和你食

天雨關係，原本戶外花園既燒肉聚會，變咗室內模式。食材係晏晝我同台灣女生係市中心買(aeon，donki，New World)，部份已有調味醃料，其他就由人家主理醃味。最早到既係今晚既主角-David，之後係教練，我哋食住等馬sir。好在有藍牙speaker同手持隱定器，身在新加坡既Oscar成功以視像模式參加合照(多得幸男幫手揸機)，仲同大家傾咗陣計。再下次聚餐，要多一個架至可以合照了。馬sir見幸男食飽係度打FIFA，一時興起一齊對戰，令我諗起以前係機舖打VIRTUA STRIKER。為咗呈現實時，用nokia 7 plus影低分割照片。

八時入席，食吓傾吓，近十二點半至散席。關心既說話，無聊既話題，理性既討論，由衷既祝福......

親子lunch hour，領取Bike gear

幸男約我同台灣女生去小學飯堂-八户屋搵定位等佢放lunch一齊食晏，因為好耐無食兼怕攞唔到位。我有問幸男：“中一仲同阿爸阿媽食晏，會唔會唔係幾好？”幸男答：“唔會～”。説穿了，幸男只係食厭易搵位既餐廳，但作為被邀請既父母都係開心既～

食完晏，幸男番學校，我同人家就搭60X去荔枝角工廠區，拎代購既商品。

円價低兼電單車服飾殘舊，所以一直係TAICHI官網等2022～2023既冬裝。上個月俾我等到，揀好Racer All Season褸同e HEAT手套（另配電池）,再託台灣女生搵代購（TAICHI官網唔接海外訂購）。當時人家問我預運費幾多，我答“志在必得”，今日卒之到手喇！

酒店式雨淋

原定聽日至安裝既新雨淋花灑系統，師傅突然話今晚可以裝，結果傍晚時份黎安裝。恆溫功能絶對係番唔到轉頭，校大細水流都唔會忽冷忽熱。上網搵資料都無提及花灑有幾個出水模式，變相有驚喜。

之前既Hansghore用咗4年就先壞龍頭（無恆溫或熱水兼出水慢），換個平龍頭無耐就壞埋個雨淋花灑，所以一於換套靚啲既Ghore。雖然係貴啲同要等一星期(代理送貨到門市再約師傅安裝)，但絕對值得～

清零

今日騎愛駒出太子換錶板，里數錶由零開始，原本可以呃吓自己係新車，可惜中央位置已有垂直花痕。"會唔係污積咋?"，試過輕掃，但花痕依舊，相信係安裝時hi花。畢竟係舊車換零件，拆舊件時灰塵會依附指頭，除非師傅係錫車之人。成7千蚊埋單，無諗過會係送花痕，出聲嘈又無用(唔通賠個新或減手工錢?)，鬱鬱寡歡之下，騎羊回航。攞車時見店員無話舊錶係車內，於是主動提問下，維修員至連新件盒俾番我。加上攞車時見到既花痕，感覺有點差，唔通第六代車無全新既第八代矜貴?定係我望落去唔似錫車之人，部TMAX貌似係腳車(雖然都係)?唔怪得上個月check車時，店員話無得齊整粒指揮燈，唔通拆開晒黎幫你燒果粒led燈咩(要搵個電路版專才)，訂貨成個換喇~

10:45左右放低TMAX，12:30左右就收到電話攞車，中間時間係始創中心既Starbuck邊飲邊R WiFi黎睇行運超人殺時間。預科時代無時間追，只係偶然放學趕得切番屋企睇。係生活艱難期，真係好需要笑料當抗壓劑.......

一心諗住叫杯氮氣冷萃焦糖咖啡，原來唔係間間分店都有果部機(好似生啤)，店員幫我砌杯土炮出黎，冷萃咖啡+奶泡+焦糖醬圈。雖然唔係同一回事，但勝在誠意搭夠~

PS：照原定計劃將舊錶放上轉賣網站，寄望幫保下（雖然機會渺茫），無諗過幸男話“點解唔留番嚟留念？”

