F1 & EURO 2024

幸男睇過Netflix既Formula 1:Drive to survive 後就開始追F1既比賽，今晚一家三口一齊睇奧地利分站直播賽事。

幸男話有媽媽有份睇既場事都會好戲劇性，今次都唔例外，幸男偶像Norris Lando位居第二之下與第一位既Verstappen Max相撞後，需要退賽。

晏些少，咁啱康楠收工騎豪爵黎交收代淘既茶壺手抽，撞見騎FORZA過嚟睇波既阿基。

今晩既歐洲國家盃既戲碼-世界排名第9既英格蘭對世界排名第42既斯洛伐克，竟然係頭25分鐘先失一球下，再於補時階段既90+5分鐘，由比靈咸倒掛射入追平。加時上半場既91分鐘，由簡尼門前頂入反勝。

PS:無諗到足球賽事同F1一樣咁戲劇性，唔知英格蘭可以行到幾遠呢?

過雲雨

臨收工攞車至落大雨，唯有係橋底等陣。明明夜晚已落咗一段時間，望過天文台APP，收工就啱啱好停雨嘛。好在未開車，如果唔係實淋足全程。

PS:係橋底碌住電話等，見細雨立即著車回航，成功home and dry。

 

家品玩味

早更收工搵康楠交收台灣手信，最感動既莫過於呢個藥師窯日式蒸氣火車型蚊香座。

放入點著既蚊香餅，真係好似蒸氣火車開動咁0架。實物上手，細節既上色都唔錯，無話同網圖相差好遠。

一直想買多個陶瓷蚊香座放係花園，上網搵過，最啱心水既都係呢款，可惜香港無得買。即使台灣網購見到，但一直都係無貨。見康楠於台灣旅遊，所以搭單(多謝晒~)。

PS:人口流失兼市道低迷，商品既選擇都比之前少好多，網購變成最後既戰線。

上山放羊

09：30村口集合，同阿基一齊出車上大帽山。臨上元朗公路前發夢兼cut唔切線作修正，結果各自跟住高德導航，係大帽山再集合。

十點半到埗，觀望台已有位晨運客聽住收音機扭腰。望上去係雲霧下既白波仔，唔知行唔行到上去。今日成卅幾度，帶咗支冰水，到埗時啲冰已經溶晒。

難得上到嚟，行去附近既望下仲有無靚位影相，愛駒們繼續留守路邊。

行番上去會合愛駒，驚見泊車位附近(展望台)有牛出沒，幸好無行落愛駒隔離！

兜落啲望遠景，無諗到方向唔同咗就收唔到本地數據既訊號作回程導航，結果要行前少少兼校啱方向。

烈日當空，係下一個景點停泊，唔想做燒春雞，用毛巾遮擋下座鞍。

呢個隱世觀景，真係好攞命，條路又曬又大塵。

好在尋日買咗個RENO POCKET 5，無佢今日實中暑。雖然衫都係濕汗，但至少唔會有頻臨熱衰竭既昏眩。兩條友成功番藍地食晏，下次咁熱都係去一個景點就夠了。

PS:考咗電單牌咁耐，第一次上大山，見笑了。

比利是VS斯洛伐克

00：00開波，為咗捧迪布尼場，都要頂硬上。

幸男聽日要番學，但俾我游說"睇得一場得一場"之下，都有出黎一齊睇比利是(半場就去訓)。

Wedding Anniversary

相熟既陳設，今次係我同台灣女生第二次嚟食結婚週年飯。

舊年係麗晶酒店Steak House食到一肚氣，都係呢度夠靜夠舒服。

市道唔好，餐牌選擇無咁多，但水準都係依舊。

TSR Signature Boston Lobster Bisque，呢個年頭都唔係咁易搵到間西餐有得嗌龍蝦湯。

Traditional Baked Onion Soup ，呢個就更加難得。

"New Orleans" Style Crab Cake，兩個人分。

U.S.D.A. Prime Rib Eye，台灣女生之選。

U.S.D.A. Prime Tenderloin，我就跟咗個4 courses 既wine pairing，好掛住dry aged牛扒。

Side dish係另上，雖然唔係嗌咗好多嘢，但大家都飽飽哋(真係老喇)。

甜品我就揀咗芝士拼盤，不過羊奶芝士真係投降。

Apple Crumble Pie with Vanilla Ice Cream，被加咗塊"Happy Anniversary"朱古力牌，因為人家訂枱時備註咗for anniversary。可惜人家聽日要番工，如果唔係既話，真係想訂埋住宿留一晚。

平淡但又急忙地過每一天，除咗紀念日，我哋盡量每星期都安排一晚we time二人外出用餐。

RALLY MODE

今晚同阿基一齊出車兜風，地點原本為欣澳石灘，但因為第一次信錯高德，去咗行爛地路。係望到石灘，但係隔住個工地鐵絲網，咁即係我哋去咗石灘隔離既工地？最終落腳點變咗係長濱走廊既路邊，無力再徒步行去石灘。

帶定保溫袋，凍黑烏龍茶，仲有膠杯，一齊坐係石堤望海瞎聊，兼遠望石灘(照片上方)。

原本有對銀髮男女係石堤後坐住戶外露營櫈乘涼，但無耐就離開。雖然我哋行錯路有啲驚險(高低起伏兼爛地加水氹)，但誤打誤撞行經與鐵路只隔鐵絲網既小路。阿基仲以為我一心帶佢行，不過今次探完路，下次可以去泊好愛駒黎等列車經過作擺拍。

PS:番至屋企，要立即處理越野路段既污積。

家族聚餐&幸男轉會

今晚番老家黐餐兼為阿嫂做生日，台灣女生準備既蛋糕，於晚飯後呈上。幸男升中後，無以前咁多時間番老家食飯見伯伯同伯娘兼嫲嫲。好在我哋都算住得近，未至於大時大節至見面。 

食完飯，我騎愛駒去嘉耀樓下交收二手iPhone 14 Pro。幸男見到自己既後繼機體，非常滿意。以往幸男用既智能電話，只係媽媽用過既士啤機(SONY Xperia 1系)，免得跌爛或唔見咁大損失。升中要用iPad做功課，幸男話iPhone會方便啲。其實我覺得佢多同學用iPhone，都係另一大原因。

PS:目標係考完試至轉用新機，免得考試前席分心。