精彩,出局

法國隊16強止步,原本3:1等完場,但81分鐘被瑞士接應傳中頂入追至3:2,再係90分鐘再失一球(中圈地波交入娥眉月,再推入大禁區射入)。加時無入球,結果十二碼由瑞士門將桑馬撲出安巴比既射門作結。今次歐國盃睇唔番2018年世界盃既法國團隊,大家好似打天才波,臨時搵機會,又臨時有人識執生咁。另一方面,領先既法國防務明顯鬆散,導致被攤平。瑞典球員係鬥志及默啟上,確實勝過法國隊員.......

法國隊先輸一球下,中場頭鎚截取後,直傳基斯文腳下,推順交俾安巴比,再傳俾賓斯馬。雖然落點追不上,但賓斯馬以左腳將足球扣上前方,配合衝刺以突破瑞士3位球員之包圍,於57分鐘射入。

59分鐘,安巴比於禁區內後腳(穿透後防)交俾基斯文推順射門,瑞士門將撲出,再由龍門柱前既賓斯馬頭鎚補中入網。

75分鐘,瑞士後防以橫腳截擋賓斯馬踩住大禁區線之射球。無人看管之下,普巴於娥尾月對開巧遇回彈球,推前一步就射向右前方,入彎近角位入網。

一舊雲先生

 

今日放假,由我騎愛駒去接幸男放學。其實每次兜入黎都好感觸,小學兼初中既回憶湧上腦海。當年以彎背黎抗衡書包重量既薯嘜,放學時會否望到一個騎住藍色綿羊既人,向佢注視著呢?

幸男今日放兩點鐘,所以索性直接去燊光食下午茶。幸男嫌薯條唔夠"味"而加茄汁,有啲擔心佢愈黎愈重口味。

雖然天陰,用天文台app望過,短時間內都唔會落雨,於是約Photina交收餞別禮物。年輕人追夢係件好事,當年我都有諗過去個無國界,可惜唔做crew的話,要去外國讀幾個月書兼考試。計唔掂學費兼生活費,所以打消了念頭。唔知幸男既夢想係咩呢?希望我可以幫佢或陪佢去達成。

已摸清新錶既運作,並調校好自己所屬既時區。錶面上不同既時區,已不再單係城市名,還有舊朋友舊伙伴既名字。

PS:細個時成日俾阿媽話我成日夢遊魂(現時既講法係"放空"),所以被冠以"一舊雲先生"

隔海買錶

17號夜晚十點至係網上落order,今日就DHL送到屋企~當初都猶豫咗好耐至進行網購,因為有網上評價話JOMASHOP網上OUTLET有假貨之餘,保養都係要寄番去美國....

盒內有官方保用證,錶身同錶帶都有膠膜封存,唔似假貨喎。諗過呢個品牌唔hit又唔係勞力仕咁貴,應該唔會有人會整隻A貨去退貨卦。其實當初係V CITY見到呢款BALL既WORLD TIME TRAINMASTER錶,但錶面係TAIPEI時區。試戴過都幾鍾意,所以上網搵下邊度有得買。與Authorized Dealer比,JOMASHOP係65折左右。話晒有得退貨,點都好過係e bay買(張相都唔知係咪真嘛)。

好難得個時區唔係BEIJING,而係HONG KONG。呢兩年香港變咗好多,我好怕以後唔會係WORLD TIME見到熟識既地方名。再者,戴咗8年既ENICAR都有幾殘下(經常粗帶騎TMAX兼做花園清潔),當遲來既夫妻錶都好丫~疫情下無得去旅行,希望往後有機會可以戴住佢去唔同既時區,但先要搵錶舖校啱錶帶。

晚飯時間,屋企突然局部停電,台灣女生繼續以明火煮食(抽油煙機有電)。

今次已係一星期內第二次停電(村內鄰居都係),今次都係一個鐘左右就有中電搞番掂,不過餐飯就無得涼住冷氣黎食。

PS:大前晚局部停電,電視個組電制無電輸出,所以轉咗用NOTEBOOK上網睇(無SOUNDBAR都有個JBL speaker0架)~

父親的自白

今日父親節,晚飯好餸但無飲酒,因為要番夜班~

父親節,好想做番自己,率性地過一個隨心的一天。

陪太后睇波

半夜三點起身睇歐洲國家分組(A)-英格蘭對蘇格蘭,由於唔係番早更,所以安心邊食邊飲邊睇~由於幸男係房訓緊,soundbar都無開,只係電視細聲一點。

台灣女生係英格蘭迷,所以睇得分外肉緊(有時大聲過電視)。0:0和氣收場,好在分組賽無加時~

PS:P更收工趕入油兼番屋企睇死亡之組(F)-法國對匈牙利既下半場。先落後一球既法國隊由基斯文射入追和,但整體法國隊好似無2018年世界杯既高峰。

二人時光變三人睇波

上屆歐國杯,我哋只係買16強既PASS,但今屆就硬食$1080全51場4K畫質賽事。有別平時720像數飛上電視黎,4K絶無矇鬆散既問題。英格蘭小勝克羅地亞1:0, 作為英格蘭擁躉,人家當然開心。

近中午,好趕咁同台灣女生搭的士去Yoho My Cinema睇請<太太，請小心輕放>。司機係一個年紀較大既女仕,佢聽完目的地後,問番我哋係咪錦田個邊。我話唔係,提佢元朗輕鐵總站落,點佢佢答"哦,新元朗中心~",睇黎佢無揸車好耐.......

齣戲麻麻地,當初都係為咗綾瀨遙而入場。睇完就係隔離既Glasshouse食晏(味道同選擇都差咗)。食飽就去隔離一田買晚餐材料。原定係半島食二人註册週年晚飯,但我唔想食到趕頭趕命,再撲番屋企騎愛駒去接幸男番屋企睇歐國杯,所以晚餐只係食住家二人日式燒肉。

導航支援系統

食完晚飯,心血來潮拎隻CYBER FORMULA ZERO既DVD出黎同幸男睇。將相片send俾同事,回覆係"一齊成長,你就係佢既雷神"。希望我可以做到幸男重視既導航,可以亙動地一齊成長~

PS:同幸男講,爸爸以前讀書時好鍾意呢套動畫,而且每當失意時都會翻睇黎勉勵自己。

腳仔軟

每日著足8個鐘既鞋,不經不覺已鬆鬆散散,所以早兩日入東涌OUTLET買咗對新鞋。今日新舊鞋一齊放係地面,先至知原來舊鞋真係夠期要換。

呢幾年既工作環境同氣氛變咗好多,自己都好似對鞋咁“散哂”。

堂食KFC憶青春

放假日子,同台灣女生一齊去接幸男放學。原本諗住食泰國餐,但幸男話唔啱食,結果上扶手電梯睇中咗KFC。好耐無食KFC既堂食,多數係電單車外賣番屋企食,貪可以快快脆食完趕家務兼配啤酒。  

幸男第一次食KFC,睇黎香口快餐係無一個小朋友可以抗拒。

其實我預科時代兼TRAING時代已經常去食KFC,仲記得預科同楝哥出去通利買平結他,再買埋個MD機(上圖為網上搵到既同款型號照片),銀包得番好少錢(僅夠搭車番屋企),都係去食KFC........

PS:今日唔怕撞到熟人,所以著住毒TEE出街~