人生第一部平板電腦(Window Tablet)- TECLAST X3 PRO

今日大佬幫我係灣仔電腦廣場買咗TECLAST X3 PRO,並夜晚係我公司交收呢部我人生第一次擁有既平板電腦.為咗幸男既升小一英文暑期online習作,兼且回應台灣生一直對平板電腦既寄盼(方便上網訂購生活商品及雜貨),於是萌生購買平板電腦既念頭.

經過上網既research,原本諗住買Microsoft Surface 3,貪佢入門版4G ram 64 GB夠用又係負擔得起既奢侈(買埋keyboard約5千左右).但由於Surface 4 PRO已全面上架,性價比高既Surface 3已絶跡於市面,一時感到失落.

叠埋心水考慮第二志願既Lenovo Miix 700(雖然外型真係有點土氣),但大佬既建議-TECLAST X3 PRO有8G RAM兼128GB既SSD容量,都只係$3980(Keyboard另加舊零水),比Surface 3 或Lenovo Miix 700入門版更具吸引力.

登入幸男就讀小學之網上教材,初試基本運作速度以及wifi上網反應,結果令人安慰.相比其他同價既台灣或中國品牌機種，性價比高確實不容置疑.基於不常帶出街使用(大多於自己或外母家),911.6 g既重量尚可接受.

學長與學弟

今日要帶幸男去小學訂書兼買校服,台灣女生同幸男搭的士,我就騎羊出發.最後出門既我,係村口巴士站已望到兩母子剛上的士,於是我吊住部的士尾.中途係快線過頭,但臨到目的地既一盞燈,被載位倆母子既的士追上.

行上一樓禮堂,一手交支票,一手交書,家長們都係即場check吓啲書齊唔齊,以免日後更換或追補.

落番地面活動室去訂校服,經過操場時,見到正進行維修工程.小一至小六時代,每天都要集隊早會既地方,已不再係石屎硬地面.

買完校服,就帶幸男去小食部望下.以前無零用錢,每天只可以帶一樣老媽準備好既零食番學,故好羨慕同學可以排隊買小食.

臨走時幸男話要去厠所,於是帶咗幸男去校務處附近既男厠(位置與30年前一樣).人家提議下,兩父子一齊係學校門口合照,相隔31年既學長學弟~

將校服及書本放入seat位下既存放箱,騎羊去市中心名店屋會合人家及幸男(徒步前往)一齊食晏.以往愛哭兼常跌倒街上既小朋友,食完晏就騎羊去上班........

藍天足球同樂日

今晚係市中心食完元氣壽司,就搭巴士去湖山仿真草足球場,參加藍天足球同樂日(區內足球班試堂).

幸男與幼稚園N班同學希希一齊試堂兼同組,首先係基本訓練,家長們都係外圍觀摩或為小朋友影相.

新界西足球隊都有黎參加,唔知點解另一個球會都會黎試堂?

盤球訓練,幸男不時都會落手,今次已比舊年暑假既賽馬會足球班表現好一點.

雖然N班後就不再同班兼同校,但係雙方家長聯絡下,兩位小朋友不時一齊玩或家訪對方.

休息時間,咁啱有個足球閒置草地上,叫幸男上前影張造型照.

全晚既高潮位莫過於分組比賽,相方不設龍門,只要將足球送入對方既龍門口(兩碟或雪糕筒之間)就可以得分.

A7配上變焦天涯鏡24-240係運動拍攝方面真係弱啲(尤其係晚上),S mode黎影小朋友走黎走去都考起相機及操控者.最似樣既呢張相,好似隊友跑埋一齊慶祝贏波~~

原先仲擔心今日會落雨,好在只係日間有雨,晚上總算順利進行活動.家長們與小朋友們及負責人員大合照之後,幸男拎住塊宣活動宣傳牌同希希一齊影相.雖然只係同樂日, 但幸男跑到成頭成身都係汗,屋企帶來既水都飲清,結果要去附近既士多買多支$6既凍bonaqua.

暑假除咗八月既旅行,無咩準備興趣班,人家得知家長們向場內工作人員詢問報名參加藍天足球會之方法,於是為幸男報名.

麗都灣-悠閒下午

原本想CALL的士入清水灣,但司機電話覆CALL時話龍翔道入西貢塞晒車.上網搵過資料後,決定去同係第二級泳灘既麗都灣.

