管家湊仔日

放假天,湊仔天。食得太多燊光,所以提議騎愛駒去市中心食拉麵。雖然臨近食晏時間,但唔洗等位就可以入座。雖然無豬軟骨,但叉燒拉麵都足以令幸男出門,當然依舊追加糖心蛋同紫菜作配菜。

行過TGC,見到有鑊剷買,諗起屋企用開果個已殘舊兼表層剝落。十五十六之下,揀咗耐熱300度既加拿大品牌款式。

經過玩具部,搵到1001盒既DXS可動PLUS既新幹線戰士!之前已知會暑假發行,所以一直都有捕住吉之島玩具部既櫃架,盛惠$399~

番屋企經過球場,見有雪糕車蹤影。花園停定愛駒,遞上散錢包連住既迷你八逹通,叫幸男自己出去買軟雪糕,但幸男無工而還!"明明仲聽到音樂聲0格....",於是同幸男一齊行出去球場,從漸大既樂聲及車頭方向推斷,剛才雪榚車應該係入咗球場側既小路調頭,所以幸男出到球場時失去雪糕車既影蹤。

邊食邊溶,夏天食雪糕絶對考驗閣下是否眼明手快,否則一手黐立立.....

其實回程前先上咗外母屋企攞幸男既波衫,外母話執好咗個櫃黎俾幸男放LEGO車同生日禮物,咦.....不如就當DXS PLUS係預支既生日禮物都好喎~新版只係多咗扭腰及提高大髀關節,變形系統與DX系列一樣。

新舊剷相比,長度一樣,不過前端就無舊果款咁挺身。

新買既DJI Osmo Mobile 3已成為幸男上online足球班既裝備,配以幾年前買落既Philips無線藍牙耳機作對話。

幸男上堂期間,我就騎愛駒出咗去搵光仔,兩母子足不出户就可以食到九龍塘既外賣。明明講好咗外賣,但人家都係買咗刺身壽司拼盆,結果食剩晒啲壽司飯..........

PS:兩架E5放埋一齊,唔係落足眼力睇盤骨位,都真係分唔到邊架係新買既PLUS..........

另類足球訓練班

日今日卒之都買咗SWITCH既CAPTAIN TSUBASA番屋企,可以跟隨VIU TV播既足球小將劇情,與南葛隊一齊挑戰全國三連霸~

兩位學員一齊上訓練班,每人輪流跟住課程黎練習。

SENNHEISER AMBEO Soundbar加持下,令客廳頓變成遊戲機中心!故事模式分為EPISODE:TSUBASA及EPISODE:NEW HERO,遊戲建議玩家可以先以前故事勝出全國制霸,再挑戰後者既世少篇。本人覺得先係全國賽摸熟系統,再對國際勁旅既舖排非常貼心,亦能夠讓玩家重溫各經典場面。EPISODE:NEW HERO中,相信以往無太多著墨既隊伍會有新既戲份及絶技。

PS:其實今日有買埋JUMP FORCE,一心以為好似街霸咁打,點知要用自設角色去跟故事去與其他角色結緣,至可以獲得角色作對打模式.......

R/C FORMULA E

期待已久既Nissan Formula E Gen2 Car,今日卒之都到手喇~有勞ANSON入油時幫手換購,否則我同康楠一齊入滿愛駒都未必夠$450.........造工真係唔差,車身係合金料,細緻位及拉花都近乎真車。

由於分階段換購,所以要苦等到第四期(尾二)至可以換到FORMULA E。曾經有諗過換埋另外兩款FORMULA車(Team Penske Indycar,Ferari SF90),但結果都無為儲齊而換。

下載埋個App,用智能電話經藍牙電池控制Formula E～房車型號有得著頭燈著兼,Formula就只可以係電話上響咹(房車型號都得)。操控雖然比唔上正式RC車(圓型軚控兼油門扣板),但勝在性價比高。

初賞Long Vancation

まわれ まわれ メリーゴーラウンド

もうけして止まらないように
動き出したメロディ

LA・LA・LA・LA・LA LOVE SONG~

今晚同台灣女生一齊睇Long Vancation,其實我哋係第一次睇呢齣1996年既日劇作品。當年無免費電視台購入此劇,大家都係信和買“特版”VCD日劇套裝。

當年忙於適應預科,資質有限兼無多餘錢去補習社,結果令我每一日都係跟唔上課程進度.....另外,久不久要陪老豆去急症室打止痛針,薯嘜式初戀失意,孭2份補習(幫補買參考書),雜燴成一團糟既生活時間表。

