CAPTAIN AMERICA ：Civil War

今日騎羊去市中心,先會合早更放工既台灣女生,再去大姆指同老豆及大佬一齊食下午茶,因為今日一齊去UA睇美國隊長3英雄內戰.

美國歷史中有內戰,州份既政治意見不同,導至出現南北陣營(Confederate States of America,United States of America).今次既英雄內戰亦都因為政治取向分歧,而令復仇者聯盟分裂.復仇者介入各地進行反恐活動而造成既傷亡(尤其係於索高維亞對付奧創一役),令世界各國領袖們感到不滿及受威脅,於是衍生出索高維亞協議,以合法化及控制復仇者聯盟之行動.

識時務既Iron Man接受索高維亞協議,但美國隊長則認為高維亞協議會令復仇者聯盟變相成為政治僱傭兵,失去獨立性及正義本質.加上Iron Man得知美國隊長隱瞞其好友寒冬戰士,原來係殺害雙親既兇手,故令二人關係進一步對立.

特技依舊搶眼,故事無咩冷場,最特別既莫過於兩大陣營對戰,並加入蟻俠及蜘蛛俠來制衡對方.蟻俠縮小身型以向Iron Man盔甲進行內部破壞,最後更逆轉成巨人作戰.蜘蛛俠則以其蜘蛛感應及蜘蛛絲網來牽制美國隊長既飛盾.

其實始俑者係痛失家人既前索高維亞情報員Helmut Zemo，自知無能力擊敗復仇者為家人報仇，故施計令復仇者聯盟陷入政治危機，分裂，並自相殘殺。最後既前蘇聯基地,亦都只係以喚醒其他寒冬戰士為餌,引美國隊長及Iron Man到來私鬥.

PS:原有既3D眼鏡已舊,所以買咗個新既俾台灣女生.點知老豆話佢果個得個"矇"字,唔見立體,於是開場無耐就要出多次院外既攤檔買3D眼鏡(一次過買兩副,人人帶新鏡).

PATLABOR THE NEXT GENERATION

今日收到Leo既短訊,話有機動警察既真人電影出咗DVD,於是上網search吓代理有無出藍光碟.真的有出藍光碟,太感動了!
立即換衫騎羊出市中心既大眾書局,係相熟藍光碟架搵唔到,於是向職員展示手機上之代理官網.

"請問有無呢隻藍光碟?".
"有,請跟我過黎."

見到電影版既藍光碟之後,職員打蛇隨棍上咁問(可能見我個毒男樣呈感動壯態).

"仲有TV boxset喎,會唔會要埋?"
"要!"

開開心心咁去排隊,俾錢時至發現電影版既藍光碟得番我手上果隻(要拆防盜金屬條碼),TV boxset就仲有得係收銀櫃台後攞新既.$179(94mins)+$299(285mins)+$299(309mins),雖然貴了一點,但都比荷李活電影藍光碟平,話晒鐘數多嘛~

PS:前年去九洲旅行時,咁啱要後一個星期至上映其中一集TV boxset既OVA(日本係逐集出OVA電影上畫),否則無中文字幕我都會入場睇.

ILLUSIONISTS

中午出去尖沙咀,係新港中心地庫既台式鐵板燒店食過晏,再係PACIFIC COFFEE飲杯咖啡,一家三口就行去文化中心.

一個月前買定飛,希望幸男可以親身目睹魔術表演,小朋友應該多點幻想嘛.幸男BB時都有睇無線播既魔術表演節目,抱住幸男既爺爺仲話好睇就俾個"A"佢.

舞台設計都幾新穎,有大影屏幕作點綴,增加時代感~由多個表演者分段上台演出,感覺好似較熱鬧,但變相無咗大衛高柏菲既全能魅力.刀鋸美人,水密室,人格分裂,人體水平懸浮刺穿,隔布凌空取物......雖然演出熟練兼流暢,但睇得太多"解開魔法陣",少了一份驚嘆.唔明雜技性質既"THE ECCENTRIC"點解會當係魔術團隊既一角,反而金魚缸一條變一缸金魚,以及啤牌魔術比較特別兼摸不著頭腦.

幸男睇得著迷,可惜係表演者帶領觀眾玩小魔術時(將座位信封內既POST CARD洗牌,擘開一半,與鄰座交換),幸男顯得唔感興趣.人家被愛兒嘮叨而分神,未能跟上指示完成湊成配對既人物POST CARD.當初買飛時既宣傳單張講到外國評價好高,唔通佢地無睇過"Magic's Biggest Secretes Finally Revealed"?

