家中睇戲

今日卒之都的起心肝,騎羊去良景間節拍,買套票,做會員.之前係大興租開碟間鋪頭執笠後,一直都未有新地方落腳.

$198套餐,18張飛,DVD同VCD都係扣一張飛($11),都好划算.一向喜歡係影視會租碟既原因如下:
第一,本人係電腦白痴,不懂下載.
第二,個人較喜歡係梳化坐得舒舒服服,飲啤酒,食零食.
第三,網上唔太多冷門電影,有時影視會至會有.

 

即時租咗兩齣之前想入戲院睇,但又無時間去睇既戲.反斗熊心無想像中咁好睇同好笑,最好笑既情節已經係TRAILER度俾晒你睇,不過幸男就睇得好入神(但後勁不繼,開始唔集中...)

 

湊仔戀咁黎,講男女主角受共同好友夫妻所託,照顧一歲大既BB女,期間發生趣事.身同感受,

深深感體會到在職父母照顧小朋友既辛酸,準備生小朋友既父母應該睇呢齣戲~

消費日

大假最後一日,晏晝同ANDREW去飲茶,買啲嘢再番公司接台灣女生放工.傍晚係尖沙咀既燒魂食晚飯,因為17;00-19:00時段平少少$199一位.

賣點之一係數款年肉任君揀選,我哋除咗牛舌同牛肉金菇卷無叫,其他都試晒~其實仲有海鮮類食材,熟食都多選擇,本人覺得比起去韓陽苑好好多~

食完嘢行咗陣,就番屯門,因為趕住要買嘢,其中一樣就係係玩具反斗城買個BB圍欄,等一個人湊幸男,都可以安全地放低一陣去廁所或入廚房.

好日都唔買書,今次係尚書房買咗本消閒書($47),因為得簡體版,所以要剿番本字典仔出黎.

最後係NOKIA($388)對面既T.ONE MOBILE以$338買咗個藍芽HEADPHONE,因為跟機果個係坐巴士時勾到前座扶手位,一坐低就斷咗.......

好好食的拉麵

食日同台灣女生行沙田,睇吓啲家品,夜晚係沙田市廣場七樓食.同層有兩間日本嘢食,揀呢間係因為價錢好似相宜啲,兼且望落個菜單又啱心水啲.

我叫咗個餐,有壽司又有迷你叉燒拉麵(我揀咗咪噌).

人家就散叫一客鹽味叉燒拉麵,有成心塊大叉燒.人家過啲叉燒俾我,我又過啲壽俾人家,咁又變咗兩個餐~拉麵味道好好食,湯又好飲,絶對有係日本札幌食街邊車仔檔既口味,好過蔡SAN賣廣告果間札幌拉麵多多聲!

今日都總算有啲成績,係德國寶問過資料兼睇中一部抽油煙機,係I&D睇中兼訂咗張床,係PHILIP訂咗部分燈飾,希望快啲可以搬新屋啦~

幸男會客日

雖然落雨天,但無阻客人上門探幸男,先上黎既有惠嫦同卓敏.惠嫦話好開心幸男肯俾佢抱,因好多時佢抱親既小朋友都喊~

卓敏當然順利抱住幸男啦,對上一次抱抱都好似係冬天係屋企打邊爐.

臨出門口,幸男玩到攰,洽眼訓,但聽到大家既笑聲又努大擘大眼跟住笑,笑到攰又訓番著....

JACKY,韻詩同賢仔上黎坐咗陣,就大顆人坐JACKY車去市中心會合小歌仔食飯.閒日都唔知點解四圍都係人等食飯,結果係DELIFRANCE食西餐.幸男都算合作既,但都要抱吓佢出去商場望吓嘢同行吓至開心.

食完嘢,同JACKY去百老滙買埋部抽濕機,後日送貨,總算搞好份入伙禮, 之就同埋賢仔坐JACKY車番屋企.

