被"街頭掠影"

今日收到瑋霖send俾我既相，原來今日早更之後，回家途中被認出並影相作紀錄。平時係街上，見到特別款既電單車，我都會忍唔住舉機。

當年我揸SKYWAVE250SS時，就係夜晚係馬路上見到前車尾燈咁靚咁特別既，左右分開。尾轆右邊只有死氣喉，左邊又唔見風箱既?上網查證後，就開始對TMAX有興趣。

PS:間距式既尾燈，令我諗起FAIZ果架AUTO VAJIN，呢個都可能係揀上TMAX既誘因之一。

大膽假設，細心求證

用開既膠囊咖啡機，相熟口味既咖啡膠囊，今晚呢次就少咗一份過往既澀味。

早前同阿聲傾開水質對沖咖啡既影響，得知佢有朋友係海外試過好多款礦泉水，試出Volvic為性價比最高。咁啱係屋企附近既惠康見到有得買，所以促使今晚既試驗。

擺酒週年去婚宴

今晚唔洗諗邊度食飯，我應阿Paul之邀請，去銅鑼灣遊艇會參加佢同Annette既婚宴。

我同台灣女生係銅鑼灣地鐵站會合滔爺，一齊行去遊艇會，趕得切參加觀禮儀式。

證婚儀式後，主人家安排咗露天小酌時段。A7同事，一齊戥Paul哥開心。

開席前，新郎哥有時間出嚟同賓客打個招呼，當然要趁機一齊大合照。

食到尾段，主人家開始邀請各組別既親友上台合照。我校好連拍兼連續AF，交俾攝影師時再交帶"個EVF就我老花，你用個芒睇位至啱用"，成功影到兼揀到張大合照可以派街坊。

番到屋企再同當年新娘，用相機影番張大容量相。今日11點我就出車去相熟花店交收預訂既花球，上年花店老闆娘外遊無時間代準備，今年我特別交代要大朵啲同靚啲~

出門前都有影張自拍合照，每年都係呢款花球，但每年都係要影番張相作紀錄。

咁又17年喇，結婚，擺酒，搬屋，生小朋友，置業，湊仔，旅行，裝修........順境與否，都有你陪我行落去。

PS:今晚最好笑係阿Paul係台上話大家都知佢同Annette都係第一次結婚，好多嘢唔識(意思係招待不周，還請見諒)。

八百九十四年後既佳釀

晚飯前開定支紅酒唞氣，望落個木塞好似怪怪哋。

細心一睇，原來係“2918”，拎舊底留落既同款紅酒木塞比較，應該0印錯9。唔知係咪朝早睇過“夢之筆記”情節，就出現呢支未來異次元紅酒呢？

收完外賣，行出去輕鐵站會合老闆娘交收玩具。依舊邊閒聊，邊陪老闆娘等下一班列車。原來好多舊客(四十歲前後)都移民，少咗買實體心頭好既支持者(傷感).....

上次老家食飯，得知大佬尚未入THE FLASH版既BATMAN(Michael Keaton)，於是向老闆娘查詢。可以搵到心頭好，又可以幫手清貨，WIN WIN。

夢戦士.ウイングマン

今朝食完早餐試睇真人特攝版<夢戰士>，感覺蠻好。男主角廣野健太酷愛特攝英雄，於街上意外地遇上從天而降既異世界女子-葵。動畫中葵既服飾偏向輕薄，真人版既厚重，少了一份靈巧感。

英雄角色設定湧現腦海，揦起手無記事簿，男主角拎咗葵手中既“夢之筆記”作暫用。

原本自high既特攝英雄變身動作，弄假成真~

夢戰士既外型與動畫設定相近，只係細節上追回時代差。細個係電視睇過，但斷斷續續，唔太記得結局。

另一驚喜係第二女主角-小川美紅由菊地姫奈擔演，其待劇中更多非校服既場口，例如體操訓練或青春沙灘……

PS：夢戰士呢個故事拍真人版特攝毫無違和感，有咩比得上特攝迷變成“真”特攝片英雄咁理所當然？

THE LAST DANCE

託大佬買定優惠飛，今晚一家三口一齊睇<破。地獄>，希望幸男可以會對親情有多一點體會。故事主題環繞傷感既親人離世之悲傷，幸得恰到好處既笑位令觀眾有休息既時段，再巧妙地推進下一個煽情位。始終幸男人生閱歷尚淺(兼對生活無咩觀察)，所以無大人既感觸。

預告卡片既"如果你睇唔過眼既，門口係果度。好行，唔送到"，原來唔係子華對許冠文既回應，而係壓軸既高潮位。工作關係，面對離別，早已有唔少想法。好認同戲中Hello文對女兒既叮囑-"你都要當自己係寶"，以及道生所講"生人都好多地獄"，做人真係要鍚自己多啲。

貪方便，約咗大家六點鐘元朗西鐵站集合，搵地方食頭輪晚餐。幸男唔啱GLASSHOUSE，所以食番日本菜-穴壽司。

市中心既鮨千壽執笠後，就轉咗去食鮨樂，YOHO既日式食店就只係穴壽司合心意。

原本人家話嗌餐，但我見唔係樣樣都啱。"散嗌喇，鍾意食咩就嗌咩"，但無諗過係大家食到捧住個肚去睇戲。

戲裡面提及到南音老曲，即刻諗起呢首歌。打定輸數係KKbox搵，竟然有得download~

PS:多謝Lok Yin既汽水同爆谷(啱晒幸男)

THE RESISDENT

無乜劇啱心水，膽粗粗試睇Netflix既The Resident，意外地覺得好睇。可能因為男主角Conrad Theodore Hawkins既設定係一位前軍醫(外觀少似Kevin de Bruyne)，所以比一般醫院題材既美劇，多一點新意。另外，故事加入名利人性暗黑面，有啲<白色巨塔>既味道。

中學時代有追過ER(仁心仁術)，礙於當時未有錄影機兼明珠台22:30播，所以都唔係集集都睇到。當年邊諗到George Clooney會做電影版Batman，亦無諗到自己會係其中閒角之一。人大咗，睇The Resisdent會比睇ER明多啲，感受都唔同咗。

PS:飾演女主角Nicolette Nevin既演員Emily VanCamp，上網search至知係做過Captain America:Civil War既Sharon Carter(美國隊長戀人既侄女)。

大閘蟹聚餐

今晚應上次酒樓食飯之約，上大姐屋企食大閘蟹。

適巍除咗自攜活龍蝦加餸之外，仲親自操刀同調味，果然識煮嘢食既男人係最吸引。

當年既沙灘及飲食組合，新世代應該無我哋以前咁多節目。

辛苦大姐準備今次既聚餐，當年大姐手抱既幸男，今日係放學做埋功課嚟既中三學生。

好難得可以咁齊人開大餐，當然要搵個後輩為我哋影番張大合照。