鐵騎支援

幸男今日要去青衣東北公園草地足球場參加足球隊選拔，由於地點有啲吊腳，所以我用愛駒送到球場(半個鐘就到)。見尚有少少時間，叫幸男影番張相向媽媽作到埗滙報(話晒行屯門公路)。

一直希望幸男可以係足球隊學會積極主動，應變解難，紀律責任，可惜日常生活未見有起息。"做得好,係對自己既交代，係一種美德"，家訓不敵佛系性格x青春期....

J CRUISE II

早更放工兜番屋企放低行裝，騎愛駒出土瓜灣，不過無上次咁順利，行錯好幾次路口。平時黎都係平日，今日就好多人係店內，訂咗貨都要等一陣至可以俾錢交收兼做會員(DOWNLOAD APP)。

番到屋企，立刻為新頭盔影相。J CRUISE II標榜入風量比上代多30%(時速100Km/h之下)，另外後枕既鴨尾有助高速下之穩定性。

其實上次有諗過自己出呢個拉花，不過覺得俾台灣女生用會更好，所以只係訂番舊有既橙色拉花。

幸男升中，父母頭都大埋，但幸男就真係個頭大咗，所以今次台灣女生既新頭盔亦係幸男既新頭盔。

早前幸男都係戴媽媽個白底銀色拉花既頭盔，小學用既J.O頭盔都可以放入士多房珍藏。

PS:車迷城比代理既服務好，大家都係訂貨，人地俾5舊水訂兼等1個月(確定日本貨存起計)就有貨收，代理就要俾全數兼等半年.......

一人住家影院-EXTRACTION 2

開瑒緊接第一集結局，Christophr Hemsworth身中槍傷墮河，隨即被救援小隊於下游截救。

唔講仲以為睇緊ER，由於重創，手術後需要大量復康治療。主角光環之下，不但可以行得番，仲可以復出重操故業。

毒梟犯事坐監，但強迫其妻兒女陪伴過獄中生活。今次男主角受前妻委託，去喬治亞既監獄(毒梟買通當地警力及司法部門)，營救前妻妹妹及其小孩。之前既第一集既一鏡到尾廣受注目，今次亦唔例外。獄中營救已有一鏡到尾，而且獄中大騷亂場面墟冚。

除咗康復情節，基本上絶無冷場，感覺好似打緊機咁。結局留晒伏線作第三集既舖排，唔知Christophr Hemsworth會否繼THOR之後，開始新既系列主角?

PS:趁兩子今晚外出活動，先至可以炸SOUNDBAR配動作爽片。

電器殺手

騎羊出葵涌工廠區，明明地圖係啱呢座，點知我行咗去後面搵唔到入口。

繼TINECO既電池問題要維修，今次輪到ECOFLOW RIVER2。電量用到30%左右就會暴跌至0，未曾試過由30%均速下降至0%。同TINECO一樣，都係等3-4星期，電話通知領取。

PS:今日為超獸機神轉POSE，發現未能擺出夾胸持劍，睇黎太習慣千值練既3重肩關節。

THE FLASH

今日同大佬一齊去YOHO my Cinema睇IMAX版THE FLASH，享受AE買一送一優惠。

開場以正義聯盟既組合出現，Batman(Ben Affleck)騎三輪機車出陣應付罪 犯，The Flash則負責現場救援。最後由客串既Wonder Woman營救Batman。

The Flash意外發現Time Bowl能力（快過時間係佢自身既影響？），計劃回去兒時阻止母親被殺害既厄運，結果意外地困係大學時期既過去，並經歷Krypton星General Zod入侵地球。由於時間線被干擾，地球無超人出現。The Flash希望搵當時未出道既蝙蝠俠及水行俠幫手，但被干擾後既時空提早出現蝙蝠俠兼消失。The Flash連同大學時期既自己一齊去搵當代既Bruce Wayne，原來Gotham已太平盛世，故Batman(Michael Keaton)功成身退多年。聽到The Flash既講法及General Zod之威脅，於是老英雄重披戰甲，與新一代英雄去搵超人既下落。"You wanna get nuts? Let's get nuts"，今次唔係與小丑對持時既怒吼，而係與新世代既幽默。

