少主床舖

前晚棟哥黎幫手砌床,尋日洗埋啲床單被單,今日加埋蚊帳同吊飾,少主既床鋪今日卒之達100%完成度!

之前房間既窗簾較沉色,所以係IKEA買咗白色底彩旗花既窗簾布.我同台灣女生將"死懶鬼"鬆弛熊放入床鋪試位,感覺都唔錯~~

希望一切如期進行,星期一(4/10)少主係法國醫院出世啦~

PS:大假呢幾日都係咁執嘢,家具位置要改動,洗晾BB衫,抺塵打掃,電器安放及電源位配給....真係好攰.

特別鳴謝-楝哥既技術及人力支援,同埋IRIS既蚊帳及玩具掛飾

VL前的P更

今日係大假前既晏晝更,亦都係最後一更伙拍EDDIE同阿麟,所以都影番張相黎留念~

睇番啲相至發覺自己曬得都幾黑吓,平時自己都係得個"做"字,不學無術,都無咩嘢可以教到佢哋,只係可以分享吓一啲經驗,一齊開開心心咁番工.

PS:今日換新刷頭至發覺用咗三個月既刷頭真係殘好多...............

超合金魂 GX-55 飛影＆鳳雷鷹 (税込)9,450円

今日收到相熟玩具店既電話,話我預訂既飛影超合金第二彈-雷鳳鷹已經番貨,於是騎羊入元朗去交尾數兼攞貨.

今次連埋既飛影係活動(action)重視型,但本人就較喜歡同黑獅子一盒既變型式既飛影,因為較似動畫既設定,機械感較強~

合體後既空魔,外型都唔錯,有啲似monster hunter既feel,不過呢比超黑獅子個盒,今次既qc手工真係差啲,係啲鬼鼠位會見到的剪位"披"口位(用指甲鉗剪模型個隻),飛影大脾位既銀色有啲唔均巡,整體黎過都係ok.

其實合體方面已做得好好,跟足動畫,但無奈現實世界有地心吸力,所以玩具要加上3個配件,以固定飛影之位置.

十一月買埋個爆龍就可以儲齊一套超合金系列,不過爆龍係三隻之中最唔起眼既一隻,希望合體gimmick方面會有驚喜~

ps:Action重視型飛影既大髀太壯大,所以擺post時好容易俾下身塊甲刮到,玩兩玩就花咗大髀啲銀色油.....

外母大人GE

今朝11點收到外母來電,話佢半夜四點肚頂唔住,由鄰居陪同下去急症室睇醫生,醫生話驚脫水,所以要上C2病房吊鹽水觀察.身為賢婿,當然梳洗食啲嘢,幫外母大人執啲日用品就騎羊去搵外母大人.

苦了鄰居阿姨陪咗外母大人成七個鐘,接手後都係O房等咗近兩個鐘至上到病房.好在係C2,如果去其他病房就無2人房.俾職員收完症,就陪外母一陣,等到台灣女生放工行過黎探望吓,跟住我地就去市中心食晏.

之後上咗外母家攞啲替換衣服,我就搭輕鐵去探多次外母(買埋本明報),而人家就打的番屋企準備晚飯.

好在外母大人都無話痾到無胃口,仲好八卦咁行出去"莊"人哋個護士站,希望外母大人快啲好番~

轟天猛將

sleeping day,約咗德輝係巴倫紐睇16:05場"轟天猛將",$35張飛,超抵~單係卡士已經係值回票價,比上一次既第一滴血之熱血回歸更好睇.

故事簡單,一班僱傭兵接咗中情局既工作,任務係去一個小國收拾前中情局既毒梟,兼其操控既當地軍權政府.動作方面全是硬橋硬馬既埋身搏鬥,以及粗野式既駁火場面,絶非CG特技及靚仔post所能比美.

第二男主角Statham非常搶鏡,打得又夠man,加上本人對騎電單車角色有情義結(仲要係ducati).

龍哥一把年紀,64歲都可以一身肌肉,都算係咁(應該又要操又要打針食藥).希望佢可以成玏退居幕後策劃,俾啲後生既上位,唔洗咁操勞啦.....

雷電夜

呢張係我人生第一次影到既閃電相,今晚十點幾開始就係咁行雷閃電,持續到十二點就開以倒水咁落雨.

番完早更,騎羊去泳池游水,四點幾番到屋企食少少乾糧,七點半就同Oscar,楝哥一齊係元朗間七福神食日本嘢.

三條仔食吓講吓,咁又坐咗兩個幾鐘,本來Oscar話去食糖水,但我見烏雲密佈,係咁行雷閃電,嗱嗱臨告辭,跑去開布冚,撻車走人.沿途都係密集式雷電交加(好似打機或拍戲咁),好驚會大風大雨,好在都順利番到屋企,感覺好難忘.

泊好車,就番時間出去巴市站接去完大學書友聚餐既台灣女生,驚隨埘落大雨嘛~

ps:細個時好多時會將"行雷閃電"講錯成"行雷小便"

智利紅酒

感冒初癒,今日同台灣女生係吉之島買餸,係面熟既阿姐介紹吓,買咗呢隻智利紅酒,不過我個支係2006年.

$150左右,口味都唔錯,有別於一向飲既法國波爾多既風格,唔洗咁單調.唔知出年人家可唔可以再陪我品嚐GRAND CRU CLASSE?