誇區堂食午餐

禁晚市堂食後，少咗一家三口出街食飯。台灣女生是日放假，外母部電話有得攞，所以順便一齊出去食晏兼攞機。

訂定枱，一落車就直接去"蟹慶"食晏。

環境唔錯，夠晒日式，店員既日語招呼勾起旅行既感覺。店內客人唔多，可能係已經過咗一點鐘。

一人一個鱈場蟹海鮮盛宴，嘩~前菜已經有蟹肉~

幫活蠔刺身配酸汁影相至醒起,正話唔記得咗影刺身三點.....蠔身夠晒肥美，同酸汁好夾。

幫幸男揀咗個蟹御膳，幸男見我哋有燒鱈場蟹，忍唔住話要試一舊。

原本幸男好似半推半就咁，但幸男見到個餐就唔同晒聲氣。

好耐無試過鮮甜既新鮮貨，平時食開既急凍貨被比下去........

擺酒週年時食過喜之次，所以今次揀咗澳洲活龍蝦配海膽龍蝦汁。

店員話龍蝦可以用黎加工煮湯，加$40就可以有一碗，結果乖乖跟隨建議3碗。

PS:食完飯就上SONY客服攞番外母既XPERIA 10 iii，再行多陣SOGO。雖然巴士點對點出入，但大家都係好攰。

廳長唔易做

多區出現疫情，外母被誠邀留宿以觀察事態發展。尋晚訓瑜伽墊打地舖，都係太UN背脊，結果都係縮住腳訓梳化(結果腳痺)。為咗有覺好訓，今日就託台灣女生放工去DECATHLON買張露營充氣床墊。

廳長唔易做，人家買漏咗個腳踏泵(屋企個車軚氣泵唔啱咀形)，結果我要飯後騎愛駒出V CITY補購，回程時冒雨回航。電動氣泵無貨，腳踩泵要2分鐘至完成充氣，睇黎要係HKTVMall搵吓。

玩具X童年回憶

之前買落魔方既飛天虎(MENASOR)，合咗一兩次體就無咩點再玩，於是今日就幫佢份體組隊影合照。適逢有5個隊員，於是諗起兒時既5星戰隊托大炮既陣式~

上網搵咗好耐至有張類似既圖片，畢竟年代久遠，當年無上網，所以圖片都係舊圖冊既掃瞄版或者舊影片既CAP圖。以前既特攝戰隊了結怪人時，總係會組隊CALL支大炮出黎一齊"啡"瓜敵人，而敵方幹部又總會出法術將被炸散既怪人注入新力量兼巨大化~最後戰隊Call出機械載具，合體成機械人同巨大化既怪人作round2了斷。

有印像追看過既戰隊有,<光戦隊マスクマン，港譯：超能戰士>，<高速戦隊ターボレンジャー，港譯：雷霆煞星>, <恐竜戦隊ジュウレンジャー,港譯:無敵戰士恐龍戰隊>，係每個週末早上既寄託~

PS:唔係上網睇番都唔知原來當年無綫同亞視係隔住咁播特攝戰隊，唔怪得有啲係只記得個名而無認真追看(亞視個節目表常臨時更改)。

另類男人的浪漫

是日番晏，收工騎愛駒兜去置樂蛇王輝買外賣，一黎買番工作坊作探班，二黎自肥番屋企食(追趕每年食十碗既目標)。

限食令下，無得堂食，唯有係花園望住愛駒黎食，模擬街邊摺枱風味。食咗咁多年蛇王輝，由童年回憶變成情義結。

出太子

今日出太子始創中心，幫老豆搵電熱背心。兩間舖頭都話無大碼，要等番貨或落訂.......好在用電話係PRICE.COM搵到商場內仲有一間，雖然無現貨，但只需等廿分鐘左右就有同事令到店內。

無需落訂，真係廿分鐘就收到電話通知。店內試過電池同開關，就一手交錢一手交貨!

