球類主題日

因為波衫係外母家,所以婆婆係球瑒會合,幸男換好衫就影番張三婆孫照.

幸男手抱BB時,婆婆不時打橫抱住黎哄幸男,兼情深對望.幸男已七歲半,只可坐住婆婆大腿黎撒嬌.

我同台灣女生一人一杯凍飲拎去睇踼波,幸男每次都係"喉"住人家既紅西柚蜜糖紅茶。

今日爸爸最大既任務，就係試新機A7 III，第一次日光户外試影，要啲時間摸熟按鈕佈局。

同一場景兼同一天涯鏡，過往以S mode都只會落得光度不足或油畫化。有賴10fps連拍，背照式感光件及新對焦系統，成功捕足有姿勢但腳頭不足既地波。尾段時間,教練將隊員分組作賽,但不設守門員,各隊只需將球射向指定既龍門( 籃球架下的護板)。一位小球員唔明點解無守門員，教練不停咁話“無龍門咪無龍門囉，有咩問題丫？”，並親自示範作解釋，令我由心笑出黎。

Joystick方便構圖，經viewfinder追望主體，右手指公推啱對焦點，右手食指就按快門連拍。一個鐘有多既測試，最喜歡呢張相～～

番屋企時經過遊樂場,幸男得到媽媽既同意,玩咗陣滑梯至入屋.唔知幸男有無少少印象,著住尿片時有玩過呢個滑梯呢?

夜晚臨訓前,一家三口一齊睇J2台錄落既黑子籃球劇場版-LAST GAME.奇蹟世代再次結集,並加入黑子及火神,以VORPAL SWORD隊名應付美國知名街頭籃球隊JABBERWOCK.雖然大家都非常了解各人之絶技,但面對強敵仍需巧妙既戰術及絶技配搭,反而豐富了合作性及戲劇性.VORPAL SWORD陷入苦戰時,一家人都好緊張.

PS:最後既2分,真係追得好險~

順便約大姑拉S食晚飯

今晚約咗兩位大姑拉食飯,地點係旺角既長阪燒.番工兼配合小朋友既時間表,與朋友既約會都會減少.如果今日唔係一定要出旺角的話,尋晚臨時約既是次飯局都唔會成事.

呢間食店主題係爐端燒,感覺似普通串燒多啲,可能因為客人望唔到爐端......

居酒屋形式餐牌，每份餸都係細細份，當佐酒又有啲怪，因為店內無啤酒嗌，只有枝裝日本酒…

食物質素唔錯，適合情侶約會多過一班朋友聚餐。

店內裝潢精致，充滿東瀛風～其實餐廳係單楝式商業大廈之上，行過咗都唔覺……

幸男食完個拉麵，再點咗杯柚子雪葩。幸男第一件事係將置頂既藍莓推開，先至安心享用甜品。

今日出旺角既誘因，係預購既A7 iii已經到咗門市。官網預購既禮品(SD 咭，原廠電池及LCS-L20S袋)，加埋部主機，夠晒大堆頭！

機關算盡，一心諗住用新相機影相，可惜無預新機電池問題…好在有帶尿袋出街，即場叉住先，結果都夠晚飯時段用。

咁啱阿潘係旺角為世侄女搞証件，於是上咗Sony Store搵我哋一家，再一齊係附近大家樂食個快tea。

PS: 晚飯後一齊去搵甜品食，結果係廣華街一間港式甜品店坐多陣～

1 2 switch x 酒局

今日約咗賢仔,Jim,嘉耀同康楠上我屋企,黎個小型酒局。

先玩賢仔帶黎既迷你超級任天堂,係Full HD電視打低清Game～
細個覺得緊張既瑪利奧賽車，而家睇番真係得啖笑～

三五知己，開番支紅酒飯，呢款糖果型芝士食得幾方便。

啟發1 2 Switch X  飲酒既靈感，就係Sneaky Dice呢個遊戲(酒吧玩大話骰)。

空手接白刃，康楠拎埋幸男把忍者刀黎增加投入感。玩過既朋友，都會諗起古天樂首“今期流行”既舞姿。

威士忌酒具set既shooter杯，完全配合是次活動。

雖然Online打機盛行，方便安在家中與好友對戰及共戰，但一班人聚埋一齊玩，有講有笑，先至係最拉近彼此既距離~

PS:希望傳承屯宿既識英雄重英雄及把酒談歡既文化

真.tomtoc

之前托教練係淘寶買既SWITCH機套，今日已經係輕鐵站交收。上網刨咗好多介紹，決定揀tomtoc，貪佢硬身面又slim，布面質地觸感。

雖然揀咗淘寶既自營店，理應係官方正貨，但始終都怕無良商户假冒。QC唔睇唔到咩問題，用手機掃2D barcode，發現有得上tomtoc官網。輸入serial number 及購買單號，成功登記保養，仲唔係正貨？

