Beer with Netflix

今晚台灣女生帶幸男出去同大學書友食住家蒸氣火鍋,我就可以一個人安在家中,邊睇NETFLIX既Altered Carbon Resleeved動畫電影邊飲啤酒~之前睇過劇集既Altered Carbon,但故事唔太吸引,可能同攻殼機動隊太類近。Altered Carbon Resleeved以日本黑幫為主線兼動畫形式,反而更易接受為攻殼機動隊之外傳。

晚餐係番焗尋晚BISTRO BON既小食,份量都足夠填肚,話晒都有舊威靈頓牛丫~

3連假的第一天

食完晏,騎愛駒去黃金海岸既Market Place,人流唔算多,但食店外都有食客等候入座。

上次去到K11都係無貨,一心近近哋黎買ECOSTORE既粉劑,無諗過竟然有seventh generation既洗碗碟粉(當然買夠兩盒)~

排隊等俾錢都多人,離開時順便去遊艇會邊望下。由細到大都係屯門,呢度亦都有唔少回憶。

宿舍時代,最愛與一眾宿友一齊去飲酒,星群地中海餐廳亦係其中一個常規聚腳點。瞎聊,開心,八卦,煩惱,難題,大家都係亙相陪伴及扶持........

見疫情稍緩,夜晚一家三口出咗去bistro bon預食母親節飯,等幸男唔洗日日對住四幅牆兼有點新食意。

人家點咗杯富士山乳酪,曲形既杯配上飲品顏色,又真係有點貼提。由於無啤酒飲,唯有同幸男一齊叫果汁飲(幸男揀橙汁,我揀蘋果汁)。

其實尋日已搵光仔留定食材,所以今晚可以享用長腳蟹~

預訂台灣女生一直好想試既"威靈頓牛",一如所料口味唔太啱人家,因為太濃味嘛~我就依舊食兩舊已覺得滯口,剩低果舊牛同炸雞粒及薯條被打包走。

PS:多謝光仔既款待,只可惜是日多客,無暇合照~

SENNHEISER AMBEO SOUNDBAR啟動!

卒之都收貨喇,面對18.5kg既重量,拆箱及搬抬都十分吃力(幸男都有幫手跟頭跟尾)。駁好晒HDMI線,放置好收音咪作客廳空間之測量,以補償房間左右不對稱~

購買前已爬文得知SOUNDBAR同座位要至少相距1.5米,但好幾次CALIBRATION都失敗(已閂晒窗兼無開風扇冷氣)。唯有將SOUNDBAR放到電視櫃最後,以增加間距,才能望見"Processing 100%"。

Robbin Hood係御用試機碟,因為弓箭雨下既一幕,絶對可以表現出前後左右既定位性兼包圍感。再試Dolby Atmo Demo碟,定位上比Philips Fidelio B8準確(可能受惠於收音咪既測核現場空間)。

駁上大佬健既舊sub woofer,理應重音會較好,但反而無震動廚房鋁板天花既舊景象(6.5吋比不上8吋?)。用藍光碟電影黎試,得出既結論係B8偏向依靠重低音黎掩蓋5聲道既乏力(似舊耳機BEATS SOLO 2 WIRELESS )。之前亦試過HDMI ARC模式時,B8駁唔上sub woofer,聲音頓然變得單薄。

PS: 試過電視節目及Netflix,Ambeo比B8唔係又高班好多,應該係音源不足既關係。睇黎會多啲買藍光碟電影番屋企煲,以發揮Sennheiser Amber Soundbar～

奶茶代酒

疫情下台灣女生都煮咗好多餐,今晚一於二人時光,家去貝爾特食晚飯。依舊人流唔多,只係門口既一角變成臨時reception。喜歡黎呢度食飯既原因之一係中西餐都有,人家就揀咗"自家製XO醬海鮮籠仔荷葉蒸飯~

