Minority Report預視AI

近日鬧得沸沸揚揚既藍鯨AI，令我諗起一齣2002年舊戲Minorioty Report。故事係未來世界用電腦大數據分析實況監控，配對先知對近未來既預視，去預報罪案，繼而由執法部門於關鍵時刻作及時阻止及逮捕。

如果個系統不受制約監管（獨立第三方eg.傳媒及大眾選票），亦無公開透明兼可信既上訴渠道，只會變成大眾既悲劇及權貴既手腕（如劇中既罪案歴史被竄改）。早年已有高牆內既市民，誤信搜索引擎推薦既醫療廣告而花巨額進行未被審批既治療。如果AI出錯或誤導，責任應該由當事人自己承擔，定係AI公司負責？

男主角John（執法行動組探員）被預視為殺人犯，而受害者最終係男主角在場下身亡。為逃避監控以查出真相，不惜係黑市換眼（預視現實中用VPN去保障網絡私隱？）。

大年初一去AIA嘉年華

中午番老家食過開年飯，搭巴士出去中環，先去IFC既DALLOYAU坐低飲杯嘢，無諗到兩母子食得落蛋糕。

跟住人流行去AIA嘉年華，疫情後第一次一家三口重臨舊地。幸男已由小學生，變成中三青少年。

先嚟玩掟飛標贏公仔，失手後就同媽媽一齊玩初階碰碰車。

借出Flip 6俾兩母子自拍。

幸男話要玩過山車，自己排隊，自己一個車卡，初段幸男神態自若。

當去到俯衝路段，難掩緊張扭曲之情感。

人家話除咗碰碰車，點寃要揀多樣同幸男一齊玩，結果係"空中韆鞦"。

拉盡天涯鏡200mm焦距，影低兩母子既笑臉。生疏影相，快門設定不足，唔多成功作品。

原來幸男係咁叫媽媽收番埋部機，怕跌咗電話，爸爸會好唔高興。

咁呢個view又真係幾特別既～

小食區域小休，望見正前方既另一邊有生啤賣，"嘩，有啤酒喎"，立即衝上去。BREWDOG PUNK IPA係英國飲過罐裝，所以對生啤裝充滿信心。

有好幾檔熟食，但都只係買爆谷輕最扺。

成人版碰碰車，特意揀停係附近既車輛，方便一家自拍。

財散人安落，$620包三個大人入場券兼50個代幣(入落充值咭)，再增值一次$180換18個代幣。

舊地重遊，好多以前幸男會玩既遊戲，而家已經超年齡或無趣。見到人小朋友玩艇船，原來幸男記得當年佢都係要用枝棍刮底嚟撐前隻艇，唔係水流就夠力推進。

臨走時見摩天輪有LED新年賀詞，特意駐足捕捉"身體健康"。其實我哋係TRIP. COM買既飛包摩天輪既飛，但實在太多人，要等成2個鐘。早知係K LOOK度買飛，要兜爆谷好過。

晚餐係IFC既金色不如帰食拉麵，番到屋企一如已往，係飯枱擺拍新年合照。

佐賀燒肉谷

晚餐唔想食外賣，問幸男食日式燒肉好唔好，但又嫌“牛太”同“焰”食到悶，於是叫台灣女生去佐賀燒肉谷望吓個MENU兼攞枱，我同幸男趕出去搭巴士往市中心會合。

我哋揀咗Lv4既放題餐，包日本和牛兼全種類鮮食材，另一賣點係酒水全放題。

呢個寒氣溢出既和牛寶盒只係俾客人初試，之後可以繼續係app為每款和牛落單。

區內有海鮮食材既日式燒肉店，印象中得金舌(已執笠)。蝦同蠔都大隻，就算係冰鮮都抵喇。

店內唔算爆場，最入既位都係吉既，但出面近門口既區域都多人，估全場有半滿。

限時優惠，即場加入會員，揀選Lv4放題餐可減$100，變相每位五百幾(因免埋加一)。

PS:為幸男考完試作興功

露(營)宿一宵

半夜3點8凍醒，望下天文台app，8.4度，唯有將eHEAT內膽塞入睡袋，冚住上半身。5點8又凍醒，原來已8度，將eHEAT內膽著入電單車褸內。7點4再凍醒，7.3度，唯有開著埋個eHEAT內膽最大輸出。

