Check車&陪太子聽講座

十點半多啲去到太子車行放低愛駒作保養，行番去始創中心既星巴克坐低打躉。 環保政策之下，飲杯咖啡都變咗係盲杯。

咖啡陪韓劇，坐咗個零鐘就行去食晏。經過呢間多年既舊式時裝店，忍唔住用FLIP 5嚟影低佢，因為老店一間又一間咁消失中。

例牌係花園餐廳食，上次(12月)都係度同嘉耀一齊食。

唔算太熱，徒步行去深水埗，沿途發掘吓舊物。

以前探完阿婆阿公(番鬼同霍氏)搭60X一定會經過呢個公園，今次就行入去近望水簾。

去到黃金，見到呢一幕當場崩潰，早知唔洗叫台灣女生去日本旅行時買......

回程搭地鐵，愛駒已係側巷等接走。店員話極力子未算係跣，仲可以行多一陣，我自己亦打算年尾換，始終平日燈位開停多。記得上次行咗萬零公里就跣極力子(逆油筒停燈位)，而家已三萬公里。

享受高速巡航回程，番屋企冚好車，放低戰利品，就搭巴士去學校會合幸男。

六點開始既澳洲遊學團簡介，原本話要成個鐘，結果半個鐘就可以走人。

貪就腳去咗安定友愛商場（愛定）既香港達人食晚飯。

之前幸男好抗拒足球主題既遊學團，講到尾其實係無伴，今次學校搞既遊學團就唔怕無熟人。

PS:怕落雨所以無騎愛駒，如果唔係落雨的話，就十足小學時代回憶。

幸男的bellroy

4日前幫幸男訂購既銀包，今日DHL送到。雖然無人在家，但速遞員好醒目咁投放係安全既位置。

幸男用開既無印銀包又開始殘，見bellroy有銀仔格既款式，所以俾幸男於官網睇款兼揀色。

PS:話晒中二生，開始要搣甩小學雞味既用品。

騎羊兜風

應阿基所約，夜晚趁好天，一齊出車兜風。臨時搵地點落腳，牌坊集合時set好導航目的地為"釣魚灣"。嘉頓燈位有臨時修路工程，好在左轉好近就有個廻旋處。

廿分鐘就到埗，車泊埋路邊，徒步行落去就係碼頭。碼頭當然有人係度釣魚，但"釣魚灣"係咪多魚啲就唔知。

燈光下偶爾見到魚毛群，兩條友望海飲住zero嚟交流睇牙經歷。原本諗住去青龍頭，但見網上既圖片好似無乜街燈，所以都係留番下次日頭至去探路。

PS:回程攞車前，見到既塗鴉公仔都係有牙。

間歇雨天

落咗成個幾星期雨(慶幸番工放工時間係細雨或停雨)，趁今日有短暫既半晴半陰，將屋企囤積既回收品拎去綠在屯門。

回程去相熟茶記食晏，今次帶定矽膠飲管，唔洗再用浸到爛既紙飲管。

疫情前用既環保餐具，再度出街用，呢幾年都係屋企用(外賣走餐具)。疫情期間，大家都怕攜餐具變傳播媒介......舊年年初口罩令不再，有不少人擔心無口罩下既感染及散播，而家大眾取向當COVID係流感C。

夜晚番老家黐餐，幸男補完習就自己搭車去嫲嫲屋企。

老媽除咗準備孫仔至愛既蟹，仲應幸男係whatsapp家庭群組所託-鹽焗雞粉醃既焗雞翼。

PS:回程用愛駒載幸男番屋企，幸男高咗，坐貼椅背，膝位都到我腰位。

遲來的智慧

上星期問台灣女生會否約洗牙，無諗到咁快就有期一齊去洗。十年有多無洗牙，原來左上方悄悄長出智慧牙。

"少少蛀，唔洗補，刷牙刷入啲"

"刷牙係咪好大力?法瑯質有啲薄"

PS:睇黎電動牙刷唔好校到最大輸出至得

幸男代收花

因為台灣女生放工後唔係直接番屋企，所以番緊晏既我託幸男放學後番屋企等收貨。

人家八點番到屋企見到札花，當然開心，誠邀收工既我一齊合照。

PS:希望人家係新崗位工作順利~

BERSERK

NETFLIX最近有BERSERK動畫上架，睇咗兩集，一如泰gg所講"夠沉重，啱你口味"。

中學租漫畫時期已有烙印戰士既單行本，但見進度緩慢，無扚起心機去拜閱。

第二集開幕用番第一集既攻城既撮要，再以1998年經典插入曲FORCE墊底，完美呈現磅礡壯麗及恩怨情仇。

Think逼天地

幸男既新書枱今日下午四點幾送到，而家卒之都可以放到laptop後，仲有位擺書本習作。受制於牆壁與床位之間距，其實腳位兼心口位都唔太闊落，有一定既壓迫感......

有提意過電腦櫈轉可升降既細工作櫈，但用家話可接受現時既空間(拆除電腦椅兩側扶手後)。希望網到有實物既舖頭，可以俾用家確切既體驗。

你總是心太軟，心太軟

今晚幸男話多功課太攰，唔想熨校服。我答佢:“咁皺喎!”點知幸男話著冷衫遮住就唔覺.....媽媽同婆婆去咗旅行，突顯咗幸男平日既惰性。

結果我都係忍唔住，自己臨訓前幫佢熨咗......

 

ICE綿羊的特選星期六

早更放工冒住細雨 兜去相熟油站，計落都四個月，又係時間去約時間換偈油。

電動車浪潮下，近日有研究報告指出，電動車雖然無二氧化碳排放(轉咗係發電廠)，但剎車系統及車始釋放既懸浮粒子比傳統油車高400倍。

電動車直出既扭力，令一眾駕駛者趨之若鶩，因為油車世界中要超跑至有既效果，而家平一大截就垂手可得。撇除充電時間同地點，其實車主們都係想擺脫有加無減既油價。油錢慳咗，又有超跑既加速，其實有幾多個駕駛者會認真考量環保既真理性?

慶生@景薈

趁幸男未放完復活節假，約老母係華都集合，一齊搭960出會展。原本只係約今晚番老家同大佬健食生日飯，見市道不景，於是忽發奇想，自助餐應該易book喎。

台灣女生搵到會展既景薈，雖然唔係最抵既買一送一，但K look訂購都有平。賣點之一有生蠔，其二係全場啤酒汽水及餐酒任飲。

最早到既係壽星仔，平時要塞車番屋企食，今日就可以搭一個站地鐵，飲住白酒等大家。謹祝大佬健:生日快樂，身體健康~

PS:幸男升中後，一家三口都少咗番老家黐餐。今日搭車時，全程同老媽閒聊，只望老人家可以開心輕鬆過日子。