PS:目標係今個大假日子內,同人家一齊煲晒呢齣經典潮流日劇,重拾逝去既青春。

這麼近,那麼遠

放大假好難唔出街,今日我哋就搭西鐵去咗海之戀商場行吓。撞正食晏時間兼星期日,間間餐廳門外都排滿人!!二人限食令確實令食店及食客叫苦,結果行番轉頭去brotzolt攞位食晏......職員哥哥搵均全場,安排我坐係兩母子隔離個枱,除咗有條小走廊,仲有埋透明隔板,真係"這麼近,那麼遠"~

星期日無餐叫,純散嗌。生啤配豬手,放任既午餐之選~

食完晏就行去DONKIDONKI,非常非常之多人!!基本上係好似行年宵咁迫,舉步為艱........原本話買便當做晚餐,但望落唔太吸引,所以只係迫個轉就算。無諗過幸男係玩部區搵到架心水TOMICA車仔,而人家就揀咗杏甫酒(日本旅行買過黎飲)同荔枝酒。

運動性≠耐用性

上星期五係元朗良記車行攞完新一年行車證,塞咗一大輪車去到公路迴旋處,點知一俾油部車好似無力加速咁,幸好預得夠車距至入迴旋處......打去原廠約檢查,要成2星期後至有期,早幾日死心不息,再打去原廠問有無客取消預約,結果感動上天可以攝到今日檔期!職員哥哥話似係極力子問題,師傅check完再報價。

由於今次順道為服役2年既TMAX換呔,所以預咗會好晏至有車攞。"既然你都會搭巴士番屋企先,不如你去朗豪坊附近配埋厠板番黎丫",結果跟隨台灣女生既提議。

係朗豪坊好趕咁買咗件特價POLO恤,再追巴士APP上顯示既班次。番到屋企坐陣就有午餐呈上,人家話我快到好似出去新墟剪完個髮咁上下時間。

一如所料,愛駒要近收工至可以交付。搭巴士出到去車行已近六點,頭尾呔兼極力子片配件兼手工,3000大元有找.....車呔已不再係DUNLOP,而轉用BRIDGESTONE BATTLAX SC2,重回日系品牌~

店員建議唔好俳佪或重覆係俾油行少少就停既時段,因為扭油筒至車身開始前行其間會消耗極力子片。香港地有幾何唔塞車?,SKYWAVE時代果12年都係咁既手勢或習慣黎開車,當年都係4萬公里至需要搞極力子丫我上網見其他師兄都係4萬公里至要換極力子片,但我1萬多啲就出事,唯有當TMAX扭力高兼短途車程多所致(人哋上公路多至拉長咗個里數)。趁人家準備晚飯,我就快速為愛駒清潔一次。

西川因疫情無開業,人家用奶奶饋贈既惡魔雞煲醬整住家雞煲,仲特意加埋花甲落去,扮足西川貨色~味道唔錯,只係雞件要於後期至吸晒醬汁辣味。

PS:好在上次係元朗YOHO間AGNES B無買到件POLO恤,因為今次再平啲(8折變7折)!!

避疫家居砌LEGO

限聚令及限食令之下, 一家三口於午飯後拎出存積已久既LEGO Architecture系列,分工每人砌一個世界地標。

無諗過第一個完成既係幸男,呈上英國地標組合!

第二位完成既選手係台灣女生,負責凱旋門既我包尾........

用人家部SONY XPERIA 1 ii作三位LEGO建築師合照,因為室內下既光源,NOKIA 9既色調係差啲.......

2016年買過NANO BLOCK版本既Arc de Triophe,相比之下,LEGO Architecture確實係靚好多及高還原度!

說明書頭幾頁係作品實物之介紹,收藏家們可以順道欣賞靚相~

PS:輕鬆度過一個下午,飲住玻璃杯內既咖啡(現成日系支裝),邊砌LEGO,不自覺地與三十多年前食住咖啡味彩斯糖既小朋友重叠。

突然愛扭計

於網上睇到一位小學生用7秒就擺平一個扭計骰既短片,台灣女生於是上YouTube睇搵教學短片鑽研。

自少從未征服過扭計骰,一黎無耐性,二黎無法得知破解方程式。扭計骰俾我既印象係數學幾何天份人士既專利,與我呢個無長處既凡人無關~