我的2023尾巴

朝早天未光，番工前係季季紅買點心做早餐。

可惜今日阿姐話無潮州粉果，唯有plan B山竹牛肉。

晚餐由外母大人主理，份量依舊超出4人前。

番工企前行藍地惠康，見香檳買2支有特價，於是買嚟同台灣女生一齊迎接2024。

飯後睇住英超嚟過年，慜大人同列查利臣都有入球，黎緊慜大人要離隊，為南韓出戰亞洲杯。

2023回顧:

-中學生無以往咁易笑面迎人

-三月復常(免口罩)

-轉帶漸進鏡

-小型太陽能收集

-迷上<<呪術廻戰>>，<<MFゴ－スト  >>

-十號風球滯留工作坊

-疫後一家三口去旅行

-海外見德輝一家

-轉用SAMSUNG摺機

-老頭子入老院

-十號風球滯留工作坊

-生日月份

-Blog產量少咗(人攰多咗，時間少咗)

PS:覺得身處之地愈來愈陌生，無移民都變咗二等公民;生活模式亦變咗好多，不再熱鬧，不再多選擇......

縱使疫情過去，但生存感仍舊淹蓋生活感。

NETFLIX過聖誕

聖誕檔期得今日放假，所以只係屋企一家三口睇合家聚電影。

一家五口，在職父母照顧手抱BB，青少年姊弟因為一次星際異像，第二日老豆同細仔對調身體，阿媽同大女對調，手抱BB就同家犬對調，鬧出笑話及尋找解救之方法。

子女唔明白父母既辛勞及付出，父母唔明白子女既難處及需要。劇情下令雙方可以100%易地而處，相信其他為人父母既觀眾們都會覺得，父母組別應該比仔女組別易適應，至少體能精神既提升及己有既社會經驗，可以扳回唔善長既項目失分。

PS:希望幸男睇完可以開明多一點，嘗試接受超齡（第三次青春期）男孩既建議。

8.5度出太子check車

montbell長袖天蠶衣+吉之島短袖保溫底衫+長袖線衫+電熱電單車內膽+電單車褸殼+頸巾圈+電熱手套，用最高既配置去應對8度既寒風。

雖然係大風，但受惠於TMAX既隱重，全程高速都唔覺辛苦。出到太子，個身同手指都係暖笠笠。

交低車匙，去始創中心相熟咖啡店打躉。除咗頸巾圈，拉開電單車褸拉鏈，無話因為有天蠶衣而覺得太熱。

咁啱嘉耀早收工，於是落黎太子搵我食晏。

今日預咗晏攞車，因為車行話BRAKE油同尾BRAKE皮都夠期換。不知不覺，TMAX已經足5年，行咗22000km+6000km，真係要發掘多啲地方去兜吓。

送嘉耀去巴士站後，自己行去朗豪坊借廁所兼逛吓。LOG ON呢個玩意令我繃緊既思緒帶來一點節日歡喜。好耐無行朗豪坊，無諗過高層賣日本精品既店舖(巴士店附近)仲係度。

四點唔夠拎車回程，係深井附近就塞車，要用多平時一倍既時間至番到屋企。Check吓電熱內膽既電量，得番25%咋。如果再塞耐啲，就要無太陽下捱凍回航。

三變SHATTER

今日卒之扚起心肝，完成三變SHATTER既飛機AV-8B Harrier。飛機形態已好接近真實機體，只係前輪既收納，稍為比前方既渦輪入風口突出，以及機尾因腳部既收納而無咁纖幼。

機械人模式都係早兩日至成功呈現，因為說明書既圖解及印刷質素，我要睇三條YouTube亙補不足。機械人與電影版非常接近，只係由車轆代替既渦輪入風位比較單薄。造工唔差，比起之前買既Blitzwing好得多，至少滑手而唔係油淋淋。

當初一拆盒就已經係汽車形態，其實我都幾鐘意美式肌肉車style。

曾因車尾信號燈未能展出兼底部既腳掌摺疊與網上介紹不同，向Action Robo查問是否錯體。

回覆係令我腦洞大開!平時玩開日系玩具，未曾試過大貨與試作品有所不同，尤其係一個月前應該係finalized version。

跟原廠回覆既實照，將被完善既車尾完美重現。第三廠既定位之一，就係正廠唔會投放太大資源既副角色，呢個就係我會留意第三廠作品既原因。

PS:說明書實照，仍然係一個月前公佈既試作品，未有跟隨實品一齊被完善......圖解設計與印刷，請自行評價。

家居Wi-Fi升級

Wi-Fi7既興起，令Wi-Fi6制式router降價。舊既TP LINK DECO M5三機組已服役4年多，偶而會斷訊號...HKTVmall見到3機MESH組合$2599，所以心動升級。尋日收到送貨，今日動工接駁安裝。

LAN線位係書房，第二個router就依舊放係一牆之隔既廚房，客廳既上下載網速約近500Mbps。

驚喜在尾房(第三router據點)既改善，以往上載只得100Mbps唔夠，而下載有150Mbps左右。升級後，幸男係房上網課Cambly就方便得多，我同台灣女生係房睇夜波都唔怕lag。

