中秋飯

每年中秋,屋企都係當做埋生日.今年都唔例外,比平日好餸,我托大佬拎支紅酒過黎,三仔爺一齊飲.

幸男收到伯伯同伯娘既禮物,由於未到正日,所以唔拆得.

食完飯,一齊食雪糕蛋糕,同埋晴王日本提子(carol幫手代訂的),大合照時間~

嫲嫲幫手同幸男一齊吹蠟燭,好似佢仲開心過孫仔.大家健健康康,生活愉快就好了.

PS:晴王真係好好食,令我諗起去北海道果園提子既回憶.下年都訂晴王黎做中秋飯後果先~

早更後的星期一

早更過後,騎羊番老家附近既茶餐廳食晏.一星期前打過腊既愛羊,仍然能反照太陽既暖光,忍唔住要影番張相.

選擇同質素都唔太出色,只係呢碟雞全翼薯條可以令我騎羊到訪,畢竟好少茶餐下午茶餐有炸雞全翼,即使有都係得一隻.另一個原因,係貪呢個時間唔多人,一定有位,靜靜哋發呆或用智能電話上網都無壓力.

晚餐由台灣女生主理,總算可以足不出戶,安心家中用餐.由於番工好忙同有點洩氣,所以開咗支紅酒作調劑~

PS:食下午茶時,有店貓走到我腳旁,我將雞翼尖掉到地上,牠咬咗兩口就放棄,更以前爪拍我大腿,以行動表示對食物既不滿.幸好職員幫手將牠驅趕,被拍果下感到貓爪既硬度,好在條褲無爛~

幸男食BB辣雞煲

平日只會兩公婆或與朋友黎食雞煲,今晚就變咗一家三口,親子雞煲.

眼闊肚窄既幸男,要望吓菜單有咩嘢食,其實幸男開始揀飲擇食.....

由於限時任食唔包海鮮,所以我哋全部散叫,反正小朋友都唔食得多嘛.特選

幸男有個湯烏冬墊肚，再食雞件同其他火鍋配料。食都尾段，幸男覺得湯底變辣，於叫幸男將食物放係烏冬之清湯浸一浸先放入口。

PS: 幸男第一次食雞煲，係楠哥屋企聚會。幸男大個了，就快可以坐愛羊既後座～

Psycho Pass

Psycho Pass第一二季早已追過，今晚係平板電腦上睇埋劇場版。匿係書房,帶住藍牙耳機黎睇晒成齣,畫功一如既往,没有半點馬虎.

今次Sibyl的先知系統及無人駕駛機器人，岀口至東南亜戰亂地區SEAUn，並以水上都市作試驗中心,以控制內亂.女主角常寸朱以考察員為各,前往SEAUn尋找當地反叛組織裡的狡嚙慎也-常守朱之前拍檔.

第一季故事結尾,男主角狡嚙慎也為對付擁有免罪體質既槙島聖護,以執行私法既形式,殺死槙島聖護,並開始逃亡生涯.與Sibyl先知系統之宿命,令避世既狡嚙慎也加入反SEAUn組織.

常守朱再遇狡嚙慎也,起初一心想將男主角逮捕並帶回日本,但中途險被SEAUn組織之軍力所殲滅.狡嚙慎也帶常守朱到反SEAUn組織暫避,再分頭調查.最後SEAUn組織高層被揭穿以敵我識別系統去瞞騙Sibyl先知系統之色相掃瞄器,以達致合理及和平化軍閥統治.

動作與文戲比例恰當,只係結局時較多爆血場面.要了解人既本質,的確並不可能一眼就得出定論。即使由二百多個犯罪者腦代組成既Sibyl先知系統,亦未能完美分辨現免罪體質,而且亦會被其他系統所混淆.

本人很認同狡嚙慎也,如沒有危機感(Sibyl先知系統下生活),便會失去求生本能,尤其係當遇到犯罪者或特發事故.實生活中不難發現劇中元素:人性陰暗面，心理質素，免罪體質......

PS:夜晚騎羊係THRE3 CONCEPT買外賣番黎一家享用.

撲美容(羊)品

原定一早八點就動手為愛羊抺洗同打臘,但結果都係食過早餐再補眠多兩個鐘.雖然趕得切午飯前完成,但原來省銅膏唔夠用.一心諗住食晏時係藍地買,可惜事與願違,結果要去兜去紅橋至買到.

咁多年黎都係用呢隻牌子,膏狀比水劑容易處理,唔會滴到地面或車上.

番屋企完成埋省電鍍及金屬部件,側架都閃令令,花痕就當然係無法子啦.

愛羊由06年3月服務至今,快要十二年了,幸好款式長青,兼保養得宜.