九點鬆啲至真正起身，先沖番杯咖啡暖吓身兼提神。雖然買個陣唔知咖啡包陳述係咩來歷，但真係一如當初既分流(揀咗唔酸既類別)，味道係特別既~

早餐係烘熱既麵包配明太子醬，出太陽就開始覺得唔洗著咁厚。

邊食邊執嘢，兩點幾食既午餐係牛扒配牛油粟米~洗埋啲食具，就動手收拾剩餘既裝備，分批推車仔運上代步車。

PS:多謝基耶既邀請，如果有時間投放的話睇嚟我都係走輕量化既motorbike camp多啲。

黐人架生去露營

村內茶記食過午餐，趕番屋企又孭又拎行裝，出村口會合阿基架車，一齊去車CAMP營地出發。不愧為前邊境禁區，電話顯示為內地訊號.....

接待處有啲噏耷，行落去就望到大草地同個湖仔，右邊係星空營(閒日要千六蚊)，停車場另一邊係部落營同小屋(無影相添)。

行內人指導之下，合力砌好2個營，之再係中間架起天幕。

搞掂都近黃昏，未至於身水身汗，但都要啤啤佢。

唯一最接近戶外服飾既就係電單車褸，帶埋eHEAT內膽，話晒今朝臨放工時見打鼓嶺得4度!

今次係阿基久休復出既露營，辛苦佢到湊住我呢個素人。我不時問佢"仲有咩要搞?"，但回覆係"你而家唔係番工呀"，睇嚟奴性太重，一得手就諗下一步要點。

營地有獨立廁所兼浴室，不過今晚得十四度左右(無浴室寶)，可能都係洗個頭就算。

晚餐由阿基主理，透爐時遇到阻滯，結果我去咗無人既接待處"買"碳精。

入夜後，湖邊木欄有黃燈著起，但照明就靠營友自己帶嚟既架生。

晩餐主題係串燒，大家邊食邊飲酒邊胡扯，3 round啤酒後，分埋半支裝紅酒。一如阿基所講，搭得個營，set好個陣，整得晚餐，都差唔多夠鐘訓。

臨訓前，圍住個人工湖兜個圈，順便窺望吓人哋既重裝豪華營(話晒今次係車會包草地自攜營場)。

營與營之間唔算太近，臨訓係自己個營內睇陣netflix下載(靠場地慢wifi)既跳躍大搜查線日劇，希望今晚夠暖訓。

尾禡自助餐

上次番老家黐餐，老媽約做尾禡，於是做就今晚呢個(無咗下文好耐)Cordis自助餐。老媽鍾意自助餐，又可以俾佢抖下煮少餐。

地點就大佬大嫂放工(唔洗塞屯公)，又方便大隊可以一程車番屋企。每人6舊幾，包全場酒水，奶奶嫌我代斟既生啤太多泡，但明明已斜杯……紅酒好唔得，大佬轉攻白酒。

每位送半隻(開邊蒜蓉蒸)龍蝦，另外紐西蘭生蠔都唔錯，而且唔會斷貨。

PS：幸男放學係學校做陣功課，就時間係華都巴士站會合媽媽(剛放工)，嫲嫲同我。

即日買即日玩

是日放假，搭巴士出油麻地去相熟玩具舖交收預訂既第三廠變形金剛玩具，補＄460(訂金$200)就去附近既J.Co飲住啡嚟等下一班車。

九巴個app突然short咗，睇唔到幾時有車，唯有坐耐啲。差啲就衝出去搭60X，好在見番下班63X既時間。

番到屋企就拆盒影相，同上次買NEW AGE既Powerglide一樣，有張QC PASS圓貼。我覺得呢款副廠既人形比例做得唔錯，只係腰背位成幅凹咗(變咗屁屁位突出)，同埋個炮口位(瞄準鏡)有得著燈就更好。

好耐無試過即日開箱玩具，說明書既圖解依舊令人費解，照舊跟住YouTuber既影片嚟變。

Size比正常既WALTHER P38細，理應手柄夠位俾埋尾指，但已可以喚醒兒時玩玩具槍既童心。

PS: 上網搵吓LOGO貼紙先，話晒人生第一隻MEGATRON，兼之前有2隻博派都無心口個徽章。