終極路軌

係吉之島買埋橋躉配件,番屋止就幫幸男將兩set路軌組裝為一.見幸男個樣咁肉緊就知佢幾咁開心~

兩set夾埋一齊,集捐山窿,上山,過搖擺吊橋,sir滑梯,過接橋,經發聲車站(叮叮鐘)等多元素於一身.

合成後都幾大吓,幸男可以坐係其中一個圈內觀賞火車.即使幸男唔係坐定定望,只係客廳玩其他玩具或四處走動,都要火車玩具開動著(唔知幸男係咪要隨時都望到行駛中既火車呢?).雖然好似好好玩咁,其實都有發生技術問題.除咗多咗兩架thomas火車頭外(因每set都包一架),另一個問題就係追撞.因為劭外買既fearless freddie行得太快,約四五個圈後,freddie就會追到thomas,發生追撞.另外收納都要用成個膠箱,仲要係個山要另外搵地方擺埋一邊.

ps:當初熄火車玩具時幸男會喊住話"開呀開呀,火車呀.."同埋喊住咁講"拜拜thomas,拜拜freddie..嗚嗚...".要一段時間既教導,幸男至開心咁話"拜拜火車,聽日見~"

火車SIR滑梯

今日特意搭輕鐵入元朗搵舊玩具店,因為想碰運氣睇吓有無之前上網睇中既THOMAS火車軌.係德輝既電話提示下,卒之都搵到間舖頭兼發現目標玩具.四百幾蚊比円價平,就算以之前買個SET吊橋黎比較,元朗都只係貴係賣貴灣仔三十幾蚊.見幸男就生日,貴少少都無所謂啦,最緊要佢鍾意嘛,幸男見到有少車玩具當然開心,猛話"拆哦拆哦.."

跟住紙盒黎砌,好快就搞掂,幸男怕聽見THOMAS衝落滑梯後既緩衝機關聲,我同幸男講"THOMAS sir滑梯啫,無事0架".幸男要一段時間觀察後至安心,話"火車sir滑梯哦~".自己細個時都想有路軌火車玩具,而家買俾幸男玩,某程度都有一償當年心願既元素.

第一個THOMAS情景SET入手

今日上完PRCC,去咗太原街搵玩具舖買THOMAS情景SET.,行到第二間就發現目標之一:吊橋.$289比5XXX円價平,可惜無山頂個SET,老闆話遲啲會番貨,但唔知幾時,叫我等閒就打去問吓喎.幸男見我手拎住個白膠袋就睇穿係玩具,大叫"火車呀,火車呀".我放低啲嘢,就同幸男影番張相留念.

首先係砌原裝既路綫,幸男坐係中間追住火車黎望.由於中間住唔太大,所以幸男要坐到左閃右避黎睇THOMAS.

跟住就加埋之前買落既火車路軌,擴闊幅蓋面積.吊橋特別之處係當火車經過時,火車會左右晃動,好似真係過吊橋咁.路綫長咗,新成員FREDDIE一齊行都唔怕追撞~

另外車站仔內有個叮鐘,當火車經過時會發出叮叮聲,好得恴~幸男當然係開心,相信加埋個山頂SET合併埋,路綫會更加有趣同豐富.最新調查顯示,幸男較喜歡新火車FEARLESS FREDDIE.

工作+娛樂+家庭

今朝番早更都特意唔開車,因為放工要去新墟同老豆兼台灣女生睇轟天猛將2.其實尋晚P完騎羊肚兜咗去戲院買定飛,但阿姐話太夜,已截咗預售,結果今日A完放工至買.

之後同老豆係厨房佬集合食下午茶,食住傾住黎等人家放工(三點幾)兼開場.

對上一次同老豆睇戲都好幾年前,應該係超人強勢回歸定係鐵金剛之皇家賭場.因為同老媽不和,老豆唔方便出黎見我咁耐,成日俾老媽CHECK住.今次有咁多粒陪住我同老豆生活成長既動作巨星,當然要一齊入場睇啦.

