網購特價時裝

尋日同老豆去睇戲，唔成功收DHL速遞，今日卒之都可以見到23號網購既實物喇~

以為件件都會一樣花，點知同官網既展示點有所出入，而且顏色都無視覺認知中既NAVY.......其實一向都有買FCUK既衫，可惜專門店執吓一間執吓又一間，結果得番官方網購呢條路。 

攞番舊衫黎對照官網既SIZE GUIDE，總算買啱size!薄身透氣既長袖恤衫，絶對係夏天揸電單車既恩物。今次趁減價，加埋運費都平過香港某Z字頭既網店添(不過網店既MODEL相，色調比官網真實)~

PS:衫價45美元，運費14美元。

TOP GUN : MAVERICK

網上好評不絶，有睇過或無睇過第一集既同事們都話TOP GUN:MAVERICK好睇!今日約老豆陪我去YOHO睇IMAX版，一開場時既字幕同配樂，已令我內心鼓動~

晨光初現既色調與DANGER ZONE既激情節奏，再一次襯托航空母艦甲板，戰機整備及升空既畫面~呢個開場絶對係經典，事隔多年都係咁正!!

事隔30多年，TOP GUN畢業後既Lieutenant Pete Mitchell，只升級為Captain，袛因佢熱愛於前線駕駛戰機。率性既MAVERICK因為一次新研發機體試飛行任務中闖禍，面對永久禁飛之前，竟然被徵召回TOP GUN當教官。片中有唔少致敬位兼笑位，例如上一集Pete Mitchell於TOP GUN遇見早一晚搭訕失敗既女教官，今集佢就成為學員早一晚被扔出酒吧外既大叔。

Pete Mitchell既重任，係要教導TOP GUN畢業生以F-18超級大黃蜂(第四代)戰機去炸毁不友善國既鈾存儲庫。任務綜合低飛盤繞，緊急爬升接住俯衝炸擊盆谷地面目標，再高速攀升逃走，以避開對空導彈及第五代戰機既追擊。Pete Mitchell，使盡渾身解數去令學員見識高手實力及如何發揮F18既戰鬥力極限，畢竟實力既分野，係駕駛艙內既機師!!

今次TOP GUN:MAVERICK既賣點之一，鏡頭取景自真實駕駛中既駕駛艙，令觀眾感受第一身既實在感，速度感及廻轉感~演員們亦親自上陣於F-18內拍攝，以超越逼真既真實方式去呈現承受超音速及G FORCE既"痛快"(真係好似打ACE COMBAT咁)!

MAVERICK為咗証明自己既作戰方法係唯一可以全身以退既方案(並非上司放寛4分鐘內完成預設路線)，親自駕駛F-18以2分15秒去完作戰路線。呢一幕令我相當感觸，因為MAVERICK比任何人都明白失去戰友既傷痛，佢唔想學員因放寬作戰時間已變成炮灰，故以身作則去證明2分30秒既可行性，並鼓勵學員去克服故有界限。而家番工,老細點會親自示範一次可行性俾你睇?做細既，頂唔住又做唔到既咪受插或格扯囉.......

靚佬湯既坐駕由戲初KAWASAKI GPZ900R，跨代升級為1000CC既KAWASAKI H2黎溝女。不得不佩服編劇，30年前既對白"history of high speed passes over five air control towers and 1 admiral's daughter"，造就咗今集女角色Penny Benjamin-曾經與MAVERICK一齊輕狂既上將之女。再者，不少致敬位都安排得好自然，唔會為安插而安插，反而係將其升華，甚至變成punchline~

壓軸既作戰計劃過程緊張，但無諗過高潮位係奇蹟一(炸擊鈾存庫入口開路)同奇蹟二(將導彈射入存庫)之後既dog fight! MAVERICK為救亡友GOOSE之子ROOSTER，不惜犠牲自己架機去作援護。

緊急彈射後既MAVERICK被敵軍直昇機追殺，原本以為獨行俠會以007-NO TIME TO DIE式謝幕，幸得ROOSTER折返相救，可惜最後都係失去戰機。無諗過會潛入任務開初由航空母艦導彈轟炸既基地，重操F-14 TOMCAT!!由ROOSTER擔當後座RIO(Radar Intercept Officer)，上演多一幕dogfight，力抗第5代戰機追擊!!

