埋黎睇,埋黎揀,手套大特減~

今日陪老豆出尖沙咀覆診後，照舊去新港既美食廣場食晏。送咗老人家去巴士站上車，我就搭地鐵去油麻地，行去頭盔王睇手套~

以前以為頭盔王近果欄，原來係近救世軍附近。上網見搬遷減價，一心碰吓運氣。架底有日本制既皮手套，但稍嫌款式太單調，皮質太軟同淋身~

係頭盔王網站已對呢對法國品牌Helstons有興趣，可惜size唔啱，留住電話等番貨。不過離開店舖後，醒起有可能撞電單車褸既色，除非我買黑色或黑黃色既新褸。

PS:戴開既SPIDI URBAN手套背面睇好似仲幾好，但掌心面一望，指頭位已撻皮，手腕位既包邊皮已甩。有打去嘉利問過仲有無size，點知話疫情下唔做零售(淨做批發)兼無再入呢款品牌。SPIDI官網都再無呢個MODEL，睇黎點都要轉品牌，告別多年既關系~

邪虎丸

尋晚係YouTube見到有千值練METAFORCE既邪虎丸，非常感動～今日就係官網見到有介紹。有別之前既邪虎丸商品，今次千值練既作品係完全變形，無需掹走拳頭以換入前爪部件。細個睇魔神英雄傳時，龍神丸同邪虎丸呢對宿敵係至靚同型既魔神。

記得training時代，要出去九龍上堂，中間時間我係旺角既宇宙船買咗隻邪虎丸。包裝都簡陋,得個透明膠殼冚住塊彩式紙皮。由於唔洗換配件就可以變形，所以係theatre內拎出黎玩。

上網搵番當年既產品，虎爪係前臂後方，以轉動方式換入拳頭，而且肩甲位無得向後轉，虎形態有點怪。腳部亦只係腳掌向前傾，無咗膝蓋側面既長刺。事隔廿年，對千值練既作品當然係絶對滿意兼期待，已whatsapp老闆娘留貨~

生死時速-合家歡電影

晚飯時間睇ViuTV既暖男爸爸講到唔能夠離婚既婚姻就好似<<生死時速>>既情節一樣，被裝上炸彈既巴士要一直咁行，行慢過時速80就會爆。

"不如今晚一齊睇<<生死時速>>丫?"，咁就一家三口一齊熄燈開soundbar黎睇disney+。有別一般警匪電影，有解謎及動作特技，最後至係警匪環節。主角靚仔又帥氣，配樂同劇情一樣緊張，當年初中既我就好喜歡呢齣電影。幸男睇完都話好睇過<<狂野時速>>，我就不時向幸男提問，以作生活常識，例如巴士係咪直係可以衝得過橋缺口.........

PS:記得係百老滙電影中心買過Sandra Bullock既post card大細既咭相

電腦小升級

尋日同康楠跟嘉耀出深水埗黃金購物，成功為電腦升級及保養作準備，順便仲行咗陣玩具舖。我部電腦既SSD已服役近十年，近來經常長著紅燈兼load死或hang機(由其係關機前window update)，reboot都好耐都唔著機，估係行window既SSD就死所致。上網望過早幾年買既底板支援M2糟，但無寫明SSD都得，一心買咗唔得就放番上網賣出。

今日嘉耀就上黎幫我拆機，大讚隻火牛重本，我先記得之前試過死火牛至會重課金。好在垂直既底板邊旁(機身既另一邊)就係M2槽，嘉耀攝吓攝吓，成功入榫，唔洗大工程拆晒啲嘢出黎裝。搬晒舊SSD啲嘢去新SSD就斷電作結，拆都慳埋，多謝嘉耀既技術支援(原來RAM都有少少鬆)。

另外，尋日買既尿袋成功支援我部SHARP AQUOS R6。之前買Xperia 1 III送既MOMAX18W輸出尿袋叉得慢(話快速但要成個鐘以外黎叉50%電量)，Verbatim呢款就同GaN65W牛叉既時間一樣。

