早更後的爸爸

 

放工騎愛駒落新墟,先係相熟位置泊位,再行去食龍拉麵,乜幾時變咗“黃店”(叉燒由1塊變咗2塊)？店舖擴充至鄰舖,不過無打通,相信碗麵要經門口送去新舖。雖然有傳聞話係“偽黃”,但無所謂啦～

從同事口中得知恒生銀行之所在,輕輕鬆鬆轉個彎就到埗,安心為幸男既交流團排隊入數。

番屋企轉腰包模式兼TMAX行李袋,帶埋幸男頭盔去婆婆家接幸男去踢波。由於泊位唔夠近(第一次黎唔熟路),所以安頓好幸男就行番去帶愛駒過黎。

今日大會派波衫,幸男話要即刻著,但又真係大咗啲,攝晒衫尾都鬆泡泡。訓練有短傳及走位,最後時段有分組比賽。

解散前有課後檢討,呢個時候家長們都準備收拾行裝。

15分鐘就送幸男番至婆婆屋企食御膳,我就兜去良景買KFC外賣番屋企邊食邊睇LATE SHOW,卒之都可以稍息...............

V City新食店-但馬屋

未開張時已想試,開張後多人排隊,今晚卒之都可以得償所望~我哋揀咗日本産特選黑毛和牛放題套餐,回本目標係10碟牛肉!

台灣女生揀“美肌鍋”,幸男揀"千夜鍋",我就揀咗"藥膳麻辣鍋"(其實藥膳同麻辣又點扯得上關係?)。

幸男攞咗好多菇番黎,我就主力食牛肉,配料以雞髀菇為主,其次為粟米,雞肉,貢丸.......加湯真係添番相應之湯底俾客人,唔係齋水或百搭清湯。放題包飲品,除咗罐裝飲品,仲有逐杯斟既飲品,幸男揀蘋果汁,我就飲罐裝Coke Plus以減罪惡感。

PS:結果食得7碟和牛,唔知回到本未…價錢同食燒肉放題差唔多,都叫做食和牛丫～

第十三個花球

是日擺酒週年,同幸男講:"爸爸出去攞花,唔好嘈醒媽媽"。一如已往買番同款花球,今次老闆娘話攞唔到平時既單托,反而得較少有既雙托鬱金香。過氣新娘子依舊欣然接受,但覺得似壽球花多啲~

將幸男放係外母家,晏晝騎愛駒入元朗IMAX買飛睇即場既"極速傳奇-福特決戰法拉利"(對賽車主題有情義結)。

"Ford v Ferrari"主力講福特車隊各人(班主,行政團隊,領隊及車手兼機械工程師)交織出黎既奮鬥翻身之夢,夾雜著權謀及寫實元素。相比一級雙雄"RUSH",它無觸動心弦既配樂,以及車手間之熱血死拼故事,少了一點戲劇性,但賽車迷準會乖乖買飛入場。

散場就去王子私房菜食晚飯,見有大閘蟹餐,於是勇敢一試。唔怕貨比貨,點都係比唔上滬江。大閘蟹無咩問題,但其他蟹粉菜色則唔夠大方(蟹粉小籠包,蟹粉扒豆腐及蟹粉薑炒飯)。

PS:没有戲劇式既驚喜,只有二人既放空時光,黙黙地走過12生肖...

明宜結婚了,尾車等埋我~

社會運動下,交通係其中一個受影响既元素,但無阻一眾同事前往Ming Ming餐結婚飲宴既決心,總算可以影到張大合照~每次都戥朋友同事們結婚開心,因為可以搵到個可倚靠既伴侶確實唔易。過來人既心得,結婚唔係戀愛既憤墓,生小朋友先至係大考驗,一對新人真係要好好咁享受二人時光之甜蜜喔~

影完大合照,大家都趕去追尾班車,Emily提議係扶手運輸梯影自拍,記下大家歸心似箭既一刻。

其實我同Ricky及Chester都係補鐘趕車出去尖沙咀,好難想像近八點既尖東站會係咁空蕩。由於怕太忙去補唔到鐘,所以由原本既一家三口變咗單拖出席,希望主人家見諒!

Batman@小學英語報

一向有為幸男係訂學校既GOODIES英文報,但小朋友總係無咩心機查生字及了解內容(怕煩)。適逢今次主題係蝙蝠俠80週年,台灣女生督促幸男查字典兼理解內文後,就由我負責人引伸延續。

Nokia 9上網係youtube搵batman return電影出場既片段俾幸男睇,首先係葛咸市向天打出求助燈號。

大宅會將燈號接力打人書房,Bruce Wayne就知道要動身換衫。

由於大宅位於近郊,所以要有番架超跑座駕至趕得切入城捉壞人。以電影黎輔助閱讀埋解,應該點都有趣過無聲無話。其實呢齣由Michael Keaton主演既Batman係我第一齣睇既蝙蝠俠電影,當時無Marvel 既英雄電影,只有1978～1983既3部DC超人電影。

希望每次幸男遇到難題時,爸爸都可以用電影故事及動畫來闡説或鼓勵。

補鐘去鋸扒

難得唔係太忙,補鐘出市中心會合兩母子食晚飯,畢竟輪班既爸爸大多數係平行時空生活及支援著兩母子。

入座時唔太多人,食食吓都開始要等位。原本想叫燒牛肉,但職員話賣晒,唔知係咪見客源不穩而唔入咁多貨?

兒童餐既漢堡配薯條,幸男個口好似變大咗~

試過Dry Aged牛扒,都無話食到嘴刁,依舊可以享受outback既貨色。食食下先發現隔離枱係獅子山Rutherford(同另一半撐枱腳) ,佢讚我同人家有夫婦相(似樣?),我搗蛋地講:"係呀,似姊弟0架",當然換黎人家既厲目....

A/N後的家庭日

中午一家三口去市中心既築地拉麵食晏,人家去買水果茶,我就用環保杯去天仁茗茶買奶茶飲,務求盡快為杯價回本~

經過吉之島玩具部,見新幹線戰士全線減價,兼會員再有折。先送兩母子去搭輕鐵,再折返一口氣買下3盒,為幸男故有果3款其本版作升級。畢竟今學年係無去功課班,齋靠幸男自己做功課兼溫習兼等媽媽收工後批改及提問。如果幸男考試成績無退步的話,就當係奬勵~

由於輕鐵站既顯示屏未能提供班次等候時間,所以要係路口等住黎望邊架車黎緊而跑去相關月台。

人家上外母家放低幸男,再係河田站會合我。經過電單車泊位時,見到一架TMAX DX炒到左邊車身重創,好戥車主心痛及肉赤.....

是日sleeping day,同人家係悅品度假酒店做過泰式按摩,就去接幸男番老家黎餐。飯後想同愛駒散心,於是順道入元朗買宵夜(蠔餅舖無開,唯有買泰式雞翼串燒)。

PS:今晚收到Andrew送既禮物,夠晒輕情意重兼性價比高。大量blog囤積,都唔知幾時可以動工開箱.......