-魚翅，話晒係高級食材，點都要自拍吓。

魚翅本身無咩獨特味道，純以口感為題。自古係以湯羹及食材為其注入鮮味，唔知呢個天婦羅料理有無炸前浸過高湯呢?

成晚除咗魚翅係驚喜之外，就係平凡食材-番薯。熱氣驣驣既番薯天婦羅，同威士忌蘸汁非常之咁夾，好似fine dinning既wine pairing一樣。

第二round酒品，我嗌咗香檳，人家就話要白酒。任君選擇:德國Riesling(右)，美國華盛頓同加州(中間)，法國Burgundy(左)，我就為人家揀咗法國風情。

最後上埋麵豉湯同炸蝦飯，仲有個生果作甜品。起初仲怕外母唔啱食，好在大部份都OK。回程唔洗趕時間，一團人慢慢行番去酒店。