年青時，MAVERICK既遺憾係未能與拍檔GOOSE安全歸航，所以多年黎代拍檔照顧世侄(今集既ROOSTER)，並默默地履行GOOSE妻之遺願-不要讓兒子當戰鬥機師。MAVERICK放下執意，讓ROOSTER揀自己既路，並成功將拍檔之子安全帶返航母，解開多年既心結與夢魘!!有點似SPIDERMAN-NO WAY HOME，第二代蜘蛛俠拯救第三代女主角後既釋懷~

最感人既安排，莫過於為當年既第二男主角-韋基馬度身訂造角色設定!年長既ICE MAN受喉癌纏擾，在健康理由而退下海軍上將高官職前，仍運用影響力，將昔日同班戰友MAVERICK召回TOP GUN。二人相聚一幕，可以感受到韋基馬既專業(唔介意以病人既身份去登上銀幕)及湯告魯斯既重情。電腦特技呈現韋基馬既聲線，以方便鬥咀式聚舊"Who's the best pilot?"。

另一個值得欣賞既地方，係可以同時照顧睇過第一集既老影迷及第一次接觸TOP GUN既新觀眾。續作有唔少回憶舊片段及實體舊相去交代MAVERICK既經歷,以及對舊拍檔GOOSE既思念,絶對係集懷舊致敬與劇情補完於一身。當然睇過第一集既觀眾會發掘多一點彩蛋，例如"I Ain't Worried"配樂既沙灘美式足球，源自"Play with the Boys"之沙灘排球橋段。

PS:自己係ACE COMBAT既玩家, 由2玩到5(仲記得第5集既封面係F-14)，PLAYSTATION 2之後就無暇沉迷電玩。ACE COMBAT 7已有下載PATCH，讓影迷多一個回味既途徑。今集TOP GUN : MAVERICK全球大熱，皆因制作上既"瘋狂"式認真及辛勞。咁精彩既戰機題材電影，應該前無古人後無來者，畢竟成本太高及難以兼顧文戲既動情。

新觀點，新領會

老生常談"人大咗，睇嘢會唔同咗"，原來係指心態以及視力。今日收工去V CITY既眼鏡88拎新眼鏡(鏡框品牌依舊為HAMAMOTO)，每邊鏡片減25度近視既視野，手錶外圈既HONG KONG紅字清楚過之前。

上星期入房驗眼後，話有100度左右既老花。原本試諗住配漸進鏡，但店員得知我揸電單車就話唔適合。漸進鏡兩側係唔清晰既盲位，如眼球要快速掠過唔同度數既區域，就好易頭暈。好好趁惜一鏡走天涯既方便，過多幾年就真係要揸車戴單一度數鏡，其他時間就戴漸進鏡....

PS:驗眼時，視光師俾我試漸進鏡下近望書既效果，差啲就覺得要重奪番失去既視力。好在開單既哥仔話佢帶漸進鏡踩單車都會暈，以及提出我手長既優勢(同一個舒適手持角度,但唔會咁近睇書)。

1st GEOX

雖然同事們都轉著波鞋，但我仍死忠於皮鞋。番學時皮鞋陪伴我唔同既階段，出嚟做嘢，它又陪住我既成長。彷彿每天都在番學，不過係主修活出自我......

PS:番工對皮鞋已經又鬆又"un"腳(鞋墊薄兼底膠硬)，今日卒之都可以著早前係SOGO選購既GEOX。感覺唔錯(收工腳痛都少咗)，睇黎我會由ROCKPORT轉會過黎~

補食母親節飯@ATTIC

正日食唔到飯，今晚卒之可以係光仔間ATTIC補食~

特登帶埋支LASCOMBES出黎同台灣出黎飲番杯，人家話過呢款啱飲嘛~再者，咁耐無試光仔既手藝，點可以無番支酒作點綴呢?

