Check車要在補胎後

今日10:30順利騎愛駒到太子check車換偈油，同職員陳述"鬆油溜車，錶版ECO燈熄滅時，龍骨下方會伴隨震動及聲响"。

交低車匙就行去始創逛吓，11:30就去番RBTea(仙踪林)食晏。

掃code落單，揀咗有限庫存既油封雞髀(鴨髀就食得多)黑松露意大利飯。味道唔差，只可惜厚肉位近骨有血水，唔可以食到盡。

台灣女生提議我去MOKO既Loft 望吓，原來得一個角位，商品唔算多。係商場蕩到兩點半，就落番去始創中心，依舊starbucks咖啡坐住等。

近五點至有得攞車，職員轉述師傅話無異樣。夜晚得我同幸男食，於是叫人家代order市中心PIZZA MARU外賣，我回程順路自取。

晚飯後兜去師傅樓下，當run吓車叉電。無上樓，只係Lobby交收兼傾咗陣，搵日食飯再詳談。

愛駒已服役8年，seat位已唔止一個爆皮位，所以今日訂定船期貨，下次check車換油一次過更換。風擋固定膠部件有現貨，除左原定換偈油同把手grip，風隔都要換。

PS:車行無解釋，唯有上網search，應該係離合器既分離導致震動同聲响，只要唔係太強烈就可以。

洩足一星期?

夜晚同幸男番老家黐餐，開布冚時覺得愛駒好似比平時矮咗啲?行車時難轉向，心知不妙，唯有揸慢啲。番到屋企用胎泵check，尾胎psi為"0"。舊電子氣泵打到13psi就死咗，好在嘉耀兜過嚟借泵俾我。打到35psi，用皂水試下㔆釘位，漏得幾快吓(10分鐘就跌到33psi).....

問埋康楠意見，都係唔好掹出嚟，打滿35psi就去區內既騎士堡補胎。師傅話要11點半左右，結果係12點3至到，好在嘉耀兜咗架車去等我，可以係車內涼住冷氣等。$80無坐地起價，無介紹人所講咁"有性格"。

PS:營業時間為20:00~08:00，起初以為日頭有正職，夜晚至收call至開舖。到過現場就知點解，間舖塞滿嘢，夜晚無人至可以係馬路邊作業。

大假之日常

訓咗兩日，卒之都無咁喉嚨痛，但仍未揮走渾身酸軟。晏晝騎愛駒去做回收，再係市中心買啲嘢，無諗到夜晚要搭巴士出番市中心食飯。

罐裝American Pale Ale手工啤正常發揮(可惜無生啤)，反而呢個南洋胡椒桶蠔煲($208)夠新意。

薑葱銀絲龍蝦煲西澳龍蝦($468)，兩個人就份量啱啱好。

店外掛晒黑皮鵝，原來店內仲有個魚缸，人家一片心等緊杯鴨屎香手打檸檬茶。

豉椒炒蟶子($228有4隻)，埋單千二有找，算坐得舒服。侍應團隊較多gossip，不過坐係度邊食邊聽人講是非，當係食花生。

放假食晏，唔洗係村口趕頭趕命咁倒落去。餐牌唔啱，咪兜落藍地食其他茶記，順便幫康楠望車兼買超市貨。

PS:幸男去咗學校搞既大欖BBQ，聽到都覺得熱~

侘寂

每當夜晚忙到遲收工，騎愛駒番屋企絶對係一個慰藉。唔需要等車，唔洗同人迫，唔怕要望住別人既熱鬧。

全心全意感知自己與周遭，讓情緒與思緒流動著。

放假定病假?

雖然係放假日，但無力騎羊外出，午餐係村口茶餐廳食。晏晝係平板電腦睇/聽吓YouTube，洽吓晏覺。

晚餐由台灣女生放工係市中心買日式丼，其實已作病一星期，每日只係勉強應付番工。

PS:尋晚撩過鼻，結果唔係預期中既CoV，繼續係亞健康狀態下掙扎.....

SPIDER MAN-BRAND NEW DAY

"18:00元朗西鐵站等"，早到既我先去MY CINEMA嘟番張實體飛，再去GLASSHOUSE門口等台灣女生。

無咗西班牙乳豬，唯有嗌龍蝦尾配澳洲和牛扒。

人家係SET DINNER，揀咗燒牛扒，留肚食加錢既梳乎利蛋糕，無諗到咁大個~

趁無咩人，係宣傳佈景打番張咭。

今集SPIDER MAN係用SAMSUNG FLIP機，咁又好啱數，件衫都夠晒緊，真係摺機至方便出行。

上集好友及女友支持既Peter Parker，以世人忘記Peter Parker及Spider Man，去化解多元宇宙危機作結。今集有唔少虐心位，例如失去英雄前輩，獨自面對當英雄既壓力，以及唔會送出既真相剖白情書，仲有Aunt May既身故......好多人話今集既Spider Man好睇，因為歷煉後既Spider Man同普通人樣，要憂柴憂米及無力感(前一兩代好早就涉及)，顯得分外有血有肉。

Trailer保密功夫做足，鬼上身既異象，原來係X Men既Phoenix -Jean Grey。其實之前既X Men電影，都無提及Jean Grey既心路歷程(主力放係Wolverine)。

另一亮點係Punisher同Spider Man既互動，實際與大愛既碰撞。Hulk既亂入，反而無Dr. Banner既文戲咁重要。無人可以決定Phenotype既好壞本義，只需要面對及了解本我。

戲中Ned開發既Spidey Tracker app，介面畫風復古之餘，仲配埋1967年元祖動畫既主題曲，十分過癮～壓軸彩蛋：App顯示有外太空既蜘蛛俠，唔知故事會發展成點呢？

Spider-Man, Spider-Man, does whatever a spider can.

