22:00的寂寥

放工騎愛駒兜去工廠區既7-11買啤酒,心血來潮舉機(NOKIA 9)影下街頭夜景。手動模式,加上5鏡合成需時,但結果令我非滿意~

其實影完之後,我心急查看相簿,但只見"處理中"字樣伴隨轉圈及起格既初稿。等待清晰照片時,感覺有點似70年代即影即有相機既經歷。當下既慢活,令便捷顯得粗糙及欠缺了一點回憶。

PS:疫情下既街頭比社運時冷清得多,眾商店既生意亦然,因為大家都盡量留在家中自我或與同住家人小組隔離。

家庭足球夜

又係番完夜班既中午,依舊騎愛駒去紅橋覓食。

今次好順利地係OK買到貢品,一片心今晚可以呈上俾幸男。

番去新興攞埋個外賣,就番去獨自面壁開餐。傍晚騎愛駒番屋企,享用台灣女生準備既晚餐。

近十一點,我同台灣女生叫幸男開電視睇新聞,另一邊廂我同人家係書房用智能電話登入NOW E,再投影到客廳既智能電視。電視播放住直播既收費賽事,幸男驚喜過後，就緊張投入賽程。

開場23分鐘,基達菲既一個入球,令幸男失神到手中既列車戰隊figure都跌埋落地。幸好VAR為幸男鬆一口氣,侵犯令入球被判無效,還原0:0。雖然畫面像數只係720P,偶有起格既情況,但無阻大家睇波既投入度。

兩球在手,幸男非常滿意賽果。美斯已年屆32,唔知幸男仲可以追隨偶像幾多年呢？

PS:其實臨開波前,用NOKIA 9登入NOW E失敗!!原來當初用LAPTOP作首次登記時,誤觸touchpad令電郵地址少咗2個英文字母,讓成無法進行核實程序!!!!!幸好錯體電郵尚未被人登用,秘書成功建立該電郵作睇波專用。

一人前的午餐+撲足球雜誌

明知兩母子訓得晏,自己騎羊去紅橋赤橋食拉麵當晏晝果餐。雖然係星期日,但店內入率只有一半,街上既人流似疫情前閒日既下午兩點幾時份。

行過見到有0架CB190R,唔係得CB300R咋咩?望落個款又真係一樣CAFE RACER款丫........幸男委託我買"進攻足球",但唔醒起係紅橋間OK或7仔搵,唯有行番去新墟望搜尋。

西鐵站7仔唔見,巴倫紐商場7仔又無,唯有順便行番去對面馬路望下藥房有咩補給品。自foood panda及deliveroo既冒起,Go Go Mall樓下就經常有外賣綿羊駐守,昔日既麥麥送自顧車手竟然列隊,但最搶眼既莫過於呢架魔鬼造型既2000年款FORZA。

行到去啟發徑既OK(近杯渡站下方),先至搵到一千零一本,總算成功代購,無令幸男失望~

PS:可以搵到樣興趣去熱衷,確實係一種幸福。

當機立斷換藍牙耳機

之前係Mobo+俾店員reset過MAVIN Air-X,但都係當用WiFi連線時,耳機都係會出現跳線。雖然CS話要早去代理放低至可以即日提取,但我計落數不如先放低耳機,等佢整好至搵日放工出去攞。由於今日等半日辦公時間,所以好趕咁番屋企摷單兼跟住高德導航出荃灣既派龍中心。

向職員陳述跳線問題,試過各種次序,要收埋左機,逼右機單獨運作,再從叉電盒拎出左耳機作連接。明明呢個型號係TRUE WIRELESS+,理應無分主副機,左右同時接收藍牙信號作演釋,所以我堅信係品質既問題。職員拎耳機入去俾維修人員檢測,我同老豆傾咗陣電話。無幾耐就見職員拎出另一盒新機,不過就只係對換叉電盒同耳機,包裝盒連耳膠及充電線則用番我當初買果set。

無諗過半個鐘就可以換番個新機走人,非常滿意代理既高效率服務,無話要放低幾日等check清楚至回覆。回程用舊nakamichi耳機作導航,好在出荃灣既車程兼等候時間已充夠電力。

望你可以得到平反,Rest In Peace......

