勇闖城軒之"掛牛頭,賣豬肉"

今日無飯帶,所以落canteen,"勇闖城軒",結果..........

男同事:"干炒牛河丫"

收銀:"得干炒肉片河咋喎"

男同事:"是但啦..."

小弟:"係咪咩牛都無,生炒牛飯都無呀?"

收銀:"有"

張飛打住"生炒牛飯",但收到既係疑似"生炒豬飯".俾同枱三位同事試食,大家都話質地係豬肉,而且仲係無咩肉味個隻.餐飲凍奶茶,奶多茶味少,比我第一次飲既更糟糕........

PS:"城軒,你叫我點信你呀?"

閉關睇七人攬球+BLASSREITER

今日放假,安在家中睇七人欖球賽,係高清廣播下,真係拍得住睇現場~畫面清楚,鏡頭追住個波,攔截防守zoom in,只係欠缺現場氣氛.

仲記得同台灣女生拍拖時受brenda既恩澤,可以入大球場現場睇,全場啲男人都係飲住啤酒,連入廁所都係將杯啤酒放係尿兜頂.氣氛一流,投入度高,而且偶爾見到有人裸跑衝入場地~(其實個次係我咁大個人第一次睇現場既運動比賽)

另外,今日卒之都煲埋套blassrieter,原本被佢電單車元素吸引,但去到中段己經稅減......打鬥方面麻麻地,故事較偏向陰沉灰暗,都係熱血風格啱我啲~

ps:多謝琪芝既"技術支援"

開心直航

今日番完早更,騎羊往新墟食晏,再同人家一齊去巴倫紐睇"開心直航".我既目的當然係捧"綾瀨遙"場啦,而人家就綷純想睇日式笑片.

故事金係講機場各職位既重要性,以及團隊精神,配以少量笑料~

細心諗,如果乘客知道機師係一正一副,但由副機師作主,作考試項目,唔知會唔會投訴呢?係香港,乘客一定會話以副機師作主,正機師為輔助兼考宫既做法係對乘客唔公平,"有啲咩事邊個負責先?"

隔山買牛

係相熟玩具網站見到,將會出VF-25超合金專用ARMOUR PACK,兼且係網上予訂,當然好想買埋佢啦.之不過由於市道不景,好多玩具店結業或改變入貨方向,令選擇少咗好多,尤其係價錢超過幾舊水既貨品,恐怕到時香港既店舖唔會入貨.

聽Gordon講信和有間專幫人訂貨同bid貨既店子由樓上office搬到二樓商場鋪,於是今日出咗出望吓.見有人係櫃枱問嘢,於是攞咗張單張邊行邊睇吓收費表先.

1.貨品金額+稅(需要時付)

2.轉帳費(500円)

3.日本當地郵費(200-1000円)

4.日本寄香港郵費(1kg~1200円)

5.服務費(每5000円收50HKD 上限1000HKD)

諗咗好耐,係台灣女生既支持下,打電話去問價,件貨物$336,但加埋運費,約要五舊水(即係俾多50%).結果食完飯就上去落訂開單.係玻璃枱面下既LCD屏幕confirm貨品照片,姐仔話check過件貨七月尾至出街,叫我預八月頭我至收到貨.店員強調單張上既"不成功,不收費"(咁似意外索償廣告口號),如果訂唔到件貨,可以全數退還訂金($336)

希望一切順利,八月收到貨之餘,而其他店鋪又無入貨啦~

愛羊&頭盔

係台灣女生樓下等人家時,忍唔住影咗呢張相~

愛羊入門三週年

 今日係我同愛羊三週年既日子,本來諗住同羊仔出去兜吓風,但見佢污糟貓咁,於是改為抺車打腊.食完晏,成個下晝就係咁俾晒愛羊,台灣女生就係客廳上網煲劇.

 話晒係週年紀念日,除咗水療(清洗)兼按摩(打腊)外,特意為愛羊換上新外套(布冚),記得係街度同其他羊仔講你有幾嘆~

隔離屋既狗仔好鍾意同個飯兜玩,發出"咚咚"聲.其實佢無得入屋,好多時都係自己係露台,主人又無咩時間陪佢咁.有啲"鄧"佢悶,加上朋友既影響,我諗我都係退休至會養狗~

ps:由於隔離屋隻狗眼仔附近有個啡色圈,我同人家都想起麥兜,於是就叫佢麥兜,點知佢又咁啱好鍾意玩自己個飯兜~~

東海堂-流芒蛋糕

 台灣女生一向都有鋪食蛋糕癮,今日佢卒之都忍唔住係東海堂買咗個流芒蛋糕,假借幫屋企兩隻熊仔做生日為主題(咁都得?)...........

未切開,人家已經做好"ready"手勢,正值恆生信用咭有折,都抵食既.回程時我已盡量小心行車,好在係愛羊seat位倉運送期間,蛋糕無受車身擺動而撞爛.

叫得流芒,切開後真係見到中間係流質既芒果肉汁,童叟無欺~咁大個蛋糕,都夠人家分幾次黎食.

收藏目標

細個時己經好鍾意恐龍幫既阿頭-鋼鎖,而家話masterpiece出佢, 造型同動畫既設定非常近似,真係好期待~

以前要買隻變形金剛玩係好著侈既事宜,係大陸賣既會比香港平啲(當年變形金剛既玩具係大陸都係熱賣,可想而知TF當時係幾勁). 

番大陸廣州探親時,屋企人見我成日都要買,所以帶我去當地既百貨公司揀.滿心歡喜咁去睇,但竟然係無晒鋼鎖賣,連第二志願既"翼龍"都無得買,結果買咗隻劍龍.....

ps:將佢放係keroro隔離,可以上演番"軍曹對小嘎"既一幕

醉雞鍋

今晚台灣女生話要試新菜式-醉雞鍋.雖然湯底係用現成既史雲生醉雞湯加花雕酒,但配料就係人家一手包辦.

雖然味道無係太興食個款咁重味,但人家整既又無咁涸口.簡簡單單,烚埋啲生菜落去個鍋,又可以當一菜一肉~

細個唔鍾意食住家飯,大個咗反而鍾意係屋企食,當然偶爾出街食,得人家可以抖吓啦.

42

今日同台灣女生入村搵老豆食下午茶,之後搭42號小巴出市中心.兩年幾無搭,原來已經裝咗八達通機,而且由以前$4加到$4.3.

呢兩年既時間,好似過咗好耐咁,好攰...

ps:當年我去interview,番school training都搭呢架車......

蠔餅

今晚同台灣女生食完田中,好好彩,唔洗等枱就入得去坐(但入面又真係再無空枱).唔知係咪經濟唔好,之後門外等入座既人客都無以前咁多.行咗去買蠔餅食.由於係即炸兼"寢"住有人黎幫襯,所以邊等邊望吓街.

我同人家都覺得呢度既蠔餅好食過潮州打冷大排檔,買完就搭小巴番屋企,坐定定,邊飲邊食~

番到屋企都只係八點幾,只係離開咗屋企兩個幾鐘就來回元朗兼食埋個晚飯.沖完涼繼續係sofa睇電視.....