唔完美,可接受,但亦都要改善

尋晚上YouTube睇住MEGAHOUSE官網既介紹短片,挑戰凰呀既二段Super Aero Boost Mode。

車尾部份還原度高,定風翼可以由水平内翻變水平外翻再變垂直,已令我讚嘆～車尾外殼兩側前段可以拉長，二段升壓鍋既伸長機關,亦貼近動畫。

Circuit Mode, Mirror Turn Mode, Aero Mode以及Aero Boost Mode都非常出色,只係Super Aero Boost Mode要扣點分數。前擾流包圍未能緊貼收窄既前轆,令前軚外露。如果前方紫色部份既擾流板可以再多一次摺疊既機關,相信可以縮短車頭之濶度。前端兩側既長牙變得更修長,前軚會被緊緊覆蓋。

QC方面,塗色精美細緻,但變形機關榫位有啲唔太FIT。我果架凰呀就有一邊前擾流白色摺板,以及一邊後轆側冚摺板(紫色)有點瑕疵。冀望兩三年後,可以見到AN-21既Renewal Version!因為是次既凰呀,與ASURADA既前擾流板有點似,只係兩邊既尖角向外翻出90度而已。

關我事嘛？

番夜班前開SWITCH儲吓Asphalt 9既汽車設計圖,點知彈出呢個畫面!

送咗一包咭過我,一開有成5款設計圖~

設計圖唔係舊車款之餘(有我好想要既H2 SPEED),仲有多300個A代幣!咦?會否我車庫既資料無咗,先至俾少少筍嘢黎作補償?檢視車庫同車手生涯進度,又無咩出入喎......

安心睇戲-WW1984

原本係舊年生日月份睇既WW1984,一拖再拖,卒之過埋個新年至可以係戲院睇。戲院收票處外有一大叠訪客資料表及數支原子筆,客人只需將填好既表格連同戲飛呈上,就可代替安心出行app。

有別前作BatmanV Superman: Dawn of Justice,Wonder Woman同Justice League, 女主角應付既敵人只係社區既小偷或強盜。故事有點偏向Spiderman既模式,要應對一個有野心並突然冒起既大奸角,所以無前作咁著重強大既神力及武器。感覺上係俾觀眾認識Diana如何適應人類現代生活,以及對情人既思念,當成英雄愛情片就好了。

睇戲前先係鮨千壽食晚飯,人家收工直接去攞位,但被安心出行卡關,畢竟係新政策。

較遲入餐廳既我就好順利咁入座,無好似人家咁受店員既為難。

晚飯前,我送幸男去置樂上足球班,臨停車泊位時驚覺地面有玻璃膠！邊個咁無公德心隨地派膠？提早急停,成功迴避圓筒,並將佢踢埋一邊。

倒後愛駒少少作檢查,前轆都有沾上前車輾爆既膠痕,唯有用濕紙巾抹走(感覺似玩Asphalt 9 被人陷害)。

PS: 華麗既金鷹盔甲原來只係用黎捱打…

年初一,行百貨,補年宵

年初一放假,晏晝番老家食晏,再搭小巴出市中心。

係V CITY落小巴,先係咖啡店坐陣。監守行為既幸男,獲得係NOW E睇重看英超精華既恩恤。由於人家部XPERIA 1 ii未能成功連接藍芽耳機,故我借出NOKIA 9(wifi上網)。二人限聚之下,唯有從後黐波睇~

行咗陣誠品,其中一書係Whats Michael既彩色漫畫,幸男邊笑邊睇,好快就睇完。咁啱教練又係V CITY,故一齊交換利是。兩家人見過面,就當拜咗年。

一田附近既家品部,搵到個特價花樽(陳例品),啱晒用黎插台灣女生買既年花。

另外,又睇中咗個大型晾衫架(有兩層),因為舊果個用咗十年有多兼膠夾位斷裂,一直用大衫夾黎頂住。

今年台灣女生係置樂利寶地下某花店買咗肯亞小白合充當西式年花。諗番起舊年疫情新年都無買年花,希望下個新年可以熱熱鬧鬧咁去行年宵。

PS:晚飯前係客廳擺陣照新春家庭照,不過只係用人家部XPERIA 1ii代勞(無咩過年氣氛,無動力拎腳架配A7iii)。

網上進修班

雖然考牌後無騎棍波車,但一直有留意各類電單車既新資訊及駕駛技巧(eg 如何應對各類突發情况)。

網絡發達, YouTube有不少有關電單車既影片。以往王道係俾住油出彎,而家已轉為Trail Braking扣住少少前brake 入彎以控制車速,兼增加前軚抓力(如有需要就以漸進式加前brake),出彎後才放brake。

電動電單車為大趨勢,希望下一架愛駒係電動之餘,仲可以係有波段操控。

見到的INVISIBLE BAG

今日去市中心間大阪牛肉飯拎外賣,第一次見到"INVISIBLE BAG"!!!

之前係網上見過介紹,話只要將INVISIBLE BAG放入80度熱水,即被分解成無害物質,可直接沖入水渠。好開心環保科技可以減輕地球負擔,兼開始商用化。

PS:疫情下,商店為保衞生,拒絕客人自備重用既容器,外賣即棄用品大增。

 

腸胃不適之我要食蟹粥

以為尋日晏晝食既炸豬扒菜飯太油,令腸胃不適,原來只係腸抽筋既觸發點。無胃口,十個鐘有多無食嘢,只係飲水維生,晚餐想食得清淡啲,所以同台灣女生講"我要食蟹粥"。兩父子係度等食,一個病到發霉,一個坐到發呆~

人家忽發奇想,收工去置樂街買埋其他海鮮,用BRUNO黎搞個粥底海鮮二重塔~

由於無源源不絕既蒸餾水推動蒸氣(業務用),所以兩層塔已經係極限~除咗鮮蟹,仲有蝦及蜆類~

好耐無腸抽筋發作,一如已往既臥床休息兼斷食。今晚食粥過後,省却了冰凍特飲,乖乖早睡。