300 -Rise of an empire

之前睇過戰狼300,覺得故事好正,繼而留意男主角其他電影.續集無係戲院睇,因為男主角已轉,兼且係講雅典軍如何對抗波斯,所以等到出咗碟至租黎睇.

唔怕貨比貨,最怕唔識貨,上一集男主角謝拉畢拿真係型好多,續集個位成個阿叔咁.故事係上一集既同一時間雅典軍與聯軍係海戰與波斯軍對峙.海戰氣勢十足,而且鬥智鬥謀,可惜唔知點解要加插對方女將以美人計引誘男主角變節(仲要係男主角0趙完鬆).以熱血及史詩式黎計,上一集一定好好多,今集著重行軍策略多.由於男角既不濟,加上自己對英雄主義既偏向,第一集絶對係好睇過第二集.

後來,雅典軍及聯軍慘敗,男主角一心與波斯女將作終極一戰,視死如歸.最後關頭,斯巴達女王收拾亡夫之痛並率領海軍前來支援.以熱血及史詩式黎計,上一集一定好好多,今集著重行軍策略多.由於男角既不濟,加上自己對英雄主義既偏向,第一集絶對係好睇過第二集.

PS:波斯國王尚未被擊倒,睇黎仲會有第三集........

漢爺請食飯

新墟富臨食飯就試過好幾次,元朗富臨皇宫就第一次去.

食得咁豐富,唔通去飲?其實係漢爺升職,請我地一眾舊同事好友食番一餐高興吓.

平時各有各忙,好難得可以聚埋一齊,大家都好珍惜合照既機會.

之前買落既閃燈都好少用,今晚就大派用場之餘,更可以摸索吓設定轉換既意識.咁啱我地坐近擺酒既佈幕,所以大合照時好似去飲咁(當然係無咗新郎同新娘).

雖然分兩台坐,但無損氣氛,大家食到尾段都有轉枱坐下或者撩飲勝.

荃灣

今晚一家三口去荃灣OUTBACK食飯,一大人餐加一小童餐,$500有找.雖然幸男未病好,但我哋都有"柯打"杯果汁過幸男.

之前幸男都有同人家出呢個商場睇tomica展,但我因屋企停電而不能會合....而家剩底既就只係呢個好多tomica既display櫃.

機動遊戲好多都壞咗,呢架電車就俾其他外籍較大既小朋友佔坐,好在佢地都讓位俾幸男,順便坐順風車,一齊搖.

幸男專心地享受車長既時刻,我就不停為幸男影相.

臨去千色店之前,陪幸男去樓上玩多個機動遊戲,可惜幸男影相時唔太願望鏡頭.其實今日主要目的係去ICE FIRE買之前睇中既衫,屯門都無該款式,幸好仲有得買,last一件.人家叫我趁特價揀多啲衫,我就只係揀多一件白色polo恤.

PS:俾錢時幸男話"爸爸都無咩新衫",我無覺得尷尬之餘,反而開心幸男為我著緊.

Gatchaman

細個好鍾意係電視睇神勇飛鷹俠卡通,中學時睇過OVA版既Gatchman更加喜歡.早幾日見出咗真人版電影藍光碟,開開心心咁買番黎睇,點知換黎係失望......

造型上都OK,但斗篷就好唔掂.唔知係咪無budget定係特技尚未到家,長期都係"THE"落黎,好似窗簾布咁,完全無荷李活黑夜之神既"型".

明明係科學忍者隊,唔知點解變咗用外星礦石力量(仲要隻變身手帶變咗成隻精工鋼帶錶咁...)以往卡通都多忍術(必殺技), 但而家只係用個別既專用武器,兼且拿住支嘢好似西洋劍咁.....(嘔血x10).

壓軸既鳯凰號外型與OVA版既設定相若,只係換上灰色迷彩,但內籠就好似坐OFFICE椅咁.無堅不摧,帶有鑽破功能既鳯凰飛彈,只係輕描淡寫咁打破敵人保護罩,"科學忍術-火之鳥"總算靚仔展現.

早知係節拍租DVD睇就算,音效同音樂一般,無OVA咁正.結局暗示有續集,真係無眼睇........

兒童賭場

今日晏晝攞假,去市中心會合台灣女生同幸男食韓餐,之後就搭巴士,再轉小巴(等咗好耐車...)去黃埔既美國冒險樂園.第一樣玩既就係迷氣海盜船, 以為齋前後蕩,無諗過會左右旋轉,突如期來既離心力令差啲嘔番啱啱係Mac Cafe飲個杯凍啡出黎(幸男反而玩得好開心)....

下一個項目係路軌卡車,幸男獨自上陣.起初都怕卡車開動時,幸男會喊住要人陪,好在幸男順利完成.

全日之重頭戲-碰碰車,咁遠水腳黎都係為咗呢款係香港一度絶跡既玩意.玩一次都成廿蚊,所以我都係堅守記錄員既角色,幸男同人家玩得開心就好了.

雖然只得人家同幸男坐旋轉杯,但職員都照開動.人少都好,起碼唔會有人遮住照相嘛.

呢款巴士模擬遊戲,啱晒幸男一嚐車長既感覺(其實係等緊媽媽換代幣,霸住個位先).

幸男等玩Thomas火車時好無心機,因為一心想玩時,俾一位小妹妹捷足先登.

幸男玩個陣面容磞緊,以為幸男覺得無預期中咁好玩,但事後影相時又好開心,都唔知其實啱唔啱玩.

最係一張套票,當然要玩多轉碰碰車.今次無第一次玩個陣咁多人對碰,我對上一次玩都係2007年AIA嘉年華.

最後為咗入波波池兼迷宫陣,乖乖交出$6X,玩足時限一個鐘.陪幸男係迷宫陣上上落落都幾攰,其間有小朋友逆流而上爬滑梯,令我同幸男一度走失,好在都搵得番.

一話要走幸男就喊,要一番道理至安頓心情.五光十色,新奇玩意,金錢掛帥,令人流連忘返,簡直係小朋友既賭場.唯一唔洗錢既就係呢個商場既影相情景,賣點係可轉動軚盤.

晚飯求其係一間西餐裡食,價錢唔貴,味道一般,大家都只求有得坐同填飽個肚就算,最緊要係幸男啱食.番完半日工再直踩陪幸男,雖然係攰啲,但總算係為幸男既童年添多一點回憶及溫暖.