慳番啲錢,回程番市中心既吉野家食晚飯.相比聽演唱會,大型魔術表演點都係啱一家大細兼特別一點既~

等到吉枱兼坐低時,咁啱見到補鐘早走Ivan.佢已食完一人前火煱,打過招呼就忙住番屋企湊女.平時一個人都會諗住試下食吉野家一人火鍋,但無人睇住個位又點出去排隊買飛呢?以前新墟果間分店夠大,晏晝都偶有吉位.即使假日或夜晚人多,仲可以等近買飛及取餐既枱(至少可以放啲唔太貴重既黎霸位個吉位而自己又望得到),但市中心既設計係買飛與取餐又隔一方,中間分隔空間係密集既餐枱...

屯宿之男s

四月份,又係一眾宿友既相聚日子,仲未病好既阿禮係灣仔電腦298會合拜完山既大隊(潘,華B,我).Percy因時間唔夾,所以只係食下午茶及拜山就先行告辭.

行咗一陣就搭的士去跑馬地開餐,熟食市場晚市已變成銖記獨市.

上菜速度好快,風沙雞,蓮藕餅,筍殼,金銀蛋菜,鵝腸,加上冰凍藍妹.

 平日各有各忙,以往一齊入戲院睇戲或行玩具店既光景不在,今日行下麻甩商場已經係難得.
的士番SOGO,巴士去紅磡轉西鐵.意猶未盡,華B,阿禮同我即興去置樂雅仕堡懷愐一番.裝修之後都未曾入過黎幫襯,華B話已經轉手.　

咁啱有英超直播,大家邊睇邊飲邊傾.1998年相識,已經18年了,大家由廿歲出頭,到而家將近四十,的確經歷唔少-宿舍生活,初出茅廬,結婚喜事,痛失好友,孩兒出世,工作轉營.....

用開單反相既既華B好似唔太習慣無反既應用,我自己既童心及處事態度亦都開始唔太適用現今世代.擇善固執,已不再係大眾期盼;事情既本義,亦不再重要觀點.學生時代就話思想未成熟,但成年人亦不見得可以遠離迷失.為了自己既生活及連繫著既家庭,大家都要繼續邊背著行裝邊摸索前路,"Gentlemen, all the best!".

ばくおん!

自從知道BAKUON係電單車主題,就好想睇呢齣動畫.

故事中既女子中學位於市內斜坡之巔,所以校方準許學生騎電單車作代步番學.

女主角佐倉羽音對電單車毫不在意,只係踩單車番學時見到騎著YAMAHA SEROW 225既天野恩紗,才因電單車之引擎聲而產生好感.其後意外地遇上電單車部既學姊來夢前輩,更被大容積既KAWASAKI NINJA ZX-12R發出之沉厚引擎聲所牽引著心靈. 

來夢前輩拉羽音上車後就猛然拉動油筒,羽音感受到車身既震動,速度感以及擦身之逆風,於是愛上電單車.

學車時既情節勾起我不少共鳴,一班好朋友去睇車既心情亦都令我懷念.

恩紗見到羽音學車時遇上苦頭時既感觸"正因如此,只要有一個騎的理由,那就要去騎",令我諗起自己學車時,因唔識踩單車平衡而未能成功收腳上車,大落後於同班同學.即使放工後問宿舍兄弟借單車領悟平衡,但學車進度未如理常,當時仲自嘲可能係元朗駕駛學院電單車部補鐘最多既學生.逢二進一,強制試及路試均要重考至合格,轉眼已騎羊13年了(第一代羊服役3年,現役愛羊已服務足10年).

Trailer中最搶眼既莫過於騎SUZUKI GSX400S KATANA既鈴乃木凜,KATANA係當代SUZUKI跑車"隼"之前身,以前睇電單車網站時已覺得呢款舊代電單車外型很特別,長青時代感不易被遺忘.

PS:雖然話ばくおん同けいおん既人設好接近(有抄襲之嫌),但兩套漫畫係同一間漫畫社出品.話唔定ばくおん作者改咗個名,以電單車主題來重塑少女校園青春漫畫,又或者漫畫社同ばくおん作者傾好條件,搵人以類同角色創作ばくおん.

慳咗包薯片

早幾日收到手機短訊,話星期六用德士既JoyFuel Card入油有額外優惠,每公升減$2.今日咁啱又無mug油,於是去享用優惠.