新乾濕吸塵機

人生第一部乾濕吸塵機，用咗11個月就瓜柴，得番個滾刷轉，而無法吸走污水。唔怪之得呢排污水兜無咁快滿，地板又無咁乾淨。尋日一放工就出去太子既始創間KoolBOX購買預留既KENVOR T3，說穿了又係一部國產影子機。上次包送貨既網購店無KENVOR T3，所以今次就要自己拎餐死。行貨$1799包6個月保養，水貨平2舊，結果係俾多2舊求個心安(雖然好大可能因運番大陸而要等好耐)。

KENVOR T3比Alfabot T30窄身，滾刷兩邊既死位亦比較厚濶(變相拖唔到既死位較多)，但重量就輕啲同易推啲。暫時發現既缺點係污水箱好易滿，要倒水好密(以前換1次,而家要3次)。其實店員有講過小米DREAME H11會好用啲(水箱大啲)，但我見要成2千幾，兼無信心挨到2年上次。

PS:希望下一年，香港會有TINECO既代理，唔洗再買"山寨機"，兼每年換一機.....

940920

今晚係<<940920>>既大結局，因為<<二月廿九>>既成功，令唔少網民對<<940920>>抱高期望。<<940920>>既舖排唔太和順，好似一開始較緩慢，而中段突然加速兼開始失焦。原本<<940920>>>係台灣拍攝，但因疫情而未能如期出埠拍攝(改為大澳)，劇本亦因而作出不少修改。睇完結局後，反而好想知原本既故事係點樣，小說文字版都好丫。

"入相"作穿越時空既契機，點子係新鮮，以即影即有等色彩出既時間，變為退色(天能既啟發?)，並以該段時間為回到過去時既活動時限。

楚凝入相回到過去，決意為余家聰救回母親，最後領悟到Yeesa既犧牲理論，向流星雨許願-犠牲所有人對我既記憶去改變眼前呢一刻。Yeesa將太空館飛交俾細個時既楚凝，未知能否令成年既楚凝補償番失去與余家聰之邂逅機會呢?

<<940920>>俾我既感覺係<<二月廿九>>既前傳加後傳既合成作，而阿月既奸角情節，不能融入原本清新暨哀怨既風格。我本人則比較喜歡二月廿九，靚人靚景，笑料穿插愛與悲既故事~

PS:軒公既客串，成為全劇既亮點~

想飲茶記奶茶

燊光因疫情而休業兩星期(之前係惠康門外,無意聽到店員話水吧中咗武肺)，所以晏晝都係要搵另一間茶記開餐，愛駒就泊住相熟位先~

本來諗住試呢間，點知入去坐低見個餐牌只有碟頭飯配嘢飲，見無人理我落單兼水都無杯，於是行番出去搵另一間。

剩番葵記，唯有照入，店內既紙皮石牆夠晒懷舊。老豆講過以前係亦園番工時都會幫襯，唔知內飾同當年係咪一樣呢?

午餐有7款俾你揀，奶茶味道一般，情義結下玉林苑既味道至係我既FIRST LOVE，我諗都好難飲得番。希望相熟茶記早日復業，唔洗咁飄泊搵地方食晏。

PS:疫苗氣泡下，食客要俾店員用智能電話既app嘟安心出行嘟完既qr code，見有打針至可以堂食，真係搵食艱難。

棄捐勿復道，努力加餐飯

各行各業都有員工受疫情影響工作值勤，無諗過canteen竟然19:00就無嘢食賣!!一眾同事唯有一齊落7-11買叮叮飯，選擇有限之下，大家都揀咗最多蛋白質既咖喱雞飯~

工作坊要臨時轉型以應對疫情，今晚係新挑戰前既平靜。但願"人盡其用"及"共渡時艱"可以換來多一點尊重，及多一點恩恤......