有別MARVEL既合家歡肥皂戲式搞笑，今次導演用咗點到即止既方法去作致敬笑位，例如用炸彈作動力推動升降機時拉尺位兼問大家幾重，以及查Batwing時飛過雲層曬月光(營造Batman LOGO)。其實今次Batman既戲份都唔少，身為老fans當然開心。

成功發現超人表姐Supergirl，但超人早已被General Zod截獲並發現CODEC收藏於Supergirl(非Superman BB身上)，結果Supergirl聯同兩位The Flash及Batman去對抗General Zod。

可惜無論用Time Bowl回帶幾多次，Batman同Supergirl都係戰死沙場。正當THE FLASH想放棄之際，年青既THE FLASH繼續不停嘗試，並變成當初將THE FLASH困係年青時代既怪客。結果THE FLASH想起Batman(Ben Affleck)之勸喻-放下，成功讓時間亂序回復。雖然阻止唔到母親遇害，但成功令父親洗寃。

睇完戲，同大佬分道揚鑣，係戲院斜對面既新食店見到外買有七折於是雙眼發光，將餐牌相send俾幸男揀餐(龍蝦汁珍寶帶子意粉-我都估到係呢個)。

因為有折，所以揀咗最吸引(貴)既威靈頓牛兼自家制法式龍蝦湯，結果兩樣都無令我失望。其實個湯同肉桂蘋果牛角包係同幸男share，兩父子都好滿意呢個外賣晚餐（辛苦幸男要等到八點至有得開餐）。

PS:THE FLASH成功為DC宇宙reboot開路，希望往後會有更好既發展。

向G1致敬

近日除咗超獸機神，NEWAGE既POWERGLIDE絶對係另一常把玩既玩具。

其實呢一幕係向G1既2nd SEASON OP致敬，我都要上網望番條片至可以擺啱方向同角度。

忽發奇想，POWERGLIDE既size可以扮Wheelie騎上GRIMLOCK上。

8年前既陰霾

今日閒情逸致把玩斷空我，正當擺斷空炮フオンメシン時，右邊既側炮咁鬆既？

細看之下，右腰接合榫位唔對，所以令右側炮既活動部件未能被夾緊。試過扭鬆右心口及右後背螺絲，亦未能可又糾正榫位。雖然唔影响變形，但難免心痛。

PS:8年前千值練既斷空我試過右肩關節斷裂，由於係行貨，可以拎番代理搞。今次GOOD SMILE無行貨，所以都無得跟進，唯有硬食…

COMPUTER LOCK OFF

今晚卒之初試GOOODSMILE超獸機神合體，步驟與合金魂相若，只需重點係說明書了解強化既細項。

比例太正，力壓BANDAI，千值練，以及THREE ZERO。以往常被忽視既鷹戰機，今次係三個形態都好出色。實體望合體時既頭像，比CG圖靚得多，頓時重燃買多架既念頭，咁就可以玩到爛都可以有後備機體~

PS:忍唔住要係電腦開番DANCOUGA既片黎邊睇邊玩。

玩具日

上年8月訂落既GOODSMILE DANCOUGA已經到貨，今日sleeping day都出去熊貓玩具俾埋尾數交收。雖然網上已有不少開箱片，但親自開箱睇實物係多一份質感同自主。

拆盒後既真身，各機既人形模式都好出色，細節既強化唔會太過火，比例不再"不似人形"。心急既我，竟然未將象戰車既腳趾完全翻出(現只係象形態既腳趾)就影相，有辱死忠之名。今晚擺住人形模式既小隊先，聽晚再試合體~

田今日另一個驚喜就係呢隻NEW AGE第三廠既變形金剛POWERGLIDE，三舊水有找。

的骰得黎，細節又唔差，機械人完全同動畫無異，只係腳掌內外都有鉸位外露。

飛機形態亦相當討好，塗色非常均勻，手臂既收納成功隱藏拳頭，比正廠及其他第三廠既設定出色。

雖然盒背有故事出現既女角，但其實係唔包既。其實早幾日放低吸拖機維繫時，上去熊貓玩具都見到呢盒POWERGLIDE。番屋企上網做功課，睇均都係NEW AGE既出品較可取，所以今日見仲有現貨就即課金。

說明書有點簡陋，根本無可能跟到，結果我係YouTube搵片跟住黎變。

PS:原本帶咗個大袋出去拎斷空我，結果都係唔夠，要用店舖提供既大膠袋至得。