住家免費波

平時唔會啟動NOKIA 9既分割模式影相,今次覺得係最合適既場合。每個月viutv都會直播一場免費足球賽事,今晚就一家三口邊食飯邊睇西甲(華倫西亞對畢爾包)。

雖然我唔算標準球迷,但世界盃及歐洲國家盃就必定約朋友睇。 睇波期間,不時叫幸男向職業球員借鏡。

PSYCHO PASS SS 3

早更放工就騎愛駒出德福(35分鐘就到),相熟泊位已滿,唯在剷上行人路邊。

過番條天橋去戲院買飛,順利用埋入會送既COUPON。

空住個肚騎愛駒出黎,醫肚兼打躉當然係咖啡店。雖然係同一個連鎖集團,但唔同分店既飲品同食品味道都可以差得幾遠下......

校啱時間行去等入場,今次入場人次好似比第一集果次多。

上畫兩星期唔夠就落咗畫,所以睇漏第二集,有點失落......今集講述身在西藏附近既狡嚙慎也當僱傭兵,於一次救援中遇上失去雙親既少女,繼而領向呢位一心為雙親報仇既少女。無SIBLY系統及DORMINATOR既元素,有點似外傳故事。動作畫面出色,只係劇情無咩花巧扭橋,只係單純地為男主角重返日本而鋪路。

散場攞車時,花咗唔少體力同時間,因為泊位係小暗斜......放工時段回程,交通尚可。番到屋企就可以享用簡單西餐,有被照顧既溫暖感覺。

第一次租鏡FE 70-300mm F4.5-5.6 G OSS

朝早七點幾收工,騎愛駒番屋企沖涼食早餐訓覺。晏晝食過尋晚有剩既餸菜飯盒,就較啱時間出去搭2程巴士出尖沙咀,上RENTACAMERA租鏡。

出𨋢後要係門外除鞋至可以入店,為既就係去預約好既FE 70-300mm F4.5-5.6 G OSS。由於第一次租鏡兼店員無講定要俾現金deposit,搞到我要落樓下搵提款機,再上樓排過隊等交收.....

用開既FE 24-240mm F3.5-6.3 OSS未能勝任幸男學踢波既主題,所以想試吓zoom多少少既效果如何?

實地考察,取景框確實減少了空洞既邊位,但快門先決兼高ISO令成像夾雜著粗粒及油畫化。

幸男踢波有姿勢怪怪的(睇得太多閃電十一人?),射球力度偏軟,唔知係咪同近視望唔真個波有關?

八點半解散,係置樂附近搵到間日式食店,不過選擇唔多。

肚餓既幸男,一影完相就急急啟動餐具~

PS:RENTACAMERA既職員有建議過不如租Sony G Master 100 400mm以方便構圖,但deposit要8千大元。基於光圈F4.5-5.6,睇黎晚間既表現應該唔會有改善。

收工撲玩具

早更過後,係公司樓下買杯凍啡同個包,就邊食邊行去紅橋巴士站,為既係出去Action Robo買SIEGE系列既REFRAKTOR($638)。

番到屋企就拆盒,放係枱上影相,鏡頭同閃燈既外型都接近真品。

騎愛駒出V City會合台灣女生一齊食晚飯。

初試炙宴,新張期內只收現金,侍應既服務生疏,未能掌握餐牌食品既存量(一時話無,一時話有)。

番到屋企就急忙將相機分拆為機械人小隊,雖然變形系統並不複雜,但外觀及比例上都可以接受。

網上有Fans自創手掌形態,試過一次都唔會再變.......

G1動畫既REFLECTOR三個機械人都係淺紫色,合體時只係一舊長方體上加稜椎兼前加圓筒,但當時玩具都係用三個顔色(紅,淺藍同深藍)不同既機械人。

其實有一個平啲既淺紫色版本,只要買夠3盒就可以合體,不過無咗閃燈及把手部件…

特選日

騎愛駒去市中心會合台灣女生,幫手運送超市物資兼接放工。

平日為幸男追趕時間,放工後都忙於接送,功課,溫習,大大少少既家務。今晚卒之可以放空食西川雞煲(外賣自取),再睇即時播放既Whiskey Cavalier(特務動作喜劇)。

PS:好耐都無追明珠台既歐美劇,對上個齣係Lethal Weapon轟天炮,之後都係睇Netflix既Lucifer第四季。

中秋生日飯

每年老家既中秋節食飯,都會順便同我做埋生日。自台灣女生及幸男既加入,生日蛋糕上既名子亦由一個名加到三個。呢幾年都會帶相機及腳架影大合照,但今年老豆唔想入鏡,所以我都只係用NOKIA 9黎影,希望新年可以齊齊整整影番張大照~

PS:上次播完平成Rider Forever,部飛利浦碟機就嘔唔出個碟盤(停留係平成時代…)。晚飯後番屋企試大佬有多果部LG藍光碟機,都可以出到DEMO碟既效果~

隨心拍,隨口噏

夜晚番老家黐餐,心血來潮用NOKIA 9 Pureview黎影雨勢。用咗三個月有多了,NOKIA 9 Pureview既成像好依靠光源。

5鏡頭既同步省去HDR既矇矓機率,但環境燈光昏暗的話,確實未能係眾手機中鶴立雞群。