SAMURAI GRIMLOCK

今日搭63X出油麻地，落車就直上Action Robo俾埋尾數，交收完就夾啱時間過番對面馬路既巴士站。

一出一入為既就係呢隻SAMURAI GRIMLOCK，因為2年前訂既MAKETOYS GUARDIA一直無影，所以轉訂呢款新鋼鎖。有別舊鋼鎖，SAMURAI GRIMLOCK無咁笨重，機械人既小腿及雙臂唔會有不合比例既粗厚。原本鋼鎖既武器為大劍，所以SAMURAI GRIMLOCK既東瀛武士姿態絶無違和感。

恐龍形態亦洗脫過往香蕉形線條，重拾T REX既身影。喜歡IRON FACTORY既細比例作品，容易收藏兼造工有一定水準，變形亦唔太複雜。

痕為藝術

平時泊車都要扭好幾手軚至可以將愛駒停係簷篷，因為馬路上半濕乾地令今日既呔痕(夾集半濕沙石)變得明顯得多，出現咗呢個蓮花圖。

無Burn tyre痕，都可以影低藝術呔痕作留念~

love and thunder

一心唔入戲院，等雷神4係Disney+上，今晚就一家三口一齊睇。幸男一向唔太迷英雄片，無幾耐就係梳化上訓著。開埋SOUNDBAR炸機兼閃光畫面，都無阻幸男訓貓仔覺。故事依舊系列走搞笑風，內裏硬加不少多元文化元素，例如King Valkyrie既舊愛及Korg既新伴侶。有時覺得有點矯枉過正，如果電影要如實反映現實生活情況，咁要否跟大數據份析人口及種族結構至選角?上次BATMAN已令我有呢個感覺，如果無提場式以劇情表示支持各種社會熱題，相信電影只會變咗教育電視節目。Natalie Portman擔任女雷神，我當然受落~Trailer中Jane Foster威風凜凜，無諗過係第四期癌症既她受 Mjölnir所引領，為對付Gorr the Butcher而作第一兼唯一大戰。

She will be missed

各種民間既悼念活動(無利益掛帥)，反映世人對女皇既敬重，對女皇逝世既婉惜。

7歲既我對女皇第二次訪港毫無印像，35年後既小朋友會仍會為呢位"事頭婆"離世而感觸，唔單純只係懷愐當時既經濟起飛與安穩，而係自由思想與言論帶來既創新及求真。

跨區交收玩具，區內等收電器

跟住高德導航出青衣碼頭，係葵芳(俾架TMAX頂住)cut唔切出工廠區，落到工廠區又出錯路口，結果比預期遲咗15分鐘至到埗。

目的就係為咗呢隻carousell搵到既二手列車戰隊figure，因為幸男已玩爛第一隻，第二隻已開始服役。雖然講明係二手，但心口既花痕就未能從拍賣照睇到(公仔塞咗盒內)。

原本話係地鐵站交收，但我提議係近賣家既地點，反正我揸車，結果轉係碼頭交收。

電單車位隔離就係碼頭，平時夜晚都可以當遊車河過黎吹風。

中午時份係村口牌坊收正貨吸塵拖地機，駁好叉電至出門。

夜晚就可以試用，感覺非常好。頂部既顔色真係反映滾刷既潔淨度，滾刷摩打既牽動力令我輕易向前推進（不過拉番轉頭就攰啲）。機身同接駁位都好紮實，相信耐用度可以勝任2年保用。

唔怕貨比貨，最怕唔識貨，設計同品質上有明顯差距。

複制雖然省却開發成本，但失去原創既細節及品質。

貴買平用比較啱心意，價錢平成半都好，但捱唔到一年就壞的話，根本無意思(未計實際表現優劣)。

藍天足球

收工番屋企攞齊相機，就騎愛駒去置樂會合台灣女生睇幸男踢波，因為好耐都無為幸男作成長紀錄。原本藍天足球無初中級別，但又唔知點解湊夠腳開班。
夜間遠攝動態主題確實係難，對焦速度點都追唔到快門值。其實上半節我同人家去咗搵地方食晚飯，食完至去睇臨尾個半個鐘分隊比賽。DRO盡開至無咁暗色，高ISO值下，流動細芒尚可，一係電腦Mon睇就失色，但點都好過智能電話影既火柴人。PS: 中間時間我哋去咗間無人等位既點心舖食嘢(八點鐘間間都迫滿人)，雖然話全部都係師傅自己整(唔係供應商交貨)，但味道都真係好一般........