行番落深水埗，一心去鴨記睇吓有無得配e HEAT手套既電池(有啲死死地)。經過福娃屋企附近，隨心send張相，無諗過福娃咁啱收工搭車中，於是約係深水埗食下午餐聚吓。

對上一次見面已經係Leo既婚禮，以及前一晚既兄弟酒店準備。傾吓大家近況，講吓遠望，心情始有點苦中作樂。搭巴士去到轉車站已經係黃昏，好切合當下年紀心態。

撞正放工時間，係市中心塞咗好一段車程，之後都尚算順暢，急步回家小解。

台灣女生同幸男出去面試，經過一間拉打店，幫我買咗個口罩套。

原來打開有gimmick，見到喼內既腰帶同武器，可惜得DELTA，主角FAIZ的話會有更多既"架生"~

PS:希望件電熱背心可以令老豆有多點動力出去覆診，呢排都係主力要佢飲營養奶，儲番肥啲至唔會怕凍及小郁動。

愛機商品

今日係相熟玩具網站見到GOODSMILE既展品介紹，竟然其中一款竟然係斷空我，仲要係合金兼合體!!

介紹短片中以CG呈現各機體，鷹戰機可以話係完勝BANDAI超合金魂，千值練METAMOR-FORCE，以及threezero既ロポ道。無論人形模式或戰機形態，都非常接近動画，擺脫過往被忽視既三不像厄運。

長毛象既重裝甲車形態外觀結實，驟眼唔覺太多中空位，如果履帶可以轉動就無得頂(超合金魂可以)。另外，象耳出奇地忠於TV版。人形模式要挑剔既地方係大腿既紋理與線條,以及腹部側見到背部既側炮。

美洲獅野獸形態比例唔錯，人形模式四肢正常外，最難得係主幹唔會太短同肥突。

獅虎人形模式亦不再身肥手短，可以呈現出瀟灑身影~

今次有創新既反摺設計，能同時兼顧象形態既魯鈍以及斷空我既帥氣。

胸甲及肩甲有明顯既分別，為動画版既唔連戲荒誕洗白~

原型版表漆粗糙兼有不少接口位，相信正式商品會有所改善，反而我好擔心頭部既比例。面譜佔比較少，令頭盔顯得厚大，少了份帥氣，卻添一份違和感。

本人真係好在意背部側炮既突兀，破壞既收腰既美學.........

合體後既腳掌比例還好，未有threezero既厚底鞋造型。

今次GOODSMILE既作品好似著重各機體既獨立性，而將合體後既設計作妥協。寄望真品會有較完美既修定，唔好枉費擁躉既厚望。

PS:大張正己最新画稿好似少了以往既肌肉及豪邁風.........另外,如POSE+都出超獣機神-斷空我就好了，畢竟前作黃金俠同天威勇士都非常出色~

禁晚肆前既燒肉餐

縱使Omicron比之前既Delta弱，兼大部份打工仔已打疫苗，但政府仍要禁晚肆。今晚就趕尾車去市中心食日式燒肉，因為以清零為目標(兼過往既紀錄)的話，相信唔係十四日就可以........台灣女生放工攞定住兼叫定嘢食，因為幸男要趕去足球班~  人家話價錢好似平V City 既牛角，呢間主打沖繩燒肉，所以有當地菠蘿俾客人燒。食到尾段，我同幸男先離席，騎愛駒去足球場。原本諗住放低幸男後，番屋企攞頭盔去市中心接人家，點知人家不勝(梅)酒力，自行搭的士回家。

元旦的完蛋感

 

元旦日，通常會講有咩回顧，有咩展望.......但我懷着一個長期病患人仕或年邁長者既心情，"卒之挨過咗一年"(慨歎)，以及"都唔知挨唔挨到出年"(愁緒).........等心語。

唔敢有展望，因為呢一兩年有太多既失望，只會預算可以再荒誕成點同會有幾快。相信無諗過會有人會讚同要小學生驚同喊去學習歷史，至少為人父親既我，無俾小朋友睇<魷魚遊戲>，無打<PUBG>。