平成版"東京愛的故事"

今晚同台灣女生一齊睇VIU TV重播既東京愛的故事,片頭曲"ラブ・ストーリーは突然に"帶領我倆回到29年前(平成3年)既東京~

唔怕貨比貨,最怕唔識貨,人家都話平成版既主角們,出比令和版既演出好得多。故事舖排細緻有序,充份表達出三位同學想以大人既身份,去畫解讀書時既瞹昧。 主動兼爽朗既莉香,亦活演出對愛既熱誠及軟弱。

PS:真"三上健一"再現螢幕,太瀟灑了。身為導賞員,我不時向人家劇透…

午班前的燒肉

是日番晏,無諗過午餐係食住家燒肉!由於工作關係,不能以啤酒作餐飲,有點美中不足.....疫情下,大家都減少或被政府禁止(晚市)外出用餐,好懷念以往外出用餐既美味及聯誼~

放飯時發現人家send咗張相過黎,原來幸男被委派去洗碗。洗碗碟機要下星期三至有得入廠,睇黎仲有排要手洗..........

PS:明明一早咗有ERROR CODE 14,但客戶服務職員話點都要師傅上門CHECK先,結果要花多個幾星期等師傅上門再約收機回廠。

重塑FORMULA E香港站

尋日係置樂見到LEGO SPEED系列新作,立即當場課金,因為可以一償同幸男一齊睇FORMULA E香港站既願望。今日晏晝同幸男一齊開箱砌,我負責房車,而幸男就負責方程式。

雖然方程式既步驟及部件都少過房車,但結果我快幸男9分鐘完成~兩車既貼紙都係由我包辦,但幸男有一個失誤,令車尾側既貼紙要被刮起作重貼。$269有兩架車,都算係抵玩丫~另外,起跑線燈號架原來有機關!只要將橫樑逐步拉走,紅黃綠燈號會相繼墮下~

晩餐由台灣女生主理,放工番黎煮,八點鐘多啲開飯。一睇就知幸男係邊睇電視邊食飯,升小五都仲係要人提"眨眼"......

晚飯後,將書房既SUPER ASURADA AKF-11出黎同FORMULA E合照。

希望有一日真係可以同幸男一齊睇香港站既FORMULA E,係真車前影相留念!

PS:晏晝收埋汽酒貨,無諗過連白酒都有貨兼順便一次過送貨~原本講好幸男慢過我一分鐘就要捐一架新幹線戰士玩具(基本版),但最終都係不忍心要幸男割愛(始終基本版由幸男讀幼稚園開始入伍嘛)。

元朗一日團

當年只係從錄影帶睇動畫電影"阿基拉",但今日就同康楠及嘉耀去YOHO MALL my CINEMA睇4K版阿基拉~雖然劇情係已知,但細節已變得模糊,變相今次邊咗係溫書兼享受大銀幕。自少喜歡電單車既我,AKIRA劃時代戰駒當然有重要地位,前年睇READY PLAYER ONE(挑戰者一號)時,見到立體電腦動畫版時已非當雀躍同共鳴~

睇完戲落番雞地附近食晏,唔想等位,所以入咗間潮式牛雜粉麵店。食完飯就分道揚鑣,自己走去益發排隊,大約半個鐘就搞定。

見未夠時間會合大VICKY,係YOHO MALL行吓。Agnes B減價,睇中咗一個polo恤,可惜折扣下都係有點超出個人預算,所以都係放番低........

