收取預訂cd

之前為咗"零秒出手"隻主題曲,出咗尖沙咀既香港唱片訂碟,原本話兩星期有貨,但個零星期已經打電話俾我話有貨.見今日台灣女生要覆診,所以今日番完早更至出去攞.對番円價,唱片舖都係收我十算,無另加手續費,運費等.

科技進步,時下既消費者可能慣咗下載既生活模式,所以cd舖都無以前咁多碟賣,減低風險嘛~可以買到隻心儀既cd,真係萬幸.......

ps:貪吃既人家,係地鐵站忍唔住話要買個鮮士多啤梨泡芺,而我就買個tiramisu味~

活化舊建築

每次搭小巴係馬會落車時,望見被拆剩圍牆既柳園,都後悔當初無趕時間黎影相留念.

讀預科時經常經過呢個門前,個時會諗咁大既舊屋,究竟住啲咩人?唔知住係入面舒唔舒服呢?

小山坡上的舊屋不見了,只有赤條條既山泥平台.如果當初將舊屋改為有小食部既公園涼亭,美化一下環境都唔錯丫~

J Phone夢碎

今日騎羊出市中心幫台灣女生放低部電話去整,一月尾係T One Mobile買既大陸夏普正貨日系電話SH9100C,咁就壞咗......

近來發覺人家部電話打俾我時好細聲,人家要嗌出黎至大聲啲,用handfree至正常.試過同人家交換部電話試,原來部電話聽人地把聲仲細聲.......咁咪即係earpiece同microphone都壞??仲有靜音模式照響原廠設定鈴聲,響鬧功能失靈.....

其實我早就唔贊成買,因為維修問題煩,而家要交番大陸原廠搞,一來一回要成個月時間.......唯有用住我部舊nokia機頂住先.

ps我當初建議人家等nokia 6700s,二千多啲就有交易,可惜人家鍾情日系摺機款式......

愛羊近照

雖然天陰,但都騎羊去兆康買外賣,等台灣女生放工番到屋企就有得食.呢排少咗騎羊出入,希望愛羊唔好見怪,影番張相補數~~

ps:泊好車,見到有隻蝴蝶,無諗過電話相機都影到.

TOY STORY 2

之前同台灣女生睇咗TOY STORY 3D版第一集,今日就趕住同人家睇埋第二集,因為只會上映一個星期.

十一點多啲就到市中心,但戲院原來係要十一點半至開,好在摸門釘既唔至我一個啫...唯有等埋人家搭小巴出黎,係mos burger食埋晏至去買十二點二個場既飛.

買飛時全場都係吉位任揀,入場見無咩人,於是幫人家影番張相~雖然我已經睇過,但由於事隔多年,兼且其間無係電視或租碟番睇,所以只係依稀記得woody俾古董玩具收藏家捉咗,而巴斯光年帶領一眾朋友去營救.

人家都覺得第二集比第一集好睇,笑料更多,散場己經係13:40,急急腳送人家上的士番晏,自己就買多少少嘢,再騎羊番屋企.希望人家睇得開心喇,話晒都係第一次睇嘛~

卓謙彌月

今日係Ronnie愛子既彌月宴,大家都收到Ronnie既邀請,一齊黎市中心迎囍食飯兼聚吓,台灣女生因番晏,未能出席...睇個餐牌就知幾好餸,好多謝主人家既款待~

一向喜歡小朋友既Ronnie,籌備婚禮時已經計劃婚後會生BB.以往初出茅廬既小妮子,而家已經係溫柔嫻熟既媽媽,相信子謙係未來將會好鍚呢位好媽媽.

每次抱bb都摸不著頭腦,學長輩們將bb個頭"枕"係手踭位,用手掌抓住bb既腳仔或pat pat,但手長既我,手掌往往找不到腳仔,更談不上pat pat......唯有將bb放近pat pat位置,並以另一隻手捉住腳仔,影相出黎既效果比較笨拙,尤其係嘗試"雅"起左手,以拉近自己同bb個樣既距離...