咏文結婚了,喵～

咏文出嫁了,今次係我疫情期間第一次既囍宴。每枱8位賓客,我同Jim及瑋霖坐咏文同學個枱,顯得我輩份後生咗。

每次去婚宴都戥新人開心,因為遇到一位有信心一齊面對生活難題既伴侣,絕非易事。平日我常與同事們講：拍拖都唔開心,咁就唔好諗結婚咯。從新人既求婚片段及台上對話,二人就像開花結果既葡萄,準備進入釀制成酒既新階段～

合照時間將A7iii交俾攝影師代勞,原來面上帶有早更既倦容,希望新人見諒～

PS：原本諗住騎愛駒赴宴,但見時有驟雨(朝早掛紅雨),台灣女生又話唔放心,所以乖乖搭巴士。

令人乖乖課金既旋律

原本係花園剛拖走雨後既濕悶,突然聽到熟識既音樂。"幸男你食咗下午茶未?",聽到個"未"字,就急急拎銀包出去村口,為幸男送上凍品。

台灣女生怪我淨買幸男果份,於是再一次闖入濕悶既空氣。踏入夏季,不時發現雪糕車既蹤影,為未能外出遊玩既大小朋友,帶來一點快樂回憶~

第一轉行番屋企時,已睇住軟雪糕既輪廓漸模變糊,係球場中場時就轉急步。一入屋就叫幸男"快啲食喇,溶緊喇"。當我再行出去時,人家send咗幸男張相俾我,見軟頂已溶解中~

古迦@時效警察

最近同台灣女生追睇"時效警察"(2019),男主角總係熟口熟面......上網search吓,原來佢就係幪面超人古迦既男主角-小田切讓(人家都讚我犀厲,憑20年前粒痣相認)。

故事環繞警察總武署時效管理課,男主角霧山修一郎負責將時效完結既懸案證物交還涉案人仕,並從中試圖破解25年前既謎題。

有别主流偵探劇既耍帥思考,霧山修一郎每每被眼前景事或當下經歴而觸發靈機,而且搭配搞笑既反射動作(反而來得自然)。由於時效已過,即使霧山修一郎成功破解犯案方法,警方都不能逮捕犯人。正因如此,男主角向犯人們提出犯案方法,他們都會大方承認,並接過霧山修一郎既保密卡片~

PS:當年古迦男主角-五代雄介(小田切讓)既認真樣,都真係一時間未能聯想到而家既樣~其實古迦與BLACK RX相距12年,成功將冰封既幪面超人劇集重啟。直至20年後既今日,日本仲係每年推出新一代既RIDER!

陪太子睇德甲

疫情下,多個主要足球聯賽都被叫停近3個月,但德甲率先閉門復賽。連韓聯都照睇既幸男,今晚期待既戲碼為多蒙特對史浩克04。邊洽眼訓邊打blog ,出客廳時見台灣女生已體力不繼,幸男就邊睇波邊舞住個列車戰士。

PS:有免費波無理由唔睇,但家務及積存既日誌,令我無法相伴。

休課的日常

幸男訓醒已將近中午,"我想食茶木"(紅燒牛肉麵),FOODPAPA就騎愛駒出市中心~雖然外賣自取有折,但一客紅燒牛肉麵都要成$7X.....咁啱見到有特價午餐(鹽酥雞扒肉燥飯連珍珠奶茶)只係$5X,當然要慳少少喇~

正當苦惱用開既環保飲管啜唔到珍珠時,幸男話應該有支粗身既不銹鋼。

午飯後,將安放睡房既DEVASTATOR抹塵兼分體,但發現左腳既混之凝土車前轆轉動部件不敵歲月,斷開了.........

玩具被齋扮到爛,實在有點可惜,一於跟住YOUTUBE既短片黎一次過變晒做6位隊員。最鍾意Long Haul(右3),因為雙腳不再單薄,擺脱已往既病。原定舊年有貨既第三廠maketoys既Defensor仲未有聲氣,期待重現博狂兩派對壘~

PS:起身個下雙腳痺痛,係餐枱做功課既幸男話“其實你坐係地下度砌咗成個鐘”。

請定假黎收梳化

坐咗幾日飯枱長櫈,今日卒之都可以坐新梳化~厚褥既感覺係薄墊不能比上的,斜靠背加上頸枕,雙腳都不自覺回收到座墊上捲摺......望電視既視點比舊梳化低,直望屏幕既中間點(以往係中間點以上少少),啱晒長時間煲劇或電影~

上星期六,舊梳化已經已由輝嫂幫忙搵鄰居接收。換梳化唔係貪轉款,反而為咗枕頸位,因為無當坐得耐都會頸痠軟。其實舊梳化只係褥邊甩油,其他部份仲好新淨....