足十公斤

今日同台灣女生帶幸男去覆診,排隊時撞見契變路個家姐同佢個兩個月大既bb.磅重後得知有10.2kg,唔怪得愈抱愈唔對路............

話就話係十一點半,其實要十二點至有得睇醫生,幸男等到訓著咗.醫生無咩幾句(可能多嘢做),幫幸男做檢查時話"都幾肥喎",其實張紙都有寫明有10.2kg啦,.....

跟住就搭的士去市中心美心會合外母飲茶.遲晒食晏晝個餐糊仔,幸男好快就食晒.

交幸男俾外母,我同人家出去尖沙咀行吓,買咗兩隻yui既cd兼一隻suede既精選碟(雙cd單碟價,爽快).夜晚係BLT食,都幾貴吓,兩個包加個炸洋蔥圈,飲杯啤酒(kronenbourg 1664生啤 $70),咁又三百幾埋單.........

放假開始就唔太服舒,搞到今日出街都唔行得耐,令人家掃興添...

農務作業

是日放假,晏晝去咗德輝度會合大家,一車二車咁推去15分鐘路程外既荒地.

入去既小路真係有啲窄同多雜草,其實再入啲有坑溝位,要行條木方橋過.

物資同人頭齊集,開始拜神,當求心安又好,當驅趕蚊蟲都得.

跟住就係燒肉啤酒時間,填飽個肚至開工.

今日既造型係參考地盆工人,為咗戴黑超,特意戴上隱形眼鏡~

早更同事食完嘢,都有黎幫手,真係夠晒誠意~今日判頭話主力係除草,約五點半開始執嘢等收工,由於我約咗ANDREW同楝哥食飯,所以無跟大隊去打邊爐.

都真係幾攰吓,尤其係我朝早去咗泳池游水黎,一向都知粒粒皆辛苦,今日更加體會到,好在平時都有叫少飯啫...

PS:本來仲有一盒燒肉未開,我將佢放係向下彎既鐵絲網頂上暫放,臨尾想攞走時,我唔覺意郁到個網,點知就咁盒燒肉就彈咗去對面,望住佢墜落同散開........

新墟閒照

騎羊去新墟,因為約咗剪髮姐姐搞吓個頭,成日都係三十幾度,真係好難頂...

見未夠鐘,於是去咗食吉野家下午茶當晏晝個餐,好耐無食,十七蚊真係好花萛,味道又唔差~

剪完髮去攞車時,見到有架MAJESTY400都改得幾型吓.

望近啲,車主應該係女騎士,我諗應該手車都幾辣吓,400CC兼咁既外裝.

變形金剛3

番完個早更同台灣女生去新墟食晏,等埋賢仔睇變形金剛3,3D版,每位$70.好多人睇過都話唔係咁好睇,我本人覺得都OK,始終佢係添食作品,一開始都無諗過有三集嘛.

以前睇卡通片時,每集都係狂派去搶能源黎整"能源方塊",再用時空隧道黎運番去CYBERTRON星.博派就每集都去阻止,駁吓火,狂派唔夠打就話撤退,只係久唔久兩方都有啲新幾械人黎亮相,俾啲新鮮感大家兼搞吓笑.

我覺得今集既電影版,以時空隧道,重建CYBERTRON,融入人類登月史實黎作主要骨幹.略嫌太少新角色,主力係老柯,老麥同禦天敵,女角比美瑾霍絲遜色.無諗過變形金剛既死穴係俾人打眼,..

睇完戲,好攰,但都騎羊同台灣女生去深井間kcal開餐,禮拜日好鬼多人,無得坐入面冷氣位,坐出邊好似食西式大排檔咁,都幾辛苦,有啲中暑FEEL.....

法式燒乳豬仔,每次都係咁香咁脆皮咁肉嫰~

香草焗鱸魚,第一次試,都幾好食~可能太攰,回程時行公路入屯門時有啲力不從心,先送人家上外母屋企湊幸男落樓搭的士番屋企,我自己就單騎番屋企.