無諗過今日個餐牌仲有母親節餐，不過我哋只係散叫，揀自己想食既嘢。呢兩年好少用部無反，因為外出食晚飯既機會都無乜，今晚點都要張高像數既家庭照交差。

向幸男提議番茄海鮮手打意粉，好在幸男話好啱食，同呢張相一樣感覺良好~

臨走前，光仔抽空出黎同我哋合照，多謝主廚～番慣輪班，對節日唔太敏感，希望人家會體諒我既不浪漫罪名…

PS：行番海傍等260X，諗起之前話趁疫情夜晚少車兜轉海傍既計劃，一直未實踐。畢竟每日都有太多藉口-天氣，接外母手看管幸男，家務…好想任性，但太多顧慮。

母親節花

聽日係母親節，但BOOK唔到枱食飯(早幾日至話回復22:00前晚市堂食)，唯有食完晏係網上訂住紮花黎頂數先。俾多3舊水送貨，仲要可以今日16:00-18:00送到，計落早啲收花，望足3假期都好喎~晏晝台灣女生帶幸男要出去元朗打針，所以訂花係我，收貨都係我......夜晚番黎見到紮花當然開心，叫幸男將波衫前後調轉著，以示母親身份黎合照。

俾你網上落咗柯打都唔係搞掂，因為要等電話覆有無貨，至e mail條link俾你過數!電話回覆話啲花會同網頁見既唔同，淺紫色既繡球花會變成其他色，腦海一片空白之下"哦,無問題丫"。好在收到實物係比官網張相既襯色仲要好，雖然係貴少少，但人家開心就好了(我都覺得紮花幾靚)。

和你老

今日約老豆係老家等我門，因為我上門幫佢洗頭。早幾日出去食母親節飯時，見老人家有頭皮。細問之下，原來受關節炎困擾，舉起雙臂有困難，所以洗頭未能澈底。

白髮太多，順便用染髮功能既洗頭水，望落好似好少少。帶埋較剪去修吓過長既眉毛，總覺得老到要望落企理，先至會有多一點自信。原本唔原出去食嘢既老豆，最終半推半就陪我出去村口茶記食晏。雖然只係叫咗個魚柳豬仔包餐(食淨麵包)，總叫做飲咗杯鴛鴦。

PS:每次見老豆子一副嫌世既模樣，總係心酸及難過。畢竟留港只係想侍奉老人家既晚年，打點多啲及好啲......
 

集圖册

以前細個睇電視不時見到足球明星集圖册既廣告，零用錢唔多兼無得睇聯賽既我，唔明有幾吸引。幸男就唔同喇，有得睇本地旁述既賽事直播兼一週精華，再有鍾意睇英超既媽媽，足球明星集圖册絶對係送到埋口~

時代進步，集圖册既卡除咗係儲，仲可以玩。好笑在有VAR咭，係咪可以推翻賽果呢?幸男話可以用APP黎玩咭CARD GAME添，唔知手頭上有星級球員既咭，會唔會有優勢呢?

雨季家品

平時落雨要著住對濕拖鞋出花園晾衫及做其他家務，番到入屋又要抺乾對腳，感覺唔太良好。踏入雨季，之前台灣女生搵咗好耐既戶外拖鞋遮蓋大派用場~即使落咗成日雨，拖鞋依然乾爽!

雖然只係一舊膠，但係設計上有唔小心思，例如有透氣虛位，唔會焗臭，以及草苗裝飾，方便唔駛踎低掀開。

PS:連運費$299一個，都真係唔平兼食水深，雖然係日本制...…..

Formula E 3rd Generation

尋日上網得知FORMULA E GEN 3已正式公佈，將於2022至2023賽季登場~新一代戰車夠晒科幻感，官方話設計理念為戰鬥機。

感覺上愈黎愈似CYBER FORMULA，只係無動畫既多樣式車款!自從睇過第一代FORMULA E既港站，我就同幸男講如果下年仲有香港站的話，不如我地買飛一齊睇丫~可惜受社會動蕩及疫情影響，FORMULA E既港站一直無望.......

PS:唔知幾時至可以好似CYBER FORMULA咁，可以用不造成污染既燃料呢?畢竟電動車既電池廢料，以及發電既碳排放，與正真零排放及零污染尚有一段距離~