早陣子,係鈴木官網發現一眾車款相繼退役,包括後我一代既Skywave.期望出年會有新Skywave之消息,Burgman俾我既感覺係偏向歐美風,少了日系既精緻美學.十月坻港既Burgman 400之狹少儲物空間,以及前轆比後轆大2吋既設定,令我有點卻步.

星期六的假期

今日台灣女生在家專心溫書,由我帶幸男去踼波,見到幼稚園好友,即刻搭晒搏頭.

幸男對好友既新陀螺玩具,感到新奇,可能係睇得太多電視卡通.

集合時間,大家都留心聽黃Sir既指示及是日安排.

戶外落住細密雨點,所以今日轉為室內練習走動及盤球協調.

S mode下,高ISO值影像質量一般,叫做認得出個樣.

完堂前十五分鐘左右,助教們以刮水架將球場積水撥走,並分組練習盤球加射龍門.球感不佳既幸男,不時要望住個波黎行同起腳,結果都只係地波向前滾動......

解散前,各學員既小動作一覽無遺,叉腰,抓耳,捽鼻.......

搭輕鐵時再無落雨,原定係安定站轉車,見月台就有北角雞蛋仔,於是買埋俾幸男當茶點.雖然車上唔食得嘢,但小朋友都係忍唔住要食幾口.

夜晚番老家黐餐,適逢今日係加德士特選星期六,先兜去藍地既惠康買啤酒俾老媽.落貨後,再係油站入特價白金旋風電油.番屋企放低愛羊,一家三口行去老家食晚飯.

那些年,我們一起食的放題

今晚約咗崇真書友,去元朗食放題.西日餐廳既名字,令我諗起以前同契細佬食過果間(教育路),但一眾書友就令我記起一齊食韓陽苑任食韓式料理.

溫生介紹, 識食就梗係食21:00後果輪,因為二人成行,一人半價.

一入座,兩位老饕已急不及待翻看菜單,並於order紙上落筆.

賣點之一，啤酒清酒任飲。由於本人唔好hire 啤，所以揀咗 瑞典Somersby Apple Cider.平時少飲清酒，所以大家前後飲咗2壼。

回本之選當然係刺身,我哋四個人都食咗三盤自選刺身~~

我哋無加錢轉任食生蠔長腳蟹，燒蠔味道都OK, 只係細隻咗啲。

天婦羅拼盤,勝在炸蝦夠長,用黎佐酒啱晒.

羊架我唔啱,但牛扒就真係麻麻哋,燒蝦反而值得再落柯打.

馬sir竟然叫咗個拉麵食,賣相又唔差喎.

愈叫愈心雄,蟹粥都嗌埋,雞翼尖小食好味過係B仔食.

壽司方面,我哋只係叫咗啲較特別既黎試吓.

我見馬sir嗌拉面,教練叫冷烏冬,我就話"咁我唔爭在叫埋蒜香法包".

呢個畫面有啲hehe,女生餵食主題應該會浪漫啲.

臨尾食既芝士雪糕好好食,大家都跟溫生既介紹飲凍奶茶,又真係好濃茶香味喎,簡直係是日驚喜.

PS:好慶幸大家都係仲係住係同區,即使係即興約食飯聚會都大機會成事~

Pacific Coffee

幸男開學頭兩星期都係番半晝,放學後同另一位同學一齊食晏(當然係媽媽團),再上同學屋企玩咗陣.台灣女生見我係市中心食晏,於是約係去新開張既pacific coffee飲咖啡.人家為幸男揀咗杯Mango Mania,但幸男就嫌牛奶味重咗少少,唔知下次會唔會揀番babyccino呢?

幸男原本負責看管座位既物件,當人家番座位時(我係櫃枱等即制飲品),見幸男一副懶洋洋模樣,好好笑.環境唔錯,只係少梳化位.無Starbucks咁多人等位,唔知係咪因為燈光太猛,少了一份休閒放鬆既感覺?

PS:騎羊番屋企時,順便載埋幸男既書包同手挽袋,好讓兩母子輕輕鬆鬆咁搭車回家.

再次擁有Game Boy

台灣女生帶幸男番屋企時，向我呈上Game Boy。其實之前已睇報導話lesportsac會出Game Boy袋 (同真品大少差唔多)。當時有一刻想買，但又覺得有點為買而買。人家話係市中心吉之島玩具部對開見到,已經係最後一個新貨,俾我用黎載外置充電或化粧棉,爽膚水及lotion小包.

手工唔錯,十字制,AB制,Select及Start制都係縫繡上的.螢幕則以一塊膠面黎呈現,頂部既開關制,以及下方既喇叭位就以燙畫線條黎表達.

夜晚果餐仲自己一個人係新興食牛雜米,無諗過會有禮物收.以前打果部Game Boy都係老豆係康景後樓梯執既,之後駁火牛黎玩,我自己都有買過老翻帶或問同學借遊戲帶黎玩,記得有打爆過三國誌.