圓方睇戲食飯購物日

一家三口出圓方The Grand睇超級無敵羊咩咩大電影之咩至勁,一心為幸男同電子顯示板同電影海報合照,但等到夠入場都無再顯示......

故事講Shaun與一眾綿羊意外地令熟睡於拖車卡既農場主人,溜入市區,主人更因被硬物撞物撞擊而失憶,成為Mr. X.牧羊犬Bitzer與Shaun分別闖入市區追尋主人,可惜被壞心腸既動物管理局職員捉拿,一眾綿羊努力營救Shaun及Bitzer,一邊迴避動物管理員,一邊設法尋找主人下落.

個半鐘頭裡笑料百出,幸男笑到"咔咔"聲,仲話好睇過叮噹.晚餐係利苑享用,肚餓既幸男見到湯料有雞腳就笑講"有雞腳呀".

幸男安靜地享用前菜,大人可以安心飲湯.

沙薑雞鍋下有個以酒精膏助燃既火種,保持熱度,避免油份凝固.用咗唔少時間黎影呢張相,因為酒樓既黃光與沙薑雞既原物相近,試咗好多個白平衡至有呢個效果,但尚未能表達原來暗泥黃既色調."酒樓餐枱上的沙薑雞",絶對可以成為攝影課程既題材.

其實我地叫咗個四人餐,幸男都有試食呢味係石鍋石斑塊.

每次黎利苑都係好滿足,即使一道平時都會食到既酒樓菜色,利苑既質數都會令我有"咁至係中餐"既感覺.

平時v city利小館點開既燒肉點會少得呢?因為怕幸男其他餸唔啱食嘛~

食到碟菜時已經好飽,好在清菜易人口唔覺滯......

唔知係咪陳皮都靚啲,碗紅豆沙都好味啲,而且用足料,唔會水laulau.

食完飯,我地係商場影下新年主題佈置,呢張相係難得台灣女生渣機既成功作品.

行去HMV時見到戲院另一角有羊咩咩既陳設,幸男卒之都可以同羊咩咩合照.

臨走前係Hargan daz買咗個士多啤雪糕俾幸男食,心急既幸男接過手就一路行一路"畢"黎食,直至去到商場內腑瞰溜冰場既座位,至坐底慢慢食.

PS:係HMV見到星矢電影出咗藍光碟,買咗個特別版,但番屋企拆開黎睇又好似無咩特別.....

崇真書友春茗

年初五,約咗崇真書友係新屯門中心百利海鮮酒樓食春茗.溫生推介區,內位置就腳,食品味道及份量都OK,抵食之算.

食到捧住個肚走,仲可以打包幾盒走人,每人都係百七蚊有找!希望除咗新年春茗,平時都可以多啲聚會,交流吓湊小朋友既經驗,及生活軼事.

PS:雖然因微雨而無騎羊代步,但一齊搭輕鐵回家兼傾談,充滿學生時代感覺.

大年初一

大年初一,中午番老家食開年飯,老豆,老媽,大佬,阿嫂,加埋我地一家三口,六大一小齊齊開飯.

晏晝出咗去市中心行吓,見到有MINI COPPER既新年展覽,當然為愛車既幸男影相留念.

呢個車型展板既髮型,十足神盾海狗丸廣告裡benz雄既style.

幸男一心出黎食蛋糕,可惜Paul Lafayet無開,於是去咗東海堂買心水蛋糕.

搭的士番屋企,幸男洗過手就享用茶點.

食飽飽就set好個陣,為幸男錄製新年賀辭"恭喜恭喜,恭喜發財,萬事如意,羊年幸福",兼花桇硬照.

新一年希望一家身體健康,幸男快高長大,幸福快樂!

叮噹(多拉A夢)

今日同台灣女生帶幸男去凱都睇多啦A夢Stand By Me,雖然話係小朋友電影,但我覺得啱廿幾卅歲大既觀眾睇多啲.

有別過往平面既大冒險電影,stand by me以立體動畫黎演繹.故事由大雄既曾孫帶位叮噹黎幫曾袓父改變未來開始,叮噹成功為大雄既未來引向幸褔生活,就要返回未來世界.

法寶唔再係用黎冒險用,只係好快咁交代叮噹如何幫魯鈍及懶散既大雄.大雄係未來世界成功引領長大成人既自己勇救靜香,改變未來.與靜香結婚前席之單身派對,大雄同一眾男生好友-小夫,胖虎及出木杉,邊飲酒邊傾懷愐舊事.想起可以同兒時玩伴一齊長大,確是難得.人大咗,可能搬屋以遷就工作地點,所以舊朋友可以係生活開既地區一齊聚會係一種緣份.

原本以為結局會係大雄係叮噹離開之後,自己努力向前成長.無諗過叮噹留低既最後時令法寶,會令愚人節受欺負既大雄,得到講mug都會有反效果既法寶.一句真心既說話"多啦A夢唔會番黎0架啦",叮噹就重現大雄面前,繼續陪伴大雄度過人生重要時刻.

忙碌的一天

今日番完夜,訓醒就騎羊入元朗搵相熟師傅安裝番支全新既原廠油壓臂,結果比多$200黎當車馬費($500油壓臂,$200手工,$200車馬費).師傅話尋日收到我電話,話原廠打黎話咗貨,就出車去觀塘.好在佢出聲話幫X生攞留咗既貨品,截得切正在掃skywave原廠零件既行家,如果唔係支油壓臂就俾人攞走.

係良記車行攞埋新一年既行車證,見隔離有間一人前拉麵店,於是入去試吓.