話說上星期四出去沙田IKEA睇窗簾布,係HOME SQUARE地面樓層見ULFERTS減價,入去八卦吓有無之前我係九龍灣ULFERTS睇中既梳化,點知被呢張再貴少少既梳化所吸引著。美中不中係兩邊扶手位有點"雅"位,用尺度過都係舊梳化加獨立轉椅既濶度,但人家話"擺到喇~都濶唔過以前IKEA果張......",結果今日人家番黎見實物話"你講得啱,係果度(舖面)睇咩都覺得唔係好大件....."

PS:由於得番陳列品一件,所以有7折(正常8折,特選貨品6折)。職員姐姐話呢張係新年放到而家(約4個幾月),見平多少少又只係腳位少少花,所以當時以旅行既預算去買呢張梳化。

老豆有信心影相了~

雖然限聚令更改為8人,但由於怕逼兼老豆未回復水準,故今晚番老家食母親節飯。

療程完成已5個月,老豆既頭髮已經回復(MONCHICHI重現),關節痛反而因為療程而得到舒緩。上年5月開始做檢查,8月開始化療,總叫做賺咗一年~但願疫情降溫,可以再次三代同堂食自助餐~

没有動力補打BLOG的假期天

趁幸男未復課,中午騎愛駒同幸男去工廠區搵老媽飲茶,樓面職員話老媽好耐無黎,原來多數買走番上舖頭食。食品質素其次,主力都俾嫲嫲見下孫仔兼向外宣傳～

送幸男上外母屋企,享受一人電影時光。NETFLIX既EXTRACTION,音源上都係未能完全發揮Sennheiser ambeo soundbar ,不過一段一鏡呵成既動作畫面令平板既故事帶來一點新意。

四點幾,收到送貨司機既電話,交收後就快速組裝MADE IN JAPAN既BALMUDA Green Fan。平板型3扇葉Italy Turbo服役多年,風力已大不如前。上網做功課,時下興DC風扇,慳電又夠靜。雖然PANASONIC都有DC風扇(二千蚊左右),但個款有點老土,所以揀咗標榜送風距離既BALMUDA(貴多一千蚊)。親身體驗,BALMUDA絶對超越當初全新既ITALY TURBO涼快(同樣坐係梳化位)~

PS:利申-呢篇BLOG一如已往都係事後補打~

週未打風前的晴天

最喜歡於放假天洗窗簾布,朝早開機洗,近中午時份掛晾。

黃昏時份,收窗簾布時順手揚塵,點知"嗖"一聲,手指己被布料立體地包圍著........

晚餐由放工歸家既台灣女生主理,炸白飯魚既色水有啲似炸魷魚鬚。雖然已經兩個月,但係屋企食飯都係慣咗自己用公筷。

之前買落既黑松露啤酒,原來已過咗期1日,急急拎出黎作飯後品嚐。開瓶時“pop”一聲,有點似鹿牌香檳仔。咀唇貼杯邊時,已聞到黑松露香味～

由於用細杯斟,臨尾成杯都係沉澱物,仲濁過竹蔗茅根!無晒氣之餘,又好膩口........

睇番樽身,話沉澱物係正常,但無話係咪飲得。下次試吓一次過斟晒落隻大杯度,睇吓有咩唔同先~

PS:係電單網站見到有美國電動電單車ZERO SR/F既英姿,極速200km/L(充滿電),最大續航距離則是259km,車重220kg,真係令人心動~

東京愛的故事(令和版)

今晚台灣女生話有新版東京愛的故事睇,姑且試看選角如何,點知三上既攣毛造型已令我吐血~

當年我睇既三上係由長髮造型既江口洋介所飾演,集時尚與不羈於一身。

永尾完治,赤明莉香,三上健一,關口里美,係我眼中只係關口既選角比舊作討好。新版永尾完治雖然同樣給觀眾一份乖巧男孩的印象,但欠缺了一點初出茅廬既純僕感(有點似韓星?)及戇直既既性格。

1993年於亞視首播,就讀初中既我每集都追看,畢竟本身熱愛日本卡通及偶像。主題曲ラブ・ストーリーは突然に以及配樂Tenderly Rica's theme令觀眾完全融入故事。除咗電視劇,我仲係漫畫店租原著漫畫,再一次經歷柴門文既愛情觀。之後都有追睇愛情白皮書,但始終都係鍾意東京愛的故事。

莉香既愛係主動又不求回報,確實有別當時一般男追女既主道。陽光兼主動既性格,讓魯鈍既完治不自覺地被俘虜。只可惜里美被健一所拋棄,令完治不敵舊癢。

網絡通訊未發達既年代,縱使效率不高,人與人之間既相處係較直接,溫暖及難忘。

PS:由於新版係串流平台播放,所以床戲尺度省却了一般大氣廣播的顧忌。