有埋家嫂陪入場,老豆當然開心,佢自己都好耐無入戲院嘛.劇情普通,昔日飾演軍佬既尚格雲頓做奸角,由頭帶尾,李連杰出得頭十分鐘,州長同布斯韋利士就只係出尾個十幾分鐘,主力都係龍伯同積遜史達頓孭飛,感覺比上一集差啲. 

睇完戲上外母屋企接幸男去市中心明星同爺爺嫲嫲食飯,幸男仲收到THOMAS燈籠添.平時一個星期都會番老家黐餐,今次就出街食,免得兩老太辛苦,一個煮,一個洗.

幸男一有機會就搞老豆個耳筒,爺爺當然開心陪玩.自幸男年初番老家起,老媽好似對老豆好咗啲,兼且有孫仔玩,老豆既心情都比以往好,即使痛症依舊困擾.三代同堂可以一齊出去食飯有講有笑既日子真係要珍惜,畢竟大家都老了,得幸男最後生~食完飯一齊搭的士番屋企,先去老家放低兩老,再番自己屋企,蠻充實的一天:工作+娛樂+家庭.

新枕頭

訓咗咁多年都係用買床褥送既太空枕,但由於搬屋後新床既床頭板有軟墊,所以令我唔夠六呎高都會腳踭好近床尾邊.加埋張被(尤其係厚被)的話,就會唔夠位包住雙腳,或者係半天吊.

見吉之島寢具特賣,於是同人家一齊去睇,搵個深度短既枕頭黎俾雙腳多啲開間.啱心水既品牌一係SINOMAX,一係就TEMPUR.雖然SINOMAX係平啲($800左右),但係個款只係普通太空枕既款,兼且同用既深度差唔多.TEMPUR呢款深度夠淺,而且式樣特別,平訓時覺得後頭位被承托得好舒服.SINOMAX阿姐話SINOMAX係比利時料,對家只係代理品牌,所以較貴(暗示唔抵買).

結果都係買咗TEMPUR個款,雖然係貴啲(折咗都要千三),但真係啱我既要求,得佢有短身既款式兼且係舒服嘛.騎羊番屋企,台灣女生係後座攬住個盒,因為放唔入SEAT位下...咁多年都係用贈品枕頭,今次貴少少當係拉上補下啫,今晚就同舊枕頭講拜拜~

生化危機

 今日同賢仔係凱都睇3D生化危機之滅絕真相,都唔知睇到第幾集電影,感覺好似睇呢個女角睇咗好幾年.劇情唔再係救人,主角被UMBRELLA囚困,WESKER派手下前往前蘇聯既秘密水底基地作救援,例牌係擺脫機關兼掃射喪屍.

李冰冰飾演既Ada Wong比上映前網上流傳既劇照好,夠晒冷艷(其實呢齣戲都唔洗點感情發揮...)無咩悶場,係四個城市場景打喪屍都幾特別,只係臨尾上去冰地與歹角肉搏戰有少少誇同耐咗啲,其間X光透視斷骨畫面有啲似PS2隻GAME咁.

PS:睇戲前同賢仔係SALZERLYA食晏,好趕咁食咗個鐵板漢堡扒餐,計埋飲品四十幾蚊,味道都OK~

一家沉迷

我同台灣女生見幸男咁鍾意THOMAS火車玩具,於是今日去市中心吉之島玩具部買咗個$69.9既路軌SET俾幸男(玩具反斗城反而無得賣).其實套裝只係有好幾個直路同彎位既路軌,兼一個彈簧橋.目的只係想將個圈擴大啲.另外我哋仲想買多咗架火車俾幸男,幸男睇完單張都無指邊架鍾意,我心水揀"FEARLESS FREDDIE",全場得番一架咋.