Spins a web, any size. Catches thieves just like flies.

Look out! Here comes the Spider-Man.

Is he strong? Listen, bud, he's got radioactive blood.

Can he swing from a thread? Take a look overhead.

Hey, there. There goes the Spider-Man.

In the chill of night, at the scene of a crime, like a streak of light, he arrives just in time.

Spider-Man, Spider-Man, Friendly neighborhood Spider-Man.

Wealth and fame, he's ignored. Action is his reward.

To him, life is a great big bang up. Wherever there's a hang up, you'll find the Spider-Man!

即興假日抹車

落咗兩三個星期雨，卒之可以愛駒代步去剪髮兼超市買嘢補給。番到屋企抺剎車碟時，忍唔住動手洗車兼噴吓膠品保護劑。

傍晚台灣女生收工去燈神拎外賣自取，我見難得好天，於是出車去市中心會合人家(慳番的士錢)。人家都好耐無坐我車尾，幸男可能仲多機會坐。

天氣酷熱，雪定支平香檳配中餐，重拾片刻慢調。

PS:一分錢一分貨，BOIZEL欠缺一份複雜及細膩

Buy 1 Get 1 Free

原本今日約台灣女生去V CITY既千両食晚飯，但見個餐牌依舊無得upgrade，把心一橫搭西鐵去YOHO。王子既餐牌亦新意欠奉，無意之間發現穴有買一送一既晚餐優惠，於是向店員查詢。

前菜-靜岡蕃茄•白身魚•香草汁，味道夠晒清新開胃。

精選四色刺身，份量同質量都有誠意。

之後上既海鮮天婦羅，有帶子，蝦，魚同紫菜包既蟹肉膏，可惜唔記得影相(掛住試紫菜包住啲乜)。

汁燒安格斯牛扒，滿滿和風~

黑松肉松露生薑飯，人家飽到要拎外賣盒打包，話要留肚食甜品。

左口魚邊海膽飯，好明顯係我既加錢之選。

焦糖布丁•雲呢拿雪糕，人家留肚戰術成功，我就各食剩一半。

PS:開心可以係區內食到有水準既晚餐，始終巿道不景兼北上降級消費盛行......

非主流球迷

早更補鐘早走，番屋企放低愛駒同背囊，輕裝出門，搭輕鐵駁西鐵(屯馬線)出啟德。

兩母子著晒隊衫出嚟，我就電單車品牌T恤。POP-UP STORE無咩嘢啱心水，齋打張咭。

商場及球場外都係以曼城球迷為主，見到有杭州既睇波團拉住BANNER嚟影大合照。

好在早啲入場，除咗方便影相，仲避到場雨。

撞正世界盃，曼城無咩主力球員，唔入伍既Foden已係亮點。相反，國際米蘭就full team咁滯。如果人家買飛前問我既話，我一定話唔洗買我果份。反而上次睇北倫敦打吡-熱刺對阿仙奴，好氣氛又多正選，抵睇好多。

入場前，先食定晚餐，揀咗周月拉麵店。

四鐘左右前至食完晏，呢碗和牛拉麵加埋杯啤酒就夠晒。

PS:融入灣區必學-"球球球....."，"飛，飛機!"，"還有!還有!"，"卧糟~"

GTO

早前係NETFLIX見到有全新既GTO Revival兼舊GTO一齊上架，當年熱播時我同台灣女生都無睇過，於是一齊由舊GTO睇起。礙於4:3兼低像數，啱晒挨住枕頭用平板嚟睇嚟既睡前日劇。

之前睇既係2012年版既GTO，相比之下，元袓版本即使係低清，反而好睇得多。

PS:無諗到當年既尺道咁開明，可以有露點既雜誌硬照上鏡。

唔記得影合照既書友聚餐

逢星期四晚，台灣女生都要上堂，所以我唔係番晏既話就要諗晚餐。今晚就約咗崇真書友聚吓，照舊係火鍋放題。 原定旺角集合，最終轉係荃灣，反而我慳咗時間(可以番屋企泊底愛駒)。

教練最早到，為大家打點。

雞煲係無限添配，教練嘛，馬sir同我食住嚟等阿偉。

人齊食多轉雞煲，再落埋個湯底轉火鍋，等上一次性既清蒸海鮮拼盤。每位$300，都算係抵食~