兜秋風

秋涼天，可惜今日無咩陽光，不過都照原定計劃出車兜風。今次係去昂船洲大橋觀景台，順利跟住導航，只係最後既一個出口差咗miss咗(直上昂船洲大橋)。泊好愛駒，影番張打咭相留念，無藍天白雲，點都係差啲…...

平時少行高速，巡航式兜風永遠都係有益人車身心。

好在嚟得早，半個鐘後已無位泊，私家車約五架已無乜位剩。傾咗大半個鐘就打道回府，原本諗住行昂船洲大橋，汀九橋，再行屯公，但忽發奇想：不如好似旅行團咁丫-不走回頭路。

唔上汀九，行青馬大橋同汲水門大橋(享受吊橋效應)，駁北大嶼公路，再行屯赤隧道。雖然係兜遠咗，但無屯公咁多四綫轉三綫，三綫轉四綫，又少啲車cut黎cut去。

PS:少一點繃緊，多一點空間感。

特效POSE

星期五睇完七海健人領便當後，忍唔住要為呢位令人敬佩既前輩影番張瀟灑造型照。借台埋台灣女生部電話黎影呢張模仿照，只可惜無左手虎口張開既配件，搵日試吓拎其中一個手形去旺角皆旺問吓有無相近膚色既配件。

突然諗起網上見figma附送既膠片特效，我都可以買塊塊膠片，自己劃三七比例線同加灘紅油，重現『十劃咒法』。

雞煲

好耐都無係屋企食雞煲外賣，自從西川執笠後，巿中心既火水爐又愈來愈差，而家都只係偶然入元朗買。屋企食既好處除咗酒水無咁重皮之外，配料亦彈性得多~

份量算ok，至少唔會碎飲飲兼骨多過肉。少辣都唔係太辣，下次可以試中辣，但大家都食到個汁係帶點甜味。

PS:去紅橋既再來一煲攞外賣時見到有初代TMAX，佩服車主既耐心保養，忍唔住要同元祖輩打咭。

迎娶紀念日

約台灣女生係轉車站等，一齊等巴士出港島。趁等車兼無乜人，用A7iii幫人家影背光黃昏照（試咗好多張至收貨）。

晚餐主題係蟹，人家話之前有book過，但話我嫌貴(咁應該好多年前)，所以今次至第一次食。

餐廳門口有個蟹池，唔知係咪好似酒樓咁，有單就出黎撈呢?

研究一輪餐牌，精選性價比，結果揀咗“季”餐。聽唔切侍應介前菜，但又幾好味。

海膽鱈場蟹刺身，人家唔食海膽，結果過埋俾我食。餐牌無陳述黑色既係乜，唔通係Caviar?

難得二人放空，可以細味閑聊。

呢款蟹膳手工生啤幾正，我前後飲咗2杯～

松葉蟹同鱈場蟹都係即場係客人枱面清蒸，感覺有啲似係溫泉旅館食飯。

個箱係大，但其實唔係好多舊0架咋。

口口鮮味，食食吓好似仲好味過溫泉旅館。

燒鱈場蟹，每人一份。

諗起當年去北海道渡蜜月既時光。

原本有擔心個餐唔夠食，食到呢味松葉蟹天婦羅，已經有7至8成飽。

松葉蟹肉羮，無諗過係清湯肉丸咁。

凍毛蟹，都幾多肉吓。

黑松露鱈場蟹肉蒸飯，食到last一味都係以蟹為主題，絶無戲場。

相熟花店老闆娘今年外出，未能為我準備惠顧多年既花球，所以今日去咗市中心栢麗收貨。雖然係貴啲，但啲花又色水靚啲喎。

早兩個禮拜黎問價時，店主以為我係結婚用，我笑住咁答老夫老妻買黎當慶祝紀念日。今日憑單領取時，店員問我今日用定聽日用，以為我係老新郎定老兄弟呢?

PS:今年經歷不少，電單車追到既夠時間，都唔夠用嚟沉澱。平時無乜私人閒時既我，變得更加疲憊。

苦學生

 

是日星期二，幸男放學後要去補數學，番到屋企已經七點半有多。食過小豆町既外賣(我同人家堂食)幸男做陣功課，十點就上半個鐘Cambly，再繼續做視藝功課，搞到十二點九仲未做完功課。

話晒放大假，釋出善意，靜靜地係枱既另一角作精神支援。

PS:幸男結果01:15至有得訓......

母子私人司機

幸男放學番屋企換踢波衫同袋，由於遲放學，時間太趕，於是放假既爸爸用愛駒送到球場門口。

台灣女生放工係市中心買晚餐，見順路兼有頭盔，做多單接送。

今晚既主題係上海菜，人家嘗試覆製出街食大閘蟹時既佐酒，可惜買錯咗紹興酒嚟放話梅(應該係花雕至啱)。

每當大閘蟹季節，吉之島超市都會有專(雪)櫃做買4送1既優惠。住家大閘蟹既好處，除咗平啲之外，仲有酒水放題。

PS:幸男踢完波同波友食完麥當勞番黎，仲有胃口食大閘蟹（5-4=1）~

守門12年

 
今日卒之約咗電閘師傅上門維修，原本諗住淨換紅外線感應器，結果連摩打一套換。無耐性逐個fuse制試，一嘢熄晒全屋企電，陪師傅一齊係花園熱同吹水。原來師傅話未來幾年就番大馬，畢竟香港既定位，大家都心照不宣.......

當年趁圍牆未起，問發展商可否預大個出入位裝閘，並由原定右邊變成左邊。說明調動係為咗電單車出入，查問加裝電動趟閘既位錢。當時有問過個摩打可以捱幾耐，師傅都係話10年左右，數下手指已12年。12年後，我都未必再有體力騎二輪，所以就算今次要花皮半都係每個月$104，都值得完夢收league。

PS:12年後既我，你仲有無渣電單車呢?收league前既電單車係全電能，氫電能，定係氫燃能?

秋冬要進補

每逢秋冬，我都有一個目標:食十碗蛇羮，秋冬要進補嘛~為咗呢個目標，好多時會番夜班前，騎愛駒去蛇王輝買外賣，到休息時間就同同事一齊享用。上次太趕時間，唔記得影相，今次補番數。

PS:經常以"女人唔補好易老，男人唔補好易無"嚟氹未試過既同事一齊食。