貴人出手相助

好攰咁病住黎番夜後,晏晝勉強騎羊去良景搵老豆食飯,再番屋企.同人家睇陣電視,就係客廳訓覺,突然收到德輝既電話,話佢同子健踩單車係我屋企附近,於是以冰凍汽水作餌,誘騙佢地黎幫我安裝bb衫櫃.

其實個櫃只係要安裝腳部既轆,同埋頂部揭板裝置,但由於個櫃本身太重,自己一個人真係唔可以安全地放平佢黎安裝.勞煩晒德輝同表叔,我會同個仔講及你哋兩位叔伯既幫忙.

其實由我初畢業番工,學車渣車,德輝同表叔都幫我唔少忙,教我唔少嘢,蠻有阿哥既感覺~

親子茶聚

今日老豆放假,朝早打電話黎約係村口食下午茶.我同台灣女生都係放假,於是約佢係市中心飲茶,不過係老豆係新墟行去市中心攞定位.

難得可以同老豆飲茶,唔太趕時間黎傾吓,當然要影番張相.老豆見人家個肚比上次大咗啲,又關心家嫂有無唔舒服,好似仲緊張過我....

再一次放題任食中招(木村)

早更過後,騎羊去泳池游水,再去置樂玉林苑食晏,番屋企放低啲嘢,就出門會同台灣女生,同卓敏及小歌仔(新電咗個髮)食晚飯.係無咩主見之下去咗兆萬既木村食放題.....

本來諗住食11樓既松屋,但由於卓敏食過,所以試呢間,點知嘢食麻麻,服務態度麻麻,甜品每人限叫一款(並非任食),任飲啤酒係藍冰.............七點入座,但已經有不少食品售罄......

每人$158埋單,去隔離既家樂間Gelare食甜品,坐吓傾吓,差唔多一個鐘至走人.起初只係細雨,行到創興等巴士就倒水咁落......

情義結

今日同德輝,Ivan同阿邦係元朗睇完電單車,係元朗西鐵站買咗套幪面超人BLACK同影月既紀念車飛.先前諗住唔買,但始終都係敵唔過情義結.........

今次既幪面超人祭,除咗有1,2,V3,龍騎,劍,響鬼同電王,同場都有本人喜愛既BLACK,甲鬥王同FAIZ.見網上都無咩人話好睇,電視都無谷廣告,所以都係齋留車飛作留念,反正入場都無咩特別既想買.

希望之後都會再搞,咁我就可以帶少主入場參觀同影想,培養吓佢對電單車及RIDER既興趣~

超合金魂 GX-54 飛影&黑獅子(税込)：8,925円

今日入元朗攞番之前訂落既飛影+黑獅子既超合金,手工唔錯但飛影就由動畫裡既白色變咗做銀色.原定係七月尾有貨,但遲遲都未收到老闆娘既電話,落訂張單又無該店既電話,故委託德輝上去幫我問吓,原來老闆娘抄錯咗我個電話,所以一直keep住一盒黎等我摸上門.

細個睇電視時都有追"忍者戰士飛影",每次有主角們有危難時,飛影都會出黎幫手,以一敵百(屈機),以及同其中一架機合體黎清畫面.一見到佢出超合金就好想買佢黎玩,一嘗精細既合體過程.

黎緊仲會有雷鳯鷹+活動重視型飛影(9月)同爆龍+零影(11月),自聖衣神話儲齊十二件黃金聖衣後,好耐都無集齊一套玩具既壯舉....上之VF100既MACROSS F,因為廠商既商業變陣,只能儲到3架機,欠缺綠色偵察機同紫紅色既獨立機....

PS:說明書裡對飛影變作合體機蕊既指引不足,搞到我"舞"咗好耐至可以嵌入,但都有卡住手背既刀刃.用牙籤幫手,結果都有少少花,故建議大家以X型黎放置飛影背部之雙臂,避免手背之刀刃凸出膊頭之邊線.

INCEPTION

今日番完夜更,晏晝同台灣女生去新墟買飛睇"潛行凶間",可能巴倫紐四點場好爆,唯有去凱都買5點鐘個場,係吉野家慢食再係附近行吓等時間入場.

好在之前聽阿roy(健輝)講,齣戲無咩厠所位,,行開咗會唔知發生咩事.我同人家只係帶咗支水入場,sips咁飲,臨入場仲去多次厠所添,成功坐足兩個半鐘.

故事中既新概念-潛入夢境世界,但夢中有夢,計中有計,其複雜性比MATRIX更強,因為MATRIX只涉及現實及虛擬思想精神世界.

劇情太多重要資訊,節奏緊湊,邊睇邊諗,好忙,究竟男主角有無由LIMBO(混沌)返回現實世界呢?番屋企上網SEARCH其他觀眾既回應,見到呢幅圖,至好似清晰啲,一個撮要咁.但根據呢幅圖,日本仔同男主角都應該無離開limbo.......

ps:http://www.141hongkong.com/forum/redirect.php?tid=573901&goto=lastpost

老豆生日

今日係老豆既西曆生日,特意騎羊去良景同佢食晏,兼呈上少少心意.未能約係酒樓舒舒服服咁同埋台灣女生一齊食餐晚飯,始終好似爭啲,希望老人家唔會介意.

食過飯,閒聊完,老豆如常陪我去攞車,目送我騎羊番工.番到公司,SEND咗個短訊俾老豆,老人家今年57了...真係希望快到十月,見到老豆既開心樣~

早更,覆診,晚飯

番完早更同台灣女生出佐敦覆診,去圓方行住黎等小歌仔,太陽都開始落山.

人家係雜誌見到有間"龍蝦燒"係佐敦,於是去試吓,以$48@叫咗三隻燒龍蝦仔.

聖子皇,美國石蠔都有叫,其實店裡較特叫既都係海鮮燒,另外我地都有叫燒茄子,芝士西蘭花,同埋泰式燒魚(無咩味).總括黎講,調味變化唔多,蒜蓉,芝士,XO醬,可能我地無咩叫肉食.

飲品方面,大會係無水供應,要叫支裝水,我就一杯大Hoegaarden,人家飲汽水.當叫竹蔗茅根時,阿姐話啱啱煲好,未雪凍,錯有錯著啱晒養生既小歌仔~

埋單每人$160,我同人家覺得雖然味道ok,但下次都應該唔會再幫襯.行去隔離既63x巴士總站等車,一上公路就攰到訓著..........