CD WAREHOUSE減價區搵吓有咩啱心水,點知搵到呢齣舊戲。為咗滿足FANS CLUB,一口氣買下3隻"當這地球沒有猫"。由於該店只得一隻現貨,所以先俾晒錢,再等集齊3隻至係V CITY分店攞~

繼上次"天堂醫生"既聚會,相信好快會再有佐藤健既FANS CLUB交流會。

PS:傍晚同大VICKY係千色店聚集,再搭的士去大姐屋企食飯~雖然只係4人聚會,但都係開開心心咁邊飲邊食,好溫暖既住家聚餐~

愛駒覆診日

十點左右出門去太子,於車行放低愛駒換機油及電池,行去花墟附近既PACIFIC COFFEE搵位坐低打發時間。

齋飲又點可以等到食晏時間呢?奧義就係上網睇2006年既時效警察,其間邊同台灣女生whatsapp。Gameboy袋配上外置電源,砌成一個小座架,藍牙耳機亦幫忙打造迷你私人映畫室~

近近地,諗住行去嘉利睇SHOEI既J CRUISE II,可惜撞啱職員午膳時間,未能進入店內.......

唯有四周圍行吓,經過一間校服店。櫥窗既舊式假公仔,令我諗起恐佈電影橋段。

天朗氣清,但有成30度以上,樹蔭成為避暑歇腳點。

行吓行吓,唔覺意行咗去園圃街雀鳥花園。

園內有好幾間店舖,除咗一個個既雀籠,我仲見到有一袋袋既草蜢。

咖啡後突然搞肚痛,急急腳行去新世紀廣場,諗番原來都好耐無黎(Training及剛畢業時代就不時出黎行吓)。

行均成個FOOD COURT,都無咩啱食,而且價錢亦唔平,結果行番落太子求其搵間餐廳食晏。唔怕貨比貨,最怕唔識貨,原來茶木既紅燒牛肉麵真係好好食!!

臨近三點可以攞車,檢查後都係話電池老化引致撻車時電壓不足。唔知原廠出車果舊係咪鋰電,但今次揀咗鋰電,反正只係相差一舊水。回程時有一陣雨,搞到分心入錯線,去咗青嶼幹線......來回無咗$20,只係廸仕尼外既廻旋處兜咗個圈,唯有當行海景高速公路黎叉新電~

PS: 卒之可以清脆地燵車,睇黎短途既駕駛模式,令電池挨唔足兩年。

跨區FOOD PAPA

傍晚時份,騎愛駒出浸大搵光仔,親身支持兼探下班,畢竟佢係大忙人,而我係輪班人。

望完餐牌,以whatsapp同台灣女生商討組合。

制作需時,好在有杯冰水同冷氣降溫~回程撞正放工時間初段,車程花多咗15分鐘(50分鐘番到屋企)。

除咗光仔推介既慢煮牛小扒,仲有法式脆皮乳豬仔。由於無龍蝦尾,所以轉咗係帶子意大利飯。保溫袋既護送下,只係慢煮牛小排需要用焗爐翻熱。

幸男上完ZOOM足球班,沖完涼無耐就可以食到光叔叔既大餐。由於貪心叫咗兩份牛小排,個意大利飯都無郁過,結果留黎俾人家聽日做午餐~牛小排確實係好食,OUTBACK既慢燒牛肉絶對被比下去!另外,法式脆皮乳豬仔都好出色,人家讚不絶口~往後既外賣晚餐,可以有一個優質之選~

PS:大家食得開心,兜遠啲都值得,仲可以當睇黃昏屯公海景~

上色版VA Hi-SPEC SUPER ASURADA AFK-11

今日係相熟網站見到上色版VA Hi-SPEC SUPER ASURADA AFK-11,可惜要出年6月先至發行~

相比前作SUPER ASURADA,前方既擾流可以話係同出一徹,只係多咗前輪既包邊設計。AERO MODE時車身兩傍吸風位向外伸展,與車轆並排(重量分布有利直線衝刺?)。應扇有專屬頂蓋,但從照片中仍難估算後輪側板既收納玄機......

從車頭望去,升壓鍋無前代咁突出,好讓整體流線型態得以保持。

PS:已委託賢仔幫我訂黎緊既FIGURE王,因為今期有VA Hi-SPEC SUPER ASURADA AFK-11介紹兼CYBER FORMULA專題回顧!疫情下,不少玩物都延遲上市,VA Hi-SPEC OGRE AN-21亦由五月拖至九月下旬.......