平時最多都係入9L多啲,今次入8L慳咗16.27,都夠買包大薯片.其實之前都試過出過加德仕既油咭,仲要係同張信用卡聯繫咗,一用該張信用咭就會儲油咭分.由於太耐都儲唔夠分換油劵,兼且張咭無再續用,所以早排至俾油站阿姐叫我重新申請.偶爾星期六即時入油折扣,比起齋儲分換油劵吸引.

SHERLOCK "THE ABOMINABLE BRIDE"

今日係良景節拍租到褔爾摩斯既電影藍光碟, 可以同台灣女生安在家中睇呢齣當初想去戲院睇既電影.
故事設定為1895年維多利亞時代既倫敦,一位身穿婚紗既婦人於住所陽台四處向途人開槍後,於眾目睽睽下吞槍自殺.同一日之晚上,該婦人之丈夫於街上被已死既太太(身穿婚紗)槍殺.途人既證供指受害男士親口叫出太太的名字後才被槍殺,而太太則消失於濃霧之中.

原本以為單純以新派元素打造小說時代既褔爾摩斯故事電影(好似<神探褔爾摩斯>Sherlock Holmes),依舊係名偵探褔爾摩斯,助手華生,政府機密局邁克羅夫,探長格力.........但原來故事巧妙地交錯於維多利亞時代及現代之間.維多利亞時代既情節,原係係2014年第三季結局時Sherlock於飛機上造夢既情節,夢中<地獄新娘>一案(當年係懸案)之追查令Sherlock諗起與Moriarty復活之背後線索,而Sherlock對宿敵Moriarty既執著亦都投射到夢中維多利亞時代<地獄新娘>之經歷.

非常佩服故事既編排,精妙既計謀,<地獄新娘>一案背後涉及女權抬頭既神秘組織,而且凶手先以假死,再於殺害親夫後自殺,以混淆警方之調查方向.貴為罪案劇集既擁躉,期待新一季既TV系列.

yoho mall

上次去元朗YOHO MALL食完飯時,因過咗七點而未能玩恐龍攤位遊戲,於是約幸男今日晏晝去玩番補數.$180買4張價值$50既大型遊戲劵兼2張價值$10既攤位遊戲劵,都叫個平咗啲(帳面).第一個玩既係挖泥機,職員哥哥耐心地教幸男如何操控.我係隔離搏命影相,希望有張好啲,商場內燈光兼動態較難準繩.

跟住去咗近停車場出口既小型攤位,將熊仔公子扔向紙板機械人,扔三中二都有禮物-來佬品牌芝士味魚仔餅.

幸男挑戰射擊攤位,起初擔心會三發全失,點知又全中喎~

目標圓球被下方之吹氣裝置以氣流托起,我有為幸男揀無咁大跳動既圓球作目標.

行番轉頭玩大型攤位,今次就係大型夾公仔機.突然諗起,唔知老豆以前後生渣吊機時個樣係點呢?

最後就係戶外大型遊戲,幸男見到咁大個充氣滑梯已好開心(未出發先興奮)~

我同幸男一開始就係商場內睇住介紹小册子黎揀玩邊幾樣遊戲,因為套票既遊戲劵唔夠玩晒咁多款.

呢款係彈彈床加滑梯,小朋友等爬上滑梯時,可以係彈彈床位置玩住小遊戲黎打發時間.

一著陸,幸男就疾走番去入口位,再次重覆彈彈床同滑梯.原先幸男以為只係玩一次sir完滑梯就搵番對鞋黎著,要職員姐姐同我提示至知係限時任玩~

玩到身水身汗,當排隊等玩最後既遊戲時,幫幸男脫去外衣.職員俾咗對手袖過幸男穿,應覺係怕汗水加皮膚會被膠滑梯"啜"住,sir得唔順之餘仲會痛.幸男唔夠膽玩龍弧形滑梯,堅持淨玩龍口之直長滑梯.

洗手間抺過汗後,約德輝一齊係雞地搵間茶餐廳一齊食吓傾吓(始終擔心德輝之心情),慶幸德輝總算比頭幾天好.臨走時我叫幸男上前攬攬德輝,並輕拍其肩背,以示支持及安慰.雖然有採排過,但都要小小提示.

ps:同幸男行番去郵局附近既玩具店揀同學生日會之禮物,再搭輕鐵番老家黐餐.

幸男五歲半生日

是日清日節假期,唔想出去市中心逼,但又諗唔到食咩好,突然醒起屏山既TONG'S.公眾假兼晏晝至打電話去BOOK枱,竟然有位,於是一家三口冒雨搭輕鐵食晚飯.

餐廳半戶外既地方有小朋友韆鞦,及其他小玩意.

