買車氹仔

是日放假，騎愛駒去燊光食完晏，就兜去置樂行相熟玩具店,目標係買會發聲(真車錄音)兼震動既玩具跑車。

結果揀咗藍色HONDA NSX,記得以前玩賽車game時,都係用當時既NSX(個人化為橙色兼加貼紙)出戰。

番屋企拆包裝試車，鬆螺絲排好鈕型電池，又真係有怠速引擎聲兼震動，加速推前就變成咆吼運轉聲～如果加埋幸男既tomica街道地墊，就好似拍特攝片。

唔夠時間去市中心買蛋糕，唯有將冰箱既雪糕放入冰袋，騎愛駒去接幸男放學。

放學有雪糕食，邊個小朋友都會開心，更何況有小玩具～係幸男面前示範迷你跑車，可惜附近太多真車行過，未能聽真NSX既聲紋。

Hot Rod Mk3

幸男愛踼波,所以不時以機械人玩具黎作足球員,今日又有球員受傷.......雖然兩位球員都曾接受過軍醫康楠既治理,但Mark1及Mark2難逃右髋關節既舊患復發。

今次幸男無嚎哭,只係向剛訓醒既經理人(我)求助,望聯絡上軍醫作跟進。經理人查看兩位球員既傷勢,認為難以再接受手術,決定召入後備球員作替。幸男接過Mark3後,細心咁睇包裝,唔通深恐冒牌??

幸男好喜歡Mark2頭盔上既手塗拉花,於是將Mark2頭連接上Mark3既身~Mark1及Mark2將以跑車模式作收藏,希望Mark3可以挨到暑假(新幹線戰士團隊,應該讓Mark3有多一點休息時間)。

PS:火棒於國內版既名字係熱破,驟眼睇唔覺同美版有咩分別,只係內附簡體字說明書。

出城探班

今日同台灣女生騎愛駒去浸大既BISTRO BON食晏,全賴高德地圖語音導航,成功1take過順利到達～

未夠十二點，輕鬆入座後，發現餐牌唔太昂貴，不慨為大學宿舍餐廳。

其實想同人家黎呢度試食，今個大假卒之夾到今日，而且天公作美。

香辣烤雞伴薯條,份量都唔少喎~

油封鴨腿肉燒汁意粉,肉量比我預期中少,有成隻髀肉就好了!

餐湯味道唔差,只係上枱時間有點落差。

識人好過識字,我哋可以享用廚師精選~

午市時段人流多兼柯打趕,光仔能夠偷時間同我合照,真係夠晒唔話得(那些年,一起帶頭箍的日子)。

雖然車程要半個鐘,但搵到附近有合適既泊車位置,真係可以夜晚兩公婆黎二人世界兼當兜風。

PS:人家約咗朋友係旺角食晚飯,所以午餐後騎愛駒落旺角。係朗豪坊行咗陣,就去咗食下午茶,自己一個人騎羊歸家。

七夕的接送管家

朝早落大雨,無得騎愛駒去接幸男番學,唯有搭輕鐵出發。

上到外母家,幸家係訓住黎等我。好在幸男落樓時,已經停咗雨。

台灣女生唔舒服,所以接放學都係由我頂上。

番屋企放低幸男專用頭盔,載人家入元朗行吓YOHO MALL，因為我一心去一田買KIRIN CRAFT (IPA)BEER。HOMELESS元朗分店原來都快要結作業,又少了一個睇家品既地方。行到近六點,買餸都有點晏,乾脆去王子私房菜開餐。

之前去過YOHO既利苑食飯,不過選擇及水準都唔及旺角分店.....

睇人家個蒼白樣,就知有幾唔舒服。

釀焗鮮嚮螺，釀料有蟹肉蘑菇，汁料帶微辣，睇黎英文描述比中文更詳細。

呢個餐令我諗起旺角利苑既商務二人餐,掛住食唔記得咗影碟乳鴿。

見個餐好似好少嘢食,但食到甜品前既呢味50頭吉品鮑魚撈蝦籽麵,開似有點飽意。

食埋個紅豆沙,就埋單走人,再去攞番一入商場就買定既迷你士多啤梨蛋糕。

騎羊番屋企放低人家,又將幸男專用頭盔放入TMAX座鞍下,出發去接幸男回家。回程前,先去外母屋企附近既惠康買益力多俾人家。

住家AEON情人節餐

是日補鐘,騎羊去市中心吉之島超市買生蠔。與其他客人一樣,俾完錢就乖乖等師傅開生蠔及包裝,無諗過是日買生蠔既客人均會免費獲得冷拼小食(帶子,蝦及翡翠螺)一份。台灣女生放工後,係吉之島超市買牛扒同三文魚刺身番屋企,所以今晚既食材全部都係AEON供應。

共渡第十二個生肖,"老夫老妻"都要影番張情人節住家大餐照。不再曖昧,没有心如鹿撞的新鮮感,但彼此已是生活重要伙伴。

PS:拍拖時既"戀務蒸蒸日上",現已變成"家務叠叠日積"

AIA嘉年華之樂與悲

五點四係華都巴士站等台灣女生放工,趕搭巴士去AIA嘉年華。

大人忙住買咩電子代幣組合至最花算,小朋友就掛住望定場內有咩玩.......

唔知係咪因為場外之中環摩天輪旁邊新增迴轉木馬,場內只有迴轉韆鞦。

年年都係玩果堆嘢,但總係吸收拖友及一家大細黎燒錢~

怕閃燈影響他人,而且想試吓背照式感光件既能耐,但低光兼動感主題之下確實要閃燈至得(高iso下之悲歌)....

Big Swing得幸男一個一玩,前後搖擺90度左右~

當然相比其他成人向電玩,Big Swing絶對係小兒科。

百步穿楊,足球班既幸男,未見有好成績,結果都係落空.........

抛擲式遊戲,亦都係一場空......

呢個反斗車王機動遊戲,幸男由2015年下巴唔過扶手桿,玩到而家咁大個。

蟲蟲過山車,為求慳代幣,幸男一人應戰。

高塔魔毯滑梯既位置燈光異常地暗,仲記得有一年係幸男太細個,我要雙腿圍住兼抱住幸男一齊玩。

幸男要媽媽既提示至成功扣好安全鏈,但幸男嫌迴旋速度太慢,全程翹住手四圍望,好似坐公園既老人家咁定檔。

結果精算,剩餘既電子代幣,全數攞去玩碰碰車。幸男夠高度,可以自己一個人操控一架車,無須家長陪同。

搗蛋作亂既屬性,大人同小朋友都無法抗拒碰碰車。

臨走前,一家三口一齊落場玩,甚有瑪利奧賽車既感覺~

可惜幸男架5號車發生故障,該車只能往後走及鎖死一邊軚,變相不停向後自轉。曾叫幸男鬆油門再踏,但都無補於事。在場車太多,怕叫幸男過我架車會有危險(即使我己泊係幸男隔離貼住)。試過踩油並推動壞車,可惜未能湊效.....幸男唔開心到喊出眼淚,名符其實"樂極生悲"......代幣耗盡,媽媽安慰幸男,下年再黎玩過,一入場就玩碰碰車。

一路喊住離開嘉年華,呢張相好似啱啱被女朋友甩咁慘.....

PS:搭渡海小輪去尖沙咀食拉麵,係小食之慰藉,以及父母既衣物保暖下,幸男開始釋懷。