元朗屯門兩邊走

番完早更,騎羊入元朗,係一間細咖啡店食晏.天氣凍(15度)兼食風位,飲住杯熱cappuccino黎等蘑菇批。

特意騎羊入元朗,其實係為咗去pccw既客戶服務中心領取超市禮劵(搬遷地址費之回贈)。順道行過燈飾店，但唔見心儀既Philips candle light ，於是騎羊去市中心吉之島購物。

夜晚一人前晚餐－鰻魚飯，配番杯住家餐飲。

台灣女生去咗同事屋企打邊爐，我見未夠鐘出羊接人家，砌埋機碗碟杯。

忽發奇想以LED 頭燈打光影洗碗碟機運作水花之後，熄埋客廳燈，創作柯柏文X波動拳～

假期的日常

是日放假,但都係貪方便騎羊去燊光食晏,$40包凍餐飲,午餐有10款選攞,仲想點?

騎羊兜去良景補給日用品，順便係客務中心補番之前係輕鐵站增值八達通失敗既錢。

動手執拾士多房，將舊一代既黃道12道聖衣神話吉盒掉走，驣出入口空間。相機背包亦掛係伸縮通，減少書房既凌亂。

台灣女生放工係市中心買餸，回家主理晚餐。

難得有住家飯食兼忙咗一個下午，開番支紅酒作慰勞。

咁啱屋企有提子汁，一家三口一齊以葡萄飲品作乾杯。

無機為繼，唯有換電

今日晏晝出咗去旺角銀城換智能電話之電池,因為近兩三個月電量跌得很快.二月頭就足一年保養，打去維修中心問過，電池只包半年，換電要$220,另加手工$200。即使放低部機一日兼check到電池損耗多過80%,都要俾手工同料錢，所以我揀咗直接換電，2小時後取機既方案。

無諗過新電得10%電量就作交收，想俾客知道係換咗新電？？好在有帶叉電，立即補血～其實中間果2個鐘，我係銀行中心既Starbucks飲咗杯凍咖啡兼睇咗陣書，再係星際及Action robo睇咗陣嘢，結果近3個鐘至上番銀城。

機背既玻璃同電池一體化，所以變相有新機背，連相機鏡面都得到重生。試影過幾張相，成像清晰咗～

PS:台灣女生接幸男一齊去食赤橋拉麵，我係紅橋巴士站落車行去門口等人齊入座。

倆公婆點秋香

今晚係特選星期四,幸男在婆婆家用餐，我就同台灣女生於區內食飯小休。人家放工去咗置樂既按摩店鬆一鬆，無咩情趣既我諗起網上介紹一間就近人家去既新食店“秋香”。

部份酒品以掛勾形式作陳設，感覺蠻特别～

雖然牛仔骨煲仔飯係貴咗啲($168)，但味道同肉量(4塊)都交足功課，窩蛋撈飯亦係亮點。

相熟日系生啤，當然要影番張相(個頭壓扁咗)～

柚子菊花茶$48一壺，都算抵飲。

人家對花茶情有獨鍾，點可以唔叫模特兒定格黎影張最靚既設定呢？

秋香煮海鮮煲$238,有蝦，帶子，青口及芝士年糕。味道唔錯，湯頭夠濃味。

最後叫埋串燒雞中翼同牛粒，口腹皆滿足～

侍應姐姐能操流利日語同廣東話(請自行定斷是否日系)，而落單既日籍帥哥則主要用日語同女侍應溝通，以英語夾集少量中文與客人互動。

店內有唔少客人係黎輕食兼飲酒，我入座無耐已開始要排隊等位。雖然餐牌選擇無正式套餐，但作為一間居酒居，已經足夠留住我哋既心。

心軟的爸爸,心碎的幸男

是日放假,奉命接幸男早放學(考試天),兼帶幸男去食慰勞午餐,再去濕地公園玩.幸男話要食元氣,雖然自己有點肚痛,但都照等午市開門入座.

每次黎元氣都要食蒸蛋,唔明點解可以咁滑口同無氣泡~

番到屋企,一心唔再出街,抖吓個肚.見幸男一個人係廳內玩玩具,心裡有點過意不去,於是照原定計劃搭輕鐵入天水圍.我掛住用天涯鏡四圍搵嘢影,走在前方既幸男不時回望催促.