沙粒幼滑,於樹蔭下開沙蓆,幸男安心製作沙城堡.

雖然都係深井沿線,麗都灣比近水灣好,巴士站一落樓梯就到,少啲垃圾,更衣室附近有賣熟食既士多.幸男未足兩歲時,我同人家開始一家三口去沙灘(黃金).日落時份,幸男望住個海黎食保溫壼既糊飯.

拍拖時代沿用至今既冰袋戰陣,冰種兼雪至冰狀既支裝水,有效為凍飲保溫.

天涯鏡拉到盡既後遺症,成像散散地,但總算可以為兩母子拍下動態照.

幸男今日唔願帶太陽鏡,話面好熱.我怕強光傷幸男眼睛,我細個時無太陽眼鏡,即使中三打街場藍球都無咩保護,去到中年就開始後悔.

冰凍Sunraysia芒果汁,幸男悠然自得~試過帶幸男落水玩,但海水太凍嚇怕了幸男,結果只係淺水區浸腳.

注重熱量攝取量既女士,不妨試吓Suntory All Free Beer或其他日系無酒精既啤酒作消暑.

大小不良,一齊食零食.無諗過幸男唔啱食桃哈多既脆脆小食,反而同我交換包熱浪黎食........

好耐無游水,平日都只係陪幸男去泳池玩水.係淺水區沿沙灘邊試游幾次,見可以一次過游到一個橫灘距離,理應足夠游出浮台.向最近既浮台進發時,未幾就感到海水溫度驟降,要打橫游多一陣至適應到溫度,結果打斜游去較遠既浮台.

對上一次出浮台都係十年前與台灣女生拍拖時既光景,我仲用蛙 腳推住訓係浮床既人家出浮台.一個人係浮台吹海風,等咗好耐,至等到兩母子發現我係浮台並揮手.

幸男既三個沙堆城堡,石頭堡,飛機堡,海龜堡.臨走前,幸男將飛機逐一踏散,搗毀每個城堡,好似特攝片既作惡怪獸.

梳洗兼收拾行裝,搭的士落深井既kcal享用晚餐.水準好似比往年差了,或許是Stella's寵壞了我同人家既要求.

住家流水麵

夏日炎炎,晚間都會近30度.今晚台灣女生與幸男動手砌之前訂購既TAKARATOMY流水面機,準備以冰凍冷麵作消暑晚餐.幸男根本覺得係砌緊玩具多過準備晚餐,由呢張相就睇得出......

今日放工就同人家係市中心一齊食晏兼去吉之島超市買定冷麵,醬油配料及魚生(我去華都相熟電子店買電池),為既係一家人安在家中食輕盈晚餐.將煮好既麵線,一箸箸咁係頂部放下,麵線跟隨涼快流水滑下.

幸男好似邊玩邊食咁,係人家帶領下"準備好未?ready?ready?",幸男咔咔笑咁用筷子於尾段攔截麵線.本人就覺得啲水彈到一枱都係,最好著深色衫黎食,怕醬油濺到衫上.

愛羊回家

番完早更,急急趕出去觀塘接愛羊,愛羊自上星期二放低就一直滯留原廠一星期.係公司樓下既咖啡店買咗杯凍啡同麵包,就同順路既蛟龍一齊邊行邊食邊傾住去巴士站.

睇張單就知點解要搞咁耐:換風擋,側架連彈弓, 前叉油,油墊連彈弓,brake皮,brake油,極力子皮, 皮帶, 偈油, 偈油隔,火咀,風隔,油缸蓋膠圈,螺絲組.

回程時愛羊動力比平時隱定,前叉避震能力有改善,加速亦變得爽快.愛羊已服務十年,之前見側架踢腳位斷裂兼風擋殘殘地,於是打去原廠訂購部件,趁今年夏天時間出原廠check車時一次過大執.希望愛羊可以保養得宜,精精神神咁陪伴住我,好讓幸男夠歲數坐係後座.

PS:等職員開單時八卦閒聊,原來salesman黃生已於大半年前離職.我第一部既電單車Burgman150同現役Sky Wave 250SS都係由黃生為我開單.仲記得德輝,表叔,大豆陪我攞Burgman 150俾尾數$23000時,要黃生數現金(因為未有信用咭).計落數,已經係13年前既事.