醉漢

今日幫幸男換衫時,見佢好似大隻咗,個肚仲抛咗出黎,成個佬咁.於是將之前買hoegaarden送既迷你啤酒杯candle,交俾幸男拎住黎影相,真係好似一個飲完啤酒既醉漢咁~

放假天,湊仔日,外賣夜

今日放假,本來諗住晏晝抺車打腊,但實在太攰,食過台灣女生整既冷麵,一齊係梳化夾住幸男睇電視,清吓之前錄落既節目.夜晚就叫板長外賣,實行全日休息,足不出戶.

我哋食外賣日式晚餐時,幸男就咬住凍牙膠止牙痕.其實平日放工後仲要湊小朋友,真係好攰.難得有一日係一家三口係屋企抖吓,感覺都爭好遠,平日掛住家務,侍候幸男,真係兩公婆傾多句都無時間,有時間都去訓覺................

新舊交接

新買既F-22星星叫,俯瞰飛機形態,外型整體尚好, 與真實既F-22相差不多.

可惜飛機底部,推進引擎下多咗腰位同大脾,令佈局失去流線型,不符實物,要扣分!

機械人形態就相當出色,倒三角上身兩旁機械感十足,體型比前作F-15大少少,下半身關節活動亦較多.舊個隻其實已經好幾年,除咗一買番黎背脊部件少咗粒螺絲釘(有一塊背甲係變型時會脫落),最近右翼既關節仲爆埋,所以忍唔住買咗架F-22頂上.

兩代星星叫,交接儀式完成(一隻爛翼),狂派契弟角色後繼有人(其實我仲有一隻F-15黑色底紫色拉花既SKYWARP)~

PS:有段時間幸男一個人坐係度,塊面貼住枱面,但一見到相機就笑起黎~

子承父業?

番完夜更,訓醒就同幸男玩(其實某程度都係俾佢嘈醒),見到今朝放係客廳既頭盔,心血來潮俾幸男試戴吓.七個月大既小朋友,個頭當然係唔啱加大碼既頭盔,不過幸男既膊頭啱啱好托住頭盔底部既兩邊,視覺上好似戴得好穩咁,其實鏡頭外有我隻左手"磅"住~

平時幸男見我番屋企除頭盔都表現得好奇,今次由佢戴上,完全無反抗或扭計,仲好開心咁添,唔通佢都想騎電單車?

傍晚騎羊入咗元朗搵相熟店舖留隻S.H.Figure既影月,點知忍唔到手買咗隻電影版既MASTER PIECE星星叫($680),因為我本身都好鍾意F-22戰機,加上自己都有買之前既F-15星星叫MASTER PIECE,有啲情義結................

幸男見世叔伯

今晚同台灣女生帶幸男出市中心見世叔伯兼食上海嘢,其實之前都無咩點同ANDREW及楝哥食飯,適逄今晩佢哋又約食飯,於是一齊食~

唔知幸男係咪認得佢哋,係世叔伯既懷抱下都無喊又無扭計,有一幕好似係楝哥"磅"住幸男同Andrew講數咁~~

爺爺見幸男

今日老豆偷時間黎睇吓幸男,由於唔方便帶埋幸男出去食下午茶,於時叫老豆村口既茶餐廳外賣黎食.

其實湊幸男都幾消耗體力同精神,有時都會忟同灰心,但見老豆好開心咁抱住幸男,都會覺得有啲安慰.

PS:夜晚出去市中心同大姐,EMILY打邊爐做生日,好耐無見既適巍都有黎~

小金子家訪

今日台灣女生既大學書友小金子黎家訪,唔講都唔記得原來當初結婚搬出黎住,小金子已經上過黎一次.今次就多咗幸男小朋友,當然有影番張合照~

有朋自遠方來,不亦樂乎.人家親自下厨,以西餐黎招待客人~

幸男先食糊仔,之後就咬住凍牙膠黎陪我哋食晚飯.食完飯,我就洗大餅,女仕們就繼續聚舊清談~

呢個係我今日番完早更去置樂食完晏,係相熟商場逛個陣見到既bb床掛飾.賣點係會閃燈,會播音樂,可以播預錄30秒既錄音,bb一喊就播出兼著燈~$299,猶豫咗一分鐘就買咗,佢係我第一份自己揀黎送俾幸男既禮物~

雷神奇俠

今日將幸男交上外母家託管,因為傍晚約咗Jacky,Ivan,輝仔同賢仔去睇<雷神奇俠>.男主角Chris Hemsworth都係大隻又型,女主角係黑天鵝既Natalie Portman,前半部份文戲較多,臨尾至多啲打鬥.以英雄片黎講都係不過不失既,只係稍嫌無男主角攻擊咩特別花臣.

其實放低幸男之後,我同台灣女生係外母樓下既翠華食晏,對上個次黎翠華食都好似係拍拖個陣時,而家啲嘢貴咗好多,午餐都要成$40......

人家苦得15分鐘至食到燒汁豬扒炸雞翼意粉,本來好趕時間,好勞氣,但食落又幾好味,結果無咁嬲....

七點幾睇完戲,上外母家湊番幸男走,等輕鐵時同佢係月台影咗相,好在全程車都無喊無扭計啫~

慶祝外母生日@2+2 CAFE

番完早更,騎羊番屋企沖個涼,換件衫就同外母,台灣女生及幸男一齊出沙田行吓.外母大人無嘢睇中,我反而買咗啲衫,晚飯係2+2 CAFE食自助餐.

當然要影番張三代同堂黎賀壽啦,今年係第一年有多個家庭成員黎慶祝生日嘛~

幸男今日就係外母大人既甜心先生,外母當然受落,不時抱住佢黎四圍行~

我同人家都係主力生蠔,每次侍仔開三隻俾你,唯有行密啲~

外母攞咗平時都會係茶餐廳食既咖喱牛腩.

再有韓式既泡菜冷盆小食.

甜口既班戟,我諗因為平時食開西多士既關係......

最後攞埋生果,可能當飯後果.

大會有少型生日蛋糕送俾訂坐生日賓客,細細件,每人食一口,唔怕浪費嘛,話晒都有得吹爉燭丫~

人家為我係自助咖啡機沖杯CUPPACCINO,如果有凍飲就更加好~巴士入屯門再轉的士,番到屋企都十一點幾.雖然攰啲,但都總算係不負賢婿既虛名........