Check車，行旺角

例牌四個月一次既愛駒覆診，唔經唔覺已夥拍TMAX DX足7年了。

放低愛駒同車匙，照舊去花園餐廳食晏，趁十二點前唔多人。食完飯去始創中心地庫既CD WAREHOUSE逛吓，買咗特價影碟。

原定去STARBUCKS打躉，但奈何，無位，於是行去信和行吓順便搏吓有無得攞TENBLANK隻CD。用電話示出單據相，"點解唔帶(面)單呀?"。橫濱店員同訂客(大佬)whatsapp確認後，半情願下俾隻碟我，睇嚟佢好想收番齊set單。

行埋玩具舖都未收到車行電話，始創既Starbucks仲係無位，唯有行去花墟附近既Pacific Coffee。好在搏到張搭枱，飲咗半杯就收到車行電話。

上次check車時已訂定油缸兩側既包圍，今日check車順便裝埋。主動話燵車唔順要換電池之下，先至話電池狀態唔好（上次仲話唔洗換住）。皮帶有裂痕反而估唔到，仲差5千km至到上次換既2萬km嘛。

回程直取置樂，去長頸鹿幫阿Bill買tomica既高智能方程式車仔。風見隼人既雷神得番最後一架可以埋解，但超音騎士舒麥加既Knight Savior已無晒(唔通F1電影關係?)。

壽喜燒晚餐食材由我係DONKI買，用電話影相俾人家，被遙遠控制買乜。番屋放低貨物，再去Vcity上海婆婆門外交收車仔俾阿Bill，得佢可以用盡啲留港時間見朋友嘛。

PS:係利寶行咗陣就收到電話短訊通知牛肉乾，明明望過無鬼，唔通係便衣?

屯宿之男-海鮮餐聚會

傍晚約Percy去三聖海鮮檔揀海鮮，阿Bill就直接去酒樓會合我哋。

難得番香港重聚，所以我提議今晚既聚餐以海鮮為主。呢味螺片係兩食，刺身加涮涮鍋。

唔講都唔知，原來係英國鵝係受保護，所以只可以食鴨肉。

今晚夠晒齊人，搵啤酒promoter代影大合照。疫情起就停咗逢4月既小聚，大家都努力適應及保養自己身體。

Bill話雖然望住個海，但平常可食用既海鮮唔多(海水太凍)，尤其係生猛果啲。我之前去旅行係街市見到既，原來係外地冰鮮解凍後放出嚟。呢味豉椒炒蟶子，唔知當地唐餐館要幾銀呢?

砵酒焗美國桶蠔，夠晒港式。

蒜香蒸扇貝，海鮮餐既基本。

椒鹽瀨尿蝦，揀海鮮時阿Bill係電話裡指定既菜色。傾吓食吓笑吓，九點幾阿Bill就話要番去碼頭接阿仔番酒店。

散場後就得阿潘同華B一齊去黃金飲多杯，華B攞正牌飲moctail(要揸車嘛)。同疫情期間一樣，得Resto Bar & Grill開到22:30，其他餐店早己閂燈閂門。

以前P完一齊去黃金海岸飲啤酒，同樣十點左右，但熱鬧不再。唔知當年日本泡沬經濟，係咪都係咁上下蕭條呢?

PS:Kir royal既比例明顯唔夠多香檳，以往有質素既cocktail，變得係區內難求......

TENBLANK with Sennheiser Ambeo Max

尋日開始睇既Glass Heart，今晚就成功煲晒10集，仲要俾個Love it過佢。

追劇期間適逢幸男係車路士主場睇友誼賽-車路士對AC米蘭，係遊學團既壓軸節目。

幸男可以睇到麼迪落場，真係戥佢開心。其實幸男係著住車仔長袖衫入場，話有啲熱......不過入球多(4:1)，熱都抵番。

身處香港既我哋就邊追劇，邊用平板睄吓比數同進度。

尋晚睇到第三集時已嘩嘩聲，咁型棍得唔得架?臨尾仲係艇上LIVE表演音樂節目既首度公開作"約束のうた"。海邊有摩天輪做背景，航拍機式取鏡，視覺震撼十足。過往一套日劇既成功，一個好故事，加埋靚主角，再加一首搶耳或耐聽既主題曲，就一定掂硬。今次GLASS HEART仲要唔至一首歌，差唔多每集都有一首新歌，點可以唔收得先?

劇情上除咗音樂組合既成名之路既王道，中間亦有唔少轉折，例如男主角藤谷直季同真崎桐哉撞歌，鬧出抄襲雙生兒。藤谷直季得知真崎桐哉作品同其極度相似，竟主動收回發表，但真相係藤谷直季同真崎桐哉係同父異母之兄弟。新曲係各自從母親(藤谷直季之後母，真崎桐哉之血緣母親)學會之旋律作藍本去創作。

原本二人以演唱會同場表演，以觀眾既喜愛度去決定發表權，但真崎桐哉因意外而無法赴會。藤谷直季向真崎桐哉既歌迷講"抱歉，各位，我去把桐哉帶回來!"，由TENBLANK剩下既成員演奏住真崎桐哉既歌曲去安撫歌迷。原本已夠感人，最後二人於醫院頂層直播，令氣氛變得動人。