中間活頁位可收納8張遊戲卡，附送既黑布袋可以收藏joycon 手帶。家用為主既我，覺得已好夠用(平日收藏都唔會封塵)～～

搶購A7 Mk3

是日A/N，訓著一個鐘左右，收到朋友forward既短訊，話A7 III 已接受預訂。

覺都唔訓(五點鐘)就衝入書房,開電腦上官網搶貨(可以多一粒電池， 送64G SDXC UHS-II咭一張及LCS-SLC20相機袋嘛)，㩒極都入唔到去結帳版面。用咗半個鐘多啲，至成功結帳，join埋$290既Premium Service計劃，3月26號收貨。之後再試吓再登入，首輪訂購已完，第二輪要4月中交貨。

PS:之前無升級去A7 II係因為同初代同一個感光件,只係多咗5軸防震.今次承襲A9既對焦系統,兼換上背照式感光件,加埋上一代5軸防震,絶對係值得擁有~~

台羊植入式微電影

 "大人不是都要工作嗎?"

"我長大了也要工作呀"

"所以爸爸,我能不能帶美寶(鄰居同齡女孩)去旅行"

"我討厭美寶像媽媽一樣"

"想出去玩都沒人陪"

男主角結婚前常與女友騎機車兜風，婚後有小朋友之後就只有工作及閑置在家。見阿仔偷偷騎機上車作玩時，男主角講小朋友不可騎機車，大人才可以。小朋友童真既回答兼提問，令父親語塞。

本人睇得好有共鳴，有家室既男仕的確要花唔少時間俾工作同家庭(尤其係小朋友)。年輕既興趣或動力，往往被疲憊的身心沖淡…

https://youtu.be/ovxYQyR8ehQ

令人心動的TMAX 530

腦閉塞多年,好耐無為一樣嘢而著迷,YAMAHA TMAX 530鼓動了疲憊既內心~原本諗住新版BURGMAN 400係繼任型號,但二月睇過實物放唔到兩個頭盔,規格上只係多咗ABS同容積馬力大咗,顯得有點雞肋....上網搜查市場流通既日系綿羊,發現TMAX 530既可行性.

鍾情單筒尾避震之運動性,除咗SUZIKI既BURGMAN 400,就只得YAHAMA既TMAX 530.DX版先至有7段預設,與BURGMAN 400平手.

望落去都算四正,感覺比BURGMAN 400既收納箱大.官方話可以放兩個開面型頭盔,真係要親身試過至知,尤其係SHOEI既J-CRUISE外型與全面型無異,只係少咗下巴位.

話晒貴多成一半有多,電子配套當然係高階得多.除咗KEYLESS外,可切換行駛模式(Sport Mode & Town Mode) ,TCS 循跡防滑系統.另外,DX版有電熱把手及座位(只限前座),電動調校風擋,巡航定速.

其實過年前係馬路見過一架綿羊經過,而車尾俾我既感覺係既帥氣又陌生,"究竟係咩型號呢?咁靚,點睇都唔似台羊丫..."

雖然係2017年既款,但網上既試用報告及實照唔多,車匙可以插入KEYLESS牌背,以防不時之需.

一個全面型頭盔絶對無問題,但我最希望可以放齊我同台灣女生既J CRUISE頭盔.

銀色配藍色呤都幾特別,可惜只有SX(Sport)版至有呢個色.DX版只有藍色同黑色,個人就偏向藍色~

上網爬文,見有原廠既後座椅背配,唔知香港代理會否代客訂購?

刨完電單車網介紹,再上Y'S GEAR官網,得知有個外置納袋,啱晒裝布冚或購物補給用.

PS:Suzuki 近年好似放慢手腳，當初大儲物容量加可預校單筒尾避震一鳴驚人，但十年後既最新型號，除了承繼上代既ABS及尾避震 ，就只係加大輪徑及LED 頭燈。

1/18 完全變形SUPER ASURADA

今日卒之都係相熟網站見到1/18 完全變形SUPER ASURADA既上色真身,與動畫既比例相當接近.

美中不中既係Circuit Mode時,前擾流板最高平面比動畫設略高。

Aero Mode既前擾流板與車身結合成完美流線，乍看極似初代雷神。

動畫TV系中，超級雷神要應付越野賽段，新作可以完美重現3段變型。過往Megahouse既作品, 只可以透過換部件黎呈現Circuit Mode同Aero Mode,但 Rally Mode就以獨立(不能轉換型態)作品去填補當時技術上既不足。

雖然定價係貴少少，但連駕駛倉都可以打開兼呈現細節，真係想快啲到七月收貨～

補購日

今日再入元朗，補購歡送賢仔既禮物，因為置樂長頸鹿遲遲未有代理之回覆。好在賢仔報訊話早幾日係燊興見到，而且貨量充足。

自己就買咗隻無腳既紅酒杯Big O to Go Syrah，因為上次店長介紹買Rirsling既唔及用開有腳既酒杯濶口，轉為梅酒梳打既專用杯～