生活照

 一度消瘦既幸男,近來又好似肥番啲,可能病好咗之後,回復胃口.除咗正餐外,幸男好多時都黐大人既嘢食,下午茶又有小食,你睇佢個肚仔幾突.

幸男1歲零7個月大,走動多咗,講嘢多咗,唯獨係我既體力無增多咗黎照顧佢.平時都少咗用相機同幸男影相,只係懶惰地用手機黎影,無奈SONY手機又比NOKIA N8影既差.唯有勤啲用NEX-3幫幸男影相,係呢段動搖緊買唔買NEX-7既時間好好咁冷靜吓,儲吓生活照都好丫..以前唔會點買相機,但有咗幸男,好想留住佢既成長生活照,將我肉眼見既幸男烙印於照片上.幸男比我既青春更值得留念,.我只係一個佬,青春已離我很遠嘛.

村口遊樂場

今日同台灣女生帶幸男出村口球場玩足球,唔知點解幸男見到足球就好肉緊,係咁追住個波叫"波波",唔知第時會否加入足球部? 

人家落場同幸男一對一,幸男騎騎笑,四圍跑.玩咗無耐就有大人要踼波,唯有交番個場俾人.

去咗隔離既遊樂場玩,幸男唔放心SIR滑梯,雙手緊握住兩邊.唔上唔落,又好緊張咁.當我抱住幸男一齊SIR,幸男至無咁驚,安全意識高~

好在近近地都有個遊樂場俾幸男玩吓,唔駛搭車至有公園,外母帶孫仔出去行吓都方便啲.無請工人,放工後兼顧家務同照顧小朋友,真係好吃力,自己又唔係挨得既人,所以比以往病多咗.雖然別人眼中係無質素兼唔積極既湊仔生活,但每次見到幸男既笑容,都會諗"算啦,佢都幾開心丫".

歡送傑傑

今間帶埋台灣女生同幸男去美心皇宫食飯,因為同事們為傑傑搞咗個歡送會.由於晏開餐,我同人家帶住幸男去市中心吉之島先會合小歌仔,買陣嘢至上去酒樓. 

飯前有麻雀耍樂,我就同大家影吓相留念,兼同啲舊同事聚吓,因為已調職既同事得知傑傑另有出路,都話要同佢食番餐.

幸男唔願同傑傑合照,扭計喊,真係失禮,但都照影.....

阿仔唔合作,唯有以兩公婆作單位黎同傑傑合照.大家都夥拍傑傑多年,睇住佢愈黎愈大隻,有埋IVAN仔添,關係尤如朋友.

等埋P更同事到臨,先由主角同大家講幾句話,但無諗過會唱"情與義,值千金"黎搞笑.

今晚賓客有四圍半,全場汽水啤酒任飲,大家都食得開懷. 幸男依舊要跟大人食翅,另外啱佢食既就係龍蝦伊麵D伊麵.

果半枱坐既都係生仔80後,唔知佢哋啲餸係咪真係一半份量呢?食到十一點就準備走人,因為幸男已好攰,平時九點半就沖身換衫,食埋支奶就訓.人家話幸男攰到扭計喊.媽媽抱住時,幸男仲手指住門口話"走"~呢次係佢第一次識講"走".

第十三代手機 -Xperia P

今日番完早更就同台灣女生搭輕鐵去市中心食晏,自己再去新墟間電訊數碼出新手機-SONY XPERIA P.原價碼$3998,客戶價$3299,預繳三個月台費就可以攞走部紅色新機.

用開既NOKIA N8上網慢,一去到多FLASH既網址會LOAD唔到(出BAD REQUEST),加上係IRENE餐飲,部機被RICKY打瀉JACK少杯橙汁落我部機度.被兜頭淋之後,"神"多咗之餘,右側既LOCK仲壞壞哋,好難推上去.上網做足功課,1Ghz雙核蕊ANDROID機,以價錢同外型及功能黎計,應該係我既不二之選.