我就揀咗肉眼扒,始終配汁係住家扒欠缺既元素~

限酒令之下,酒店餐廳都不能幸免,唯有以奶茶代酒…

CHECK車送大架

疫情下,電單車行既生意無受影響,依舊要早兩星期預約檢測。放低愛駒,先行去朗豪坊附近既裝修街配購廁所天花LED燈,好在第二間就搵到一模一樣既燈具(帶埋壞咗既LED燈去配兼對埋裝修時影低既包裝盒)。搭地鐵去K11,惠康唔見SEVENTH GENERATION既洗碗碟粉,係商場頂層發現家品店,啱晒殺時間~

屋企既筷子開始殘舊,咁啱又搵到"Dishwasher OK"既筷子,send相俾外母既智能電話,幸男滿意紅色底襯貓隻圖案~

呢個紅酒開瓶器唔錯,(包埋樽頸錫紙cutter),只需上下搖動把手,就可以裝酒塞拉出。期間車行打黎,話引擎燈著係因為O² sensor夠期,料錢$1020,總算少份擔心(起初估為係火咀)。

搭番地鐵去太子,貪平係花園餐廳食晏。疫情下既限聚令,每枱最多4位,兼要1.5米枱距。櫈都未坐暖,就俾隔離枱既後生仔請求調枱,因為想近住女同事張枱一齊食。

行多陣始創中心,打電問下車行,原來愛駒已準備好,只欠出單。燈位前鬆油慢車之拖拉感及雜聲,被歸咎為皮帶問題(已被調校)。

交收時,職員話發現愛駒係原廠召回既型號,有瑕疵既泊車大架已被更換。明明係電單車網站望過該項召回並無愛駒既車架批次,

PS:用咗一年既布冚已退色兼殘破,用黎冚洗衣機隔離既儲水桶。書房既士啤車冚正式服役,今日順便購入既車冚就留作出年用~

童心抗疫

食完晏,心血來潮拎斷空我出花園拍外影,小心翼翼咁放上外牆頂。之前修路既碎石堆,應該係唔錯既背景,可惜已成過去.....其實係長頸鹿買啲模型場景配件,砌個背景又得唔得呢?

晏晝一家三口一齊係NETFLIX睇"天空之城",我細個睇既時候應該同幸男差唔多年紀。事隔多年,畫面像數既升值,總蓋不過故事既童話美,音樂既融入感。暴力敏感既幸男都話"好睇",至少係睇足全程~勇氣,歷奇,愛心,理應從小就伴隨每一個人,去面對每天的存活難題。

PS:由於幸男腸胃不適,台灣女生送幸男上婆婆屋企療養,我就騎羊去V CITY八月會合人家食晚飯。雖然係主餐牌半價,但味道就真係差咗,兼且不少菜式都係售罄或無供應....

大人呃食兒童餐？

今日幸男既午餐係Outback既兒童餐,我就食屋企既麵包同幸男食剩既份量,反正胃口不佳(番完2個夜班)。由於只係嗌咗一個兒童餐,職員起疑心再問多一次,我答“係呀,買俾小朋友食”(其實麥當勞既開心樂園餐都唔會禁止大人嗌丫?)。

等外賣時行過LOG ON,見到之前係荃灣千色見過既MORAL。用開既背囊已經有啲殘舊,心水牌子Bellroy之外,另一考慮既品牌就係MORAL,不過呢個款好似太過淨色。

PS:自從訂Final DANCOUGA之後,不時將粗玩既斷空我擺吓唔同既pose~

FOODPAPA

其實我都係一個車手,不過我只係接一個電話既柯打.....夜班過後既我,騎愛駒出市中心買外賣,咁啱撞見有FOODPANDA同DEVLIVEROO既車手等送柯打,感覺蠻搞笑~

淨外賣無餐飲(有88折),安放好seat位下方既收納倉,就著車俾油出發。

順利無打瀉,不過啲湯好似多得滯。

幸男當然食得開心,至少唔係燊光常餐丫～

傍晚跟住YouTube 片示範，為Zippo火機換火石。尋日順便係安定買埋電油,因為清貨結業,怕區内難搵…

文藝風Zippo火機復活!雖然見過唔少既款式,但都係呢款最優雅。

PS:店員點都無諗過,呢位客人係對點蚊香都咁講究～