幸男見張CATALOG咁多火車玩具,就話要俾男男.一心二用既幸男聽見火車行到佢面前,就舉起CATALOG黎望THOMAS,情況有啲似大人係酒樓擧起份報黎紙望下枱面有咩食咁.

心情興奮既幸男,夜晚臨訓係床上面攬住晒啲毛公仔係身,好似舊時歌手係台上收歌迷送既毛公仔咁.小朋友既笑容,永遠係父母最大既安慰.

PS:上網CHECK過,買齊兩款情景SET,就可以合成一個穿山洞兼爬山過吊橋再下衝既組合,要努力搵地方買齊佢先~

親子活動之路軌火車THOMAS

PRCC放學後直接搭車番屋企,只係村口花炮會食個中式牛柳飯就接外母手湊幸男.台灣女生番晏未放工,見幸男呢輪咁鍾意睇THOMAS電視,於是攞番新年個陣師傅送俾幸男既THOMAS玩具出黎.為咗呈現真實版THOMAS,我用傑傑送既THOMAS立體紙藝書作背景,兼且播埋書內主題曲音樂. 

起初幸男坐埋一邊睇得入神,有時搞吓個紙盒.男仔唔係應該都鍾意路軌火車架咩?我細個時都好想有得玩(當時電動玩具較貴,電池又貴,係小朋友眼中係富貴玩意),而家諗番個原因係男仔鍾意車,又想見到車會自己走動,咁得出黎既結果就係玩具路軌火車可以滿足到呢幾個元素.

之後就好興奮咁又烏底身睇,趴係地面黎睇,仲會叫"火車哦","THOMAS".......見佢咁開心,我都有啲安慰,起碼好過上次個市中心父子團丫~

預祝小歌仔生日

 小歌仔生日在即,特此誠邀小歌仔同卓敏家訪寒舍,一齊聚吓兼食餐生日飯.雖然小歌仔放假,但要等卓敏收工,所以都係晏開餐.

食材係台灣女生放工同我一齊係市中心買,番到屋企後,我就騎羊入元朗攞訂好既生蠔.其實仲有盤沙律,不過枱面無位,要食晒生蠔至拎出黎.大家都俾生蠔"浪"住個胃,結果牛扒都食唔晒,魚生又食剩啲,結果我同人家食剩既牛扒變咗我聽日番晏既晚餐飯盒,而卓敏就拎走食剩既牛扒同沙律.

大人嘢食唔啱幸男食,所以預俾咗個蛋糕俾幸男食,你睇幸男食得幾開心~

壽星女既蛋糕係TIRAMISU,,所以唔啱小朋友食.由於係現成即買既,所以無小歌仔個名,希望壽星女唔好介意.蠟燭數量暗示咗年歲,小歌仔話一支就夠,但上訴無效.

SET好腳架,"嗶嗶嗶..................吒",大合照完成!又大一年啦,希望準大姑拉身體健康,心想事成.蛋糕當然係食唔晒,壽星女攞埋剩下既蛋糕番屋企繼續食.真係滿載而歸~

HIGH TEA

今日同台灣女生帶埋幸男出旺角搵小歌仔同卓敏食下午茶,本來係朗豪坊既SKY BAR,但要四點後開,於是去咗隔離既MR. STEAK.

兩位準大姑拉都比我吔早到,結果大家都係揀二人TEA SET, 只係集中搵心儀特飲.

幸男好似唔係好記得卓敏同小歌仔黎過我地屋企咁,要一段時間WARM UP,不時因小歌仔攞走交通工具書仔而喊.

嘢食一上枱,大人掛住影相,幸男已出手攞,好在人家眼明手快,成功欄截.出黎食吓傾吓,都幾開心,平時番工日見夜見,而家就要約先有得見.

幸男都食咗大半個北海道牛奶布甸,傾傾吓又約好咗七號主我屋企同小歌仔食生日飯添,要壽星女入屯門真係有啲唔好意思,不過當就吓幸男同卓敏啦~~食完又搭番巴士入屯門,因為晚飯係老家黐餐.