除咗中間既三角戀兼韓式狗血劇情外，最後TENBLANK成功將音樂人井鷺一大既封殺，演化成為反CUP兼以德報怨，亦屬意料之外。

對上一次覺得好睇既日劇係FIRST LOVE，都係佐藤健演出，今次GLASS HEART都有佢翻唱FIRST LOVE既主題曲之情節。由於GLASS HEART係5.1音效兼以band sound為主題，soundbar配sub woofer絶對係完美還完制作。如果只係用電視揚聲器嚟睇既話，就真係嘥咗齣劇。

PS:我已係kkbox download 晒啲歌~

簡簡單單玩BANG BRAVERN

 

上網睇過TAKARA TOMY既BANG BRAVERN實物介紹，兼同Good Smile作品之比較後，極後悔無去動漫展買會(有多兩把透明綠劍)，於是係Carousell搵咗隻。

可能太少眾兼隔咗一年至出商品，唔多地方有得買。開盒一板睇晒，武器唔齊全，無絶招既透明綠配件，亦無合體後既バーンツインランサー(Bang Twin Lancer)雙頭茅。

雖然TAKARA TOMY較多螺絲外露，但我又唔太介意，反而覺得有重拾兒時玩玩具既感覺。另外，佢原色既膠件既處理手法，令我省却刮花甩油既擔憂。

之前GOOD SMILE出過一隻BRAVERN，但稍嫌佢為就合體比例，令載具形態兩側(小腿過)過長，失去整體平衡。

砌埋隻Bang Dragon ，撇除雙炮外既空隙較大之外，整體外型不致失衡，機頭(跨甲)比例無Good Smile既換突兀。

PS:簡單既變形，令我比以往更勇於開箱試玩。

利寶OMAKASE

黑色暴雨咗成日，台灣女生話出街食，結果約到置樂利寶既OMASAKE小店。

人家話呢間嘢做咗好多年，同事試過都話好食，我就答邊有可能利寶有間OMAKASE我唔知(小學尾行到而家)!原來係好耐以前賣凍菠蘿及撈冷麵既舖位，記得對上係有過賣生蠔既舖。

見餐牌有新鮮生蠔，昆布森蠔得1隻，但超大隻，另外4隻係西班牙(少見嘛)。店長非常建談，話屯門呢個鋪只係做咗年幾，十幾年果間係市區。

是日時令原條刺身-金目鯛，其實我哋係背住情趣店開餐。

店內有支裝清酒出售，無信心飲晒一支既，可以揀半枝裝。

師傅話由於我哋係即日預約成功，所以食材係唔需要熟成處理為主，例如呢款鳥貝。

粒貝刺身，令我諗起以前係西川雞煲食既象拔蚌刺身。

8點後商場人潮不再，店舖閂剩呢間同夾公仔機，冷氣變得涼咗，食個煎餃子暖身。

最後係碳水化合物，我同人家分別揀吞拿魚同帶子壽司嚟share。

最後我試埋個海膽，師傅應我既少飯要求，提議熱狗式呈上。由於太啱食，要encore嚟多一件。埋單千六有找，但絕對比得上銅鑼灣既樓上舖既日式料理。

PS：好耐無係區內試到滿意既日式料理小店，對上一次係OMASAKE既道(2021)，感覺似以前巿中心錦薈坊地下果間惠比壽。

3 laps is a lifetime

原本以為只係電影中出現既對白，無諗到真實賽事會出現。

Lando Norris係第三位起步，第一個圈就跌到第五位。開局不順之下，用一停策略，無視隊友Oscar Piastri係第18圈換硬胎。Lando Norris捱到31圈入pit換上硬胎，直踩到尾。

尾段車胎損耗下，第68圈被隊友Oscar Piastri追近1秒距離內。最後一圈成功攔截隊友既overtake，以0.698之差奪冠。

PS:我在即時錄精彩時刻，俾身處英國既幸男睇~

Trade in成功，一人前和食，一星期Flip7用後感

台灣女生放工有飯局，幸男人在英國，七點幾至出車去市中心吉之島，買魚生番屋企做一人前和食。

晏晝去咗YOHO既SAMSUNG專門店做trade in，成功不被壓價收回3千6。今日個trade in期係打去客服搲番嚟，因為太多人換新機，我係網上系統約唔到七日內。尋日sleeping睇波太攰，輕鐵番到屋企都要洽多陣至有力出車。

其實我幾鍾意FLIP 6既白色，可惜今代FLIP 7得三隻色(星塵藍，石曜點，珊瑚紅)，連網店限定色都係得一款(薄荷綠)。

外芒大咗像數又高咗，對摺後都係薄過上代機型。受惠於外芒佔比擴大，可以一個版面塞3(最多4)個widget，唔洗逐頁掃。另外，可兼用既app多咗，仲可以揀比例嚟避開鏡頭位。

唯一扣分既係用自家Exynos 2500寫入及讀取速度，影相後要等好一段時間至會出現係相簿app，明顯比上一代用Snapdragon 8 Gen3慢，希望往後既軟件更新有所改善。

PS:寄望下一代主鏡頭同廣角鏡頭都有所提升