北倫敦打吡

搭屯馬線出啟德會合台灣女生，列車上已出現3:1既紅白比例，到啟德站更見比例擴大好多。

早前同幸男嚟過睇利物蒲對AC米蘭既人家，帶路去商場food court食定晚餐。用餐區一片紅海，我揀咗拉麵，人家揀咗花甲年華，最尾都要去花甲年華補買燒蠔至夠飽。

入場前自拍合照，真係處處紅軍，我同人家既波衫都係借幸男既收藏嚟著。

我哋坐既係熱刺球迷區，座位上已擺好打氣用既會旗。開場前有表演，人家話同利物蒲對AC米蘭果場一樣。

有別於大球場，啟德可以帶埋杯啤酒入座。冷氣開放絕對係夏天恩物，同舊年係大球場睇傑志對馬體會差好遠。

排隊買啤酒時，有外籍球迷送上手帶，應該係球迷會既人？

早到場就可以睇球員熱身，列查利臣係正選名單，太好了～

滔爺同翔爺收工就搭鐵路出嚟，成功趕得切開波前入場。官網上搶飛失敗，今次呢張四連飛係托同事朋友係CAROUSELL搵到。假飛滿天飛，賣家話交收當日，一齊去售票網一齊攞飛，確保係官方機構印出既入場票。

旗海做背景既自拍，唔計各自既球迷區，兩邊座位既球迷都係以紅衫為主。

球迷區有女擁躉舉起南韓國旗，唔知係咪孫興慜既同鄉呢?半場前，截取阿仙奴傳球既柏比沙亞於中圈超遠起腳，笠死未回禁區既龍門。

74分鐘有孫興慜後備入場，，好在今次佢有隨隊參加亞洲之旅!一直有離隊在即既消息，落場比較踢得鍚身，但總算可以一睹慜大人風采~

1:0完場，雖然入球量稍遜，但勝在氣氛十足兼亙有攻守，最重要係贏波嘛~四連座裡面，最開心既一定係滔爺呢位資深熱刺球迷，第一次睇愛隊現場比賽，仲要係北倫敦打吡戲碼。

英倫遊學團

一家三口搭的士入機場，因為幸男今晚機出發去英國。今次既遊學團係無熟人一齊去，唔同舊年去澳洲果次由學校主辦。

幸男掛靴一年，諗住幫佢搵有關足球既遊學團，告別足球夢。台灣女生搵到EF去Torquay遊學團，但無諗到幸男係出發前已被新晉U隊甄選。

完成行李寄艙同check in手續，去咗紅軒食晚飯，話晒都會2個星期無中餐食嘛~

校啱時間就埋單，過番嚟機場。

其實幸男對今次既遊學團係有保留既，覺得無必要花呢一筆錢，但我同人家既心態係俾佢模擬下將來海外升學既生活。

難得幸男笑得自然，又難得張相無炒。

媽媽唔捨得個仔，下次見面就係兩星期後。

PS:以前話香港地時間就係金錢，但而家係用時間去換錢(北上消費)或降級消費。新世代偏向work life balance，或許同外資既睇法一樣，香港既吸引力已大不如前。

23代手提電話之收機中SAD

朝早順利收新機，順豐無送錯貨，今次無咁多淋糝嘢送，反而無咁煩。

上次Flip 6係買官網限定色(白)前都有去睇陳列機常規色，今次齋係YouTube同網圖就落單買藍色，好在實物都無相差得遠。

收埋HKTVMALL 貨，用新線嚟叉電。

一心黐好外芒貼先，點知揀過機設定畫面時，發現原廠跟機既內芒貼上方左右角疑似有裂位。晚飯前去yoho既三星店問，職員叫我問網店專線睇吓有無得成部換過。Send埋機去客服WhatsApp，一如所料只係話會安排到samsung專門店換新芒貼，但日期未知(新到未有貨)。

晚飯係相熟酒樓享用，幸男遊學團前兼外母小病後既聚餐，希望幸男外遊順利兼外母大人身體健康。雖然我出去買半支裝紅酒時有小插曲，但總算息事寧人~

手機Profile更新:
1st   Ericsson PF768                >黃色 sunday
2nd  Boch 909 Dual                 >灰色 people
3rd  Siemens A40                     >藍色 orange
4th   Ericsson T29                    >銀灰色外殼,紫色panel one 2 free
5th   Ericsson T39                    >灰藍色 one 2 free
6th   Sonyericsson T300          >紅色(紅豆) smartone 
7th   Sonyericsson T630          >黑色 smartone
8th   Nokia 6260                       >銀色 smartone
9th   Nokia 6270                       >黑色(深啡色,鋁金屬外殼) smartone
10th Nokia 6500 Slide             >銀色(鋁金屬外殼) smartone
11th Nokia N86 MP                 >白色 smartone
12th Nokia N8                          >橙色(鋁金屬外殼) smartone
13th Sony Xperia P                  >紅色 nwmobile
14th Sharp SH930                   >白色 nwmobile
15th Alcatel One Touch Idol X >黃色 nwmobile
16th Alcatel One Touch Idol 3 >灰色 Sun Mobile
17th BlackBerry DTEK 60       >鈦灰色(玻璃背面) Sun Mobile
18th Nokia 7 Plus                    >黑色(玫瑰金色金屬邊框) Sun Mobile
19th Nokia 9 PureView           >藍色 (反光夜幕藍)Sun Mobile

