電單車手既心聲?

PS:本人自問就無癲,不過呢排成日落雨兼拍台灣女生番工,無得騎羊,的確覺得較悶,無咩心機既...

NO MORE HEROES 2

玩過第一集既NO MORE HEROES,被其爽快簡單既殺手榜排名戰所吸引,於是第二集都想睇吓有咩新元素.當打到第三場對戰時,面對敵人與其啦啦隊伍合體而成既機械怪,主角竟然騎住電單車,進入從市區另一邊飛來既機械人之駕駛倉,進行對戰~

當儲滿level作絶招時,會有主角係駕駛倉內既cut in,好有動畫或特攝片既感覺~其他敵人角色都依舊出色搞鬼,有啲仲係上一集死唔去但經過改造吊命既人物.整體黎講,今集比上集更爽快同完整,值得一玩~

今集既系統刪減了上集主角係市內騎愛駒自由去各目的地既特性,可能係wii機既性能做出既貼圖效果太強差人意(好比早期PC版GTA咁粗糙)係挑戰下一個對手之前,只可以係地圖menu上揀,做part time賺錢,做gym增強角色能力,買衫買武器,以及復仇小任務.

PS:晏晝騎羊同老豆食完飯,就去市中心逛,買埋嘢食俾台灣女生,再兜去天水圍搵輝仔,電單車唔單止係我既嗜好,仲係我生活既重要元素~

公司三人藍球賽

今日去良田體育館,因為雄仔參加咗公司搞三人藍球賽,自己中學都打過一年波(超渣),所以都去襯吓熱鬧.

女朋友既支持當然係必勝之道,五點十個字到場館,其女友己經到咗兼帶我入球場.

比賽開始前,雄仔同一眾隊友briefing完,就出去熱身,跳射有板有眼~

結果係一勝一負,第二場對手有個較牛精兼技術型既球員,同雄仔有啲衝撞,唔明點解打波仲係會有啲唔太君子既球員.雄仔係隊中得分最多既球員,三分,上藍,截球,仲有"零秒出手",交足功課,希望其他球員快啲進入狀態,順利奪標~

ps:本來用手提電話拍video錄低比賽,點知廿分鐘完場時,部機hang咗,停唔到機,結果要強行拆電.....結果條片無咗.................

聚

番完早更,趕輕鐵,西鐵,地鐵,出柴灣,同兄弟們一齊去望吓阿強個位.鮮花,生果,香煙,芝華仕18,以聊表對老朋友既心意.兩年了,大家都有改變(例如:開始玩相機,工作環境,做爸爸...),不變既仍然係"友情".

夜晚小新帶我地去佐敦既火鍋店"高流灣"開餐,相識咁多年,食得最多既都係打邊爐~材料新鮮,魚三角多肉得又唔腥,墨魚丸好好食,花甲好甜,湯底夠晒味~

阿禮明顯有心事,成日都煙不離手,唔似平日為享受而食既態度,說話亦較少.希望佢搏殺之餘,亦能顧全身子.

PS:晚飯後段覺得好攰,阿潘話"咁你第時點湊仔?",聽完真係有啲擔心.....

娘惹

由於想台灣女生唔太操勞,好多時夜晚個餐都係出街食,今晚就搭小巴去置樂既娘惹~

前排多得外母大人上門幫手看顧人家,當然要叫埋出黎一齊食飯啦~

呢個巴東牛肉好似炆牛腩咁既質地,個汁都幾好味.

其實之前人家同外母黎過呢度食,評價都係好食兼抵食,今次我第一次幫襯,都覺得物超所值.今日都唔少人係門外等位,好在我地早少少到,等咗兩個字左右就有位.

ps:好懷念以前可以同人家騎羊出入,四處去食飯既方便~

傳說中之"十八羅漢"

今日一眾崇真書友趁復活節大假,一齊到舍下聚舊,教練因為身在盧山(苦練昇龍霸?)未能出席.

人口分佈依舊係一枱麻雀,加一梳化打機.Oscar係出發去飲前,食出一舖"十八羅漢"大牌,佢開心到話"相機,有無相機?影低佢先~"

外賣pizza,打牌,打機,雖然每次聚會都係咁既格局,但大家有傾有講,始終都係開心.daivd同阿嫂都好關心我同台灣女生,仲特意借埋本書俾我地溫吓書,為十月做好準備,感激!

以前細個唔太明白,點解啲大人成日都叫啲朋友上黎屋企,而家卒之都明白箇中既原因.

ps:同David一齊打Wii既biohazard時,好在當年一齊係仁愛堂溫書,偷時機去樓下"up dup"機舖打"侏羅紀公園"槍game既感覺~~~

中大校友親善家訪

今日台灣女生既大學書友渣車入黎家訪,買定餸上黎落廚,真係有心.

飯前同飯後都係雀局耍樂,本人就負責洗大餅,相信人家今日應該都可以驅走悶氣~

人.神.魔戰

番完夜班,訓咗四個鐘左右就起身,食少少嘢就騎羊去新墟"巴倫紐"會合德輝,一齊睇"人.神.魔戰".

故事係講隨著人類文明進步,生活得到改善,人類開始否定以往依靠敬拜神,以祈求幸福生活既觀念.一向倚靠人類崇拜同祈禱以得永生力量既眾神,係領袖"宙斯"帶領之下,接受人類向眾既宣戰.男主角係宙斯同人類某國既女王所生既半人半神,帶領人類抵抗受宙斯妥委託既冥王哈帝斯之來襲.

話就話係3D,但其實無阿凡達咁立體,可能係budget既問題,最立體既只係字幕(番到屋企睇番啲影評都係咁講)....故事一般,只係將幾個希臘神話串連一齊,希臘神話一向都係好簡單,所以個劇情都係無咩支折同驚喜.

ps:睇完戲同德輝食埋個下午茶就騎羊去市中心,係相熟書報攤見到肥貓訓係報紙架上~