可惜到達時發現,是日休息.............幸男失望到快要喊出黎,但我都照叫幸男埋位影張相俾媽媽睇.期間有國內旅客一樣摸門釘,並委託我為佢哋於門外影相留念.

 原本都有諗過去完濕地公園就去銀座站附近既實惠行吓,因為市中心果間執咗,而家就變成主要行程.無諗過呢張電腦椅要成$999,價位拍得住IKEA.

小朋友心靈受創,當然要食番個開心樂園餐黎緩和吓.大人就無呢個褔份,因為無MacCafe,無得飲番杯咖啡同食件餅~

臨走前,行番去實惠買廁紙作手信.試後勞累兼好夢成空既幸男,上車坐低無耐就訓著咗....

晚餐及小食@紅橋

今日番晏補鐘,一個人騎羊去紅橋既赤橋拉麵開餐(台灣女生一早向外母報名黐餐),依舊柯打呢碗辛辣味噌拉麵.店員溫馨提示該麵會有芝士粉,喜愛芝士的我急忙回答:"無問題!"

食完麵,去咗附近既小食店買臭豆腐食(辣醬加豆瓣醬),15蚊兩件,平咗1蚊.店外有唔少人都係等候即叫即炸既臭豆腐,畢竟區內無咩地方有得食.味道唔錯,但重口味既我認為可以再臭多一點~

泊羊時已聞到到有臭豆腐既味,於是跟隨香氣搵到呢間小食店,盤算飯後小食.

PS:見到有架YAMAHA MAXAM250,但無尾牌,座位上放咗兩頂頭盔,有點奇怪.......

最低騎羊氣溫紀錄

用天文台App 睇過得7度，入冬以來仲唔係今日最凍？

開車前，以最大輸出黎預熱e HEAT手套 .中厚mont bell長袖天蠶衣X2,Topvalue短袖保暖T恤,厚津領線衫,TAICHI保溫頸巾圈,TAICHI電單車褸連夾綿內膽,UNIQLO防風牛仔褲加羊毛襪！

無懼風寒效應(行車時應該有雪櫃咁凍),成功與愛羊到達相熟茶餐廳食晏,為個人紀錄而拍照~

咁凍既天氣,最好就係食焗飯(雖然平時我都食.......).

食完晏,與愛羊一齊挑戰七度下既公路,借口係去市中心吉之島超級市場買士多啤梨俾幸男~好在今日有新貨番,之前只係得甘王.

PS:期待可以再買到"露之水滴",以及"宮城鑽石士多啤梨".

Set Dinner @PENTALOUNGE

一半為咗Frontier, 一半係貪呢度既set dinner 同outback差唔多價錢，所以約台灣女生黎PENTA HOTEL食飯。

人家剛係婆婆家替幸男溫習，等食時已攰到打喊露…

晚上八點鐘，餐廳內唔算人多，只見一枱情侶，其餘係兩三台聚腳小酌客。

環境唔錯,話晒係新裝修,當年真係無諗過工廈改建既酒店,會係可以咁OK~
芒果牛油果雜菜沙律，味道清新，只係食剩唔啱口味既牛油果。

墨西哥豌豆湯，有點辣味，另類版羅宋湯~

Set Dinner唔包飲品,抱病在身既人家叫咗杯檸樂煲薑。

上菜時間要等好耐,上主菜已經係落柯打後一小時既事....雖然係耐,但味道又真係唔錯喎~穀飼牛西冷配紅酒汁,即使無問客人幾多成熟,但七成熟既結果又啱啱好(塊扒唔夠靚黎煮五成?)。薯寶內有細塊煙肉,令單調既味道添上一點燻香。

黑松露醬帶子意大利飯,人家嫌略鹹,但我就覺得無問題(年長3年之重口味?)。

好開心區內有一間風格較新潮既酒店,期望晚餐既選擇會多點款式,因為上網望過既介紹同我今晚既menu只係相差兩款.另外,侍應生之服務業不夠熟練,可能太年輕吧~

PS:中銀信用咭有八五折,埋單都係四百幾。