20th Sharp Aquos R6              >黑色 Sun Mobile

21th Samsung Flip 5               >藍色 Sun Mobile

22th Samsung Flip 6               >白色 Sun Mobile

23th Samsung Flip 7           >星塵藍色 Sun Mobile

為揈而揈既4DX體驗

對上一次入戲院睇同一齣戲兩次(二刷電影)，已經係Slam Dunk日文同粵語配音，今晚應台灣女生所求睇4DX版既F1。呢張相其實係用MIRROR既方式edit過，因為我哋企係4DX牌自拍影唔晒，於是係對面塊鏡嚟影對面既倒影做背景。除咗IMAX版，4DX版都係場場都爆咁滯，所以上星期要吼實預售一出就網上買飛。

近呢兩次睇既戲都係IMAX版，顯得今次個SCREEN好細，加上望落個場有啲殘。張櫈好硬又唔貼背，4DX動感體驗係無咩必要，抖動會令觀眾無法可以看盡畫面細節及運鏡。用擺動令觀眾感受轉向係OK，但F1架車無埋由避震差到係咁震囉(唔係科幻片炸到七彩)，炒車既抖動就合理既。椅背兩側既噴氣有啲無謂，炒車意外既情節，銀幕下方兩邊會有煙霧助興。

散場等巴士時已經係十二點，好耐都無試過咁夜仲係條街度。

暖男版Superman

由Marvel遊走到DC既James Gunn，繼The Suicide Squad(2021)，Peacemaker(2022)，今次係重啟Superman。

原本我想出去iSquare睇IMAX，但由於幸男唔想出咁遠(佢話網上評價好兩極)，所以明知個Screen有花痕都係Yoho My Cinema睇。

由第一代彩色電影(1978-1987)一連4集做主角既基斯杜化利夫(Christopher Reeve)

到2006年重啟失敗既Superman Return既Brandon Routh

再到對上一代(2013-2017)Man of Steel系既Henry Cavill，相信大家都係傾向絶對力量既Henry Cavill多過繼任既David Corenswet。

我本人覺得今次David Corenswet係TV版Supergirl裡面既超人(Tyler Hoechlin)既延伸，陽光笑容多一點。

貴為暖男Superman，有唔少溫柔既畫面描繪，例如以身軀保護女童，拯救松鼠，不忍殺掉破壞城市既巨大外星生物，甚至無對重度傷害佢既Lex Luthor執行私刑。

今次重啟，省却成長情節。一開始就講超人已經出道一段時間，而且同期有Justice Gang係Metropolis市幫手維護正義，令故事唔會太過單調。

唔少老Fans嫌今代Superman既設定被弱化，超人唔應該被打到焦頭爛額，但我睇完之後有另一種體會。有別漫畫當時既年代，AI，流動網絡，無人機及演算法，將超人既神力優勢收窄，更重要既係對手Ultraman根本就係超人既複製人。

複製人橋段已係超人4：超人決戰核能人用過，另外Pocket Dimension失控亦同Superman Returns裡Lex Luthor用Krytonian crystals造新大陸引發既災難相似。

全卡片無咩悶場，中途有唔少輕鬆位(未至於太over)，例如Lex Luthor既女伴，更無諗到佢會成為揭穿陰謀既重要人物。

總結：擺脫沉鬱既氣氛，開心輕鬆咁睇完一齣節奏明快既英雄片，但缺失咗張力及氣魄。

落重本復出

幸男今日自己出咗去旺角買波boot(自己儲落既私己錢)，因為掛靴果年既舊boot已爛。

當初仲擔心遊學團會影響佢去選拔，好在趕得切出發前完成新U隊既選拔，兼且順利入季前訓練(練到擘口)。

希望幸男會珍惜失而復得既機會，其實我同台灣女生一直想佢可以係喜歡既足球上，學會團隊相處同合作，以及應對解難，最重要係朝向目標甚至夢想前進既韌性。

收貨，緣聚舊，住家西餐

朝早11點鬆啲就收到City Super既送貨。

今次既重點係韓牛，好耐之前市中心AEON超市買過一次，可惜之後就無再見到。

出村口食過茶記就騎愛駒去紅橋買下午茶俾老豆，點知巧遇Andrew。送完外賣兼問職員文件事宜，就同舊同學去附近食下午茶。

帶定個保溫袋兼冰種，順利係OK搵到幸男至愛既芒果雪糕，順便買埋榴槤配山竹既雪糕俾台灣女生試吓。

韓牛無日本和牛咁膩口，肉質同油脂比例令我可以盡情享受份量感既蛋白質。

PS: 回程攞車時，見到有女騎士泊車，遠望以為係REBEL，原來係KAWASAKI既ELIMINATOR 500。巡航車既引擎兼喉聲，勾起學車時既回憶。

韓風凜凜

幸男今日出去剪髮兼做壓貼燙，入屋一刻令我同台灣女生驚訝，如果係街度行過，我一定唔會諗到"I'm your father"。

即時諗起走廊相架裡其中一張相，兩歲唔夠既幸男，訓醒個頭亂到好似CD封面造型。

假日司機

同番晏一樣，放假都係貪近行過球場，去花炮會附近既茶餐廳開餐。番到屋企成12點半，見幸男啱啱至起身梳洗，話番1點半，於是提議TMAX送番學(好耐無送番學，平時頂多係番嫲嫲家黐餐坐後座)。

一點唔夠就係安定商場附近落客兼落貨，自己就慢慢塞番出去。撞正胡小放學時間，諗起幸男同自己小學既回憶。

PS: 回程係燈位跟住係架汽車運輸車，視覺上好似Batman :The Dark Kinght Rises用佢嚟做跳台行shortcut避塞車一幕。