李文亮先生既訃聞確實令我心酸,一位直言實務既醫生,竟然一開始被誣告造謠。事實勝於雄辯,當初新SARS之造謠,變成驚世警號,可惜一切都太遲,錯過了整整一個月既抗疫時間.........

疫情急速擴散,除咗隱瞞主因之外,文教及知識亦係副因。先進國家既政要大多受過高等教育(疫國既政要又有幾多學歷?),縱使各有政治動機或盤算,但至少會有科學精神,會求真相兼批判性思考。

自古帝制既興衰,在乎君主是否開明及納諫。執權者越尊蠻,政壇及民間就越不敢進死諫,並變得唯命是從,尤如童話故事"國王的新衣"。為防範國民造反,故意控制言論及網絡資訊自由,反而無法實現"一人計短,二人計長"。制度上既缺陷,加上軟件(文化,知識及多元意見)上既不足,即使可以將先進國家們既科技引入,亦不見得足應付突發既災難。

PS:好多人會用當年豬流感既疫情相提,但至少當年涉事國家沒有隱瞞,反而和盤托出,好讓全球做好防範。

讓老媽安心

尋日台灣女生話我知"奶奶打過俾我問你點",諗唔明點解老媽唔真接打俾我,人家話"可能怕阻住你休息".........放工係奶奶舖頭附近既7-11買啤酒,順手影張相send去家庭群組。

望均都係得生力,藍妹,嘉仕伯......最後搵到suntory既大罐裝~

已經習慣係櫃台要求冰粒,安心係房間等門鐘收保溫壼,以冰鎮方式製冷~

肚空空,用埋老媽既油角黎送啤酒,至少讓老人家知道阿仔仲食得飲得,少一份擔心。

入伍一星期

放工一心出去太子換耳機,但經店員重設後,又好似有改善,唯有再係有WIFI既環境下再試吓有無斷線情況。上頂層既大書局行吓,發現呢本台灣出版社既日本電車大集合。經台灣女生問幸男,當事人話無呢一本書,於是乖乖課金.......

搭巴士番公司,騎愛駒上外母家呈上珍藏過幸男,自己再兜去紅橋新興買牛雜米做晚餐。

上次入住係前年屋企裝修兼適逢世界盃,之後都有黎食晚飯或飲酒小敍,所以都有唔少情義結。

等新興外賣時,去OK睇啤酒,揀咗兩款少見既產品。

由於空肚搭巴士出到始創至搵地方食晏(近5點),所以11點至食晚餐都覺得啱啱好。兩款啤酒都無預期中咁好,支4 PINES仲飲到一半就無飲......

PS:入伍一星期,撇除一日Briefing同2日假期,實質番咗4日工。陌生環境,不明朗之氣氛兼朝令夕改既指引,確實令我未能定神。

Harbourside自助餐

台灣女生早前係Klook預約咗自助餐,小朋友免費,變相買3送1,每位$6XX。

雖然無生蠔,但西式冷盤(長腳蟹,翡翠螺)以及日式刺生都源源不絶。熟食選擇多,而且款款都係好食,並非以數量充撑場面。人家當然唔會等要尾段至去掃甜品,我亦好識做地為人家抓拍~

由於唔方便帶相機,唯有靠NOKIA 9 PUREVIEW。

餐廳名無呃人0架,真係望住維港～侍應生見張相曚曚哋,以為自己影得唔好，其實只係Nokia 9未完成合成演算。臨等埋單時,幸男話肚痛,要去廁所,踎咗好耐至出黎兼坐多陣至行得。行咗一百米都無,幸男就嘔,不過嘔完就好好多,順利搭西鐵歸家(幸男於車箱內挨住媽媽訓咗陣)。一齊落車,但送三婆孫去搭的士,有點"夫妻緣不再,親子情永在"既分居感覺。

PS:AVITA LIBER 14'已叉滿電,暫時試上網,藍牙USB插頭都OK,不過touch pad就比較大(用curser時方便),打字時容易誤觸。屏幕既質素明顯比舊TECLAST X4好(唔會有邊位漏光),黎緊要幫佢安裝番個防毒。