重遊兒時舊街

今日出ACTION ROBO交收早前訂購既三變SHATTER，每次行玩具店都令我重拾一點童真，陷入慳錢與好奇既拉鋸。

行埋現時點，無咩新發現同收穫。經過兒時探阿公阿婆既街道，以前既得如酒樓已變成老人院，地面大當亦已分拆成商舖。

望到呢個街道牌，好想佢係四十年前既同一個牌。

以前係阿婆阿公間房望落樓下就係籃球場，邊會諗到卅幾年後，球場隔離會變咗今時今日既頭盔王兼自己會黎睇嘢。

主力望下啲腰bag，但都係有啲大得滯，唯有用住taichi個細body bag（只夠裝銀包，電話同鎖匙）先。

服飾款式同上夏天黎睇個次差唔多，當時已睇中咗呢款T，可惜今次都係無番齊size。

反而睇中咗對電單車boot，即時用電話上網search吓，原來係意大利品牌Cleveiet，番屋企刨下網評先，話晒要千幾銀一對。

Flip 5外屏自拍，伸直手臂並以手掌持機，就可以輕鬆預視構圖及倒數自拍。原相直出太光，特意壓低亮度，追近實況氣氛。

細個時呢條街兩傍都係綠色既鐵皮茶檔及小店，而家變成車輛暫泊位。

而家得番一檔賣生果，唔知細個時行過有無見過呢兩位老店主?

行番出去彌敦道相熟巴士站，途經既老街道令思緒中既舊物回憶與心情展望，亙相重叠。

PS:受惠於車形作包裝，個盒都唔係好大。原本話一月至有貨，無端端早一個月就有得玩，希望唔會好似Blitz Wing咁令人失望。

兜秋風

秋涼天，可惜今日無咩陽光，不過都照原定計劃出車兜風。今次係去昂船洲大橋觀景台，順利跟住導航，只係最後既一個出口差咗miss咗(直上昂船洲大橋)。泊好愛駒，影番張打咭相留念，無藍天白雲，點都係差啲…...

平時少行高速，巡航式兜風永遠都係有益人車身心。

好在嚟得早，半個鐘後已無位泊，私家車約五架已無乜位剩。傾咗大半個鐘就打道回府，原本諗住行昂船洲大橋，汀九橋，再行屯公，但忽發奇想：不如好似旅行團咁丫-不走回頭路。

唔上汀九，行青馬大橋同汲水門大橋(享受吊橋效應)，駁北大嶼公路，再行屯赤隧道。雖然係兜遠咗，但無屯公咁多四綫轉三綫，三綫轉四綫，又少啲車cut黎cut去。

PS:少一點繃緊，多一點空間感。

特效POSE

星期五睇完七海健人領便當後，忍唔住要為呢位令人敬佩既前輩影番張瀟灑造型照。借台埋台灣女生部電話黎影呢張模仿照，只可惜無左手虎口張開既配件，搵日試吓拎其中一個手形去旺角皆旺問吓有無相近膚色既配件。

突然諗起網上見figma附送既膠片特效，我都可以買塊塊膠片，自己劃三七比例線同加灘紅油，重現『十劃咒法』。

雞煲

好耐都無係屋企食雞煲外賣，自從西川執笠後，巿中心既火水爐又愈來愈差，而家都只係偶然入元朗買。屋企食既好處除咗酒水無咁重皮之外，配料亦彈性得多~

份量算ok，至少唔會碎飲飲兼骨多過肉。少辣都唔係太辣，下次可以試中辣，但大家都食到個汁係帶點甜味。

PS:去紅橋既再來一煲攞外賣時見到有初代TMAX，佩服車主既耐心保養，忍唔住要同元祖輩打咭。

迎娶紀念日

約台灣女生係轉車站等，一齊等巴士出港島。趁等車兼無乜人，用A7iii幫人家影背光黃昏照（試咗好多張至收貨）。

晚餐主題係蟹，人家話之前有book過，但話我嫌貴(咁應該好多年前)，所以今次至第一次食。

餐廳門口有個蟹池，唔知係咪好似酒樓咁，有單就出黎撈呢?

研究一輪餐牌，精選性價比，結果揀咗“季”餐。聽唔切侍應介前菜，但又幾好味。

海膽鱈場蟹刺身，人家唔食海膽，結果過埋俾我食。餐牌無陳述黑色既係乜，唔通係Caviar?

難得二人放空，可以細味閑聊。

呢款蟹膳手工生啤幾正，我前後飲咗2杯～

松葉蟹同鱈場蟹都係即場係客人枱面清蒸，感覺有啲似係溫泉旅館食飯。

個箱係大，但其實唔係好多舊0架咋。

口口鮮味，食食吓好似仲好味過溫泉旅館。

燒鱈場蟹，每人一份。

諗起當年去北海道渡蜜月既時光。

原本有擔心個餐唔夠食，食到呢味松葉蟹天婦羅，已經有7至8成飽。

松葉蟹肉羮，無諗過係清湯肉丸咁。

凍毛蟹，都幾多肉吓。

黑松露鱈場蟹肉蒸飯，食到last一味都係以蟹為主題，絶無戲場。

相熟花店老闆娘今年外出，未能為我準備惠顧多年既花球，所以今日去咗市中心栢麗收貨。雖然係貴啲，但啲花又色水靚啲喎。

早兩個禮拜黎問價時，店主以為我係結婚用，我笑住咁答老夫老妻買黎當慶祝紀念日。今日憑單領取時，店員問我今日用定聽日用，以為我係老新郎定老兄弟呢?

PS:今年經歷不少，電單車追到既夠時間，都唔夠用嚟沉澱。平時無乜私人閒時既我，變得更加疲憊。