外型簡約,又係我偏愛既金屬外殼,機側既mini usb及hdmi插位可真接用,唔駛開蓋cup蓋.機身輕,4吋芒(N8係3.5吋),但要用micro sim咭.我起初以為電訊數碼會俾張細咭我,點知係幫我個張sim咭剪細佢......雖然插到,但唔太fit size,結果我要係屋企再修剪吓啲"披"口位,個蓋至cup得貼啲.

ps:手機PROFILE更新

1st  Ericsson PF768 > 黃色    sunday

2nd  Bosch 909 Dual    >  灰色   people

3rd  Siemens A40     > 藍色    orange

4th  Ericsson T29 > 銀灰色外殼,紫色panel one 2 free

5th  Ericsson T39 > 灰藍色   one 2 free

6th  Sonyericsson T300    > 紅色 (紅豆)    smartone

7th  Sonyericcson T630    > 黑色    smartone

8th  Nokia 6260    > 銀色    smartone

9th  Nokia 6270    > 黑色 (深啡色,鋁金屬外殼)  smartone

10th Nokia 6500 Side   >銀色(鋁金屬外殼) smartone

11th Nokia N86 MP >白色     smartone

12th Nokia N8     >橙色(金屬外殼)   smartone
13th Sony Xperia P >紅色(金屬外殼)   NWMOBILE

三大一小去沙田

今日同台灣女生帶幸男出沙田,外母都有隨行當行商場,一落車第一站係去PACIFIC COFFEE. 買咗杯Babycinno俾幸男飲,起初好似唔太啱,吮少少就放口,但結果飲晒. 

我同人家就一人一咖啡,再分一個煙肉洋蔥批,對上一次黎都係幸男三個月大,仲記得一坐低幸男就扭計喊,食埋法國奶都喊,結果攰到訓著咗至安安樂樂. 

其實今日主要目的係去IKEA買幾張圓櫈,配廚房枱櫃桶(變咗型),揀窗簾布.櫈就買得成,但櫃桶就無得配(只可成組買過),窗簾又唔啱心水,反而買咗個戶外摺枱連兩張摺櫈.幸男係IKEA有啲失控,唔要抱同坐車,一定要自己行,但又行到四圍走唔拖手,再唔係就要推購物車.屢勸不聽,結果被罰番上車坐,兼受讉責. 

當我同人家搞送貨事宜,外母餵幸男食小食.見幸男平復啲,大家至察覺佢可能肚餓扭計,要開餐,於是拉大隊去食拉麵.

之前同人家黎食過,因為好味所以再幫襯,好在都啱外母口味.大熱天時,無帶幸男既飯仔出街,因為怕係保溫壼內變臭.餓到肚都肩既幸男唯有食拉麵同蛋白黎充飢.食完嘢,行多陣一田就搭番車番屯門,下次都係出半晝街好了,免得餓親幸男.....

80後家訪幸男

是日sleeping,訓到點零鐘起身同台女先去棠記食下午茶,再行去市中心間italian tomato買蛋糕,因為今日有80後上門家訪.Leo同褔娃係蛋糕店會合我同人家,一齊搭的士番屋企,可惜臨落車就落大雨,結果上身衫濕咗,要暫借衫著,好在我啲衫都啱佢哋著啫.詠湘同輝BB之前黎過,所以一齊搭輕鐵入黎,小蘭就要電話聲音導航兼我出去球場帶入小路. 

除咗有蛋糕外招待80後,幸男既笑容當然唔少得.幸男都要一段時間打量各位訪客,見同爸爸媽媽有傾有講至放心同大家一齊玩.

其間幸男有表現邊聽westlife既uptown girl邊"un"身,好似落disco咁,大家都係咁笑. 

上幾次都整喊幸男既輝BB,今次表現唔錯,可以同幸男玩到"騎騎"笑,不過要付出唔少體力......

全靠抽濕機同風扇既支援,,臨走前Leo同福娃件衫都總算著得番上身,幸男都算俾面,影相望鏡頭.多謝大家上門家訪,希望無悶親大家... 

PS:夜晚去完老家黐餐後,幸男係拎起幾年前rita送既茶品禮物盒出黎玩,加埋手上張紙,好似要去旅行上飛機咁,Lonely Planet~

丁丁歷險記

今日同台灣女生一齊放假,租咗隻"丁丁歷險記"俾幸男睇吓,睇睇吓又覺得都大人睇都OK.以前只係租大人題材既戲,而家有咗小朋友,都會特意抽時間同小朋友睇卡通動畫電影,一齊笑吓兼嘗試靜態啲既娛樂

藍光碟加上史匹堡出品,畫面夠晒靚同細膩.故事由丁丁係街檔買咗隻模型船開始,原來該模型與另外兩架同款既模型船內藏有當年偉大船長HADDOCK既寶藏.當年船長同宿敵海盜之後裔亦捲入是次跨代尋寶兼恩怨.

