接應流感男

原定先騎羊去藍地相熟茶餐廳食晏,但預唔夠時間出門,結果要搭輕鐵去安定搵地方食晏再趕去接幸男放學.中低價食店已被中學生盆據,唯有幫襯呢間KILLINEY.

新加坡茶室,菜單唔太多選擇同花巧,我揀咗個海南雞飯.味道唔差,只係個醬比較淡味,可能食慣泰式.八達通付款有折,$63比起翠華都唔算太貴,至少包杯涷奶茶(幾好飲,落單時女店員問我要花奶定煉奶).

轉個彎就到學校雨天操場,以前小學既我於小息時,從欄柵之間窺探外面既世界.

疑似流感既幸男,燒咗4日3夜,是日復課,總算捱到放學.平日坐得唔正經既幸男,今日卒之闖出禍,失平衡致前額撞枱,幸好眼鏡及眼睛無受傷...

坐低無耐,幸男就捽手指(眼訓小動作),唯有臨到站至叫醒佢落車.

幸男沖過涼兼食過茶點,就先睡一會.見幸男額頭同頸背都有點微熱,於是貼上退熱貼,希望幸男可以安睡.

今日係特選星期三，早放學啱晒補償小睡既時間。希望快幸男快啲回復元氣，準備迎接暑假。

訓晏少少既假期天

晏晝出藍地食晏前,一如已往,一手拎住頭盔既右邊,再順勢雙手扶戴頭盔,點知"啪"一聲,右邊風擋膠托斷開.好在斷口位唔太界手，仲可以安心使用.頭盔已服役四年，但未見有新拉花款式,故無意替換.

壞開有條路,平板電腦叉唔到電,見個火牛(左)同Philips led candle light叉座果款(中)既spec差唔多,於是膽粗粗試下,又得喎.出市中心買日用品,兼係華都相熟電子店配咗隻新既番黎(右),一片心等幸男考完試至拎個平板出代埋搞屏幕有一横死點既問題.

冚好電單車,急急出門搭輕鐵接幸男放學.無為幸男準備茶點,於是帶幸男去學校附近既麥當勞食開心樂園餐,再送幸男上功課班.

夜晚約台灣女生係置樂小曼谷食飯,人家放工徒步前往,我就騎羊會合.平時幫襯開泰味軒,見今日小曼谷人少至入去.好耐無惠顧,價錢平,但味道及環境都唔及泰味軒,但人家話生菜包好食啲~

食完飯,騎羊送人家上外母家接幸男,假期天就完結了.

ALIEN: COVENANT

雖然無睇上一集既<普羅米修斯>，但都趁高興與一眾異形迷一齊入戲院睇<異形：聖約>。

故事不時有<普羅米修斯>之憶述,所以唔覺太大脫節。原來異形既前身係生化武器，剿滅新星球上之動物物種，以方便人類入主。可惜生化人David之極端哲學性格,萌生出培育新物種以適應惡劣環境,代替原定既扶助人類於新星體拓展生活之使命.

連番惡鬥,人類殖民太空艦隊員傷亡慘重,最後更被生化人David冒充善良既生化人Walter潛入太空艦,將異形胚體帶去宇宙中下一個星體.

近近地行去v city既和民食晚飯,價錢相差一倍既溫泉蛋牛肉飯~

基本上大家都係各自叫一碗飯兼一杯飲品,再一齊分三樣小食.

總算順利一齊睇戲,因為當初其中一張飛與大隊隔咗兩個吉位,以防再有男同事加入,點知俾人買咗呢兩個位!我臨開場前用手提電話上網望多次,見大隊既另一邊仲係吉位(未被訂購),於是膽粗粗以K9飛坐K16既位.

兒嬉保齡球

是日放假，幸男都見到同學，因爲今日台灣女生同幾個家長約咗一齊帶小朋友去碌保齡球。

小朋友們都係亂扔一通，因為有防落坑圍欄，大家都會有得分進帳。大家理應用最輕既球，但小朋友偏要逞強，嘗試其他重量。雙手攬住個波走幾步，停低就拋下重球，“嘭”一聲…望天打掛般等保齡球樽被撞倒。

家長小組形式作交流，我就繼續以相機黎打發時間，偶爾訓示幸男不當或不禮貌行為。

結果幸男係最低分果位，但最高得分都唔過100…臨走前，大家係分牌下一齊合照。

搭輕鐵番安定，原定一齊食大家樂一人一火煱，但由於夏天到來，已無火煱供應。轉去加藤屋，等咗唔夠半個鐘就有位，我點咗呢個"擬 Pepper Lunch"鐵板牛肉飯(味道一般)。

幸男揀咗咖喱吉列豬扒飯，人家揀咗一人火煱。呢間餐廳好似集Pepper Lunch, 吉野家，Izumi Curry於一身。

未等夠位時，小朋友先盆據一張枱，並一齊分自攜之玩具作玩。食飽飯就再聚番埋一齊玩，可惜同學們都掛住望平板短片或手機遊戲，幸男唔開心到喊出黎，話無人陪佢玩。同學們見到呢一幕，相繼放下電子産品，再一次童真交流。

同小朋友影相真係撞手神，中焦或可觀度高既相片唔多，顧得人物動態又無暇留意背景～

Story Time

平時幸男既故事時間都係由台灣女生負責,但今晚就由尚未沖涼既我代替沖緊涼既人家,免得幸男遲訓覺.

