等放工

今日騎羊接人台灣女生放工,人家遲咗半個鐘放工,好在我一早入咗室內邊涼冷氣邊等.

平時接放工,只係想人家快啲番到屋企抖,同埋唔洗一個人係輕鐵站行番屋企.其實一直以黎都唔太明,點解女仕們總係鍾意另一半等放工.

特意係人家出公司門口前見到羊仔既位置影張相,但都係感覺唔到任何特別......

小禮物

今晚同外母大人係裕滿人家做節,點知外母大人話有信俾我,好似係咩車牌,無理由抄牌會寄去外母度.人家聽到就立即話無嘢,並且一手截住封信.

經過一番盤問,原來係人家係街見到有人用既電話繩係車牌設計,於是網上search同訂咗車牌鎖匙扣同電話繩俾我,諗住當係生日禮物....我答佢$40一個X2,都只係$80.........

物輕情義重,雖然公司只係得以上既logo選用,但人家話想要SS(因為愛羊係SKYWAVE SS), 結果該公司都為人家精制咗SS既logo.

PS:http://hk.myblog.yahoo.com/plant182km/article?mid=9

泰屋聚舊

今晚一班兄弟約咗係泰屋一齊飲嘢聚吓,因為percy下星期就會註冊,成為人夫~

畢咗業後,大家都妤多時出黎飲嘢相聚,但近年由於各有家庭,兼且有小朋友,最關鍵既係有要員離去,相見聚時間更加少,所以每次出黎我都好珍惜短暫既時光.

可能係我無咩family bonding,我真係當大家係好似親兄弟一樣,能夠認到大家,確實係我既褔份~

Gentlemen, cheers~

一風兩食

今朝番工時都仲係八號風,結果尋日晏晝同朝早各兩個鐘加埋有四個鐘allowance,一風兩食~

土砂龍討伐成功!

經過幾日黎既屢敗屢戰,卒之都俾我"做低"土砂龍!由於佢攻擊力強,一衝埋黎就好似架火車咁,可以將成個人"炒起".最糟糕既一次係場景大石後食嘢補血,點知佢先"炒起"查查,再撞散大石,繼而剷起我.

初次接觸芒亨既我,雖然已經慢慢掌握,但仍有好多唔明既地方,希望可以打爆機啦~

金時鯛,賀生日

今日同小歌仔去咗尖沙咀既石亭食晚飯,當補祝生日(尋日至係正日).一坐底就留定條金時鯛黎做刺身,點知小歌仔以為係大眼雞.........

四個人坐底邊等食,邊食,邊講,差唔多逗留咗三個鐘.因為五日裡番咗四日早更,所以好攰,希望壽星女唔好介意.

年紀大咗,覺得朋友可以坐低聚吓,大家健健康康,傾吓交心話已經很好了.

住家海鮮餐

今晚台灣女生模仿大排檔既做法黎煮蟹,味道爭咁啲,唔知係咪人地臨尾有淋熟油上面,同埋落得多鹽.

另外一款係模擬酒家做法既清蒸鮑魚仔,時間掌握得好,肉質仲係嫰口,但可能係豉油味道唔太合配.

有勞台灣女生既努力,為咗可以進步至平日常規菜式,一於出去食多一兩次試吓味先~