冒險故事,上天又下海,幸男睇得好入神,怕傷眼睛,睇咗一半就停播休息,食埋晚飯至繼續下半場.惜幸男中間時間扭計,結果被調教後至有得睇下半場.

唔太積極同進取既我,只想幸男可以享受家庭溫暖之餘,亦從家中日常生活學會自理能力,危險意識,規矩禮貌.

姐姐探男男

今日小歌仔黎探幸男,其實話新屋入伙就聚吓,但就極DUTY都唔夾,結果到今時今日至成團. 

今晚既大厨係台灣女生,菜色係西餐.我同人家先係吉之島買牛扒,沙律,三文魚刺身.番到屋企,我就騎羊入元朗買生蠔同紅酒杯.

卓敏要放工至入黎,所以最遲見幸男,但幸男都無扭計,玩波玩到"卡卡"笑.

開餐啦~簡簡單單,西式晚餐,大家都食得滿意,有講有笑,仲有雪糕甜品添. 

左手邊個支係小歌仔去前蘇聯分裂出黎既阿美尼亞旅行買既紅酒,右手邊係卓敏係元朗買既法國瑪歌紅酒.當然開咗支法國紅酒,因為品質有保證,加上小歌仔旅行團友話試過該紅酒係酸的,同當初係酒窖試既完全兩回事.

可惜飯後無時間影大合照,因為卓敏第二日要番工,我又顧住同教練傾電話,結果係人家同幸男,小歌仔,卓敏用手機黎影相.希望下次食飯時,補番影大合照啦..

一星期內第二次既黃金海岸自助餐

再一次番完早更同台灣女生到海金海岸酒店食自助餐,今次主題為老媽既母親節.上星期同外母食完至收到老豆電話,話大佬提議搵一日去黃金海岸食自助餐,經WHATSAPP磋商後,定咗今日.

嘢食質如何都係其次,最緊要係有孫仔幸男相伴.我同人家先上CALL的士,兜去老媽村口俊達茶餐廳接兩老,再去黃金海岸.

幸男同大家乾杯,又跟爺爺嫲嫲出去戶外去同其他小朋友姐姐妹妹追逐;又跟伯伯同伯娘去攞嘢食.....

幸男無上次食咁多嘢,但都係表現尚可,只係同其他小朋友玩時唔願走,少少扭計同喊.

由農曆新年帶幸男番老家至今,幸男已經好熟老家同嫲嫲,希望老媽唔好再對老豆唔好,一心抱孫為樂就好了,年紀都唔細咯,開開心心咁過,就好了.自己做咗父母,先深切體會湊大一個小朋友係唔容易.即使偏愛與否,父母養育之恩都包含不少付出同犠牲.

黃金海岸自肋助餐預祝外母生日

今晚同台灣女生,幸男及外母去黃金海岸食自助餐,因為預祝外母大人翌日生日辰,當埋係母親節~ 

好多年無黎食自助餐,不過一樣都係無生蠔食,陳設無咩唔同,唔太靚又唔太老土囉,中規中矩. 

戶外可以行到去海邊,兼白帳篷旁,我記得同房阿BILL都係個度結婚,可惜當晚因為翌日番A/N而早走.

戶外有熟食檔,另一邊有炭燒乳豬仔同雞全翼,BBQ牛仔骨及其他食品,但唔知點解無牛扒.......

全場汽水啤酒任飲,但得獅威,可樂同雪碧........................室內則有熱咖啡同紅茶供應.我因為番完早更,係屋企做家務又無小睡而攰到頭痛,所以無飲啤酒.

幸男唔計錢,雖然有食嘢,但唔係樣樣啱,最鍾意食醮咖哩用既薄餅,其次就係食雲尼拿雪糕.

人大咗唔係太鍾意食自助餐,除咗為食生蠔,反而想集中食自己想食既菜色,貴少少都無所為.自助餐係咩都有,但唔係味味啱,而且質素會無差啲,生蠔都無大隻你食啦.外母大人反而鍾意自助餐,可能多熟食,而且有孫仔陪住,當然食咩都更加開心啦~