選擇唔太多,揀咗灯火呢一款拉麵,麵身較硬(下次都係揀軟),叉燒偏瘦(無平時既肥膏圈),較特別係辣味噌(小辣),相信下次都會再幫襯.

騎羊去良景租藍光碟-Dracula Untold,劇情同特技都幾好睇.以往同類型既電影,吸血疆屍男主角愛上人類女主角,吸埋啲血就一家親.....

今次男主角係人類伯爵,為咗抗行土耳其帝國既暴政-從自己城堡管轄既土地,獻上多名男童當兵(包括自己愛兒),不惜上魔山搵吸血疆屍借助力量去對付土耳其軍.法力只為持三日,其間男主角不能直照太陽.如果三日內男主角能夠抵抗吸人血既慾望,法力完結就可以回復正常人,否則變成吸血疆屍永遠生活於黑暗.
故事有點似黑武士為愛入魔,充滿淒迷.

夜晚約咗阿禮食西川雞煲,但要先係凱都排隊買聽日多啦A夢既飛.新年多人睇戲,我都排咗半個鐘至到櫃台.

原本職員話年廿八應該好靜,方便就黎幫襯下,點知又坐滿人.我同阿禮坐門口摺枱位,錯有錯著,啱晒阿禮既"習慣".

各有家室,阿禮又常留守大陸工作,屯宿之男都少聚會.難得阿禮得閒,一齊邊飲邊食邊傾,唔好次次都係"有嘢留番拜山(阿強)講"嘛."Gentlemen,all the best!"

屯門年宵

今晚同台灣女生一齊上大興接幸男去行花市,人家一心以為巴士站果個年宵仲有,結果一如我所講今年只係得天后廟廣場既年宵.行咗15分鐘,再行多廿分鐘,至到年宵場地.......

人頭湧湧,不過都未至於俾人逼人推住向前行,可能今日都只係年廿六.

目標為本,幸男買咗海豚氣($40)球同風車($20)之後,就話好攰要番屋企.今年年宵既商品無往年咁貴,唔知其他年宵場地都係咁呢?

臨走前見到有得玩撈金魚,幸男就突然精神番晒.平時既撈金魚檔要撈到若干條魚至有禮物,但呢檔就無論客人成功與否,都可以揀禮物,幸男就揀咗貼紙.

PS:其實我同人家係屋企食完住家情人節西餐至出發去接幸男,食材好啲又唔洗同人迫嘛.

黑白色熊貓&黑咖喱拉麵@尖沙咀

今日幸男唔願訓晏覺,只係床度碌黎碌去,因為我地今晚出去尖沙咀太空館睇全天域電影<熊貓愛回家>.內容無想像中好睇,似明珠台播既中國熊貓基地介紹人工熊貓培育,只係多咗野外放生前既訓練,例如以1比1既模型,配以狼既叫聲,讓熊貓學會迴避危險(認識天敵).

夜晚去咗一風堂食拉麵,平日關係,唔駛等好耐就有位.

我同台灣女生都揀咗時令既黑咖喱拉麵,由於黑咖喱汁會染污衣服,店員為食客提供紙圍裙.

我食晒碗麵都可以全身而退,圍裙一點黑色都無,因為我著白淺色衫,所以特別小心嘛.SUNTROY生啤買一送一,第二杯我飲到一半就放棄(番完早更好攰)...相比日本九洲既一風堂,當然係日本既好食好多,但香港分店總叫做較有質數既拉麵,唔似北海道札幌拉麵.

人家好鍾意自己點既雞尾酒"SAMURAI",飲到面紅紅咁,幸好神智清醒.我自己試過一啖,又真係唔錯喎~

"維修愛羊"變"害羊不淺"

明明講好咗要換原裝油壓臂,今日去元朗搵相熟師傅搵車時,竟然唔係原裝.支油壓臂硬到過份,我要用猛力至可以蓋上seat位,彈出時速度奇快,好似大整蟲節目拋彈蛋糕既感覺.番到屋企時,見SEAT位未能完全彈起,輕輕一托,油壓臂下部份固定位置鬆脫.......

由於SEAT位因伸長之油壓臂而無法完全蓋上,於是係德輝電話指導下(先send一張相去問功課),成功拆除土炮油壓臂.交收時師傅話係台灣產品並加以改裝,但拆落黎睇,手工都幾粗糙,圓孔是不規則,平面既部份竟然係扭曲兼表面凹痕.

另一端既固定部份亦一樣手工低劣,令人難以接受係價值$500既貨品(連工包料收$700).打電話去師傅投訴,師傅話原廠油壓臂要成千蚊,所以用咗呢款自家改良既部件.幸好舊個支原裝仲係度,約明早安裝.打電話去原廠問價,雖然無貨,但只係$480,三星期後番貨.

之前搵相熟師傅換皮帶時,師傅都係出觀塘原廠攞原廠零件黎搞,有單有據,所以至有信心繼續幫親.今次真係一個好唔愉快既經歷,令我諗番多年前舊羊係元朗摩托既回憶....一肚氣,嘥咗德輝一番心機,放工幫我途經師傅個舖位交訂金................

萬壽菊培育計劃

幸男既幼稚園功課係種稙萬壽菊苗,其實前年N班都試過,不過無開花.

今年台灣女生買埋肥料配合花苗生長,希望可以成功開花.幸男問我落肥料即係咩意思,我諗一諗就答幸男"好似請花苗食生果,多啲營養,快高長大."

PS:晏晝幸男下午茶食人家做既士多啤梨芝士蛋糕,我同人家就食無士多啤梨既芝士蛋糕.呢個四重芝士既芝士蛋糕自制包裝只係$19.9,仲要係一田有得賣,味道都唔錯呀.