好耐無食生蠔,見價錢唔太貴($3X@)於是叫咗一SET.

特意叫咗個蘑菇湯俾幸男,一人份量,盛惠$98.......

台灣女生同幸男既合照,人家試個湯味道夠香濃,但真係有點貴.....

呢個海鮮鍋配意粉,湯底味道似罐頭金寶湯,雖然材料似係新鮮.份量話係四人用,但我同人家就覺得只夠二人用,頂多三人用......龍蝦半隻,青口,蜆,蝦,較鮮味既係長腳蟹.

原本想試荷蘭牛仔扒,可惜無貨,於是叫咗澳洲和牛西冷.

是晚驚喜係呢杯WHISTABLE BAY生啤,人家試過都話好味啱飲.埋單要$16XX,都有啲貴,下次都未必再來,除非朋友一齊飲啤酒加小食.

其實每年既今日都會以兒童節兼半歲生日黎同幸男慶祝,蛋糕當然唔少得,仲要係幸男至愛既貓貓造型.

祝幸男身體健康,幸褔快樂!暑假過後,幸男就升小一,漸漸遠離BB嬌柔既性格及外型,小朋友同大人都要適應新階段.

PS:朝早玩尋晚未完既大富翁,幸男因先後踩中我同人家既地段物業,故陷入財政難關,要抵押地契作還款周轉.上次影唔到幸男因抵押而喊(因掛住安慰),今次都有喊,但已無第一次咁激動....(小朋友既童真確係家庭歡樂之源)

BATMAN V SUPERMAN :DAWN OF JUSTICE

今日番完夜班,訓咗兩個幾鐘就起身騎羊去市中心UA同老豆一齊睇<蝙蝠俠對超人:正義曙光>.上次都係同老豆睇新一輯既超人電影Man Of Steel,今次好似係睇第二集咁~

 超人挺身而出,對抗企圖將地球"普頓星化"既同鄉(General Zod率領之普頓星叛軍),化解地球危機.自此超人以神秘英雄身分四出救助人類大型災難,被世人崇拜及倚賴如神一般等級.
葛咸市與大都會一海之隔,但蝙蝠俠千方百計要找尋對付超人之方法,因為超人大戰同鄉時,Bruce Wayne如其他市民一樣,喪失親人般既同事朋友,對超人既合理破壞行為極度反感.企業富商Lex Luthor將普頓星深層礦石Kryptonite(外星飛船殘骸找到),引入美國並利誘蝙蝠俠奪取以對付超人.另一方面Lex Luthor以Clark Kent之養母作人質,逼使超人對付蝙蝠俠.Lex Luthor既最終目的係以General Zod之指模,進入外星飛船殘骸,吸取外星科技知識之外,並以自己既血將General Zod之遺體活化成怪物.

兩大英雄識破Lex Luthor之奸計,General Zod之遺體再生之怪物已於市內大肆破壞,神秘古董商Diana Prince化身為戰鬥女神Wonder Woman並出手相助兩大英雄,同抗巨敵.雖然出場時間唔多,但雄渾既配樂襯托強悍既戰鬥力及古代神話戰服,非常搶眼.

本人並非DC死忠或MARVEL教徒,只係一個自童年接觸不同美式漫畫英雄主題卡通及電影之宅男.不少觀眾網上評價都係沉悶及文戲多得黎又唔清唔楚,但本人覺得要交代既太多,無論係角色及各自經歷,以至作串連故事之奸角,唯有重點交代.加上時下電影不再單純平舖直敍或直接理解,話題之作如<INTERSTELLAR>及<INCEPTION>都需睇多一次或網上維基一番,方才多一點明白及細味.

回想起初睇蝙蝠俠三部曲(俠影之謎,黑夜之神,夜神起義)之第一部<俠影之謎>時,覺得有點沉悶,無端端話Bruce Wayne做蝙蝠俠之前四出流浪,學習武術,最後更加入影武聯盟(League of Shadows),故事以Bruce Wyane化身蝙蝠俠以阻止影武聯盟之首忍者大師聯同奸角稻草人之毒氣肅清葛咸市行動作結.第二部曲及第三部曲相繼上映,精彩又緊湊兼動人既劇情,原來需要由第一集作發酵.相信作為正義聯盟既初型電影,後繼作品會更加明快及熱切.

PS:電影結尾,超人捨身以礦石Kryptonite制成之茅向普頓星怪物作近距搏擊.世人被超人捨已精神所感動,葬禮以最高軍方型式舉行,棺木蓋上國旗.超人由被孤立變成被接納,被認定為人類烈士英雄,非常感人~