千金為買心頭好

掙扎咗好耐先至係CAROUSELL買咗GUNDAM OO劇場版既BRAVE COMMANDER TEST TYPE(ROBOT魂)，今日收貨喇（順豐到付）。事隔11年既産物，特意搵近乎全新既賣家。雖然係綑綁式連STANDARD TYPE，但無謂因少失大嘛～

矛盾大對決，土炮VS量子，陸戰高達顯得較為紮實，容易站立及擺POSE，BRAVE COMMANDER TEST TYPE就連直企都有點牙煙。

葛拉漢耶卡係我相當喜歡既角色，一部份因為佢既座駕FLAG。

未有擬太陽爐下，葛拉漢耶卡以OVER FLAG ，成功牽制Gundam Throne Eins，奪取其激光劍，並擊退對方(真係做到"超越阿修羅既存在)。

須左之男與前身摩修羅生，其實都係FLAG既延伸機種，只係削走變形既性能，並增添日式武士風外甲。BRAVE COMMANDER TEST TYPE，則融合初代FLAG既變形設定與摩修羅生/須左之男既線條。

由於Robo魂既size太精細，唔敢掹指揮機既腰部作變形，都係拆盒一般機黎變熟個流程先........

大快人心，賀歲鉅獻

晏晝一家三口去英皇睇<毒舌大狀>，雖然明知有粗口場面，但中一生點都要學習面對。雖然片長134分鐘，但絶對唔會有不停望錶既動機。

林涼水本為不可一世既法官，不被續聘之下，轉到老友私營既律師行接第一份官司。由於證人臨時改口供兼受傷兒童突然去世(未能作證非母親導至其傷害)，被告被判監禁17年。自責既林大狀離開專接有錢佬既律師行，自己係旺角唐樓接街坊法律顧問委託。事隔2年，水官得知當初轉口供既證人因絶症而於遺書告白-當初因鍾氏家族(私生女老豆之正印妻子)而作假口供，於是再次夥拍當年律師行既新人方家軍為苦主曾潔兒翻案。

"法律面前，人人平等"變成"法律面前，窮人含L"已好一段時間，現今社會仲要係"有例用到盡".....好耐無體驗過，求真-不屈-公義。電影宣傳"大快人心，賀歲鉅獻"，絶對係最到位既撮要!黃子華以往成功飾演過<男親女愛>既師爺，絶對勝任法律界角色。故事有唔少水官既內心戲，其張力令一眾預設黃子華為諧星既觀眾刮目相看。

PS:扮演檢控官既謝君豪，活演出金遠山既剛正不阿，擇善固執。

大年初一

年初一，朝早番老家食早飯(餸加煎糕)，晏晝番屋企影新年家庭照。新一年，希望一家身體健康，重拾笑面～

壓線大掃除，根本無時間行年宵，好在台灣女生分兩次買定年花(葵涌工廠區同屯門栢麗)，為家中增添新年氣氛。

豐富西日晚餐由人家主理，食材係人家影完相就出市中心選購。

過咗虎年至拎隻邪虎號出黎玩，造工係靚，但無奈無說明書，要用電話掃QR CODE上網睇PDF檔。由細到大都會儲低玩具既說明書，因為玩具爛咗扔咗，都仲有說明書可以回味及作收藏紀錄。除咗可以欣賞精美既紙品，仲可以短暫抽離，完全投入只有玩具既放空。再者，多年後既古董玩具，唔知個qr code仲用唔唔到呢?

PS:老豆情況無乜改善，幸男無收過爺爺利是，唯有依計劃行事。人大咗，歷煉少不免會挖空心力。

FIRST SLAM DUNK

朝早搭輕鐵入元朗，會合瑋霖同石表哥一齊睇IMAX版既男兒當入樽電影。

一直廻避網上劇透，但都知道主角為宮城良田。本人唔介意宮城作為各人之連繫，只係嫌未忘人情節太多，拖慢節奏。其實TV版或漫畫對眾角色既私生活描繪唔多，多數都係學校日常，籃球訓練及比賽。另外，電影色調走灰暗路線，連TV版既鮮艷都比不上，唔太明製作用意(唔通要特出非TV版及真實風格?)。

由於漫畫只係睇過一次，尾段花道飛身救波引致背傷，先至記得漫畫內容。對賽畫面比當年既動畫流暢好多，第一視角取鏡帶領觀眾去感受真實球賽既體驗。戲院內聽到女觀眾為射球而引緊張到嗌出聲，可見井上老師既成功~疫情期間，一家三口係VIU睇晒動畫版，兩母子既認知程度係湘北贏得神奈川縣代表資格，所以全齣電影都係新鮮元素。

散場係大海報前打卡，有勞瑋霖代工~挨年近晚，各有節目，石表哥同瑋霖無同我哋一家三口食晏。當年既爛尾確實傷透大家既心，但今日睇完之後，覺得贏到全國三連霸既隊伍，已經係無憾。體力不繼兼傷患，絶對係全國冠軍止步既合埋原因。

PS:希望幸男睇完可以多點投入球隊及喜愛既運動，因為我初中只可逢星期六或日(上午或下午)黐同學出街場打3對3，連自己既籃球兼練習基本功之機會都無。

First Love-化老土為新奇

世界盃之後，開始追FIRST LOVE，今晩卒之都睇到第9集最終回。初戀既經歷往往係夢幻開始，分岐介入，別離作結。如果俾大家一個機會，係分岐階段停下，以成熟既大人心景去再次應對，會否有另一個結果?劇集巧妙地用呢條橋，配合宇多田光神曲既加持，令FIRST LOVE有別韓式老土愛情劇套路(失憶原來可以咁玩)。

男女主角少年版演員都係相若級別既青春無敵，但成年後既女演員（滿島光）則好似有點被佐藤健比下去。

北海道取景係無得輸，加上自己新婚旅行亦係呢個地方，情義結加分。慶幸係NETFLIX出品，如果係電視台既作品未必有咁好既BUDGET同效果。

尾二果集，女主角個仔係男主角屋企拎咗部DISMAN番屋企，入電芯播機內既碟。呢個SHOT堅正，PANASONIC DISCMAN當年大熱之餘(我都有過一部同系列)，透明窗讓觀眾窺望到FIRST LOVE隻CD~

野口也英同兒子一人一邊耳機聽歌，閒坐騎樓望天，與當年與並木晴道係學校天台，邊望藍天邊聽同一隻碟情景重叠。丁香花既嗅覺，拿破崙意粉既味覺，手語既視覺，唇吻既觸覺，FIRST LOVE既聽覺，令所有回憶歸併。

最後一集，揭曉晴道往模擬試，於火車遇上也英時已一見鍾情，並係考模擬試時偷窺女主角心儀高中學校選項，繼而發奮讀書，一心再遇女神。呢個揭秘為主線故事，添上一個彩蛋。

女主角番去掘時間囊夠晒老土，意外發現內裡有當年晴道將呢段高中前之邂逅秘密故事寫成信。追加男主角離開日本前寫下既祝褔，原定10年後既溫馨冧女設局，變成廿年後既孤芳自賞。First Love既觀眾對象係卅幾歲層，除咗成長背景時代相若之外，更因為大家都有歷練伴隨既遺憾。

PS:結局係也英獨自往冰島搵晴道，仲要做埋空姐(高中心願成真)，日日番工都見到面，突然變咗<衝上雲霄>.........