雖然房內有好多Thomas故事書,但我就揀咗星座故事書裡山羊座同雙魚座既故事情節.

父母總會將自己既興趣薰陶小朋友,我亦希望幸男會學識欣賞大自然中既夜空.

影月

係花園望見樹影間有明亮月光，心血來潮入屋拎相機同腳架出黎，可惜最接近肉眼所見既就只係得呢張。連番既嘗試下，月光位置已偏離最初既預設，圓面亦失去感動力之大小。

原來要影一個又圓又靚既月光唔係一件易事,至少要有支打雀遠攝鏡會好一點(天涯鏡既成像有點力有不逮).有雲又會因為曝光時間而被移動中的雲遮月兒,亦會打亂或無法確認設定的效果.朋友們安慰我空氣質數都係一個因素,但我始終覺得自己懶,齋係屋企就想影一張滿意既月光相片,是有點奢望........

緊急應變晚餐

台灣女生買好晒餸,一心煮餐住家飯,點知煮煮下發現爐火自行熄滅.身在良景既我立即打電話去供應商,但由於已近七點,師傅已收工....番到屋企見人家已拎出卡式GAS爐黎煮餸,好似户外主題既烹飪節目。

輕食神器Bruno都出動埋，因為插個拖板就可以啟動。開飯啦,3餸1蒸蛋,都叫做照原定食譜黎處理食材,有勞人家.............

PS: 其實尋日諗住今日早更放工就call供應商換石油氣，因對上一次換已經係農暦新年。可惜放工太攰兼掛住趕睇埋隻生化危機之終極屍殺，唔記得咗………

故事講Alice經電腦網絡，收到Umbrella電腦系統管家Red Queen之洩密，T virus 之解葯存放於熊市基地底部之Hive 。故事無乜驚喜，但總算交代了女主角Alice(T virus發明家Marcus之愛女Alicia的複制人)及Red Queen(Alicia童年的影像及聲效型態)之由來.最後身患早衰症兼以輪椅代步之Alicia連同Red Queen及Alice聯手毁滅基地,成功讓T virus解葯隨空氣向全世界飄散.Alicia犠牲自己前,將自己既回憶上載到電腦晶體,並希望Alice可以代替自己,擁有著真實回憶而活下去.

手裡劍神

三婆孫去完旅行,今日幸男就要番學啦.台灣女生話幸男旅行期間表現良好,於是我將之前買落既DX版手裡劍神(手裡劍戰隊機械人)送俾幸男.

忍者機械人,飛龍,工程車,新幹線,忍犬,一齊跟住說明書黎合體~

手裡劍神合體完成,幸男仲拎埋舊年係伊賀買既忍者刀玩具出黎一齊合照.話說有次行尖沙咀既玩具反斗城,見到基本版同DX版,幸男比對過之後就話DX版靚(精細)啲.從包裝盒得知DX版會有聲效,原來合體時,頭部既手裡劍部件,會播出合體時既主題音樂,親身呈現電視情節.


幫幸男砌埋個飛龍模式,真係有番電視飛龍型態既主樂同聲效，幸男非常滿意呢份遲來的半歲生日禮物。

PS:幸男第一隊愛上既特攝片戰隊，逢星期日都會幫幸男預校錄影，怕未訓醒而錯過嘛～

一人前假日

台灣女生同幸男及婆婆去旅行,是日放假既我可以安在家中為愛羊清潔打蠟兼噴膠皮保護劑.對上一次既紀錄已經係四個月前,平日都只係會掃風擋上的塵污,再過皂水及清水,以軟毛巾抺乾.如果車身有明顯污積(如雀屎及昆蟲醬),先至會以相同方法清潔.

電鍍側架都"省"到閃鈴鈴,感覺有啲似懷舊時代,街邊檔踎底幫人擦皮鞋咁.夜晚番老家黐餐,老媽病咗,煮好就入房訓覺,基本上無見過佢.

上次人家帶幸男去韓國旅行,我一心諗住可以全情打機(ACE COMBAT),結果機都未駁過線,就要去接機(番工放工後都無咩時間).今次我都唔寄望可以重啟Wii U既忍者龍劍伝......